https://hk.finance.appledaily.com/finance/realtime/article/20180130/57773217
港股今日急跌逾300點,訊匯證券行政總裁沈振盈「沈大師」,今日開腔為大家指點迷津!被問到大市是否已「沈判日」,大師指,「大沈判?未到未到,仲等緊啲因素出現。」
他表示,「呢兩日嘅跌,暫時未可以Confirm個市係大跌住。」他解釋,由於1月份升幅大,期指結算後出現回吐亦合理,而北水亦開始套現,「臨近過年,升咗咁多,都會有套現壓力,所有我諗嚟緊呢個禮拜,都會偏軟為主。或者試一試落31800至32000點呢啲位。」
他強調,早前睇淡的因素一直存在,「發酵緊但未到觸發點,我估計
個市過年前都安全。只係回吐,但回吐完又會發彈返上去咁樣。」
「香港投資者情緒仍然好樂觀,似乎唔理會背後因素,所以暫時落完去都會抽返上去,直至因素發酵,如3月議息。」
他指出,要留意美國十年長債息,現時債息升至2.7厘,如果升勢未止,則壓力會加大;另要留意美匯,料短期會見底回升,如美金抽升,應會對美股有壓力。
另外,被問到是否仍「一股不留」,他指,「冇架,我只係炒輪咋,都係以高沽為主,股票我冇啦,連我啲愛股我都清晒。」他透露,現時主力指數熊證「打游擊」,一高即沽,「未大口坐倉」,「通常抽高,我就會用300-400點距離打靶嘅熊證,預咗3-400點嘅止蝕位。」
「當Confirm個市落,我就會沽個股,
目標都係港交所(388)、騰訊(700)、平保(2318)」