呢個系列第一期介紹嗰位超級英雄，犀利嘞，勁過超人同變形俠醫，用一支竹就可以挑起成個地球。佢就係史上最偉大的三位數學撚之一，古希臘最傑出的科學撚——阿基米德。
開始之前，循例遊吓花園講講時代背景先，不過寫個年份出嚟，連登仔都應該冇乜概念，就請大家想像一下《戰狼300》溫泉關戰役嘅200年後。
唔好以為班戰狼好撚英，其實係賤狼；之後斯巴達班友咪又係為咗利益同雅典班吹水精開火，自己人打自己人。呢場內戰慘烈囉，由西西里打到小亞細亞，又陸戰又海戰咁，收尾大叫「自由、民主」口號嗰班賤狼贏咗，不過希臘從此一蹶不振......呢啲睇戲睇唔到架～～
之後，馬其頓嘅腓力二世稱霸希臘。唔知腓力二世係乜水？佢咪係亞歷山大大帝老竇囉，死廢帝咁都唔知！亞歷山大大帝南征北討十幾年，32歲就瓜柴，死前成個古波斯王國被佢收咗皮。佢死後希臘化時代就嚟料，當時整個地中海沿岸都深受希臘文化的影響。
亞歷山大大帝嗰啲繼業者，互相攻伐咗四十年左右先開始手軟。阿基米德就係响呢個比較太平嘅年代出世，地點係西西里嘅沿海城市敘拉古(Syracuse)。又係一個表面經濟繁榮、什麼什麼文化大熔爐，實質上政治邊緣化嘅地方。
其時地中海嘅形勢，東部希臘玩撚完、波斯收咗皮、繼業者自顧不遐。西部則由兩大勢力响度角力，就係古羅馬和古迦太基。兩個國家為咗爭奪地中海沿岸霸權打咗三次大戰，史稱布匿戰爭。西西里島夾响兩大勢力中間，想獨善其身......邊有咁易！
第一次布匿戰爭就係因為敘拉古國王同墨西拿(Messina)嗰班傭兵唔妥，打吓打吓由地區衝突升級到代理戰爭(Proxy War)，即係羅馬和迦太基各自支援啲武裝力量去打，然後食花生。有啲似敘利亞內戰，美國佬援助反對派，另一邊俄羅斯就狂撐政府軍；睇唔明？唔明就再多啲留意國際時事啦。
代理戰爭都唔夠皮，迦太基就直接出兵全面開戰。之但係，迦太基班友完全唔夠打，兩嘢就俾羅馬軍隊打殘。都係第二次布匿戰爭刺激啲，不過，阿基米德就係响其中一場圍城戰歸天......R.I.P.
講起第二次布匿戰爭，就不得不提Hannibal…...
唔係Anthony Hopkins嗰個角色，係唯一能夠打到羅馬人屎滾尿流、落荒而逃嘅迦太基大將軍漢尼拔(Hannibal Barca)。唔識佢，起碼都聽過有條粉腸騎大笨象橫越阿爾卑斯山啩？當時呢件壯舉簡直震撼整個羅馬共和國；情況好似依家金仔試射導彈飛越日本上空，日本人大叫「驚、驚！」。
跟住落嚟，真係想用多啲時間講吓漢尼拔响坎尼會戰「完勝」羅馬軍隊嘅事跡。可惜今期主角係阿基米德，有機會再講…...
呢場坎尼會戰，被軍事撚譽為史上最偉大的戰役之一，時至今日仍為人津津樂道，不過就間接害死咗阿基米德。因乜解究？是咁的，正所謂輸人不輸勢，一場戰役死咗六七萬個羅馬士兵事小，重創其他城邦對羅馬共和國嘅威信事大。
唔講唔知，第一次布匿戰爭後，原本中立嘅西西里島已經依附羅馬，成為特別行政區。當然，每個銀仔都有兩面，敘拉古有親羅馬份子，自然會有親迦太基份子。
好死唔死，原本親羅馬嘅敘拉古老國王揀喺依嗰時間走去賣鹹鴨蛋，繼位個王孫乳臭未乾得15歲，仲要俾人慫恿轉投迦太基陣營。呢啲咁嘅反骨仔、牆頭草，會有咩下場？睇過Game of Thrones都知啦！All Hail to King Joffrey！
容許我以三國前期袁紹揮軍南下模擬漢尼拔大軍壓進羅馬境內嘅情況，若果啲統領精明如曹操，佢會點做？梗係軟硬兼施、遠交近攻，扭盡六壬都要除卻後顧之憂啦；降張繡、和劉表、撫關中，諸如此類。備戰官渡，又出其不意咁進攻徐州，就係怕劉備同袁紹一齊夾擊佢。
咁大家明白點解羅馬新敗不久，便急於圍城敘拉古啦。腹背受敵，輸九成......亦都可以見到羅馬共和國敗而不亂、當機立斷，難怪佢哋會成為最後贏家。
好啦，圍城敘拉古，終於輪到阿基米德出場。作為超級英雄，佢嘅能力係咩？博學囉！呢條博學撚真係乜撚都識，除咗上述數學撚同科學撚嘅素質，佢仲係哲學撚、工程撚、天文撚同埋發明撚。等你以為淨係得達文西條博學撚先識得發明；計落嚟達文西啲嘢都係抄......都係向阿基米德致敬咋。
講番圍城，羅馬軍隊分海陸兩路包圍呢個守衛森嚴嘅城市；敘拉古能夠守足兩年先被攻陷，阿基米德啲發明可謂功不可沒，除咗拋物面反射器、改良投石機呢啲濕碎嘢，我最欣賞佢嗰支巨形＂不求人＂(見下圖)，完全將槓桿原理與搔背脊概念發揮到極限。
久守必失，羅馬軍隊最終都攻入敘拉古。雖然羅馬將領有令不得傷害阿基米德，不過一條70多歲嘅博學撚有點會有人認得。相傳，阿基米德死前仲响沙地上畫緊的圖形，死到臨頭仍誓要屌鳩羅馬士兵最後一次，吼叫：「Noli turbare circulos meos！」。
拉丁文我唔係好識得譯，大意為：「屌，咪撚阻鳩住我畫圈圈啦！」。
阿基米德之死呢個故事，啟發咗後世無數之咁多嘅數學撚。死都要鳩畫圓圈呢種高尚情操，係幾撚咁迷人。條撚樣仲要死都叫人响佢墓碑上刻一個有球內切圓柱圖形(a sphere inscribed in a cylinder) ，來紀念佢自己最偉大嘅成就—《球與圓柱論》(On the Sphere and Cylinder)。
支持請正皮，數學撚唔好負皮住，我會繼續寫《球與圓柱論》嘅內容。
高質
