病態老師 續

Push

多謝Ching推post

多謝Ching推post

第二十一章

情報都收集得七七八八，我都準備為聽日做準備。

「多謝你哋抽時間搵我，身為老師嘅我覺得好欣感。有啲咩事我哋再聯絡！」

於是，我離開咗快餐店。

Brianna對住Adolf打咗眼色，示意佢離開。

依家只係剩低Brianna同Eve係快餐店。

「終於得番我哋兩個！」

「請問何事？Brianna？」

「我都唔轉彎抹角，我想知道你對阿Sir嘅感覺係點？」

「對阿Sir，嗯......咪朋友關係！」

「真係得咁多？」

「係呀，我本來喺班入面就好少朋友，咁啱我同阿Sir咁夾咪做到朋友！」

Brianna無奈咁嘆咗唔少氣，唔明點解Kane揀個對佢無感覺嘅人。

「咁Kevin呢？我之前見你哋行咁埋，應該去到拍拖階段啦？」

「一樣，都係朋友！」

「如果係阿Sir同Kevin，你個揀邊個？我好想了解一下？」

「嗯......Brianna，唔係樣樣都好似你諗到咁，呢個世界無非黑即白嘅嘢。再加上我同Kevin成為朋友唔係因為比佢嘅形象吸引到，而係我收到啲情報......」

Brianna對Eve所講嘅內容感到好奇。

「......係Kevin親口同我講，佢話佢收到一個匿名電話，入面有阿Sir嘅弱點咁樣！」

「佢竟然會將秘密分享比你......」

「就好似我之前所講，Kevin缺乏嘅係愛，只要比多少少支援佢，佢就自然當你係朋友，將所有事情都分享比你！而我就係『將計就計』......但點都好，關於你最想知嘅嘢，我打算等呢件事完美結束之後，我就會同阿Sir表明我嘅立場。我哋再電話聯絡，係咁先！」

「Eve！你講哂咩『將計就計』先，唔好走.....」

但Eve已經離開咗Brianna嘅視線，Brianna點追都追唔到。

第二十章

「Kam Sir, 我聽番Brianna同我講咗你做咗Secret嘅主角之後無再喺學校番工，我同Brianna都想見一見你，唔知可唔可以？」

我應承咗佢哋之後相約咗係一個快餐店到等。

我依家叫做休假狀態嘅關係，成個朝早不所事事，去到下午至見到佢哋。

「你哋嚟咗喇！」

「阿Sir，對唔住，係我累咗你！」

Brianna率先同我道歉；比起以往嘅關係，依家好明顯比較生疏。

「唔係你嘅錯，我知你都唔想嘅！」

我安撫Brianna不安嘅情緒。

「Kam Sir，我哋今日轉咁由第二位老師教我哋，人夾人果然係無錯。呢份老師教得好悶，佢只係識照書讀！好想快啲Study leave！」

「阿Sir，唔知你幾時再番嚟？」

兩位明顯地唔係太滿意學校嘅安排，既然我同佢哋都熟絡，我決定將真話講出嚟。

「吓，佢哋依家仲有講緊你嘅嘢喎，就連老師都拎你嚟抽水，仲話我哋大個咗唔好溝學生妹咁話喎！」

聽到Adolf講嘅嘢，完全闡述「人走茶涼」嘅意思。

我不禁嘆咗口氣，但我依家做嘅都係等消息番工。

「Brianna，我一定會搵出個兇手。不過，我都需要重整一下事件......」

我分析事件嘅經過。

「首先係Brianna同我去咗天台，果時太陽就嚟落山，應該係果陣時比人偷影。我好好奇想知嘅係，佢點樣知道我同Brianna喺天台，同埋點解張相只係聚焦落我身上？呢一點我有啲好奇。」

「會唔會係佢唔想比我哋知道佢嘅存在，話哂天台道門開關比較大聲，如果為咗影得清楚嘅情況下要開門偷影，我哋會察覺到佢嘅存在。另外，天台道門有個長方形中空，中間啲空隙放個鏡頭做偷影動作。」

