喺非洲，每60秒就會過咗1分鐘(番外篇)-伊比利亞列傳

**本系列所有內容均基於史實**
**歡迎各位巴打一齊圍屌討論指正**

第一集
喺非洲, 每60秒就過咗1分鐘(一)由一杯雞尾酒開始講起(上)
https://lih.kg/2886280

第二集
喺非洲, 每60秒就過咗1分鐘(二)由一杯雞尾酒開始講起(下)
https://lih.kg/3156157

第三集
喺非洲, 每60秒就過咗1分鐘(三)柏林盛宴(上)
https://lih.kg/3328686

第四集（完整版）
喺非洲, 每60秒就過咗1分鐘(四)柏林盛宴(下)
https://is.gd/Penana1

第五集
喺非洲，每60秒就會過咗1分鐘(5)-波耳~波耳~波耳
https://lih.kg/3692239

上兩集個tone好似沉重咗少少
所以今集我決定離一離題
講吓啲喺拿破崙時期
發生喺呢個半島上面嗰兩隻牙嘅八卦嘢
等大家輕鬆吓先
至於同非洲脫殖呢個主題有咩關係呢
就留待下回再分解啦吓
一切要由呢位歐陸戰神最巔峰嘅時期講起...

話說第三次反法同盟戰爭下嘅法蘭西帝國
正被全歐洲圍屌
喺1805年12月2號
歐洲三大君皇──
神聖羅馬帝國嘅法蘭茲二世
俄羅斯帝國嘅亞歷山大一世
同法蘭西帝國嘅拿破崙一世
帶同佢地共14萬嘅軍隊
齊集喺波希米亞嘅奧斯特里茨村開拖
呢場被後世稱為「三皇會戰」、當時歐洲史上最大嘅戰役
最後由法蘭茲二世臨陣退縮、亞歷山大一世爭啲殉國BBQ
以及拿破崙徹底勝利作結

設計對白：打完就握握手做個好朋友ok?

師兄呀

跟住1806年8月6號
喺絕大部分德意志邦國過檔拿破崙新成立嘅萊茵邦聯後
法蘭茲二世被迫宣布解散神羅
呢個伏爾泰口中既唔神聖又唔羅馬更加唔係帝國嘅三不像
自始成為歷史名詞喇

拿破崙主導嘅萊茵邦聯同冇咗一大批屬國後被迫改國號嘅奧地利帝國
然後唔到三個月
喺10月25號法軍攻入柏林
腓特烈·威廉三世漏夜走佬去東普魯士首府柯尼斯堡等俄佬救兵
唔使一年
喺威能全開嘅拿破崙一輪歐陸無雙下
歐洲兩大勢力就畀佢打到我唔打喇.gif

柯尼斯堡即係而家俄羅斯嘅飛地加里寧格勒

喺勃蘭登堡門前嘅拿破崙

環顧四周
除咗畀隻火雞拖住後腳嘅北極熊外
成個歐洲就只有瑞典、葡萄牙
同埋嗰個浮喺英倫海峽對岸嘅屎忽鬼仲未臣服
頭嗰兩個就鵪鶉嚟嘅啫不足為患
不過英國就棘手啲喇
啱啱好喺一年前嘅特拉法加海戰
畀奶路臣個仆街用條命換走咗成支法西聯合艦隊
而家嘅拿破崙既冇心亦都冇力
去抗衡英國嘅海洋霸權喇
之但係由得佢隔岸伺機而動嘅話呢
成場仗個戰略主導權就會落喺佢度
得閒封吓我港口
得閒又畀佢資助吓啲fd子玩代理人戰爭
咁我咪好唔得閒

巔峰時期嘅拿破崙帝國
深綠色嘅係拿破崙直接控制
淺綠色嘅就係臣服於佢嘅政權

正當佢喺柏林攤開張地圖撚到頭都痕之際
忽然醒起樣嘢──
喂唔係喎以前就話驚畀佢地海陸兩路圍封啫
而家成個歐洲都差唔多係我嘅形狀喇
仲驚閪咩
嗱而家唔使麻煩啲英國佬封鎖我喇
我自己封返自己
拿破崙喺11月21號頒布《柏林敕令》
規定歐洲所有港口唔可以再接收英國嘅人同貨物
充公所有英國商品
禁絕一切同英國嘅貿易往來
我要黃豆都唔畀粒佢賺
同我餓撚死班仆街

