病態老師 續

「問題學生上堂駁嘴都最後你成功感化佢、女神級學生Ig比人不斷滋擾、件豬扒阻住你食飯同埋阻你開解女神、四眼畫師畫咗幅圖讚你係引路明燈同埋啟發咗你開導女神嘅方法......」

解釋一下，為咗堅守老師嘅職業道德，學校以外係唔會開學生名，最多喺形容個學生嘅特徵，方便辨認。

問題學生——Adolf
女神——Brianna
豬扒——Candy
四眼畫師——Eve

「Kane，雖然我睇得出你有能力處理好多事，但老師都係人，唔係英雄，未必真係個個都幫到手嘅，同埋唔係叫你唔好理啲學生，但有陣時都要為自己打算一下，試諗下如果你因為處理呢類問題令你身體變差，你日後點維持日常嘅運作。有時收工嘅時候真係放低公事，適當嘅時候放鬆下自己，做自己鍾意做嘅事，充實一下自己好過啦！」

我都開始諗，我嘅人生就只有工作，好似都無好好比自己休息一下，我指嘅唔係物理上，而係精神上。呢三年嘅工作，好似無一日係訓得淰，每日訓之前都同不斷諗起公事都唔夠安心入睡，又擔心啲嘢做唔哂，或者擔心啲嘢做得唔夠完善。

「不過，我其實都好羨慕你......」

因為Max嘅一句話令我回個神來。

「係青春呀，點解你學校咁多囡嫁，而我果樣就得番啲麻甩佬，就算係囡都係中女。我要初戀呀！」

「發少陣夢啦，聽日仲要番工呀！」

「不過我比個忠告你，雖則你學校有好多學生妹，但你要記住，唔好發生男女感情。豬扒就算啦，另外果兩個——女神同四眼畫師。我驚你或者佢地會沉船，適當嘅時候要識抽身，唔係你飯碗不保都似！」

Max呢句呢我有個反思，我都驚幫出個感情，但我信班學生都只係對我係朋友嘅關係姐，無事嘅！

好！完咗個聚會番到屋企，我都係時候為聽日釣出個真兇而好好休息！

第八章

以下呢一章會由Kevin作為視點

我係Kevin，係一位小毒毒，無咩朋友，可以講我係一個邊緣人。

講真，平時嘅日常只有專注學業，根本無時間搞其他興趣。我嘅人生可以用「苦悶」呢兩隻字嚟形容。

每日就係起食早餐，上堂，食午餐，落堂溫書，食完晚餐再溫書，最後訓覺。老實講，呢種生活好痛苦。但屋企講過，只要你中學好好讀書，將來入到間好大學，賺到大錢咪能夠日日玩囉！而我就係以呢個信念而發奮。

