[長文] 整場運動個本質而家先岀現！

代朋友post佢嘅見解
篇文有啲長，但個人認為佢講得好有道理
最後有小弟自己嘅睇法，可以當TLDR咁睇

==================================
有人話場運動變咗質，但係我覺得場運動而家先出現返個本質。由反修例去到五大訴求，個核心就係身份認同及主權問題。好多香港人只認同自己係「香港人」，或者覺得「香港人」遠遠緊要過「中國人」身份，自然會認為逃犯條例修例、國民教育等等嘅議題都係一個獨裁帝國對殖民地人民嘅思想同行為箝制。
當大家見到香港政府唔聽民意只聽聖旨，就會對呢個代表唔到主流香港民意嘅政府徹徹底底地完全不信任。五大訴求由獨立調查去到雙普選，都係為左限制「權力」及改變「權力」嘅分配方式。


毫無疑問呢種「權力」係香港社會嘅「治權」。「治權」同「主權」係有分別。香港「主權」喺一國兩制下必須掌控喺中國手中。但係根據中英聯合聲明，中國喺主權移交後繼續賦予香港人擁有部份「治權」，甚至喺基本法入面承諾會循序漸進比「普選」香港人，從而長遠提高香港人嘅「治權」。不過事實證明咗中國唔當承諾係咩一回事。習近平上台開始不斷加強控制「治權」。國民教育、高鐵、831框架等等，企圖透過操控香港「治權」嘅傀儡去令兩制底下嘅香港一步步融入另一制嘅發展大局入面，主動打破兩制之間「河水不犯井水」嘅核心精神


5年前嘅雨傘運動，源自於好多香港人眼見中國政府推翻當年承諾。以前中國冇咁強就話俾香港人揀特首，而家中國強大啦就set一個冇「普及、平等」嘅假選舉，所以先會出現「我要真普選」嘅口號。最後運動失敗之餘更加比建制派「等埋發叔」自我否決咗。亦因如此有好多年青一代開始覺得：
「你尊重人哋有香港主權 唔代表人哋尊重香港人」
「呢個宗主國唔會比香港人擁有真正治權」
「冇主權底下嘅治權係空中樓閣 隨時會被攞走」
於是就開始有「自決派」「本土派」甚至「港獨派」。


一個文明、民主嘅國家，當見到一個城市入面有人有自主、獨立嘅思潮時，一方面會做好啲政策令到啲人對國家有返歸屬感；另一方面會將個思潮放入議會入面消化。
放一個思潮入議會入面有咩好處：
1）逼思潮轉化為政黨 突顯其單一議題嘅空洞 =⟩ 慢慢流失支持直至退潮
2）將街頭抗爭變成議會舌戰 減低對社會破壞 =⟩ 透過協商後嘅微調、改革達致平穩過渡
然而香港政府堅決採用最強硬嘅方式 - DQ
從來DQ到參選人唔代表DQ到個思潮，相反只會令更多人走向呢個思潮，以至用更加激烈嘅方式去爭取訴求。Ideas are bulletproof。本來認同嘅人被打壓只會更認同，本來不認同嘅人被打壓亦會開始重新思考，結果就係三年之間，政府DQ咗一代人入面嘅大多數，政府DQ咗街頭以外可以表達憤怒嘅渠道。


有人行動好勇武
有人行動和理非
有人政治立場激進
有人政治立場溫和
但係無論如何都好，事到如今已經冇可能割蓆，因為無論係勇武定係和理非，今次已經係用盡全力同不分派系，共同目標就係要重奪「治權」後重再新分配。

羅永聰話政府最難處理嘅地方，正正係和勇互相不割不分，事實就係咁。只要勇武冇和理非民意backup，勇武嘅行動就會冇人解釋同冇正當性。只要和理非冇勇武比壓力政權，和理非嘅聲音就會比政權漠視。勇和取長補短缺一不可。

以往和理非唔偏向搵外國勢力幫手，依家幾十萬人出嚟遊行叫美國幫香港。以往勇武派唔偏向理會和理非感受，依家會反省點樣走慢啲比和理非跟上。大敵當前冇人有一條成功方程式，既然係咁唯有各有各做，用盡所有力量所有方法去contribute落件事到，先會製造到最大動能去推動成件事。


不分化不割蓆多了解
大家都係手足不用分得那樣細
無論最後「香港人」有冇得到更大「治權」
今次出得嚟嘅手足都係堅信一個idea
而且一輩子都唔會忘記
「香港係屬於香港人 願榮光歸香港」

==================================

運動初期的確因爲有明確議題，所以有效地帶動過百萬人、二百萬人支持運動。但係時至今日，必須承認反送中、反修例已經唔再係重點，只係導火線。就算撤回大家都係唔會再信港共同黑警，03年有廿三條，而家有送中，之後都可以有其他惡法。人民對政府失去信任後，唯一重建信任嘅方法就係重新分配權力，重新建構體制，呢樣先係我地要爭取嘅野。

場仗啱啱先開始，對共產黨要鬥就鬥長命。唔好妄想對家會因為一個《香港人權民主法案》就下放所有權力俾我地。長路漫漫，各位要保重。空閒時留一點彩色俾自己嘅生命。

各位手足，如你開始迷惘，開始唔知打生打死嘅目的地係邊，希望你睇完會變得明確。

願榮光歸香港

自推十連 1/10

願榮光歸香港

2/10

3/10

4/10

5/10

6/10

7/10

消防兩次點算的傷者數目不同，到場後初步點算為 10 人，最終 7 人送院

位置四：22 : 57 太子站底層月台 往中環車廂內
急救期間，列車突然一搖、開出，時為 23 : 03分。

位置七：23 : 00 太子站底層月台 往中環第 5 卡至車尾
3 分鐘後，往中環列車開出；再過 2、3 分鐘往調景嶺列車亦開出，同時警方開始驅趕月台上所有記者。

23:03 match 23:00+3mins
所以係有可能有人見到，係22:57 - 23:03 之間，共6分鐘

位置六：23 : 07 太子站底層月台 往中環車頭對出
他記得被捕者一排排地蹲下，堆了至少三排、近 60 人；然後左方有一位昏迷不醒的黑衣男子，驟眼看沒有血，不知如何弄成這樣。有一個軍綠色 T 恤的男子則被打得頭破血流，還有一個「肥仔」好像恐慌症發作，一度手腳僵直呼吸困難。 共三人

「你問我覺得有無死人？我不能排除這個可能。」David說，「因為我親眼見過有人不省人事，連同那軍綠色衫的男仔，事後在警署都沒碰過面了。」

剩下的事情，只有警方、港鐵職員、消防救護員及被捕者知道。

https://lihkg.com/thread/1556113/page/1
【專題】地圖重組 8.31太子站 閉路電視有真相嗎？
https://thestandnews.com/politics/%E5%B0%88%E9%A1%8C-%E5%9C%B0%E5%9C%96%E9%87%8D%E7%B5%84-8-31%E5%A4%AA%E5%AD%90%E7%AB%99-%E9%96%89%E8%B7%AF%E9%9B%BB%E8%A6%96%E6%9C%89%E7%9C%9F%E7%9B%B8%E5%97%8E/?fbclid=IwAR22jHiXy_7IgLQgLUR96edc3INp30gBuPOQSUGxaXbhPI-J2L5fwjD_Xds

立埸新聞為香港人尋求831真相，極重要，請睇！

8/10

9/10

10/10

願榮光歸香港

脈絡好清晰，師兄好波

推

願榮光歸香港