喺英國拍板後
若昂王子就秘密指令佢嘅親信
開始商議重點要撤離嘅人員名單
仲有清點金庫、財寶同一切必須帶走嘅重要檔案
以計算所需嘅運載力
跟住就根據估算喺全國港口準備足夠一萬人橫渡大西洋所需嘅糧水
然後又派員監察各親法派嘅一舉一動
而若昂王子自己亦都交足戲
三日唔埋兩日就搵啲親法派打探法國嗰邊口風
又成日憂心忡忡咁喺王宮踱步
一切都喺拿破崙眼皮下進行
由始至終
佢都冇發現佢眼中呢個肥仔背後嘅“陰謀”
或者佢根本就冇放葡萄牙呢個垃圾廢國在眼內啦
呢層就可以從入侵葡萄牙嘅軍隊中略知一二
組成呢支三萬大軍嘅
其實係法國預備隊員
雖然又唔可以話係烏合之眾嘅
不過同拿破崙親率嗰支“Grande Armée”比
當然就唔可以同日而語啦
而嗰時俄佬先啱啱簽咗提爾西特條約
佢同佢啲元帥要喺中歐𥄫實條約執行成點行唔開
所以佢就派咗佢個副官兼死黨朱諾將軍領軍
尚-安多什·朱諾
呢位自拿破崙喺土倫戰役崛起時已經出生入死嘅戰友
出名有勇無謀
打仗認真一般般
做到將軍可能只係因為佢係拿破崙fd子
派佢去純粹係佢做過駐葡萄牙大使
方便第日接管時交接順利啲啫
咁反映拿破崙都預呢場仗唔會激烈得去邊
派個忠誠嘅廢物帶支預備隊去都夠晒做啦
睇番成個安排
與其話朱諾帶領法軍入侵葡萄牙
不如話係法軍護送朱諾去葡萄牙履新
可能仲貼切啲
咁其實喺成個戰略部署上係好合理嘅
只係冇人諗到
個過程同結果會有咁多“驚喜”啫
而家就睇睇
拿破崙眼中呢個簡單任務會演變成點