奈何單單只有信念係唔足以堅持讀書嘅理由。

直到佢嘅出現，成為咗我嘅光明。

Brianna，佢喺呢級係好受歡迎，不論男同女，佢都能夠打好關係，包括我在內。

「Hi，你咪隔離班嘅Kevin？」

佢對我揮手，我仲記得佢果種笑容笑得好甜，深深烙印喺我個心。

「係！」

「你知唔知你哋個班主任喺邊到？」

佢指嘅係宋老師啦！

「佢就喺三樓教員室！」

我指住三樓個教員室。

「唔該你，你好好人呀！」

我竟然比人讚，仲要係比學校被公認嘅校花讚，唔通我準備談戀愛？

我個心怦怦咁跳，直到呢一刻，我仲回想比Brianna讚嘅情境。佢嘅出現成為咗我生命之柱，如果能夠同佢一齊，我嘅生活一定變得好有趣。

既然感受到佢對我嘅好感，不如就借個機會同佢表白，希望得米啦！

等等先，問題嚟喇，我應該點開口先，嗯......面對面表白？唔得，咁咪好似個小丑咁，我唔想做到咁高調。

「喂，最近有無睇到Brianna post野？」

「係呀，佢又去high tea，順便打下卡咁樣囉！」

我隱約聽到身邊有人討論緊校花，我決定偷偷地聽。

「真係好想知邊個同佢食姐，如果係男嘅我一定會好羨慕佢！」

「家陣佢係想分享佢嘅享受生活嘅相比我哋睇，邊個同佢食，重要咩？」

「唔好意思，請問一下你哋講緊喺咪我哋級校花？」我打斷佢哋嘅對話。

我諗到方法能夠又低調又達到我目的。

「係呀，做咩？」

「我想知道佢喺邊到high tea姐，嘻嘻！」

雖然佢哋個反應有啲唐突，但佢哋都㩒咗地點比我知。

「唔該你！」

「唔洗......乜呢個人咁奇怪.......」

我已經無理佢哋點睇我，Ig有一個好好嘅功能（打卡），只要我一查到個地址，如果用戶設定為公開嘅話，要搵到Brianna嘅ID根本唔成問題。

結果不出所料，我搵到了！Brianna嘅IG用戶。

於是我不斷DM佢，起初比佢已讀甚至乎係被封鎖。可能係我唔夠恆心，於是我就開多幾個帳戶，目的就係要成功邀約。

經過一個星期嘅不斷嘗試，由毫無回覆嘅情況下轉變成有回覆喇！

「4點，學校門口，不見不散！」

起初，我仲以為係我嘅堅持感動咗上天，比一個機會我；後來至發現呢個係一個陷阱嚟！

我懷住期待嘅心等到4點鐘，連花都準備好，我發誓要Brianna接受我對佢嘅愛意。一諗起佢含羞答答咁承認我就好興奮。

終於喺學校見到Brianna，啲人都走得七七八八，只有我同Brianna；而佢則默不出聲，只係露出好驚訝嘅樣望住我。

「Brianna，我等咗你好耐，呢個係我嘅心意，攞去啦！」

只見到Brianna尷尬咁笑咗一笑但毫無意欲攞我送比佢支花。係唔係我講得唔夠誠意呢？

「其實我好希望你成為我女朋友，我平時個性比較陰沉，而你則比較陽光，我好靜你好動，大家一凹一凸嘅性格啱啱好能夠互補不足。我相信日後我哋能夠長遠發展呢段感情！」

但Brianna無動於衷，反而仲後退一步。

「Kevin，你會唔會比啲時間我考慮先，畢竟件事嚟得太突然，依家嘅我仲未好好準備好，等我調整咗心情至回覆你可以？」

理智嘅我知道今次嘅表白失敗，如果Brianna應承嘅話就唔會因為我嘅告白而採取拖延嘅態度。我嘗試回想令我表白失敗嘅原因，諗咗一陣我醒起喇，有時佢會同佢班主任Kam Sir有講有笑。

