揸咗唔知幾耐之後，導遊就話夠鐘食晏！
就咁停咗喺草原中間，準備野餐。講開先知，導遊叫Ariuna，得廿四歲，仲細過我地，佢講得一口流利嘅英文，喺蒙古嚟講算係好犀利
可能因為識英文，又本身鐘意呢種遊牧式嘅生活，好自然咁就做咗導遊
喺蒙古做導遊，唔係淨係識得介紹吓景點就得，因為喺七日戈壁，所有嘅起居飲食都係佢一手包辦，要買定晒每一餐份量嘅嘢食由城市帶入嚟，有時仲要煮晒咁多人份量嘅嘢食，又要set camp，仲要同蒙古大漢打交道，根本就係集褓姆、廚師、公關、生存教練於一身 後來有一晚司機同啲牧民一齊飲醉咗，Ariuna都驚驚地，因為平時佢係會同司機同埋啲男人一齊瞓同一個蒙古包。
第一餐就係麵包夾生菜芝士蕃茄咁食。最普通嘅嘢食喺一流嘅環境底吓都會變成美食
問Ariuna會唔會當導遊係佢一世嘅工作，佢好快就答咗唔會
佢話佢都鐘意做導遊，可以識到外國人聽到唔同嘅故仔，但係就唔想成世都係咁。我就問咁你將來想做啲咩？原來佢嘅理想係喺蒙古嘅小鎮到教英文
令到出生喺小鎮嘅細路都有機會做到自己想做嘅事，唔會一世都被困喺嗰度
真係好型
喺香港講理想，通常都會比人話唔好發夢，慢慢就冇人再記得自己想做啲咩
又或者，唔係唔記得咗，而係從來都冇知過
但喺蒙古，仲係有人會夠膽去諗。喺嗰一刻，我覺得就算佢做唔到，佢都已經嬴咗。而且，我諗佢應該會做得到。
我呢？我將來又想做啲咩？
個情人公園我好似去過 附近有細路踢波我去屈佢地機 佢地以為我係日本人因為佢地覺得日本仔踢波勁