大陸封鎖

同一時間
俄佬眼見本來隔住半個歐洲嘅拿破崙
眨下眼就嚟到門口
基於唇亡齒寒
佢正路都唔會想普魯士冧埋檔嘅
於是喺1807年1月開始反擊法軍
不過當時佢身陷第八次俄土戰爭分身乏術
東拼西湊下總算籌集到近9萬大軍
呢支臨時湊合嘅雜牌軍
當然就同送經驗值畀法軍冇乜分別啦
拿破崙喺6月14號以5萬兵力
擊潰前往解圍柯尼斯堡嘅7萬俄軍
亞歷山大一世為免蠟燭兩頭燒
決定化身尚書大人
喺7月7號同法國簽訂提爾西特條約
退出反法同盟之餘再掉轉頭同法國結盟
加入法國嘅大陸封鎖
另外順便同法國一齊喺普魯士割咁幾忽咁啦

留名兩年後再入返嚟睇

lm

得到甜頭後俄佬就食住上喇
喺拿破崙岌頭後
1808年2月俄佬以迫令瑞典加入大陸封鎖為由
派兵西出芬蘭灣入侵斯堪的納維亞半島
到第二年9月瑞典頂唔緊
就承諾加入大陸封鎖
兼割讓芬蘭地區畀俄佬求和喇
隨後俄羅斯成立芬蘭大公國
亞歷山大一世自任芬蘭大公


拿破崙對此表示👍
佢嘅大陸封鎖差唔多完成喇
除咗一個窿仔──今集個主角葡萄牙

作為英國喺歐陸歷史最悠久嘅貿易伙伴
佢地嘅經濟連繫千絲萬縷
要一下子斷晒所有交易嘅話
就同直接叫佢破產冇咩分別
所以葡萄牙一直都係你睇我唔到你睇我唔到咁

拿破崙心諗叫咗咁多聲都仲繼續
你個發霉廢國當我流㗎
於是佢喺1807年7月19號向葡萄牙發出最後通牒
要求喺11月1號前向英國船隻封鎖港口
驅逐境內所有英國人
同英國斷交並且宣戰
否則就攻入里斯本再解散葡萄牙王室
葡萄牙眼見冇得再拖喇
唯有死死地氣趕啲英國商船出港啦
法國：喂屌你呀份通牒有邊隻字你唔識呀
使唔使我譯番做葡文畀你呀
斷交呢宣戰呢
我仲見到啲英國佬喺里斯本街頭走嚟走去喎
你係咪玩嘢呀

對我咁有信心

拿破崙以葡萄牙唔遵照最後通牒為藉口
喺十月頭開始動員準備入侵葡萄牙
不過呢度有個小問題需要解決咗先
法國同葡萄牙並冇領土接壤
而海軍又收晒皮
入侵嘅唯一方法
就係經過今集另一個主角──西班牙
就咁雖則係盟國啫
不過話晒人地都係主權國吖
派咁大支軍隊過境
禮貌上都要人地同意先嘅
於是佢就叫西班牙派人嚟法國嘅楓丹白露宮傾喇
其實都冇乜嘢傾嘅
成個過程都只係法國代表𢵌份嘢出嚟
西班牙代表畫隻龜咁啫
1807年10月27號雙方簽訂楓丹白露密約
法國會派出近3萬士兵“解放”葡萄牙
西班牙會容許法國軍隊過境
並且提供相約數目部隊同軍需補給等嘅協助
呢啲都冇乜特別
不過份約關於戰後分贓嘅條文呢
就有啲故仔講吓喇

密約訂明戰後葡萄牙會被分成三份
首先中間最大包括首都里斯本嗰忽
就會由法國“托管”直至‘’和平‘’後交回葡萄牙王室
呢層就好正路嘅
事關成個葡萄牙最值錢嘅
就係里斯本呢座面向大西洋、擁有無盡王室瑰寶嘅港口城市
唔自己擸唔通益你西班牙佬咩
至於幾時“和平”就純粹睇拿破崙心情嘅啫
到渣乾渣淨咯咪掟返畀原本嘅布拉干薩家族囉