「嗯......呢個都解得通，所以佢能夠喺無聲無息之下作案。但我諗唔明嘅係，兇手點樣知道我哋喺天台呢？」

傾傾下，我回想起以前嘅經歷，我曾經試過我同Brianna或者Eve單獨見面嘅時候好似比人打斷過，我腦海好似諗起一個人，我內心有少少心寒。

「我好似諗到啲嘢，但未有證據，所以我有一個計劃引佢出嚟，就係......」

正當我想講出我嘅計劃之時，突然出現咗一個人，而佢嘅出現令我心如鹿撞，佢就係Eve。

「你嚟咗喇......」

雖然是Brianna約Eve出嚟，但Brianna見到Eve嘅時候只係冷冰冰咁同佢打個招呼。可能係佢知道我嘅對象係佢而嫉妒。

「Hello，阿Sir，我聽番學校得知關於你嘅事。自問我都幫得唔多但我都希望你能夠Move on到！」

「嗯！多謝！」

自從我發現到Eve嘅IG之後，同佢傾計好似有咗個隔膜，而呢個隔膜就係自己嘅內心建築而成，講白啲即係淆底。

「Eve，我叫得你出嚟，係想知道你同Kevin嘅關係，我希望你坦白同我哋講！」

Brianna一面不友善嘅目光問Eve，只見Eve面帶微笑。

「當然係朋友啦！」

就算Eve咁樣答，我都半信半疑，我寧願Eve好直接講同Kevin一齊比我死咗條心。

眼見其他人都鴉雀無聲，我率先開口。

「Kevin係咪威脅你，如果係真嘅話唔怕同我哋講！」

「阿Sir，你信我啦，其實Kevin內心好善良，只係環境迫成佢咁，所以我好想比啲希望佢！另外，阿Sir，我有啲嘢想同你講，你仲記唔記得我比咗幅畫你睇，無論學生發生啲咩事都好，其實佢哋都係等緊你引導佢哋！」

既然佢講到咁，我只能夠相信佢。

加速

第二十二章

某一日嘅放學時間，一如以往上完沉悶嘅堂，回想起啱啱上堂對住一班嘈喧巴閉嘅同學，佢只係默默咁拎住份功課獨自完成。唔同嘅係以前可以問Kane，但自從Kane休假之後，新嘅老師完全教唔明，佢唔係未試過但奈何呢位老師只係照書讀，根本聽唔明老師嘅解釋，只好放棄。

佢有少少後悔當初所做嘅決定，明明能夠以文明啲嘅方式解決。但佢一意孤行，寧願選擇一拍兩散。

「又係時候放學，今日已經係第七日無見，好掛住阿Sir教我嘅情境！」

佢嘆咗口氣，正當佢想番屋企之際，佢打開手機。

「咦，乜阿Sir唔係無番工咩，點解佢會喺學校，仲要係天台？」

佢心入面有種疑惑，打開手機後睇到GPS所顯示嘅位置。

二話不說，佢走咗上天台。究竟係為咗解題而感到釋懷定能夠見到佢最在意嘅人，只有佢本人至知。而依家嘅結果就係Kane喺天台，只要上到天台就會同佢見面。

遺憾嘅係，天台上面係無人，有嘅只係一個平時Kane揹住嘅背囊同埋有一張紙喺天台嘅石壆上面。

「呢一張唔通係遺書？」

佢小心翼翼咁拎咗張嚟閱讀。

「相信你睇到呢封信嘅時候，我已經唔係到。

呢半年嚟我受夠了！除咗番工受夠之外，仲要晚晚OT，為嘅只係三餐溫飽；好彩我遇到一班好似朋友嘅學生，今次同佢哋傾計我至能夠做自己。

我仲好記得Adolf係一個百厭仔到依家好肯聽老師說，為自己目標而奮鬥。

Brianna，好興幸同到佢做到朋友。本來我第一次見到佢嘅外表，再加上自己冷冰冰嘅個性唔會同佢混熟到，但我比佢嘅熱情打動到。之後同佢嘅種種經歷唔能夠用文字嚟形容。

Eve，佢算係啟發我諗法嘅學生吧？係我諗唔到方向嘅時候佢會比到個最適合嘅做法，間接幫我處理好突發事情。

遺憾地，近日我成為咗故事嘅主角，綽號由Kam Sir改為狗公。令我聲名以及職業生涯都大受負面影響，對於外界對我嘅聲音，我接受唔到外在壓力，唯有走上絕路至係為我解脫嘅方法。

最後，其實我仲有一位學生唔記得咗就係Candy。我明白到其實佢係一個需要人哋幫佢但奈何班上面真係少朋友，我唯有出手相助。我走咗之後希望佢能夠自己處理難題，唔好自暴自棄！

