譽港灣生活配套方面新區商場同舊區民生嘢都用到
交通方面唔使揼雨去到啟德站,不過正常步速行過去都要10分鐘,當你中環返工地鐵都要轉3條線,除非對面有啱嘅巴士,否則交通都唔算十分方便
另外向太子道嗰邊嘅嘈音唔係人人頂到,景觀都比啟德嗰邊嘅新樓遮唒
向獅子山嗰邊就靜啲,但就望舊樓,要中高層景觀先開揚少少
仲有就係好近美沙酮中心,真2分鐘路就到,有小朋友老人家要認真考慮下
半島豪庭日常生活都依賴黃埔嗰邊,另外地鐵嗰邊都有個商場,不過規模對比起啟德嗰邊就細啲
交通方面都係唔使揼雨10分鐘去到紅磡,不過印象中全程無冷氣,駁去港鐵啲隧道得啲風扇,都幾焗下,但紅磡站就好方便,去中環15分鐘內到,另外紅隧口都好多巴士
景觀方面最好就向黃埔花園嗰邊,對比起新蒲崗嗰邊嘅舊樓,黃埔花園望落整齊好多,但要20樓以上先望得穿,望穿景觀就好開揚
不過要留意對面起緊新樓,好似都有30層高,半島某啲座向景觀會受阻,同埋預咗未來一段時間有噪音同埋塵土飛揚
仲有某啲座向會望到大酒店,附近多長生店,介意嘅話要好好考慮清楚
另外其實紅磡都有間美沙酮中心,不過距離半島好似遠少少
譽港有露台,都算好用,唔係啲濕9細露台
半島就無露台,印象中廳個窗台係好細,變相個廳望落就闊落啲
而印象中兩者嘅房都有大窗台
會所譽港就大啲多啲設施,半島就得個泳池,但管理費就反映返,半島平啲
樓齡就係硬傷,半島舊譽港10年,但樓價半島就貴啲
兩邊高質少少嘅兩房盤,半島要9頭至9尾,譽港就8尾都有交易
暫時諗到咁多,有錯請巴打指正/補充
