有冇人對日本神話有興趣?

樓主依排忙住做proj , 所以出文次數比較少
望大家見諒

等你呀

推

推

lm

Lm

留名

希望有d大戰睇下

樓主我終於搞掂個present
第四章 神明誕生
大家好 ! 上一回講到伊邪那岐同伊邪那美生咗「大八島國」，形成日本依個國家。但係熟識日本嘅巴絲都知道日本又點止依八個島呢? 原本佢地喺生完大八島國次後都仲keep住有生啲比較細嘅島嶼嘅:
生完大八島之後返去嘅時候生咗建日方別(タケヒカタワケ)，即現今岡山縣兒島 (兒島本身係獨立島嶼嚟，之後用填海將岡山縣同兒島連接埋一齊)
第二生咗大野手比賣(オオノデヒメ)，即現今香川縣小豆島
第三生咗大多麻流別(オオタマルワケ)，即現今山口縣周防大島
第四生咗天一根(アメヒトツネ)，即現今大分縣姫島
第五生咗天之忍男(アメノオシオ)，即現今長崎縣五島列島
最後生咗天両屋(アメフタヤ)，即現今長崎縣男女群島

國土誕生(国産み)


就係咁，伊邪那岐同伊邪那美就生咗成個日本出嚟啦。有一日，伊邪那美就拎咗一大堆魚同穀物返嚟

伊邪那岐：那美bb ，嗰啲魚係?
伊邪那美：係啲人送比我地架，以答謝我地生咗咁多島
伊邪那岐：下?幾時有人係到住架?

雖然依到提到人類為咗答謝伊邪那岐佢地而送啲禮物比佢地，但其實喺日本神話入面並無記載任何有關人類起源嘅歷史。但之後亦都有講到神明嘅子孫其實都係以人類嘅身分生存(目的係神格化天皇以鞏固大和政權)，所以現今就當咗人類係神明嘅後代啦。之後，佢地為咗依班喺地上居住嘅人類著想而生育唔同嘅神出嚟啦(神産み)。咁我依到將唔同嘅神歸納做幾個系列。


「家宅」系列
最先出世嘅神明係「大事忍男神（オオコトオシオノカミ）」，一般認為係一位「成日做大事」嘅，但詳細資料不明。為咗保護佢地心愛嘅人類，伊邪那岐佢地決定生育守護人類同埋屋企嘅神明啦，依次序就係:
石土毘古神（イワツチビコノカミ）—將「石‧土」神格化，掌管房屋的基礎 (地基嗰啲)
石巢比賣神（イワスヒメノカミ）—將「砂」神格化，掌管房屋的材料，同石土毘古神係兄妹關係
大戶日別神（オオトヒワケノカミ）—將「門‧出入口」神格化，負責保護房屋
天之吹男神（アメノフキオノカミ）—將「修葺中的屋頂」神格化。以前啲人會同蘆葦同茅草（カヤ）去做屋頂（葺く）
大屋毘古神（オオヤビコノカミ）—將「修葺完的屋頂」神格化，同掌管災厄嘅大禍津日神為同一神明
風木津別之忍男神（カザモツワケノオシオノカミ）—冇神格化任何野。但可以由神名睇得出係同「風‧木」有關嘅神，因為以前啲人係用木嚟起屋嘅，估計依位神明負責喺狂風暴雨嘅時候保護房屋。
以上六位都係負責保護「家宅」嘅神明嚟嘅，故稱「家宅六神（かたくろくしん）」啦

家宅六神入面三柱神負責守護嘅野

（續）
「水」系列
之後就生同「水」有關嘅神明啦，依次序係:
大綿津見神（オオワタツミノカミ）
「ワタ」係古代「海」嘅讀法;「ツ」係古代助詞，同現今「の」嘅用法相似;而「ミ」有神靈嘅意思，所以「ワタツミ」就代表「海神」啦。
有趣嘅係，之後嘅海幸山幸彥編反而用「海神（ワタツミ）」而唔用大綿津見神去稱呼佢。雖然可以係代表唔同嘅神啦，但亦都有可能係各個地方都對大綿津見神嘅有唔同叫法，至於真正原因係點解就真係無從稽考啦。

