今日行程主要喺高知市入面，出發前食個BRUNCH先
BRUNCH係高知出名嘅鍋燒拉麵，夏天食都幾熱幾攞命。冇咩特別推介邊間，我係喺去高知城路上求其食。就依碗黎計味道一般，湯底鹹左少少，同埋湯底多油左D。OVERALL都OK，不過不失
高知城屬平山城，梯郭式。有興趣我再詳講咩鬼野係梯郭式
而家嘅高知城係山內氏入主土佐後重建，舊時依個地土有個叫大高坂山城嘅城。戰國時長曾我部覺得依度排水唔好加附近濕地太多所以搬左去桂浜嗰邊，後來山內氏入主就重返大高坂城重新築城，後來成為高知城。經歷過明治維新同二戰後，高知城成為全日本唯一一個有完整現存本丸建築群 (共15座)嘅城。
初代城主山內一豐像
如果細心睇會見到石垣 (城牆)上有一舊凸出黎嘅野，叫做石樋。依舊野係山內氏改修時為左改善大高坂山一帶水利問題，包括雨多、地濕，難以建築等等情況而建。主要係用黎收集雨水，將雨水一次過排出去，以免過多水令到石垣受壓而崩塌。簡單講係一條古代坑渠
天守下面建有忍者返，即係依堆刺釘，以免忍者同敵軍爬上牆上面攻擊
詰門，與其話佢係門，不如話係一座兩層櫓。
佢下層係用作門，同時係鹽倉，亦有作防守之用。上層就係一條連住本丸同二之丸方面嘅橋，同時亦係家老同老中休息嘅地方。
整座建築呈T字型，係古建築同現存建築黎計都好少見
現存十二天守之一，高知城天守。
高知城天守係獨立式望樓型。詳細少少講即係首先獨立式天守講緊嘅係佢建築內部並無任何同其它建築物嘅連接，即使有連接 (例如高知城天守同本丸御殿)都只會係外面連接，即係天守出左門口之後有走廊連住御殿門口。
同時望樓型講緊嘅係你可以好明顯見到天守有兩部份構成，即下面嘅入母屋，即係類似屋嘅構造，上面再加一個望樓。
而高知城天守嘅入母屋喺正面 (本丸御殿方面)望係會覺得同上面望樓差唔多闊，但係由側面睇就會發覺入母屋側面係比望樓闊。
整個天守都係根據山內之前住嘅掛川城而起出黎，所以喺頂層同樣設有高欄。順帶一提，當時高欄係權力嘅象徵，所以整嘅時候山內特登求左德川家康點頭先整得。
入本丸御殿同天守入場費 大人420円 相對非常平
外面d景唔特別靚 冇UPLOAD
追手門，即係正門。亦都係現存建築，亦因為佢而令高知城成為唯一可以喺現存追手門見到現存天守嘅城
關於詳細歷史之類未必個個都有興趣睇
有興趣睇依邊 長氣d
https://budtourhk.blogspot.com/2018/10/2017-day7-part1.html