本來佢可以攞到更多嘅
可惜喺1755年11月1號朝早里斯本發生9級大地震吖
大部分珍寶都喺地震中被摧毀
跟住嚟嘅大海嘯又將剩低嘅捲出大西洋
仲有剩嘅就畀之後燒咗5日嘅焚城烈火燒埋
葡萄牙自始一蹶不振
逐漸成為發霉廢國喇

跟住落嚟嘅分配就真正感受到拿破崙嘅惡意喇
明眼人一睇就知
呢單刁擺明就係搵西班牙笨柒兼羞辱佢嘅
背後原因陣間再講
而家睇吓蒲面嘅先
首先北部包括波圖、布拉加等大城市嘅河間省
將會建立一個名為北盧西塔尼亞嘅王國
由西班牙波旁王室帕爾馬支系嘅卡洛二世做國王
而呢位仁兄本身喺意大利托斯卡納地區嘅領地
就會拼入法蘭西帝國

要知當時整個意大利最精華嘅地區
就係托斯卡納
而省會佛羅倫斯
更加係舉世聞名嘅歷史名城同紡織重鎮
加上靠近教廷呢個基督世界嘅中心
佢嘅經濟實力同影響力
自然就同波圖呢個位處歐洲邊陲、淨係得砵酒同《馬賽對波圖》嘅港口仔
完全唔係同一個層次啦
https://is.gd/Prohibited1
《馬賽對波圖》
未滿18歲者嚴禁進入
最盞鬼嘅其實係早幾年
拿破崙先喺意大利戰爭中
從哈布斯堡手上搶走托斯卡納再交畀波旁家族
用嚟換取同西班牙結盟
而家櫈都未坐暖就叫佢起身搬竇
咁樣畀拿破崙當臭四咁呼之則來揮之則去
咩顏面都冇晒啦
不過呢樣都仲未係最離譜嘅
因為更過份嘅就喺後頭

留名

成份密約最精彩嘅部份就係最後一件“贓物”
葡萄牙南部一大片肥沃嘅耕地
將會成立一個名為阿爾加維嘅親王國
而佢嘅新主人呢
就係西班牙首相、拿破崙口中西班牙嘅真正話事人曼紐·戈多伊喇

嗱雖然佢係首相一人之下萬人之上啫
正路都冇理由咁把炮分得仲大笪過東家㗎喎
咁就要講少少佢喺西班牙嘅“特殊”地位喇
時間返返去1784年
呢位當時17歲嘅沒落貴族後裔
憑住關係喺王宮𢯎到份守衛仔做吓
閒時冇嘢做佢就會攞起支結他坐埋一邊自彈自唱
相傳佢嘅音樂造詣相當高
往往都會吸引王宮入面嘅人駐足觀看
其中就包括當時嘅太子、第日嘅國王卡洛斯四世
以及佢堂妹兼表姨甥女兼老婆瑪麗亞·路易莎

太子

太子妃

Fun Fact:
你冇睇錯我冇講錯
呢對王室夫婦嘅關係真係咁複雜
首先瑪麗亞·路易莎個老豆
就係佢老爺個親細佬
所以喺父系呢邊佢地係堂兄妹
過年𢭃利是嗰時都唔知叫老爺定大伯好
至於佢老母嗰邊都係波旁家嘅人
佢阿公係法王路易十五
同時亦係佢老爺個堂大佬
呢兩公婆嘅祖先
都係指向同一個人──
太陽王路易十四個大太子
所以論資排輩嘅話
瑪麗亞·路易莎其實係要叫佢老公做表舅父嘅