Kane 字」

我睇到呢到隻眼濕濕地，為咗同Brianna爭阿Sir，結果令到阿Sir因為呢個事故而選擇輕生。明明我喺阿Sir入面原來咁重要，我居然做出呢啲事，我覺得自己好犯賤！

「除咗對唔住之外，我都唔知講咩好。」

「所以張相放上Secret係你嘅所作所為？」

「係.....咦，呢把聲咪阿Sir？」

我見到阿Sir心情輕奮到合唔埋口。

但我聽到嘅係只係佢冷冷嘅講咗一句。

「原來係因為你嘅所作所為令我到周身蟻，我要一個合理嘅解釋，Candy！」

第二十三章

「我要一個合理嘅解釋！」

我怒瞪住Candy，只見到Candy眼中流出淚光而說不出聲。

其實喺揭發兇手之前，我心入面有個底。

————

「你哋覺得係邊個會做出偷影嘅行為？」

「阿Sir，雖然我唔知係咪錯覺，總覺得當每一次我哋同阿Sir傾計嘅時候，都會出現一個人......」

Eve回想起以往我同學生傾計嘅時候指出一個論點。不論係因為匿名事件而安慰Brianna同埋Eve同我上天台討論夢想，Candy總會喺一個唔恰當嘅時候出嚟。

「阿Sir，你覺得其實佢喺知情嘅情況下出現？」

「Eve，你嘅意思係...？」

「唔係我猜疑佢，但出現嘅時機令我覺得好奇怪，佢好似知道阿Sir出現喺到咁！」

「你嘅意思指你懷疑佢手上有追踪器？」

Eve點頭。

千算萬算，我都估唔到我都有被跟踪嘅一日。明明我只係一個好平凡嘅人。

「仲有嘅就啱啱嘅唔解答嘅問題，就係點解佢往往喺重要關頭情況下出現？直覺講比我知，呢位叫Candy嘅同學好似對你有啲嘢，你有無呢個感覺，阿Sir？」

『哼，阿Sir你都係唔識氹女仔，算啦！』

腦海入面我回憶起呢一句，其實呢句足以證明Candy對我係有好感，可惜嘅係我對佢無感。

————

呢段係我同快餐店同Eve嘅對話所得出嘅結論。亦證明我哋無估錯真兇就係Candy。

「你將你所知道嘅事一五一十咁講比我知！」

只見到Candy搖搖頭，唔想承認呢個事實。

「既然係咁，我將呢件事公開比所有人聽！」

「唔好，我講！」

「終於肯承認......你呢個罪魁禍首......」

「對唔住！」

Candy只係一味抱歉亦講唔出其他句子。

「我想問，我身上係咪有個跟踪器？」

「嗯！」

Candy老實咁點點頭。

「唉......何必呢？但點解你要咁做......？」

雖然心入面有個底，但循例都要問下佢嘅動機。

「我之前咪講過，你同啲女學生行得好埋。坦白講，我好妒忌 。同埋你唔好以為我唔知，我完全感受唔到你對我有好感，淨係識話我，講說話比我聽。我都係女仔，我都有感覺嫁！」

唔通呢啲都算係表白嘅一種。以往我同Max都會拎呢類人同佢（或者同我）做配對作為開玩笑；但當事情真正發生嘅時候，我發現一啲都唔好笑，比呢類人鍾意幾乎唔咩可能甩到身。

