《六日東歐第三世界遊》摩爾多瓦+蘇聯最後淨土

依家到咗德攝斯頓河沿岸共和國

你指嘅呢度係羅馬尼亞？
除咗skoda 仲有咩車特別多

摩爾多瓦多唔多人揸lada

難怪巴打出過post問點樣將紅酒寄倉唔爛
啲酒咁平點會唔買返去

我搵返2017年去d相，都幾多Nissan

開頭講緊Transnistria，所以呢度我係講緊摩爾多瓦。摩爾多瓦好多人揸Benz同BMW

講起Tiraspol，尋晚影嘅

Lada係蘇聯嘅象徵 德左應該多啲

得農村同埋德河沿岸見到德河嗰邊特別多，仲要係有保養，好似古巴咁。

今日冇遊記

琴日好攰今日有時間會繼續寫

第三日續—前往突厥人嘅途上

一落咗車就衝返去hostel攞行李，因為晏咗走所以飛的去客運站。好彩最後趕得切，一上到車就發現有啲人嘅面孔有啲唔同，有啲人有東亞人嘅輪廓，我諗應該就係加告茲人。

加告茲同烏茲別克、土耳其人一樣都係突厥人。唔同嘅係佢哋係少數信奉東正教而非伊斯蘭教。由於信仰同文化都同保加利亞人好接近，係歷史上都會標記做保加利亞人/保加利亞原住民（因為保加利亞未有史拉夫人之前啲人係突厥人嚟）。喺鄂圖曼帝國統治摩爾多瓦嘅時候，因為加告茲唔係穆斯林，所以就唔使佢哋做自己人，好似羅馬尼亞人或者希臘人咁要交血稅（上繳童丁參軍效命鄂圖曼蘇丹），因此加告茲人長期都係散居於帝國西面黑海地區。直到俄土戰爭，俄國接收加告茲人將佢哋集中喺俄國比薩拉比亞省嘅一個地方，改名為Gagauziya，呢個地方曾經鬧過獨立，喺蘇聯解體嘅時候，佢哋曾經成功脫離蘇聯同摩爾多瓦獨立過6年。最後喺俄國斡旋下回歸摩爾多瓦，而摩爾多瓦就賦予自治嘅地位。

今次我去嘅地方係Gagauziya嘅首都Comrat。嗰度係最多加告茲人聚居嘅地方。車上坐我隔離嘅係一位烏克蘭人Денис，俄國入侵嘅時候佢咁啱喺英國，佢去過好多地方做嘢，例如阿拉斯加，我同我一樣都係未嚟過呢個地方，佢係嚟探朋友，佢話佢而家住喺愛爾蘭，平時喺當地烏克蘭僑民足球隊踢下波。佢原本住喺摩爾多瓦俾史太林搬咗比烏克蘭嘅地方，幾近敖德薩。佢話所以有好多羅馬尼亞人喺嗰度住，甚至係保加利亞人、阿爾巴尼亞人。

落咗車我就去咗hostel check in，行嘅時候留意到同Chișinău呢啲大城市唔同，靜好多，同埋冇人講羅馬尼亞文，大部份人都係講俄文，都有聽到人講加告茲文。政府大樓就會寫加告茲文、俄文同羅馬尼亞文，但係廣告商鋪招牌就只有俄文。

上去我間房嘅樓梯根本革硬嚟，我仲要拎住個篋，夜晚仲要冇燈

因為已經5點所以都冇乜地方行，我去咗附近嘅聖若望座堂，咁啱原來因為第日係聖額我略一世日所以做緊崇拜，入便同一般教堂冇乜分別，係見到好多石屎裂咗保過嘅痕跡。

入面嘅人幾友善，其中一個阿婆叫Екатарина，佢好好人，佢比張相我睇，佢話佢女婿係日本人叫Hiro，唔怪得佢見我呢啲生面孔嘅亞洲人咁熱情。嗰度嘅神職人員都好歡迎我，佢見我係教徒，個執事直接叫我上前俾神父傅油，雖然因為做唔到吿解食唔到聖餐，但係佢哋咁好人都真係唔錯。出咗教堂我就求其搵咗間餐廳食飯，跟住就返去休息。

