大家覺得有幾多成真？？
《職業大搜查》救護員篇－馬菲
從小到大，發生意外嗰陣大家都知道要「Call白車」求助。不過對於每日要做數之不盡個性命攸關嘅決定嘅救護員，就甚少人提及，更莫論表達感激同尊重。其實，救護員為咗救人，每日忙到無時間食飯已經係等閒事；最無奈嘅係，濫用救護車嘅人比比皆是，舟車勞頓去到目的地，竟然有人為咗比大頭針拮到而 Call 車，浪費社會資源！
註：對救護員稱救護車為「白車」其實係唔尊重嘅做法，所以下次都係叫返救護車喇。
救護員大搜查
月薪
入職薪金 $19,780
頂薪點 $27,380
工作壓力
🔥🔥🔥🔥⚪️
壓力來自架構上嘅制肘；
每轉 Call 會限時完成，
令救護員唔敢採取需時較長但效果較佳嘅治療方法。
工作生活平衡
⭐️⭐️⭐️⭐️⚪️
工作雖然辛苦，
但假期就可以完全放低工作。
另外，每當一星期工作超過官方制定嘅48小時，
就會設有補假。
晉升機會
救護員 → 救護隊目 → 救護總隊目 → 救護主任
想考救護隊目需要大約10年年資，條件有三：
一．啊 Sir 覺得你有實力；
二．通過救護隊目試；
三．考獲 EMA II（二級輔助醫療助理）資格，即更深入院前知識，學點打針落藥。
救護員工作日常
救護員嘅工作天由集隊開始，由救護主任通知你「走邊架車」。其後，救護員就需要為救護車輛進行檢查、車上藥物齊唔齊全。假如有緊急事件，即有人 Call 救護車，救護員就要「去車」。當值車輛有分一車、二車、三車；假如為一車，即為首先「去車」嘅隊伍。救護員通常在一車當值位置，就會避免去洗手間，更加唔會「開大」。
假如無人 Call救護車，救護員就需要上講堂，加深院前護理知識；另外，亦需要擔任局務，進行清潔。
註：救護員同消防員一樣，會將出勤稱為「去車」，因為「出車」與靈車有關連，係唔吉利嘅講法。
見盡死傷處處 光綠怪離屬等閒事
陰陽眼於常人而言，係荒誕怪離之事；但其實靈異事件好多同事都遇過，並非想像中咁驚嚇。有一次送咗個伯伯去搶救房（行內俗稱為 R房），後來證實不治。明明已經送走咗佢，但係調轉頭又見到佢。佢坐喺度個樣好迷惘咁，我同佢講：「你安心上路啦。」，佢就離開咗。
其實呢啲「朋友仔」佢地望落同正常人差唔多，唔會話好似電影入面好血肉模糊咁；咁點分呢？通常佢地會企喺啲好幼嘅欄杆上面，咁正常人係唔可能企喺一條咁幼嘅欄杆上面㗎嘛，所以就知係嗰啲「朋友」。啊，同埋佢地喺度嘅時候覺得毛管戙。
行內禁忌：於肇事現場評論死者
每日與無數生死關頭擦邊，對於與靈體相會已經見怪不怪。不過當中仍有相處之道要嚴守；救護員於肇事現場絕不能評論死者樣貌，否則被徘徊不前嘅靈體聽見就「瀨嘢」。
曾有同行看到死者年輕時的照片後，
口快快講咗句「後生時幾靚」，隨後即刻靈異事件纏身。
坊間傳言 你問我答
Q: 做救護員係咪需要有車牌？
A: 考嗰陣可以無車牌，有就最好。如果本身無車牌，喺嗰三年 Probation 內一定要考到。
Q: 點解訓練期間要去殮房？
A: 因為一定會有機會接觸到屍體，但無啦啦佢地唔會搵到條屍比你練習，咁咪要去殮房囉。真係有人試過一入到去就嘔，第日即刻 Quit 咗。
Q: 點解救護員成日無時間食飯？
A: 因為太忙，出勤率高。有時要頂更、亦有唔少濫用救護車服務嘅人。
仲有就係部門唔會理會你得唔得閒食飯；有一句說話我都覺得幾涼薄，啊 Sir話「你救人重要啲定食飯重要啲？」咁你可以點答？
Q: 點解救護員體能要求高？
A: 有時需要做特別服務，要行山上去救人。我自己就試過連續十二個鐘喺個山度上上落落救人，另外仲要揹住個「糯米雞」（急救包），都唔輕㗎。
加上我哋好多時需要去唐樓救人，要行樓梯，有機會要揹幾百磅嘅人落樓；我自己試過揹個四百磅嘅外藉人士行十幾層樓梯，腳都跛。
面試貼士
一．要盡量展露自己有紀律、熱心助人、合群嘅一面；
假如為制服團體成員／有急救證書／義工服務記錄則對面試有幫助；
二．面試前要多留意時事，特別與災難有關嘅社會大事；
三．有別於其他紀律部隊，救護團隊對男女有平等體能要求。
原文：
https://www.jobable.com/blog-zh/%E3%80%8A%E8%81%B7%E6%A5%AD%E5%A4%A7%E6%90%9C%E6%9F%A5%E3%80%8B%E6%95%91%E8%AD%B7%E5%93%A1%E7%AF%87%EF%BC%8D%E9%A6%AC%E8%8F%B2
已帶回家