水戶神/水門神（ミナトノカミ）
水戶（ミナト）代表水嘅門口，意指港灣，嚴格上嚟講係指緊河川同大海嘅交界，視之為水門。同水戶相似嘅字仲有「大和」，咁點解古代日本又會叫做「大和（ヤマト）」呢?ヤマト可以分拆為「山（ヤマ）」同「戶（ト）」，意指山嘅入口，亦都有「底部‧山腳」嘅意思啦。ヤマト本身就係一個用黎形容地勢嘅詞語，但可能因於大和政權建於奈良盆地嘅東南地域，所以佢地就借用ヤマト嚟作為佢地王權嘅名啦。
咁伊邪那岐佢地生咗兩個水戶神: 速秋津日子神（ハヤアキツヒコノカミ）同埋妹妹速秋津比賣神（ハヤアキツヒメノカミ），都係同「川‧海」有關。

速秋津日子神同速秋津比賣神雖然係兄妹關係，但你知啲神好鍾意搞亂倫架嘛 ，所以佢地兩個事實上係結咗婚兼生咗好多同「河口」有關嘅神明出嚟啦:
沫那芸神（アワナギノカミ）同沫那美神（アワナミノカミ）—將「海嘅泡泡」神格化
頬那芸神（ツラナギノカミ）同頬那美神（ツラナミノカミ）—將「水面」神格化，「頬那（ツラ）」代表水面。
天之水分神（アメノミクマリノカミ）同國之水分神（クノミクマリノカミ）—「水分（ミクマリ）」指分水嶺，用作分開各塊水田中嘅水流(有興趣可以google下)。
天之久比箸母智神（アメノクヒザモチノカミ）同國之久比箸母智神（クノクヒザモチノカミ）—掌管「灌漑」嘅神明。



「風神」同「山」系列
生完「水」就開始生「風神」同「山神」啦，依次序係:
風神 志那都比古神（シナツヒコノカミ）
木神 久久能智神（ククノチノカミ）
山神 大山津見神（オオヤマヅミノカミ）
野神 鹿屋野比賣神（カヤノヒメノカミ）—茅草（カヤ）本身係一啲唔會影響其他植物生長，而且又可以作為牲畜嘅食物，所以日本人非常珍重茅草，並廣泛使用茅草作唔同用途。而依啲茅草叢生嘅地方叫做「茅場（カヤバ）」，直至現今東京茅場町都依然沿用「茅場」一詞。因為茅草對佢地生活顯得較為重要，所以亦都將「茅草」神格化啦。
野神有另外一個別稱叫做「野槌（ノヅチ）」，「ノ」可以解作「原野」嘅意思，所以就係指原野之神

依個時候，山神同野神就分別負責生唔同「山野系」嘅神出嚟啦:
天之狹土神（アメノサヅチノカミ）同國之狹土神（クニノサツチノカミ）—代表「土地」嘅神明
天之狹霧神（アメノサギリノカミ）同國之狹霧神（クニノサギリノカミ）—代表「霧」嘅神明
天之闇戸神（アメノクラトノカミ）同國之闇戸神（クニノクラトノカミ）—代表「谷」嘅神明，因為山谷係有水流經，所以同水神嘅性質相近
大戶惑子神（オオトマトヒコノカミ）同大戶惑女神（オオトマトヒメノカミ）—代表「迷路」嘅神明



日本多神嘅原因
睇到依到你係咪有啲唔明點解日本人會諗到咁多神明出嚟呢?咁q多名點記呀痴線 。但只要你明白佢地嘅世界觀就會明白點解有咁多神明啦。嗱首先，日本人其實覺得有實際形態嘅物體都有靈魂，而神其實就係「組成世界嘅要素」，所以對於一啲佢地覺得好重要嘅物體，例如水、山等等都會將其神格化，依個亦都係點解日本有咁多神明嘅原因啦。
其次，日本以農立國，農業對於佢地嚟講簡直係國家不可缺少嘅一環，所以就非常重視「穀物神」，認為佢會寄宿喺啲田地到，令到農作物可以茁壯成長。所以「土地」、「山川」依個系列就有大量神明嘅存在啦。

神明會降臨至田地到，由山流過黎嘅河川會滋潤農田，山嘅穀物神會行山路落嚟，所以就有「山野系」嘅神出現啦。


下一章會同大家睇下伊邪那美生仔生到死咗嘅故事!

正post呀

尾已爛

類似呢D ?

係呀，巴打喺日本買書睇？
估唔到咁都比你搵到咁舊嘅post

間中有買開細路仔書

Lm