有冇兌匯黑市俄羅斯盧布？

冇，因為冇需要用

第四日：短遊小鎮再出發共產陣地

起身就去咗一間加告茲嘅博物館，可能近年多咗遊客認識加告茲呢個地方，有位退咗休嘅阿伯叫Георгий，佢40年前喺Chișinău嘅大學讀書嘅時候學過英文，直接同我用英文溝通，佢嘅英文有返啲水準，而家退休佢就做導賞員。佢係每個展館都好詳細咁介紹加告茲嘅歷史同文化，佢自己係加告茲人，識講3種外語：羅馬尼亞文、俄文、土耳其文，以前係紅軍傘兵，去過阿爾泰山服役。我亦都同佢了解過當地嘅地緣政治，因為歷史上加告茲受惠於俄國，再加上長期受壓於國內最大民族羅馬尼亞人，所以佢哋特別係政府好親俄，反對統一同埋加入歐盟。但係Георгий佢都反對德河嘅分離。佢好好人，好用心介紹，講好多自身嘅經歷。又話今年11月係紅酒節叫我過嚟參加，帶埋啲朋友過嚟。

加告茲人傳統上務農維生，所以有好多農具，有個係用嚟收集葵花籽嘅，又有織布機、絲綢，全部都至少6-70年歷史，有啲直情過百年，但係佢都直接攞上手，冇爛之餘仲用得，果然舊嘢永遠係最硬正，仲有傳統用豬皮整嘅草鞋，佢話以前阿爸有整俾佢，可以着到3年。有啲古錢幣，比較特別嘅係蒙古帝國嘅，上面仔細睇係寫住蒙古蛇仔文，係之前加告茲人喺欽察（金帳汗國）遷徙過嚟嘅時候留低嘅。


參觀完博物館，我就去咗附近嘅中央街市。呢個冇Chișinău嗰個咁大，都係賣日常生活用品為主，我見到有檔買一轉轉好似英泥咁嘅轉頭見，原來係哈爾瓦酥糖，味道類似龍鬚糖，係用葵花籽整嘅。我要半磚，個阿婆話唔收我錢當送俾我。

Comrat都係出名紅酒，佢哋直情有一個好大嘅酒莊種提子同釀酒。佢有間餐廳，我決定去嗰度食個飯，間酒莊喺一條小河對面，嗰條路嘅周圍非常破落，唔講以為已經荒廢咗，但其實仲有人住

我就嗌咗一隻鴨髀同一杯呢度釀製嘅薩博維Saperavi，呢種提子源自格魯吉亞。食完個侍應帶我參觀佢哋嘅蘇聯博物館。裏面有好多之前蘇聯嘅嘢。

返去攞返行李就出發去巴士站搭小巴去德河，原本2:45就應該要到但係成班車消失咗。結果等到4點先有車。坐住呢架亡命小巴嗷足兩個鐘之後，終於去到關口。因為有俄軍駐守，所以唔可以影相，車上嘅人都要落車排隊過關，交底護照，過我會住邊間住佢就俾咗張移民卡，上面有寫我嘅國籍，好奇如果係BNO去，究竟會寫英國定係香港？因為張卡太單薄，費事唔見，我索性攞皺紋膠紙痴住。上返車就一路坐到去Tiraspol。一落車就遇到大貴人。有個同車嘅女仔叫Елена，佢男友Артем嚟接佢，佢哋都識講英文，叫上佢哋車，車我去到hostel。我呢幾日喺德河基本上都用唔到數據，因為摩爾多瓦嘅電訊商係唔支援德河，一定要用德河本地電訊商嘅電話卡，但係因為我喺度得嗰兩日就費事。所以喺街係用唔到Google map搵路。佢哋一路送到去我hostel門口。佢哋仲問我如果想嘅話可以第日帶我行吓成個城。

