召喚lihkg所有學神/P牌巴絲 (38)

懶人包
Q&A
好壞師傅list



以上資料只作參考 自行判斷

問題1）
學咩車，幾錢先叫平，幾錢先叫貴，我報邊間學校或者駕駛學院好？

答案1）
首先要搞清楚，你想學邊款車，有2大分類，自動波及棍波。2款車，私家車(1仔牌)及輕型貨車(2仔牌)(以下簡稱貨van)。


問題2）
咁學邊款最著數?

答案2）
根據運輸署規則，考貨van牌係送埋私家車牌，考棍波係送埋自動波牌，換然之，學棍波貨van最合乎經濟原則，因為考1個牌就送埋其餘3個牌比你，即是Buy 1 get 3 free。


問題3）
我手腳唔協調架，學棍波實撞車！咁自動波應該學私家車家貨Van?

答案3）
你可以選擇自動波貨van或自動波私家車， 同樣地，你考自動波貨van係會送埋自動波私家車牌比你。亦有人話，其實我只要自動波私家車牌就夠，少個牌對我冇影響，咁你可以只報1個自動波私家車牌。
棍波私家車，我唔建議大家去報考，一來師傅少，二來係4款車當中係最難學識。最易學邊款車， 我認為最易學一定係自動波貨van，原因有3個，第1，泊位會比私家車容易，因為考試個泊位 其實係設計比大小小既車泊，例如貨van，而且貨van有後鏡可以睇到車尾入唔入到考泊車時 既黃格，呢個絕對係優勢，第2，貨van車頭有魚眼鏡，對考車既人仕要做3手軚掉頭極有幫助， 第3，貨van兩邊側鏡可以望到既範圍係比私家車為大，車身亦較高，盲點亦都比較少，而私家 車有車頭部分，新手係比較難掌握與車頭距離，相反貨van司機已經坐到全車最前部份，只係需 要掌握車尾距離感，所以我會建議新手學貨van。


問題4）
考試場地係點架？

答案4）
香港考車，主要分2大區-香港島區，九龍及新界區。以上我地都比較鍾意統稱叫考街。先講下九龍及新界區，考貨van，不論自動波或棍波，有5個試場，運輸署會隨機抽1個比你， 分別有天光道，忠義街，油塘，澤安，永孝街。至於私家車，不論自動波或棍波，有3個試場，運輸署亦會隨機抽1個比你，分別係培正道，石蔭，忠義街。
香港島區方面就比較簡單，只有2個考場，分別係掃桿埔只考貨van及跑馬地只考私家車。
有人會問，李健或者鏗鏘果D係點玩法，嗱，我地要搞清楚，我地統稱呢D叫駕駛學校，駕駛學校係冇私家場，佢地只係幫你排街外場，亦即係你去跟私人師傅學車一樣，駕駛學校會幫你報名考以上幾個場地，再幫你安排師傅，而佢地比較有規模，可以隨時去投訴換師傅。
至於香港駕駛學院，佢係有自己既私家場，分別位於元朗，沙田及鴨脷洲。
有人會問，咦，我住元朗喎，可唔可以報元朗駕駛學院考，但用私人師傅或者去跟駕駛學校應考架， 得唔得架，答案係NO，不可以。唔好問我點解，要問就問返駕駛學院點解政府會比咗個咁古怪既條例出黎。
仲有間觀塘駕駛學校，佢地都有專用場，就係油塘，但同上面個油塘係一樣，係完全冇分別架。千祈唔好比佢老點話有私家場。

問題5）
邊個場最難，邊個場最易？

答案5）
只要控制好部車，冇話邊個特別容易，邊個特別難。如果真係要揀一間，鴨脷洲駕駛學院，呢個絕對係全港最易試場。但要留意返，考官每日穿梭不同考場，昨日可能係天光道，今日可能係澤安， 明日可能係元朗，後日可能係沙田，鴨脷洲係全港出名最易既試場，問題係考官去到鴨脷洲，覺得條考試路線咁易，自然會將心中把尺提高返，考生想合格都要合乎返一定水平。