比無好感嘅人追真係可一不可再，依家真係騎虎難下。

我唔想對佢嘅言論作任何回應，我只係想快快趣完結呢單嘢。

『無論學生發生啲咩事都好，其實佢哋都係等緊你引導佢哋！』

我回憶起Eve同我提及過嘅內容。

第二十四章

以下呢一章會由Kevin作為視點，時間回溯至同Kane發生衝突之後。

我都係第一次見到Kam Sir暴走嘅樣子，睇嚟我嘅計劃成功咗。

「阿Sir睇落好可憐.....」

道出呢句正正係Eve。

「可能係阿Sir壓力太大姐，唔洗太在意啦！」

「望就咁望啦。係呢，Kevin！今個周末你得唔得閒？」

「嗯......做咩？」

雖然我係同Eve行埋一齊，但現實上同Eve都係點頭之交。我都係喺開溫習小組之後至認識佢。好坦白講佢同Brianna唔同，佢比到一種平易近人嘅感覺，完全唔擺架子。

「我有朋友比咗張遊樂場嘅門券，但我手上有兩張。又搵唔到人同我去，唔知你介唔介意.....」

我無聽錯，唔通呢啲就係約......約會？

只見Eve拎張門券放響塊面，個身扭扭擰擰咁。我見到佢嘅動作覺得佢嘅動作好可愛！

死喇，我諗緊啲咩？

就算我依家個打扮係一個正常人都好，但對異性嘅溝通都係有種說唔出的障礙。

我點咗一下頭，表示同意。

「好耶，張飛終於有着落喇。Kevin，咁到時不見不散啦！」

————

我打開段訊息之後，內心狂喜，真係有趣，我自問我所作所為都好癲，原來呢個世界原來有比我嘅行為更瘋狂。

呢段訊息竟然講比我知到Kam Sir嘅秘密。

入面有四張相，Kam Sir分別同包括Adolf，Brianna，Eve同Candy一齊嘅偷拍照。

信息仲補咗一句：佢哋就係Kam Sir嘅弱點。

我諗番起Kam Sir今日火氣旺盛，就判斷消息來源係真嘅。

假如我成功令Eve做埋我女朋友，唔知Kam Sir嘅心理陰影面積有機大。我諗起Kam Sir絕望嘅樣就忍唔住笑。

我決心好好打扮一下自己，準備今個星期六嘅約會。

————

如是者到咗星期六，唔知係咪佢期待去主題公園嘅關係，Eve好早就喺門口等我。

「Kevin，快啲啦，時間唔等人嫁！」

係我毫無先兆底下被佢雙手拉咗我入去，我完全反應唔切。唔通呢個就係戀愛嘅感覺？我咁大個仔都係比人拖手仔。

首先都係排下隊玩下入面嘅機動遊戲，坦白講我都係第一次玩咁刺激嘅遊戲，嚴格嚟講我係第一次嚟主題樂園。講真兩個問題啦，一個係錢另一個係無朋友。

「刺唔刺激呀Kevin？」

啱啱玩果個係過山車，估唔到佢一嚟就打大佬，佢玩果個過山車隻腳係無得踏，腳要凌空放，從過山車準備行上斜嘅時候，我心入面一值喺到背乘數表，由1開始，希望背到10乘10嘅時候就玩完個過山車。

我好佩服自己喺轉咗360度N次嘅地獄過山車之旅生存落嚟。

「想唔想再Encore呀？」

「吓，嗯......都得嘅！」

為咗展現自己嘅強悍，我逞強話自己無問題。

「傻瓜，我講笑炸。不如玩啲靜態啲嘅！」

頓時我至鬆咗口氣。

話雖靜態，但今日所做嘅運動量應該係呢一年所有行路步距嘅總和。Eve實在好鍾意主題樂園入面嘅吉祥物，每見到一個卡通人物，佢就急急腳走過去同佢合照，揸機果位唔洗問一定係我啦。不過，見到Eve做嘅每一個姿勢都好似吸引我眼球，諗番起啱先嘅付出都覺得值得。

「Kevin，不如我哋影番張合照？」

「嗯......好......」

我接過Eve嘅手機，轉咗做自拍模式。

「1，2，Cheese！」

「呢一張相我之後發比你！」

「Eve，話說阿Sir佢有無好番啲！」

循例上我都關心下我嘅目標人物。

「嗯...我都唔清楚，可能好啲掛...」

我都估唔到嘅係Eve居然答得咁無棱兩可。感覺上佢有啲嘢瞞住我。

「玩咗咁耐，不如我哋買啲野食先！」

始終主題樂園入面啲野食實在太貴，我哋都係係咁依買咗包粟米就算，無計，我都只係學生哥。無打過工，金錢自然係我嘅考慮因素。

「Kevin，你擘大口，呀～」

「我？嗯，呀～」

我完全捉唔到Eve嘅一舉一動，唔知點解我覺得我嘅關係不知不覺咁行近咗。

Eve吹一吹匙上嘅粟米放咗入我口。

「小心睇熱！」

呢種細心嘅行為都係第一次感受到。我頓時覺得自己呢一刻好享受。諗番起自己花咁多時間追Brianna至發現原來對自己好嘅人就喺附近。

諗番起Kam Sir果一日點解會因為Eve而暴走，或者就係呢個原因——沉船。Eve由外到內，再由內到外都討人歡喜，我反而有一個疑問，係男人眼中，Eve簡直係荀盤嚟但佢一直都係單身，我諗極都諗唔明。

