[文青勝景美食團]獨遊台北4日 (野柳‧九份‧總統府)

之前講過北投溫泉博物館係古蹟
但係而家睇都覺得佢設計好新潮
地下係紅磚+半圓頂窗
二樓係英式木屋，屋頂就係和式
Fusion得好靚


係側邊可以行去臺北市立圖書館北投分館
好多人走左上去影相
不過趕時間去下一點所以不了




而家差唔多4點，feel到就快日落
要開始出發去下一站，台北101

新北投去台北101好簡單
搭番去北投之後搭去台北101站就得
完全唔駛轉車
不過都幾遠，大約要1個鐘先到
係地鐵站一行上去就見到大大幢101同鼎泰豐
之後上5樓觀景台入口



我有北北基好玩卡
北北基好玩卡3日卷NT$1900
台北101觀景台入場票包左
即場買要NT$600，已經佔3分1
除左食野之外呢幾日交通同入場都未用過錢
所以真係好抵用
仲有1個好處，呢張卡唔駛排長隊買飛
一上到5樓近排隊個位會見到有部換票機
拍卡揀番入場時段就會嘔張QR code入場卷出黎
因為我即刻入，所以揀番即時呢個時間


台灣係地震帶，照道理起咁高係有風險
但佢係全球第一幢突破500m既大樓
陣間上到去可以睇到點解佢咁勁
右邊係101隻吉祥物，好多色


好似好多人咁，但其實都係等10分鐘
如果等唔切可以買快速通行證，貴1倍
有另一條隊優先俾你上電梯
但其實如果多人既話其實唔太大分別
差唔多排到我既時候見到後面條隊越黎越長
仲見到有旅行團準備排隊
如果佢地團體行快隊分分鐘排半個鐘



直至2015年，呢架上觀景台既電梯係全世界最快
37秒就可以上到89樓
而家跌到落第3，但都係好快
有幾快？每分鐘1公里
姐係幾快？每秒16.83米，姐係6秒跑完100m咁快

因為當年去係10月中
咁啱搞緊萬聖節活動
引左好多阿爸阿媽帶小朋友上黎扮鬼扮馬



今日天氣唔算最好，10分有7分啦
遠處有少少霧氣，但都睇到個夕陽
好彩早少少霸個向正西方中間靚位黎影



https://imgur.com/a/Qjdkzvw [10倍速]

一見唔到個太陽就走上91樓
我一走既時候即刻超多人搶我個位



91樓就冇玻璃隔住
但有個欄頂住你冇得伸隻手出去影
好撚大風，差啲吹走部機



呢個創意掛耳茶包系列笑撚死我
不過個創意真係太貴，不了

下一站去饒河街觀光夜市
費事多人所以我6點就走了
想走就要行落88樓
中間會經過呢個重超過600噸既阻尼器
點解地震帶都仲可以起到咁高既樓
好大程度就係有呢舊野
當有超大風/地震既時候令到幢樓郁既時候
呢舊野會以相反方向既力扯番你去原來位置
變相幢樓就算彎左少少都會好快拉番直
彎曲距離唔會超過物料既臨界點，保持穩定性



行過阻尼器就見到搭電梯落樓條隊超長
心諗仆街了



跟住有職員話開貨𨋢直落1樓
未搭過就梗係試下啦



嘩啲掣多到

架貨𨋢落到1樓就係辦工室電梯大堂
要行番出去先去番商場搭地鐵



台北101都幾多野食
不過今次黎想食多啲夜市，所以不了


鼎泰豐唔知點解吸引到咁多外國人食

好正，見到啲相好想去台灣

101去饒河夜市最近應該係搭巴士
但係6點鐘係商業區搭巴士
同觀塘放工時間搭巴士去沙田一樣
所以都係搭捷運穩陣啲
去饒河夜市最近既捷運站就係松山站
但係要轉2次車
一次係大安站轉文湖線
一次係南京復興站轉松山新店線
同奧運站去旺角站一樣
明明好近但係搭鐵要轉好多次車

搭左半個鐘終於到松山站
饒河夜市係一條東西向既饒河街入面
啲夜市攤位就係路中心排成2排
分成南通道北通道
松山站就係饒河街既東面
因為一早target哂要食既舖頭
然後外賣返酒店食，因為真係好熱
所以我用左一個行最少路既方法
首先出松山站最西既出口2
穿過松山市場就會去到饒河夜市既中間