原來係呢條教畜搶我條囡，我諗到呢到，我㩒唔到我嘅怒火。

「係唔係因為Kam Sir？你係咪冧佢所以拒絕我？你講！」

我步步進迫佢。

「唔關阿Sir事嫁，我同阿Sir無嘢嫁！」

呢啲小朋友都唔係信嘅大話你估我會信？唔通望住個天係晴天講落雨我又會信？

「講！你哋一齊咗幾耐，你唔答我係唔會走！」

「都話唔關阿Sir事！」

正當我再想行近Brianna嘅時候，準備揮拳之際。

「呢位同學，鬧劇到此為止！」

呢句話正正係出至Kam Sir把口。

「你班狗男女......」

我忍無可忍，正當我準備舉起手往Kam Sir揮拳之際。

「我建議你都係唔好咁做，你睇睇上面先.....」

Kam Sir 喺半舉手狀態下用拇指指住佢身後嘅三腳架攝錄機。

「Kevin，你嘅惡行已經比我錄低哂。精嘅唔該自首，唔係呢段錄影我會考慮公開比所有人知道你最真實嘅一面！」

自知自己已經處於劣勢，已經無得再反駁之下只好承認自己嘅過錯，再跟Kam Sir入校長室。

「Brianna，喺我哋分別之前，我想對你講聲對唔住，我傷害咗你！」

只見到Brianna面目冷冰冰咁望住我。

「我對你無話可說，好好反省一下自己嘅所作所為！」

之後頭也不回咁離開我視線。而佢嘅表情已經比咗個答案我，就係狠狠咁同我斷絕來往。我寧願佢鬧我一餐，總好過一個刀如心割嘅回應。

「講完廢話未，狗公？」

令我驚訝嘅居然出至Kam Sir把口。

我都知道少少關於Kam Sir嘅背景，佢上堂係比較有趣，有時會比學生笑下咁，以同學生親民為定位。

如今佢依家個氣場唔似平時嘅作風，唔通呢個至係佢最真實嘅一面？

「因為你哂咗我好多私人時間，拿拿聲去校長室認咗個罪佢，呢啲事最多記個缺點就算！」

到咗校長室，Kam Sir同我入去，我將所有事和盤托出，當然Kam Sir都唔係咁冷漠嘅人，佢都有同校長幫我講好說話，話Brianna原諒咗我同發誓唔會再犯，盡量加大事化小。

咁校長念在我初犯，再加上影響受眾唔大，決定私下和解咗就算。最後我需要寫番1000字左右嘅悔過書、記缺點同埋要做一個月值日生（喺操場，走廊掃地）

總算叫做一天都光哂，但遺憾嘅係我估以後見到Brianna嘅時候，佢都唔會對住我笑，諗到呢到我已好沮喪。

「以後醒醒定定，狗公！唔好加重我工作量！同埋，咪我話唔點醒你，**囡，唔係咁樣溝番嚟！** 係咁！」

我見到Kam Sir微微抬起頭目無表情咁俯視住我，對住我瞪眼咁，我完全感受到——被蔑視嘅感覺。

說罷，佢行翻去自己教員室。我內心有一種好強烈嘅感覺，就係憎恨，就算Kam Sir點樣幫我同校長講好說話都好，同佢唔啱啱嘅交流當中，我只有一種想法，我好想睇住Kam Sir墮落嘅樣，我好想喺有生之年見到。