如是者，我同Eve行咗好多地方，又玩咗好多攤位遊戲，同卡通人物合照，打卡，仲有我最怕嘅機動遊戲。

天氣漸近黃昏，我同Eve面對面坐喺纜車入面。

「今日我玩我好開心，我有啲嘢想送比你！」

我收咗Eve比我嘅圖作，入面有一隻受咗傷羊披住狼皮，對住啲羊群虎視眈眈但遲遲唔出手。

「你睇唔睇得明入面嘅意思？」

「畫師，我就聽下你嘅演繹！」

「其實入面隻狼（羊）係你嚟，雖然你好想做出一啲行為令自己快樂而傷害別人，但係依個並唔係你嘅身份，而你只係好想做一隻自由自在嘅羊。唔知我有無解讀錯？」

我頓時明白Eve言下之意同目的。

「我好妒忌！明明我只係想追求屬於自己嘅幸福，奈何我不但無感動到人，反而受到嘅係唾棄。呢個世界就係咁唔公平，點解Kam Sir就咁受學生歡迎而我唔得？」

「會唔會就係因為方式唔啱？同埋我發現到其實你對比以前嘅你係有進步，起碼喺衣服方面都得體！」

「咁都係有人教路姐，我反而想問一問你，你係咪因為Kam Sir而嚟？」

氣氛頓時冷卻落嚟，良久Eve至打開沉寂氣氛。

「我今日只係想做你一日女朋友，如果你有啲咩心事，我好想聽你傾訴！」

依家變做我按唔到Eve嘅句子。

臭雞Eve

第二十五章

以下呢一章會由Destiny作為視點。

估唔到玩到咁大，Kam Sir比人傳出同學生妹有路，真係有趣，但確實係我已料之內。

Adolf，Brianna，Cindy，Eve——呢四位學生叫做同Kam Sir最熟，今次唔食午膳定放學嘅時候我都見到阿Sir同其中一位學生有聯繫緊。點解我會知？時間追溯番Adolf留堂果一日。

「故事係咪好沉悶，但呢個就係人生。」

原來Kam Sir同Adolf講緊人生經，但佢有無發現Eve一直喺課室，明明係講秘密點解唔檢查一下係咪所有人走哂至講？真係好傻好天真。

之後到咗Brianna比人滋擾果一日，放咗學之後Kam Sir同Eve
傾計。

「如果想了解一個人嘅內心世界，比起發問，倒不如將你代入佢嘅內心世界！」

後尾先知原來Kam Sir搵Eve做軍師，我都明嘅，女人嘅煩惱都只有女人至解決，Kam Sir做呢個決定都係明智嘅。

我開始喺到諗Kam Sir係咪對學生妹有感覺。但究竟係Brianna定Eve呢？果陣時我仲未好清楚。

再過多幾日之後，有一次我無意聽到隔離班，即係Kam Sir果一班傳出啲聲音。身為情報通嘅我梗係八掛睇下，唔睇尤至可，一睇就發現到Kam Sir嘅另一面。

從Kam Sir同Candy嘅對答中，我察覺到Kam Sir對Candy產生「惡」嘅感覺，於是我決定出手。

我拎起手上另一部手機（匿名用）聯絡Candy。

「Candy，我係呢一間學校嘅情報通，啱先我觀察到你同Kam Sir吹水，我知你係好想同Kam Sir更進一步但佢好似同你有啲距離感。想唔想知點解？」

「你係邊個？點解你會知道呢單嘢？」

「我係邊個唔係重點，重點係我收到情報，Kam Sir同好多女學生做朋友。最緊要嘅係，我企喺你果邊嘅！」

「證據？」

「我都知道你未必完全信我，今日放學操場等！」

咁當然我唔係睇身同Candy見面。我做好準備之後，等到放咗學之後我再透過whatsapp同Candy聯絡。

「我知你到咗操場，你依家打開左上角嘅locker，密碼鎖嘅密碼係5555。入面有個護身符，咁當然護身符有個微型GPS，只要你親身比到Kam Sir，就會睇到你口中嘅『證據』。」