一行出去就會見到陳董藥燉排骨
就算你睇唔到，聞都會聞到
2018年起成為米芝蓮夜市推介
呢間野話唔可以外賣，咁唯有坐定定食


藥燉排骨 (NT$80)
碗野聞落係好香甜既藥材味
呢個藥燉排骨一碗大約有5舊排骨
個湯飲落好濃既藥材味，但係唔苦
飲耐左仲有少少甘，全身發滾流汗
排骨好林，都係骨肉分離，充滿藥材味



之後經南通道就行去西邊接近街尾
有一間冇名既紅燒牛肉麵牛雜湯
又係米芝蓮夜市推介，買左個紅燒牛肉麵外賣


行到最尾係西邊既排坊
因為離松山站比較遠所以唔係好多人
之後就轉上北通道剷番去東邊排坊街尾

越行得近東邊就越多人
行行下就會塞住，要南北通道反覆橫跳



饒河夜市最後一間米芝蓮推介就係胡椒餅
間舖叫褔州世祖胡椒餅
好易搵，就係正東面牌坊正下方
而家先7點半，我前面已經排左30人


排緊隊嗰陣見到間舖好多員工瘋狂做野
左邊同後面搓緊包皮同包緊餅
前面同右邊就有4個炭爐焗緊餅
見到啲胡椒餅瘋狂出緊爐
啲人一買買成10個，好快就清盤
我買左2個，都要NT$110，唔係太平





買完其實唔容許你企係度食
因為人太多會俾黑警用胡椒噴霧驅散同幫你加料
所以行左去對面馬路空曠啲慢慢食
隔離慈祐宮夜晚都打哂燈好狀觀
同饒河街個牌坊相映成趣



胡椒餅啱啱出爐梗係要即食
外皮好乾，咬落去係脆兼爆汁
啲汁係來自個餡，好有肉汁
食落好有炭香，胡椒同辣味有啲重
唔鐘意食辣既人可能會卻步
肉餡勁多，食落好滿足
有啲蔥令到食落冇咁滯
本身諗住剩番嗰個拎番酒店慢慢歎
但係太好食所以食埋

估唔到係台灣都會見到咁多日本學生妹
不過我準備返歸就無謂尾隨佢地




返到酒店就食番之前買既紅燒牛肉麵 (NT$100)
以米芝蓮推介既食店黎講就有啲麻麻地
麵本身冇乜特別，牛肉韌到咬唔開
可能係外賣個熱湯煮到佢過熟
牛肉湯屬於正常level，好濃但唔驚豔
而且食到後期好油好滯



Day 3 完

行番去捷運站中間經過孔廟
出面有幾個我地常見既emoji


非禮勿聽


非禮勿言


非禮勿視


縮係地下既係非禮勿動


開放日總統府個入口係重慶南路同寶慶路交界
搭番去同一條線台大醫院站，出1號出口
正常穿過二二八和平公園就最快
但為左影相，我兜去凱達格蘭大道
不過唔知陣間搞乜野活動



今日天氣唔係太好，好厚雲
好過落大雨既


因為而家先7點半，仲有半個鐘先開
所以係附近鳩行下
呢度好近西門町，10分鐘就到

鳩hea完行番去總統府已經有人排緊
要準備你既護照
同埋唔可以帶標語，酒入去
安全檢查同出入境差唔多
但係呢度就要搜袋
所以最好就唔好帶太多野黎
如果唔係搞好耐



入到去會貼一張參觀證
上面有寫你既參觀日期，極具收藏價值


一行到入總統府就會見到中華民國正副總統迎接你

一入到黎呢一層有幾個展廳
呢個係講總統府既歷史同日常



左邊係榮典之璽，用黎出獎賞既公文
右邊係中華民國之璽，用黎出國事既公文


呢個采玉大勳章係得國家元首可以戴
係總統送俾友好國家元首既禮物


肯承認自己錯誤既國家唔係少數
但連自己既錯誤都紀錄係自己既office就真係得台灣先做到
二二八事件，服貿引起既太陽花學運
甚至新鮮滾熱辣既同志平權都有記載係度
但唔承認自己錯誤既國家大家懂的

有1個展廳係講番每一任中華民國總統
就職演說中既主要節錄
上面個mon就show番佢任內大事既記錄

李登輝，係前任總統蔣經國死後以副總統接任總統
首兩屆任內推動憲政改革同民主化
將國民黨由萬年既執政黨好似厲害的國咁
變成可以由民眾投票選出總統同立委
亦係1996年首次全民一人一票下既總統選舉
成為第一任民選總統


