喺非洲，每60秒就會過咗1分鐘(番外篇)-伊比利亞列傳

聰明嘅小朋友可能會問
喂乜唔係話啲書好珍貴好重要㗎咩
做乜會咁大頭蝦漏低冇帶走㗎
呢層就係因為當時有樣更重要嘅嘢一定要運走：
里斯本個皇家金庫
當時由於時間實在太緊迫
若昂王子必須作出取捨
咁傻嘅都知與其係堆書度搵黃金屋
不如真係擺啲黃金喺屋啦
若昂王子下令將全部運力優先處理啲黃金白銀
據英艦隊司令薛尼·史密斯上將交畀英國會嘅報告記載
總共約9噸嘅金幣同12噸嘅銀幣
裝喺70個大木箱分批運上三艘葡萄牙戰艦
呢度大約等於整個葡萄牙流通貨幣嘅一半左右

1807年鑄造嘅Cruzados金幣
咁大工程可以喺一日之內完成
都已經係奇蹟嚟㗎喇
其他啲無關痛癢嘅嘢好似啲梅菜咁嘅手稿呀同王室成員嘅個人衣物呀咁
就放埋一邊先啦
（事實係最後啲衫褲都係冇運上船所以啲王室成員成程船都係冇衫換要乾煎
不過對若昂王子嚟講就冇乜嘢因為佢出晒名唔鍾意換衫同一個月先沖一次涼）
不過到咗呢一刻
呢個充滿住變數同甩漏嘅遷都計劃
終於真正進入大直路喇
所謂萬事俱備只欠停風
而家就睇吓天氣幾時好轉喇

咁你會問啲書點搞呢
呢度就岔開少少講一講
上面講嗰位路易斯·馬羅科斯
後來為咗保護呢啲館藏
就化身成武裝圖書館管理員
加入葡萄牙地下反抗軍
參與對法國嘅遊擊戰
並成功聯同英軍趕咗法軍出里斯本
最後喺1810年
若昂王子親自下令佢護送呢啲珍藏去巴西
並幫手成立巴西皇家圖書館

以藏書計係當時全美洲最大嘅圖書館
足足係當時美國國會圖書館嘅兩倍


呢本係上面講嗰個圖書館職員
喺巴西寫畀佢老豆嗰兩百幾封家書嘅匯集
以一個普通官員嘅視角
記錄咗喺1811到1822年呢11年間
發生喺巴西嘅大小新聞
由若昂正式登基呢啲大事
到某公爵因為同個男僕hehe而鬧離婚呢啲瑣事
呢啲閒話家常都成為咗研究巴西立國嘅重要史料

呢啲就係嗰幾日里斯本城內嘅一啲“花絮”喇
好喇講完啲無謂嘢
而家就將個鏡頭轉返去法軍嗰邊啦
話說喺29號晏晝3點半左右
朱諾將軍襯住好天
正喺度追趕番之前幾日因為暴雨而落後嘅進度
忽然聽到從里斯本方向傳嚟一連串嘅悶響
嗰時萬里無雲唔似係行雷吖
唔通...係大炮聲
佢當堂打咗個突
心諗今次仆街喇英軍真係開始做嘢喇
正路佢係應該即刻加速嘅
不過嗰時佢身處距離里斯本卅公里嘅聖約翰山
而周邊嘅丘陵地帶依然係一片泥濘
咁遠距離加埋路況咁差
就算佢點加速
都冇可能喺入夜前趕到去
自己喺缺馬缺炮又人生路不熟情況下
冒險黑夜急行軍
畀人伏擊全軍覆沒咪碌撚
咁點搞