正當我想得入神之際，我收到個匿名訊息。竟然有人同我一樣咁識玩，唔通係想溝我嘅訊息？咪玩啦！

我打開段訊息之後，內心狂喜，真係有趣，我自問我所作所為都好癲，原來呢個世界原來有比我嘅行為更瘋狂。

呢段訊息竟然講比我知到Kam Sir嘅秘密。

**KAM SIR，我一定會令你後悔今日嘅所作所為！**

第九章

「終於完喇！」

我喺教員室入面伸一伸懶腰，回憶番啱先由開解Brianna去到依家幫Brianna捉到偷窺嘅真兇，解決咗偷窺事件。我頓時鬆一口氣，希望唔好再做更加額外嘢。

「Kam Sir，有學生搵你！」

聽到其他老師叫我嘅時候，令我諗起每次叫得我出去嘅人都係果位要我解數——Candy。

只要一諗起要做額外嘅事情，心情自然煩躁。正當我打開門想發悔氣嘅時候，見到嘅學生竟然唔係Candy，而係Eve。

「唔好意思，阿Sir，打擾你，我可唔可以借用你少少時間？」

唔知點解Eve把聲輕而柔和得嚟聽入耳有種舒服嘅感覺。身為老師嘅我梗係唔會拒絕啦！

「可以係可以嘅，但主要係關於啲咩先？」

「阿Sir，我想帶你去一個地方！」

於是，Eve帶咗我上天台。

我本身打算問Eve帶我嚟天台嘅原因，點知Eve開始講關於自己嘅事。

「我呢！每次有煩惱嘅時候就會上嚟天台，雖然因為安全理由而圍起欄杆，但我隱約遠眺由高望向低處嘅風景。有陣時我都會喺天台到攞下靈感，諗下下一幅畫係點畫！」

講真，雖然教Eve都有近兩年嘅時間（中五同中六），但坦白講對佢嘅認知只有畫作同埋外表嘅因素，佢嘅內心我係一無所咗，我可以襯呢個機會問多啲關係Eve嘅故事。

「雖然我咁問呢條問題可能會覺得我好無聊，但我都想知道你嘅興趣係畫畫？」

「比起文字，圖畫更容易感興趣被了解。再加上以前未發明文字嘅時候古人都係以圖畫比達訊息。呢個都係好客觀嘅答案，我真正鍾意畫畫嘅原因係我鍾意故事......」

正當我聽得入神嘅時間，我聽到由天台嘅門口傳嚟嘅聲音。

「啪啪啪......」

係邊個喺到玩門？

於是我打開門一睇，又係Candy阻Q住哂。一如既住，佢帶齊哂書、計算機、紙、筆（係除咗個腦）嚟問數。

明明聽緊關鍵時刻就比呢位好同學破壞哂個氣氛。

「呢位同學，我知你好想問數，但抱歉依家阿Sir唔係好得閒。請另摘吉日，好行唔送！」

Candy望住我身後嘅Eve，面帶有不屑。

「阿Sir，你都真係好忙喎，同學生傾計都無時間教數，借用你人生嘅五分鐘真係好難？」

先唔講上次為咗教Candy數用咗差唔多半粒鐘，我需要由頭（零概念）教起。點解喺我休息（自由）時間做啲乜都要佢批准，明明時間自我喺控制。正當我想反駁佢嘅時候，Eve化解咗今次嘅爭論，仲喺我心中好感度加咗唔少分。

「阿Sir，呢條數我都想聽你解一解，其實我都有少少唔明，不如順便解埋比我聽，可以？」

當然我一眼睇穿Eve，上堂嘅情況係點我大概都知道，只不過為咗個大局為重至選擇讓步。果然外表係會反映出個性，就好似Candy呢類人，考到狀元又點，為咗自己利益迫使他人服從佢，長遠呢講只會淪落到無一個人願意跟佢合作。唉，算！身為老師嘅我，其中一個職責就係關懷呢類有需要人士。

於是我打開本數學書開始解題，咁當然我做咗啲好偏心嘅行為，就係淨係望住Eve嘅眼神同表情。Candy想聽我解題姐但無提過要我望住佢嘅樣解喎！

而Eve一邊聽一邊點頭，做出一個好明白嘅樣子。當然我知道佢係為咗配合我至咁做；另一方面我右邊只係聽到Candy係到唉聲嘆氣。係佢睇唔明我解題定我過度將心力放喺Eve身上？我無從得知，亦唔深究。

「最後寫埋呢一步就解到個根，Candy你仲有無嘢唔明？」

出於禮貌叫做望一望Candy，睇下佢有無嘢再問。今次佢只係點點頭，轉身就走，然後消失喺我嘅視線入面。

好行夾唔送喇！

「呼！」

我不自覺咁鬆咗口氣，但同時懷疑佢點解會知道我喺天台。

有啲奇怪！

「阿Sir，你好有潛質開解人喎！」

「笑咗，啱啱都算？」

「我睇得出佢好信賴你，唔係點解佢經常性一有事就搵你，唔怕同你講少少，你為咗開解Candy而食包當午餐呢件事，全班都知道，阿Sir，你好盡責呀！」

我聽到Eve嘅稱讚，心入面暗地裡歡喜咗要陣，但諗深一層亦有啲人沮喪，因為我最想開解嘅係你！

「係呢，啱先被打斷咗，係唔係講到『畫畫』呢個話題？」

「係呀，我話每幅畫嘅背後都有屬於畫師嘅故事。畫畫係主觀，無一定嘅準則，但一定有獨特性，關鍵係畫師點樣演繹其作品，為幅圖寫上故事以提升佢嘅價值。正因為有個人所畫嘅都係獨一無二，每次我睇唔同嘅畫都唔會覺得悶，反而我會沉迷喺每幅畫入面，從而揣摩畫繪師背後嘅故事或者過往經歷。呢個正正就係畫畫有趣之處，漸漸連我都好想學畫畫，比其他人認識一下我，當然包括我嘅畫作啦！」