問題6）
報名流程係點架？

答案6）
建議先去運輸署親自報名，記得要帶3個月內住址證明，報完名大約等個幾月就要考筆試，筆試只係考20條交通選擇題，需要答啱16條或以上，答啱15條既，請麻煩報名再考過。筆試內容會係報名果時，運輸署會送一本黃色小冊子比你，你亦可以自己上網搵練習，網上有大量筆試練習提供，最重要係免費，真係做到你唔想做，考完筆試，運輸署會即場隨機抽1條考試路線比你， 如果你係報香港島區考，當然只會抽到掃桿埔(貨van)或者跑馬地(私家車)，如果你報既係九 龍及新界區，咁就會出現抽獎情況，大獎係獎你幾個月後去上面提及既試場考路試。
要注意既係，如果你報名報九龍及新界區，萬一考路試肥佬，你又要再申請多次考路試，運輸署係會隨機再抽過新既考試場地比你，又或者你好不幸，可能會再次抽返你既傷心地再考多次。
本人親身經驗，我自己係親自去運輸署報名，考完筆試之後抽到油塘，本人覺得太遠所以轉咗去元朗駕駛學院應考，最重要既係，駕駛學院冇收我額外費用，所以我建議考生們，先自行報名考筆試， 抽到既場地唔合心意，可以轉去駕駛學院。但要注意，如果我抽到油塘，想轉去澤安考喎，得唔得呀，答案係NO，不可以，你只可以缺席是次路試，等重新抽獎，注意，你只得1/5機會抽到澤安，亦有1/5機會抽到油塘喎。


問題7）
考試流程係點架？

答案7）
不論貨van或私家車，都分為乙部試及丙部試。一般都係同時間進行哂兩部份，亦有少部份既駕駛學校係分開兩部份黎考，先考好乙部試，再等幾個月後考丙部試。我個人意見係，其實乙部試都 幾悶，如果考乙部試之前既練習，你只可以不停做場內動作，又唔可以出街，重重覆覆咁做，你唔厭我都覺得悶啦。
乙部試: 乙部試係考泊車，3手軚掉頭同斜路起步，只要有任何1個項目肥佬，就整個乙部試都肥佬。先講泊車，顧名思義，就係泊好架車囉。即係成功用1次機會泊入1個S位泊位或L位泊位，視乎考試場地要求。3手軚掉頭 就係2條行車線，考生只用2次向前，1次向後機會，成功將部車180度掉頭，中途唔准掂兩邊 石壆，千祈唔好睇輕呢個動作，呢個動作考你用手扭軚速度，用腳控制車速。最後就係斜路起步， 成功將部車停係斜路，再成功係斜路起步，起步果刻唔可以溜後，溜後即肥。以上都係乙部試內容。 駕駛學院就有呢到優勢，因為練習地方正正係你考試地方，只要好好地做，要合格唔太難，相對上， 考街既考生就會比較麻煩，因為你練習地方未必係考試地方，有可能師傅未能提供，亦有可能場地 所限。所以考駕駛學院相對上係有優勢。

丙部試: 每個考試場地都會有3-4條考試路線，考生需要自行駕駛車輛，途中考官會示意考生需要行駛既方向，考生係唔會事先知道考邊一條路線。不論考街既考生定係駕駛學院考生，都需要出街行一個圈返去，所以有人話駕駛學院係易考D，我係唔認同，因為丙部試大家都係同等條件，唯一唔同條件既只係乙部試。丙部試所涵蓋範圍非常廣泛，考官會留意考生有冇做足每個預備動作， 每一個動作有冇做足同做好，例如望鏡，望盲區。 首先我地細分車內環境同車外環境因數，車內環境係指你車內動作有冇做好，例如每次開車前有冇望鏡，軚盤運用流唔流暢，油門運用流唔流暢，離合器運用流唔流暢，腳掣運用流唔流暢，手掣有冇拉好或開車前放好，轉線有冇擰頭望，轉線前有冇打指揮燈，落雨識開水潑或大燈等等等...以上動作，有D可以容許你犯錯一到兩次，有啲係未必容許你有一次犯錯。車外環境就比較複雜，絕大部分都唔容許有1次犯錯，例如停車時觸及前方或左右兩方行車線，行駛時觸及左右兩方行車線， 影響其他駕駛者，沒有注意交通情況不論開車或行駛途中，太接近其他物體，在物體後急速扭軚駛 出或物體前急速扭軚切入，不利用先行權利，不讓路予有先行權利之車輛等等...車外環境變數實在太多，怨未能盡錄。