...待續

樓主拖延症輕微咗

我可以好肯定咁講
係改唔到㗎
不過我咁樣定時更新
的確畀到多啲啲啲啲壓力加速嘅

Week 3 check

好刺激呀
究竟走唔走得甩呢

好似係第一次留言但其實之前啲po都有追過巴打既文，寫得好好睇加油

有人有睇就好

有呀所以唔好拖稿

嗱就咁
雖然朱諾將軍戰績平平啫
不過作為拿破崙嘅副手
基本嘅戰術素養都仲係有嘅
聖約翰山係進入里斯本前最後嘅戰略高地
先喺度駐紮再等埋落後嘅部隊
勝算似乎會高啲
總好過盲中中喺啲泥路度摸黑前進吖
於是佢就開始構築防禦工事紥營休整
再喺第二朝
從佢嗰堆畀大雨同泥路玩到不似人形嘅“法軍”度
挑選1500個仲未死得晒嘅“精銳”部隊
由佢親自帶隊前往里斯本
準備實地視察吓再諗點樣部署反擊英軍
隨住越靠近城區
佢地就越小心翼翼
深怕會中埋伏
成隊人就喺條爛路度一邊偵察一邊蹣跚前進
不過行行吓佢就發覺到有啲奇怪
除咗之前嗰輪炮聲外
一路行過嚟一啲戰鬥嘅跡象都冇
冇炮聲、冇硝煙、冇叫喊、冇難民
而沿路唔好話埋伏吖
連似樣啲嘅防禦工事都冇個
成個城就同完全冇事發生過一樣
整個行軍除咗條路爛啲同太陽曬啲外
真係順利得有啲詭異
就係咁
佢就喺平靜得令人心慌嘅情況下行咗十個鐘
終於喺30號晏晝時份到達里斯本喇

同朱諾將軍嘅預計完全唔同
成個里斯本
唔好話英軍吖
連葡軍都唔多個呀陰公

法軍入城
街道上充斥住出嚟睇熱鬧嘅平民
冇激烈抵抗又冇夾道歡迎
呢班滿身泥濘、衣衫襤褸嘅法軍感受到嘅
就只有圍觀者厭惡而略帶卑視嘅神情

堂堂佔領軍
竟然好似遊街示眾嘅囚犯咁入城
都可以話係尊嚴掃地喇

一行人尷尷尬尬咁行到葡萄牙嘅行政中心──宮殿廣場時
恭候多時嘅財長以及一眾攝政委員一字排開
喺財政大樓前歡迎佢地嘅“新老細”：
「喂朱諾將軍！好耐冇見喇！
最近幾好嗎
我代表攝政委員會歡迎你...」
財長嘅視線似有若無咁掃過朱諾身邊爛身爛勢嘅近衛隊
再堆起笑面：
「一路上辛苦晒
嚟嚟嚟我地已經幫你預備咗官邸㗎喇
兵營亦都準備好熱水同床鋪
係呢你地肚唔肚餓呀
埋嚟坐低飲碗熱湯先啦...」
朱諾將軍見到咁嘅陣勢當堂呆咗一呆
表情瞬間由錯愕變成鐵青：
「…喂喂喂咪住先
點解會係你出嚟交接㗎
攝政委員會？咩攝政委員會呀又？
若昂王子呢？
仲有尋日做乜會有炮火聲？
邊個開炮？英軍？
但係我又見唔到市內有戰鬥痕跡喎
你好講喇吓究竟你咩葫蘆賣咩藥」
財長：er...呢層...er...
忽然後方有個法軍揸住張紙急步行過嚟：
「報告將軍！我喺轉角個市集見到呢張通告！」
朱諾將軍睇完
塊面：>>>>>
佢一手抽起財長領口
紅都面晒咁大喝：「你而家即刻帶我去碼頭！」
一行人連跑帶走咁衝去貝倫港
只見到平時帆檣林立嘅海港一艘船都冇
而本應車水馬龍嘅碼頭
就只剩低三兩個收拾緊嘅咕喱
仲有14架裝滿財寶嘅牛車
而佢地嘅主人呢
就一早消失喺夕陽映照下嘅地平線後喇
朱諾將軍：

Fun Fact:

唔知有冇小朋友諗到嗰啲炮聲係點嚟呢
嗱呢度就講個差少少成為歷史轉捩點嘅“花絮”啦
時間返返去一日前即係29號朝早
葡萄牙艦隊總司令見海面漸趨平靜
風向亦轉為東南有利出港
喺得到若昂王子同意後決定起航
整支葡萄牙艦隊共18艘大大小小嘅戰艦
以及近卅艘王室租用嘅商船
齊齊起錨揚帆再緩緩駛向外海
咁當然事前都有派員知會過英艦隊啦
不過當起航時
佢地發現英艦隊喺上風位向自己排出戰列
所有炮門開啟
炮口亦都對準葡萄牙各艦隻
完全係準備開火嘅狀態
據英艦嘅航海日誌記載
當時英旗艦愛爾蘭號仲升起準備戰鬥嘅旗號
到底因乜解究英艦突然會反轉豬肚
原因唔係因為英國佬發現有咩古怪
而係因為一個人──
英艦隊嘅總司令薛尼·史密斯上將

