戲曲中心上年年尾開台嗰日我有去現場,阿姐當住一堆權貴面前大聲屌柒戲曲中心租金條件苛刻,單單呢一點已經全場拍掌支持。西九嗰邊話要養場,講到要分賬(我聽講好似要三七分),咁班主開台又難道唔使皮費?香港粵劇商會之前舊曆年喺戲曲中心上咗十幾日戲,真係賺到幾多?就算全院幾乎滿座,好老實邊會多。所以阿姐、家英哥、輝哥不停重複又重複全港戲曲表演場地租金都唔應該咁苛刻,包括高山、油麻地、大會堂、文化中心,乃至而家戲曲中心
另外,再講起粵劇,之前香港粵劇學者協會終於同英國大學合作,搞得成粵曲分級考試,我好開心,背後都係大老倌做嘢。而家搞埋個標準,新丁想入行,或者曲藝社嗰班要攞專業資格都叫做有張沙紙。呢個實在德政,如有機會我都想考下
家英哥喺某個有線訪問講過,話幾十年前已經有人同佢講粵曲粵劇十年後會收皮,結果十年後又十年,佢自己到而家都重做緊,重要開埋戲曲中心。其實粵劇觀眾一路都有,重點當然係點加大觀眾群。李居明的確係有好多新鮮想法,固然應該支持。但我更加覺得,觀眾群增加之餘,更加應該同時增加觀眾觀劇質素,呢個質素源於對粵劇基本認識同埋點樣欣賞一套戲曲,呢一點輝哥成日強調。不過我同意,粵曲粵劇始終都要多啲宣傳。無論如何,一有粵劇嘢我就基本上都忍唔住出聲,畀更多連登仔睇到都好