可能你會話

咁啲歐洲貴族就梗係唔係變態先玩近親相姦啦
事實上一切都係為咗家族傳承啫
受教會制約
歐洲係行一夫一妻制
當然係男人都鍾意玩
有錢有權嘅話
你玩到膥袋下垂都唔會有人理你
不過就算你喺出面生隊足球隊都好
你嘅家業就只有正室所出先可以繼承
有仔傳仔
冇仔就傳女
仔女都冇呢就麻撚煩喇
要喺櫳底摷番份族譜出嚟劃鬼腳
如果一個唔覺意某個遠房祖先唔生性嫁咗個女出去
個爵位經母系血緣
劃吓劃吓劃咗去對家嗰邊呢
就真係屙拔甩喇
所以歐洲貴族嘅姻親關係
全部都經過精密計算
久而久之佢地就發展咗一種策略──
盡可能搵番自己家族成員嚟對襯家
咁就可以確保第日就算啲後代蛋都生唔到隻
隻鬼腳點都唔會劃出家族範圍啦

哈布斯堡家族就係其中最著名嘅例子
分咗家之後就奧地利支系同西班牙支系近親通婚
個女嫁畀堂兄弟
生出嚟嘅女又嫁番畀第二邊個舅父
兩邊個位咁傳嚟傳去
都唔知幾過癮
可惜劃到最後西班牙支系嗰個卡洛斯二世
因為幾代近親通婚累積落嚟嘅基因缺陷
令佢天生癲癇弱智兼生殖器發育不良
即係咁

而家隻鬼腳都斷撚埋仲點劃落去
哈布斯堡西班牙支系從此絕嗣
從而引發西班牙王位繼承戰
最後個位先流到落波旁家族度咋

咁卡洛斯四世呢對堂兄妹/表舅甥/夫婦嘅後代
又有冇啲咩古靈精怪嘅遺傳問題
令波旁王朝重蹈哈布斯堡家嘅覆轍呢
答案係冇嘅
縱觀瑪麗亞·路易莎一生
由1771年第一胎開始
到1799年最後一次流產正式收爐
總共陀咗23次
其中流產咗10次
出到世嘅就14個（其中一胎係孖仔）
最終有7個可以長大到成家立室
雖然小產同夭折數目都幾誇張
不過純粹係佢受孕次數多啫
計比率嘅話同一般貴族王室其實差唔多
而嗰7個死唔去嘅全部都冇明顯基因缺陷
仲為世人出產咗啲好正式嘅產物㖭

下任西班牙女王萊昂諾爾公主係卡洛斯四世嘅直系後裔
(好似係)

點解會話好似係呢
原因係來自瑪麗亞·路易莎嘅臨終告解
據為佢作臨終傅油聖禮嘅神父所講
呢位王后嘅遺言係：

「我所生嘅仔女，每一個，係每一個，都係私生子」

事實上佢自從13歲嫁入王宮後
關於佢同啲年輕男僕、侍衛之間嘅流言蜚語
就從未停過
睇到呢度
相信聰明嘅小朋友都會諗到
點解戈多伊呢個淪落到做侍衛仔嘅沒落貴族
可以做到位極人臣嘅首相啦
事實上佢由1784年入宮
到1792年以25歲之齡成為西班牙史上最年輕嘅首相
呢段極速上位嘅過程
背後最大助力
就係瑪麗亞·路易莎呢位人盡可夫嘅王后喇

戈多伊為王后展示“才華”示意圖

咁你會問喂卡洛斯四世死㗎咩
點解會由得個衰婆咁大頂帽笠落嚟
又由得個老襟咁樣獨攬大權把持朝政呢
咁就要講少少呢位西班牙歷史上有名嘅綠帽王喇

身為二公子嘅佢
個王位本來就唔輪到佢坐嘅
之所以佢最後做到國王
唔係因為佢有幾醒
而只係因為佢冇咁智障啫
佢大佬天生大腦痳痺口齒不清又癲癇
根本冇辦法繼承王位
所以個位先傳到畀佢
之但係呢位好聽啲講溫文內斂難聽啲講呢就自閉懦弱嘅毒撚國王
鍾情嘅就只有打獵同修理鐘錶
呢件毒撚生活習慣同啲亞氏保加症患者一樣相當規律
每日6點起身食個早餐梳洗完就出去打大半日獵
到傍晚就返歸匿埋喺房cosplay錶匠
玩到11點就訓覺
每日如是
至於獨守空房嘅嬌妻同國家大事呢啲聽落都唔知食唔食得嘅嘢
佢自然就唔會有精神同時間去理啦
咁你唔想理啫啲嘢都總要有人理㗎
尋求慰藉同治理國家呢啲粗重嘢
就唯有交畀王宮入面嗰位寂寞淫妻喇
1788年12月14號老國王卡洛斯三世駕崩享年72歲
卡洛斯四世正式登基
王后瑪麗亞·路易莎成為西班牙事實上嘅攝政
而戈多伊呢位唱住情歌風度翩翩嘅拉丁情人呢
就成為王后枕邊最重要嘅謀臣喇