薛尼·史密斯上將
佢參與過美國獨立戰爭
同沙俄交過手
又喺埃及成功擊退拿破崙
令佢成為同奶路臣同級嘅名將

呢位出名多疑、大膽同特立獨行嘅老將
從一開始就唔相信葡萄牙王室真係會放棄本土
佢認為若昂王子呢條面懵心精嘅肥仔
背後一定有咩陰謀
佢幻想咗一個近乎冇可能但又相當可怕嘅情境：
會唔會呢個根本係一個陷阱
萬一若昂王子已經秘密向拿破崙投誠
佢好可能會假借遷都嚟要求英國護航
引英艦隊嚟貝倫港呢個易守難攻嘅狹窄海灣
再襯機聯合一早喺里斯本埋伏嘅法軍殲擊本軍㗎喎
呢個本來一閃即逝嘅諗法
隨住時間推移同自己不斷腦補下
漸漸開始成型...
…係喎唔怪得之葡萄牙啲親法派咁順攤啦...
…係喎本來個市面咁混亂點知眨下眼就平靜晒等個肥仔咁易上船啦...
…話時話若昂一家到底係咪仲喺船上㗎...
…話時話啲貨係咪真係搬咗上船㗎...
…
越諗就越唔對路
越唔對路就越諗
所有嘢仿佛就係整個陰謀嘅一部分
喺呢個時候葡方派員嚟通知佢地即將起航
薛尼·史密斯上將神經即時繃緊
…仆街喇佢地做嘢喇
如果駛近我地時佢突然開火
我地咪變魚糧
唔得！傳令落去所有船炮口對準葡艦
一有咩依郁立刻同我送佢地去餵魚！！！
停泊喺馬耳他嘅愛爾蘭號（HMS Hibernia）
攝於1860年代

當時領航葡艦隊嘅
係旗艦皇家王子號
艦長名叫法蘭斯高·馬斯卡雷尼亞斯
作為喺1798年協助過奶路臣喺地中海追擊拿破崙遠征軍嘅老將
佢熟知佢呢位前隊友嘅“脾性”
己方只要一個失誤一個錯轉
對家都會毫不猶豫咁開火
到時呢個遷都大計
以及布拉干薩家嘅百年基業
就會化為灰燼
喺嗰一刻
葡萄牙、英國以至整個歐陸嘅命運
竟然都落喺呢個葡萄牙嘅艦長仔身上
不過所謂強將手下無弱兵
而家就睇吓
呢位若昂王子甘願將成副身家性命財產交托畀佢嘅艦長
係點樣三扒兩撥咁就化險為夷

喺呢個千鈞一髮之際
佢緊急下令所有葡艦緊閉炮門
跟住佢從望遠鏡中睇到
愛爾蘭號升起按兵不動嘅旗號
佢意識到史密斯上將似乎已經知道佢地並冇惡意
不過佢知咁仲未夠
佢通過旗手向愛爾蘭號發出要求靠近溝通嘅請求
喺得到同意後
皇家王子號緩緩駛近愛爾蘭號
並停靠喺大概一個船位、唔使望遠鏡都睇到對方嘅距離
然後佢就使開自己啲護衛
隻身走上甲板最當眼處
向愛爾蘭號艦橋方向行脫帽禮並深深鞠躬致謝
咁作為一個老派嘅海軍上將
史密斯從來都唔相信啲口蜜腹劍嘅外交辭令
不過嗰刻佢感受到嘅
係騎士間惺惺相惜嘅敬意
呢一瞬間
佢心中嘅疑慮終於被徹底消除喇
史密斯立刻走近艦邊
向馬斯卡雷尼亞斯上將回敬脫帽禮
並喺葡艦隊正式駛離里斯本港後
向佢地航行嘅方向行海軍最高嘅敬禮──
鳴放21響禮炮
朱諾將軍：＆$*@＾$＆
就係咁
呢場無厘頭得嚟又相當驚險嘅“危機”
就此由歷史嘅轉捩點
變成一個畀我呢亭講故佬攞嚟掗字數嘅“幕後花絮”喇

呢個就係呢套《王子著草記》嘅大結局喇
當然關於葡萄牙喺巴西嘅事仲有好多好多
礙於篇幅所限我就唔打算喺度展開喇
再離題嘅話我驚呢個系列真係會變有生之年
而家係咁意offtopic講少少
關於呢位被歷史嚴重低估嘅肥仔
去到巴西有咩搞作啦
佢地一行人喺1808年1月22號抵達巴西
若昂王子喺新大陸第一樣做嘅事
唔係搞咩慶典呀巡遊呀咁
而係草擬並簽署呢份嘢：

喺1808年1月28號簽署
《向友好國家開放港口敕令》

要知嗰時葡萄牙
得一個國家係“友好”嘅啫
睇個名都知
咁即係將巴西嘅貿易雙手奉上畀英國商人壟斷啦
佢深知邊個嘅數都走得
唯獨對住喬治·坎寧呢個仆街
就點都唔可以做牙偉
所以到埗後櫈都未坐暖就要找數