問題8）
Pass完甲乙丙部後， 最快幾時可以拎P牌？

答案8)
官方答案係7個工作天
但根據經驗， 3個工作天就應該得。
當然，唔擔保一定得。

問題9）
應該學幾多堂先去考車？

答案9)
所有人資質唔同 有人20節 已經舞到架車好輕鬆
有人40節 學車都仲要提住提住
咁你點考試呢
巴絲們 睇返自己能力啦
唔好帶住仲應該點樣處理邊個位既諗法去考試
哂錢 不如補多幾堂操熟先


問題10)
我4月考車 應該幾時上堂？

答案10)
大約1月底2月開始學
早返2~3個月就最好
最緊要唔好谷埋一次過
搞到自己好急住學 搞到補唔到鐘
多啲上網睇考果條路既影片吸收下

唉又肥
考完真係好唔開心
呢次考官乜都無講以為ok啦
點知又肥56 未有看交通情況
我仲每次都有寧頭
唉 又要哂多好多錢
學車真係哂左好多錢啦
第一次肥永孝
呢次天光道
自動都肥兩次
我唔敢同人講
無哂信心

唔係有擰頭就代表唔衰呢樣既
洗唔洗換師傅

今日考忠義街前走咗幾轉天光
真係複雜好多

考完第一次轉左呢個
呢個好有耐性 會繼續用
希望第3次得啦

其實我見好多肥左既巴打考前或考緊都仲係1516，唔夠信心，我覺得真係情願操多幾堂，操到個人定啲，有信心先去考，唔夠信心考肥左又要俾多啲錢又要排過仲唔抵

當然師傅係好重要，我見唔少巴打遇到啲師傅一係好hea 一係好惡，我自己就遇到唔錯既師傅，仲要係兩個

原本跟開一個姓何既師傅，不過佢太full加上我要放工夜晚練車，就refer左另一位後生啲姓鄭既師傅，姓何既會爆下粗，但係係輕鬆學車，會同你吹下水，等你放鬆揸，好少會屌；另一位姓鄭既就斯斯文文，好nice咁教，重點係當你有一啲好白痴但又唔清楚既concept，完全可以隨便開口問，佢都一定好耐心咁答，又會同你一齊去案件重演

好似打得太長 但真心想share，因為師傅真係好重要

利申：考掃桿埔 2 take (第1 take 衰自己on9)

駕駛學院到底有冇快期
個fd 11月元駕肥左丙部
佢師傅話幫佢排到1月尾快期
但上網睇好多人又話冇快期

諗住下個月報元駕26

2個月對駕院講超快啦

我11月考 師傅同我講個快期最快都要三月 正常排到五月左右 所以一月已經好快啦


同樣元駕 後尾自己出去報快期

考棍van肥咗兩次丙部，諗緊好唔好轉考自私

新po lm

您已經講咗出嚟

係都轉自van la

鴨駕3 take, 師兄再接再勵

留名

自動van點都好過自私

肥56，除左望鏡fing頭，仲會有咩犯錯係即死啊？

巴打係咪學棍van?

不過佢肥得我都證明我有嘢做錯
但係又唔知做錯啲咩先最慘

跟到個好師傅真係好重要

我頭三堂跟嘅師傅 郁啲就鬧 態度令人好難受
之後轉咗而家呢個 學車心情完全唔同晒
由好唔想學變到學得輕鬆自在 開心

師傅會成日提醒我啲弱點喺邊 要注意乜
我話對泊車無信心 佢就不停同我練好佢
試過佢下一個學生11:00學 佢約我08:30上堂
話早啲學 少啲人 多啲時間泊
之後俾我學到11:00 但只係收我1.5個鐘錢
有時未夠鐘接下一個學生佢都俾我揸多陣。。

好慶幸當初無決定錯 唔啱嘅師父無謂勉強

利申 1take油塘

同意補鐘操信心，揸車真係操多兩轉先更熟手