如我所料，佢真係送咗護身符比Kam Sir，之後一次又一次見到Kam Sir同啲學生妹有曖昧行為。

喺Kam Sir開解Brianna嘅時候打擾一次；喺天台同Eve傾計又打擾一次。究竟有幾唔識睇場合至造就三番四次打斷他人對話。

我依家就好似一位戰地記者咁身處戰場，而呢場戰爭好快一觸即發，咁當然我係會介入啦（以匿名身份）。

「情報通，我感受到阿Sir唔係好理我，應該點做好？」

哎呀呀，我幾時做咗感情顧問，當然，我都會盡力提供合適嘅建議佢。

「死纏難打，總有一日會被你真情打動到！加油！」

以我觀察嘅Kam Sir，佢一早就已經有目標，就算唔知係邊個都好，對你毫無耐性嘅情況下，對象一定唔係你先。

遺憾嘅係你問錯人，我最想睇嘅唔係成功，反而係失敗。明知你同Kam Sir無可能有結果但我都會將你推上懸崖。

以我觀察嘅Candy，佢對佢嘅目標異常執着，為求達到自己目的係唔識顧及其他人感受，而且佢亦係長期孤身隻影，係無人接納佢嘅情況下，就好似一粒計時炸彈。當佢承受唔到壓力就會引爆。

亂世出英雄！繁華盛世底下唔會突顯我嘅才華，只有動盪嘅時世才是。我嘅目的就係令學校愈亂愈好，我嘅存在至有價值。

與此同時，我亦將Kam Sir嘅弱點講咗比Kevin知，仲有嘅當然係將佢一身毒男款改頭換面。

咁我當然唔係無啦啦睇得中Kevin呢個人，一切都只係天時地利人和。校長係着重成績嘅人，而Kevin咁啱學術上首屈一指嘅同學，可惜嘅佢嘅外表同埋溝通方面都係欠佳，呢方面我只能喺入衣着方面入手，談吐方面可以用其他嘢搭救。

最最最主要嘅原因都係因為佢同Kam Sir發生衝突，咁我咪容易乘虛而入，本身以為Kam Sir身邊嘅女學生點都會有少少矜持，見到型少少無咁快痴佢身。

我最估唔到嘅係叫Eve嘅同學主動搵Kevin搭訕，我都有做好心，提咗Kam Sir要小心Kevin呢個人。結果Kam Sir仲因為Eve同Kevin起衝突，我食住花生睇好戲。

鍾意麻煩留一留言表示支持

當然有邊個位寫得麻麻都可以comment一下

往後Adolf同Kevin隻揪就由佢哋發酵，我自己都管唔到咁多，我在意嘅反而係個計時炸彈。

「你同Kam Sir有無往好方向發展？」

「唉，無呀！同埋我喺GPS見到阿Sir喺天台！」

「你偷偷地跟上去睇睇！」

如是者Candy見到嘅係Kam Sir同Brianna喺天台到，根據Candy提及嘅情報係Brianna同Kam Sir表白。

「呢條仆街同我爭阿Sir！」

我有預感呢個計時炸彈即將引爆，我就咁樣回覆佢。

「Candy，我不如問你一條問題，如果你見到你認識嘅老師同學生有感情關係，但你知道學校唔會插手，你會點做？」

佢好快咁估到我嘅心聲，或者佢心入面已經有咗答案只不過佢希望有人認同佢所做啲決定。

結果如我所料，Kam Sir第二日成為學校嘅焦點，啲同學仲幫佢起咗個朵叫「狗公Sir」，人最可怕唔係為求目的不擇手段，而係自己得唔到嘅嘢亦要其他人得唔到。我亦係睇中咗Candy係呢類人，期望愈大，失望愈大。

結果Kam Sir亦因為咁樣而暫時無同喺學校，聽聞係等風聲細番少少再番喺學校教。而往後發生嘅事亦同我無關，我已經達到我心中嘅目的。鳥盡弓藏，我決定做番一位平凡嘅中學生，繼續生活喺動盪嘅校園生活。

最終章

自從捉到Candy係宣揚我搞學生妹嘅黑手之後，佢答應咗我喺網上澄清番件事實屬移花接木。當然有無人信呢個就後話，最起碼嘅係我最終都番到學校繼續擔任老師一職，唔需要喺放無薪假。

