話說樓主就黎比人炒 所以得閒更新下 反正埋尾
最後一日其實本身就book咗早機番黎香港，但係死人 ou早上先通知班機cancel。好彩有得改另一班，於是諗都唔諗揀最夜嗰班，順便玩多日都好嘛
但係處理好改機票都已經11點幾，加上張南電pass又未過期，所以就過左和歌山打左個圈
本身打算去埋睇二玉站長，但係唔夠時間
加上身為一個城膠點都想去左城先 (雖然都好鍾意貓)
和歌山城其實都唔係好方便，喺JR或者南電都要再轉巴士過去
行過去都得 沿路仲有幾間好食嘅拉麵食
和歌山城算名城之一，因為不論建築風格定係歷史上佢都有一定嘅價值。咁鍾意城嘅我當然要去下啦
和歌山城係平山城，梯郭式，現存只有西之丸 本丸 同埋二之丸。雖然大部份城內建築都係重建，包括天守。但係連立式天守喺日本最主要得三個，包括前兩頁講過嘅松山城、和歌山城同埋姬路城，所以建築風格亦係依個城值得一去嘅原因。
其次，因為紀州藩當年藩廳設係和歌山城，而且紀州藩更係德川御三家之一，曾經出過兩名幕府將軍權傾天下；加上和歌山城一開始係由豐臣氏興建，所以就歷史文化意義上亦非常重大。
換句話說如果你同我一樣係城膠嘅話就一定要去喇
由JR或者南電站過黎都要搭巴士，落車後首先會進入西之丸，但係唔急住去天守本丸嗰邊。西之丸有西之丸庭園，喺紅葉季時候會有好靚嘅紅葉睇，係和歌山紅葉名勝之一。喺冇紅葉嘅時候亦因為種左好多植加上小橋流水，都好靚嫁
上圖係和歌山城主要影相位之一，可以一次過影晒天守、二之丸堀同埋和歌山城另一樣獨特嘅野──御廊下橋。廊下係指走廊，上圖中間就係走廊橋。全日本講到御廊下橋基本上都係指和歌山或者福井城是但一條，可以話係依種建築風格嘅代表物，而且並唔常見。
如果要行御廊下橋記得要除鞋，但係都好斜下 基本上如果你向下行可以跣住落
和歌山城天守係連立式天守，以大天守、小天守為主，加上附近共6座建築形成一個圈。入口設於小天守；而大天守則為三重三階建築。就防守而言因為範圍比松山城圍起嘅圈大，所以未必有咁勁。但係作為德川家嘅城，淨係個名都已經夠令人唔會攻過黎啦
其實和歌山城相對高知、松山黎計真係唔太特別，所以其實都唔太多野寫，作為旅程最後一個景點黎計真係有點唔夠過癮
講到和歌山特色景點其實其它地方仲多，熊野古道那智瀑布都應該比和歌山城更吸引。有機會再去啦
終於打晒喇。多謝繼續都仲有睇POST嘅各位
詳細依邊
https://budtourhk.blogspot.com/2019/02/2017-day11.html
即使我嗰日已經喺最佳時間去到，但係都係唔太睇到，只係見到少少急D嘅流。叫做有個雛型，圓圓地或者D水流方向有D特別咁。算啦當遊下船河，希望睇緊依篇嘅朋友去到會有機會見到啦。