放低行李就嗱嗱臨搵嘢食，去咗間叫回到蘇聯嘅餐廳，係啲主題餐廳，我開頭只係諗住嗌一碟炸鱸魚跟一杯白酒，但係個侍應又話加碟唔知咩好，我諗住應該係啲小菜就算數，結果個碟鱸魚細到魚毛咁，又硬又嚡，跟住個侍應推薦個碟我時候睇返張單原來係鱘魚嚟，幾好食，燒得唔錯，所以好撚貴，得嗰4舊收我₽170（$102），食完我就大檸樂，因為呢度所有櫃員機都唔收visa card，所以冇得撳錢，啲現金用完就冇，本身已經係旅行尾聲所以冇好多銀紙剩，所以之後嗰幾餐慳得就慳。

講返我住嗰間hostel，佢係5、60年代嘅公屋，俾香港啲私樓呢度地方好大

第五日：探索唔係好共產嘅共產國家

雖然德攝斯頓河沿岸共和國支國旗抄足蘇聯，但就同白俄一樣唔係北韓嗰種。我開頭以為就算首都會溶溶爛爛，但係完全唔係一回事，所有大嘅馬路都係新鋪嘅，大部份交通燈有埋計時器，條街好乾淨冇垃圾，淨係見過一個乞衣。本身住嘅地方就係成個城市嘅中心，Артем話蘇聯城市嘅中心一定會有郵局，所以我住嗰棟對面就係郵局。由Тирасполь蘇維埃（代表大會/議會）大樓開始行，呢座大樓都算係地標之一，特別係列寧像，而家好多前蘇聯嘅地方都已經拆咗。門牌上面寫住3種官方語言羅馬尼亞文、俄文同烏克蘭文。

之所以有烏克蘭文係因為國內好幾成人都係烏克蘭人，因為自古以嚟，羅馬尼亞摩爾多瓦同羅斯（及後嘅烏克蘭）係以德攝頓河為界右岸係烏克蘭，左岸係羅馬尼亞。但係喺戰間期，蘇聯為咗同羅馬尼亞對立，就喺蘇治烏克蘭邊境德河右岸建立摩爾多瓦自治共和國，所以蘇治摩爾多瓦唔係二戰之後先有，喺戰後吞併摩爾多瓦嘅時候就連埋右岸嘅烏克蘭自治區併入摩爾多瓦，所以今時今日德河沿岸共和國有多人係土身喺右岸嘅烏克蘭。Артем就係其中一位。所以佢屋企講烏克蘭文，同其他人溝通就用俄文。

而呢度嘅羅馬尼亞文依然係用西里爾字母，從呢樣睇得出德河沿岸共和國基本上就係蘇治摩爾多瓦嘅直接繼承。

我一路喺十月廿五街行，沿途嘅建築人都係充滿蘇聯嘅簡約風格。

蘇聯建築好興有浮雕同埋瑪賽克

呢度雖然看似係共產國家，但係其實依然有教堂。


之後就行到去蘇沃洛夫像，佢係俄羅斯、神聖羅馬帝國、薩丁尼亞三國嘅元帥， 佢趕走鄂圖曼帝國喺摩爾多瓦嘅勢力之後，建立咗Тирасполь呢座城市。座雕像身處於葉卡捷琳娜公園。

其實德河沿岸共和國係有兩個國家承認，分別係南奧塞梯同阿布哈茲，不過佢對都係俄國分離傀儡國，有趣嘅係俄國並冇承認所以佢哋喺德河沿岸共和國只有領事館。

再行過啲嘅係紀念德河獨立戰爭嘅陣亡士兵。

最後就行到最高蘇維埃大樓（國會），呢度都係有咗列寧像。

條街好似冇人咁

而家淡季，加上冬天，啲人都留返喺室內所以條街冇乜人

想問下巴打去呢度最大原因係乜野？
個地方少人去？宗教？歷史？

原因有好多，主要係聽講呢度好窮，同埋呢度嘅政治形勢好特別，想視察下民情，當然呢樣同歷史又有關係

德左同摩爾多瓦物價比較

我覺得差唔多

Lm抄plan

巴打有諗住去呢度？