而佢另一樣要找嘅數就係出兵卡宴喇
差唔多喺一年後即係1809年1月12號
葡萄牙全面佔領卡宴
加上喺兩年內
英葡聯軍喺加勒比海掃場
攻佔埋法國兩個島仔

喺1804年法屬聖多明戈（即而家海地）獨立後
粗體字嗰兩個島就係法國喺加勒比海僅存嘅蔗糖同咖啡生產地

法國橫大西洋貿易正式清零
咁拿破崙想自閉啫
佢嘅國民同歐陸其他國家
對咖啡香料棉花蔗糖呢啲商品
都仲有好旺盛嘅消費需求㗎嘛
英葡兩國靠住走私貿易
賺取咗難以想像嘅錢
大陸封鎖自此徹底破功
另外若昂王子銳意全方位發展巴西
佢大肆興建公路、工廠、學校、圖書館
仲有之前因為驚“法國毒”喺殖民地散播而嚴令禁止嘅印刷廠

英國佬發明嘅斯坦厄普印刷機
當時喺貝倫碼頭有部啱啱喺英國運到箱都未拆
若昂王子知道後即刻帶埋過巴西

巴西嘅地位從此改變
再唔係畀宗主國榨取資源嘅殖民地
而係王國嘅本體
最終喺1815年12月16號
巴西被升格為與葡萄牙本土同等地位
葡萄牙、巴西和阿爾加維聯合王國正式成立

當然反攻大陸嘅事一啲都冇荒廢過啦
葡萄牙由巴西賺到嘅錢
就經英國轉送去資助本土嘅地下遊擊隊
呢啲遊擊隊要錢有錢要槍有槍
變得越嚟越有規模
英軍亦喺1808年7月
派咗個叫阿瑟·韋爾斯利嘅中將仔
率領為數9000人嘅部隊登陸葡萄牙
會合當地一支已經攻陷咗座城堡嘅遊擊隊
於8月21號喺里斯本附近嘅維梅魯村
擊敗我地嘅地獄黑仔王朱諾將軍
只係9個月
里斯本就解放咗喇
咁嗰時嘅佢都仲未係叫威靈頓公爵嘅

1815年啱啱喺滑鐵盧打完仗返英國嘅威靈頓公爵

嗱呢啲搞作
的確會喺冇幾耐之後令拿破崙焦頭爛額
不過對於呢位歐陸戰神嚟講
喺入主葡萄牙嘅嗰一刻
佢所感受到嘅
其實唔係將來呢堆煩惱
而係嗰種喺懸崖邊
凝視住個肥仔深不見底嘅算計時
背脊所滲出嚟嘅寒意...
喺收到朱諾將軍嘅報告後
拿破崙嘅內心就同佢個fd子一樣
都係土撥鼠慘叫.gif
...仆你個街吖你條死肥仔陰尻我
艦隊走咗、國庫減半
瑪莉亞女王、肥仔同佢所有繼承者又著晒草
而家搵阿水嚟簽份退位詔書呀
冇退位詔書
我統治葡萄牙仲有冇合法性可言
而里斯本先得廿萬人口
家下冇咗最精英嗰萬五人
其中大部分仲要係政府嘅中高層
整個國家運作即時陷入空轉
另外條肥撚最絕嘅
係將所有重要文件同官印
一係運走一係銷毀
要知喺嗰個資訊唔流通嘅年代
啲官印就同和聯勝支龍頭棍一樣
見印如見人
對啲全國各鄉鎮嘅公墓完嚟講
若昂王子係咩樣佢地未必知
不過就一定認得官方公文同上面嘅蠟印
而家啲法國佬同呢個所謂攝政委員會
話就話自己接管咗國家管理啫
但而家由中央所落嘅指令
正式官印又冇
簽名嘅又唔係平時聯絡開嗰個
最重要係話因為國庫虧空所以要遲啲出糧
佢地個即時反應就係：
你攞到官印出埋啲糧先同我講呀

聰明嘅小朋友可能會問
喂西班牙唔係法國fd子嚟嘅咩
因乜解究拿破崙要搞尻佢呢又
唔通呢位歐陸戰神真係咁貪得無厭
嗱呢層就要喺度同佢講兩句好說話喇
佢唔係單純想達成《歐陸制霸》呢個成就
而真係有個都幾急切嘅戰略需要
呢度就要簡單講講
三皇會戰後
拿破崙係點重整中歐嘅勢力平衡喇

...待續