呢幅係西班牙大畫家哥雅喺1800年所畫嘅《卡洛斯四世與家人》
從哥雅編排各人嘅企位就大概想像到
畫家以至當時人眼中對呢家人嘅印象
呢度會抽幾點講講
首先企C位嘅竟然唔係作為主角卡洛斯四世
而係王后瑪麗亞·路易莎
邊個主宰住呢個家族自然就不言而喻啦
另外哥雅有意無意間強調咗國王嘅毒撚性格
國王好突兀咁比其他角色企前咗一格
同佢家人似乎顯得相當疏離
而佢嘅肢體神態就同一個等緊影團體照嘅靦腆毒撚一樣
對閪眼尷尷尬尬咁唔知望去邊好
同「君臨天下」呢四個字相距何只十萬八千里

（網上隨機圖片與內文無關好似係）
與之相對係畫家點處理各潛在繼承者嘅神態
尤其係當時嘅太子、第日兩次繼承西班牙王國大統嘅斐迪南七世（左二藍色禮服）
除咗畫到個樣四四正正外
雙眼仲炯炯有神咁望向呢幅畫嘅受眾
而視覺上佢比佢老豆企得更加前
藍色窗簾+事後孔明式嘅解讀就係
年輕反叛嘅王子急欲去除呢對荒唐無能嘅父母
並取而代之
喺跟住落嚟嘅劇情佢會佔一個細小但關鍵嘅角色
至於再之後佢同佢個繼任者點樣為西班牙帶嚟更大嘅恥辱呢
就唔會喺度再展開喇費事離題太多
最後講講呢幅畫個重心──瑪麗亞·路易莎
喺度哥雅毫不掩飾經年累月嘅生育為王后所帶嚟嘅早衰
完全冇一般王室畫作中王后所呈現嗰種母儀天下
後世畫評家對此作出一個相當精闢而刻薄嘅評論
「中咗頭獎一夜暴富嘅雜貨舖老闆娘著起衣不稱身嘅禮服到畫室畫全家幅
而收咗錢做嘢嘅畫師喺背後一臉不屑咁冷眼旁觀呢一切」
圖中最後面暗處就係將自己畫埋入去嘅哥雅
（係喇冇錯喇碌番上少少望吓先啦）

憑藉國王同王后嘅縱容以及過人嘅政治手腕
戈多伊喺西班牙嘅勢力變得越嚟越強大
到咗1800年代
佢基本上已經成為主宰西班牙一切嘅獨裁者
不過就算佢點巴閉
都始終只係打工仔一名啫
佢嘅一切
都係來自嗰對不知所謂、民心背向嘅王室夫婦
喺嗰個王權話冧就冧、帝侯將相話剁就剁嘅革命年代
佢嘅權力根基其實一啲都唔穩固
呢樣佢係急需要填補嘅


路易十六嗰兩公婆畀人剁呢兩幕
每個歐洲國王諗起都會頸後一涼

呢層拿破崙就梗係知啦
所以先會喺楓丹白露密約度劃咁大笪地畀戈多伊
令佢成為真真正正有封地嘅貴族
而喺獲得歐洲最有權勢嘅君王加持後
戈多伊亦大大鞏固咗佢嘅權力基礎
咁簽份約時自然就會爽手啲
呢樣就係成份密約分贓表面嘅原因喇
不過正如我前文所講
拿破崙背後其實係有更大嘅陰謀
呢份紥住絲帶送到上門嘅厚禮
將會變成一隻特洛伊木馬
不過講之前
先睇睇一件當時令拿破崙揼晒春嘅“小事”

...待瀆

今次試吓新玩法
呢集預計分四部份
將會逢星期六出1part
最刺激嘅係以我嘅往績好可能會脫更