陳水扁，中華民國史上第一次政黨輪替下既民進黨總統
但有少少係因為而家都仲選緊既宋楚瑜
佢唔滿意國民黨屬意既連戰做總統候選人
所以自行退黨自組新黨參選，亦帶走唔少支持者
最後連戰+宋楚瑜既泛國民黨票加埋有6成
但因為2者票數最多既宋楚瑜得36%票
陳水扁有39%票，所以勝選
宋楚瑜堅持到去到而家都仲選緊
任內大量實行本土化政策同改組長期由國民黨把持既國有機構
因為台獨立場導致大陸施壓引發經濟孤立
佢自己牽涉貪腐而引發倒扁事件，民望創新低
連任選舉發生槍擊事件但又唔知點解以50%當選


馬英九，第二次政黨輪替下既國民黨總統
任內與大陸友好，兩岸關係正常化
大量簽訂同大陸合作既條約方便商業同人民往來
仲曾經同維尼促成第一次兩岸最高領導人會面
但本土發生左大量社會事件
包括黑心油事件，當兵期間操練致死既洪仲丘事件
奶共奶得太勁而簽既服貿引起既太陽花學運


蔡英文，第三次政黨輪替下既民進黨總統
台灣第一位女性總統，作風大膽前贍
任內推動一例一休，同性婚姻合法化同台灣現代化
但當中因為軍公教年金改革引發示威
政府開明，包括起用跨性別人士唐鳳做政務委員
以科技黎解決政府問題同民眾創造溝通平台
半年前因為有香港反送中議題
中共各種威壓手段加持
再加上對家既韓國瑜發大財既威力
引發民眾對親中國民黨既憂慮而投票
創下台灣選舉史上最高得票數及第二高得票率成功連任


而家睇到呢啲Slogan真係有啲想喊



你睇下民眾鬧政府無能無恥都可以紀錄落黎
香港？咪話絕大部分人支持成立港區國安法囉

呢個排骨好好食
仲有胡椒餅隔離有個賣嘢飲 芒果奶都好飲

總統府既中庭係花園
中間有舊國之磐石



走廊掛左好多唔同既藝術創作
有唔少都好高質，好似呢幅咁


呢幅係開左99% PS濾鏡既蔡總統辦工情況
隻貓貓係總統既愛貓蔡想想
但後面李登輝同馬英九幅相


但係我估唔到既係普通連登仔lv都上到大場面
只係鳩key個憲兵去唔同地方
不過鳩得黎都幾好笑

馬英Jo Jo

見到有民選既政府就好想喊

總統府本身就係一個小型既社區
因為24小時都會有人係度做野
有啲總統府既人on duty都唔可以隨便出去
所以呢度有ATM，有理髮廳，有郵局
方便佢地處理啲私人事務
郵局就比較重要，除左俾總統府做野既人用
仲會處理一啲總統府寄出或者寄入既野
開放日既時候就會順便做遊客生意
呢可以買到啲出面比較難搵或者賣哂既首日封
因為呢度少人，啲野冇賣得咁快


第十四任總統副總統就職紀念郵票
由聶永真設計，用抽象圖案簡單線條
令到郵票比較親近民眾
而唔係有國旗有人像咁去宣示國家主權同高人一等
呢次郵票就用Pixel同線條畫出正副總統同總統府
而國旗因為唔match個設計所以史上第一次冇放落去
但就俾隔離國話唔擺國旗就係搞台獨唔承認九二共識
放青天白日滿地紅旗落郵票就OK
唔落就唔OK？咁奇怪咁政治化既


之後上到3樓
俾你去參觀既就係宴會同開會既場地
台灣虹廳，用黎開啲小型記者會


對面就係大禮堂，叫經國廳
門口有放好大盤既蘭花，勁靚


中間有我地既國父孫中山同中華民國國旗
係專門用黎開大型記者會同發佈會
空間好大，坐200人應該都唔難
中間個台夜少少有人過黎唱歌表演
不過仲有成粒鐘先過黎，等唔切了

行左個幾鐘就行完了
走既時候就會行番落中山廳
呢度先至係正門，係成個總統府既中間



廳中間有一個孫中山既半身銅像
成個廳好有歐陸風格好開揚



行出門口就有志願者派postcard同記念膠紙
蔡總統施政好強調一樣野就係貼近民眾
張Postcard就代表總統府
因為高空影落黎係2個空格，代表2個中庭
一點點就係代表人，代表同民眾接近
所以成個總統府開放展覽題為Power to the People就係咁既意思
共產黨都係咁講架，唔好拉我呀