至於Eve亦無再同Kevin形影不離，我亦無再喺同Kevin見面時受到佢挑釁，雖然唔知佢發生佢啲咩事，於我而言多一事不如少一事。

另一方面，唔知係咪同班學生發生咗好多事，同佢哋嘅關係有少少疏離。明顯地少咗交流，短短五個月嘅時間同呢班學生混熟然後再疏遠。

————

當所有事情都搞掂好，我第一時間就係搵Max出嚟食飯。

「就結果而言，起碼叫做補得住個飯碗，就算有啲人都當你係狗公之外。」

「係嘅，不過經過呢單嘢，我決定咗一件事......」

「係咩事？」

「我打算辭職！」

「咁難得你事業叫做上咗軌道，依家至唔做咪白白浪費咗你幾年青春！」

我搖搖頭，嘆咗口氣。

「好多嘢都唔係用錢恆量，最緊要係自己嘅內心鍾意定唔鍾意！我漸漸咁想追隨自己嘅內心而行！而且我有預感同班學生嘅緣份已盡，過多幾日佢哋就畢業。我對呢間學校無嘢值得留戀。」

毫無疑問，呢一年我鍾意咗教呢班學生；同時亦係發生最多事嘅一年。等到呢一屆嘅學生畢業之後，我都打算辭退老師呢個職業。

「最緊要你自己鍾意，唔好後悔就得！」

呢句係Max比我嘅忠告。往後嘅事係點，坦白講都無人知，今日唔知聽日事。

————

畢業以後，Brianna佢哋都各散東西，身為老師嘅我就將資源放喺其他級別。遞咗信之後，可能因為我就走嘅關係，係通知期期間，唔知係咪將所有行政事務都交咗比下一手，竟然係過得前所未有咁輕鬆，日日準時收工，好似踏入半退休狀態。

校長收到信嘅時候，佢都好驚訝咁望住我，佢只係覺得我一定有苦衷至離開。事實上就係忍受夠呢種無理嘅工作環境，就算人工合理又點，人工同工作量根本唔成正比。當然我無坦白講我離職嘅真正原因，主要都係講進修為理由離職，我梗係唔會袋錢入佢袋啦！

至於同中六班學生最後個結局係點，呢個亦係另一個故事。

「喂！Kane，點啦無啦啦遞信唔同我講聲？」

問呢句嘅人正正係書儀。

「可能經歷多咗，覺得番學校搵唔到我想要嘅目標！我做學校嘅原意都係想學生唔好行我條舊路，但奈何我嘅能力有限，學校實在太多掣肘。我決定想做補習社，專注係教學方面，幫都啲有需要嘅學生......」

「不如預埋我？」

「你捨得？」

「無話捨唔捨得嘅，只係喺學校番工都係辦公室政治，不如襯呢個時候轉一轉環境咁，你唔介意呀嘛？

同埋呀，小心啲呀，依家呢個年代做阿Sir好受女學生歡迎嫁，有我睇住唔比你亂嚟！」

我微笑咁點點頭，踏出學校呢個門口。準備接受新嘅一頁，我呢一刻只係想專注做好自己嘅事，將學生妹當成囡咁溝嘅事我唔會再諗！

完

後記

總於叫做寫埋呢個故，的確仲有好多留白咗嘅未填番。就好似Brianna佢哋嘅後續並無據提及過。睇下你哋有無興趣想睇下咁，遲啲有機會寫番外傳關於學生畢業後嘅故事同Kam Sir嘅交集。

雖然故事本質同結局叫做寫得唔算圓滿，但起碼完成到一個故事，算係人生重要嘅里程碑。

我希望日後處事同寫故一樣唔再係只有空想而係有始有終，就算好辛苦都好都要堅持落去。我仲記得寫五，六百字左右嘅作文相對於人生嘅一個鐘，回想起寫呢個故連寫大鋼，究竟用咗幾多個晚上編寫，咁當然有陣時朝早搭車果陣都會寫故。

一邊番工一邊寫故係一件好辛苦嘅事，所以當自己完成到一個故事之後都會同自己講：你盡了全力，已經做得不錯了！

感謝睇到呢到嘅讀者，唔知你哋睇完呢篇故有啲咩睇法，不妨留個言比我知一知你哋嘅睇法。

我衷心咁多謝你哋！有緣再喺講故台再見！