唔好亂行呀，班憲兵個個揸炮架

行完總統府先9點半
我18:10機返香港，仲有8個幾鐘
唯有諗下點樣再用盡張好玩卡
早知買2日就算
最後選擇左係市區既袖珍博物館
順便去華山1914
去袖珍博物館就行番去西門站搭松山新店線
係松江南京站落車行15分鐘就到
個博物館係幢商業大樓既地庫
有啲怪怪地




入到去俾張卡佢睇
就會蓋個印去你隻手度
之後推門人去就得



入面既展品都係以"袖珍"為主
首先睇到既就係常規展
每一樣野都好細，再組合成一個好大既場景
全部野都好仔細


好似呢件野係講緊歐洲唔知邊條河邊既一間屋
正常有啲微細既地方都會唔畫因為可以偷懶
但係佢連琴譜，琴面既相，枱上面幅畫都好精細咁造左出黎
好佩服啲藝術家

除左有頭先屋類既主題之外
仲有童話主題同風景主題
每樣野放大睇都一絲不苟





除左常設展仲有限定展
今次題目就係兒時既英雄人物
大部分都係超人同Rider既模型
不過唔係我既兒時，冇感



有隻超人可能因為有人郁個展櫃搞到仆街


如果想走，開個隨意門就會返到香港頭先電梯大堂

之後行去華山1914
點解唔搭捷運係因為我行得番去等車
我都差唔多行到
不過行路都唔係唔好既
行行下見到有國家機器動得好厲害
睇黎係境外勢力對人民既未來進行干涉


行左25分鐘終於行到黎華山1914
附近係台灣既黃金高登，附近好多電子野賣
所以有一個藝術品係放滿底板



文創區入面有啲室內既檔位俾啲藝術家擺賣
不過費事版權問題就唔影人地啲野
因為以前係工廠，所以好多石屎建築
不過而家種多左好多樹，有番啲生氣



有套劇叫用九柑仔店做緊宣傳
佢就將其中一間屋仔改成間士多



不過呢度唔係太大，好快就行完
而且因為好多時間剩，所以我又係行番台北站

又行左半個鐘之後就去拎行李
因為我搭長榮，所以可以係桃捷台北站checkin
橫掂本身程機都包行李
我掟哂啲野落handcarry度拎去checkin就唔駛拎黎拎去
所有流程同係機場checkin一樣
只需要早過起飛前3個鐘就可以係度checkin
暫時開放中華長榮國泰港龍



Checkin完先12點半
拎左張感熱紙印出黎既機票之後
基本上去到機場就可以即刻入去安檢過關入禁區
台北市區就暫告一般落
今次就行下MITSUI OUTLET PARK林口
係桃捷林口站
因為桃捷有分直達車同站站停既區間車
林口站就要搭站站停既區間車，大約35分鐘


當時桃園搞緊全國運動會
桃捷就好多Poster
呢種用黑白紫黃做基調我都幾buy


行10分鐘就到



成個設計同日本既三井outlet一樣
舖頭種類都係差唔多，賣既野都差唔多
台灣最出名既誠品呢度都有




就連餐廳都大部分同日本一樣
不過呢日係星期六，食飯時間好多人
雖然1個人係易搵位，不過不了
都係去機場個美食廣場行下
又要捱多陣餓

行番去林口站搭桃捷去第一航廈
一出站就見到部好得意既扭蛋機
NT$100抽一個，有8款
係幾貴既不過我抽左1個


行左陣第一航廈發覺冇乜野好食
就行左去搭無人列車去第二航廈
桃園機場第一航廈同第二航廈都係H形
I位係登機橋同候機室，屬於禁區
-位係Checkin同大部分舖頭
2個航廈既H係上下駁埋，所以好長
禁區入面可以2個航廈穿梭咁行
但係出面就一係搭接駁巴士，一係捷運
一係就好似我咁搭無人電車



但係行過去都好繁複
首先要搭電梯上3樓，行1條極長既走廊
先至到佢個等候月台，2-4分鐘就一班




平時唔同航廈都有分
例如話1個係俾貴航1個係俾廉航
呢度就睇唔出佢有分


無人電車就同香港機場禁區同KIX嗰隻一樣