說罷，Eve將佢嘅網絡日誌比咗我睇，入面有哂佢從小直到依家嘅畫作，包括佢喺學校畫過嘅《月亮與人群們》。

我唔係畫畫人，無資格評論Eve嘅作品美定醜，至少睇得出佢每一幅作品都好比心機畫好（我大概估喺上堂嘅時間畫）。

「阿Sir，我想同你分享下我嘅未來，我好渴望我嘅作品為大眾帶嚟正面影響，雖然我同佢哋唔熟，甚至係陌生人，但我好希望佢哋生活上遇到大大小小嘅煩惱嘅時候，當睇完我啲畫作嘅時候能夠心懷希望咁生活落去......」

「唔好意思Eve，雖然咁樣打斷你有啲無禮貌，但我都好坦白講如果你以畫師為目標嘅話難以維持生命喎......」

「呢點都係考慮因素入面，我又唔會只係從事畫畫嘅，我都打算打份兼職幫補生計，一有空餘時間就會畫畫。阿Sir你放心啦，仲有我依家都叫咗接到少少Job嘅......」

比起以前嘅我，Eve好明確知道自己未來嘅道路係點行。我根本唔需要有為佢擔心嘅打算。

至於佢點樣同個客傾價錢，點收錢之類咁現實嘅問題我亦無考究落去。

「阿Sir，唔好意思，我講咗咁多關於自己嘅事出嚟，會唔會覺得我嘅目標太好高騖遠？」

「咁睇啦，夢想呢樣嘢，係人都有，只不過要點樣實踐，就係要堅持自己嘅信念，不論喺任何情況下。唔好以為諗夢想喺一件不設實際嘅事，依一刻唔諗，唔通去到好似我呢個年紀都諗咩？年青嘅時候就係有股衝勁做自己想做嘅事！我咁睇！」

「嘻嘻！阿Sir都唔係好老姐，起碼同我哋叫做傾得埋。我呢，自問學校入面識好少朋友，能夠識到阿Sir做朋友，能夠將你成為傾訴對象，我覺得至少阿Sir值得信任嘅人，能夠識到你，係我嘅福份！」

聽到呢一刻，我深深咁了解到我嘅身份唔再係朝9晚6嘅打工仔，而係大家互相影響大家，我不經不覺為工作注入咗感情。

「Kam Sir！你又係到Flirting......？」

天台嘅大門緩緩打開，呢到Kam Sir呢個 專有名詞，我都好肯定係Adolf。

而Adolf身邊居然仲有一個人——Brianna。

「阿Sir，唔好意思，係我叫佢哋上嚟嫁，係唔係有少少突然？問過佢哋，佢哋都想聽埋你未完結嘅故事！」

我第一時間係走過去掌Adolf嘴，當然只係作勢咁做。

「Eve略略講咗關於你嘅故事比我知，聽完之後好想聽埋餘下部分，所以打算擇一日不如一齊搵你講埋佢！」 Brianna走過去搭住Eve膊頭，一邊挨住佢。

「唉，明明得我知嘅故事點知比埋你哋知，算，我無所謂！」Adolf雙手攤開，表示無奈。

Adolf講完之後，大家都異口同聲咁笑咗出嚟。

我有少少驚訝明明毫無交集嘅佢哋究竟會熟絡咗！

關於我入職後呢三年嘅工作生涯，點解變成只會服從，不會思考嘅教畜，呢個亦係另一段故事......

第十章

「做得好呀Kam Sir，你立咗大功！」

我喺校長室入面正在受到校長表揚。

「自從你搵到個真兇之後，學校的確少咗好多投訴。果然我睇人嘅目光係無錯！」

校長指嘅係用IG偷窺Brianna單嘢。

「仲有嘅就係唔知係咪你真係對每位學生做咗情感支緒之後，好神奇地咁佢哋好似中咗邪術咁，真係對學習態度認真咗，至少我巡課室嘅時候，佢哋真係拎起本書讀緊先。呢啲功勞你功不可沒，當然呢個就講笑咗講，就算你可能日後想轉行，你都能夠勝任臨床心理學家！」

我點頭多謝校長對我嘅器重同信任，一面勉強咁擠出笑容咁和應佢。

本來以為校長會再委託的我做其他事務，點知真係讚完就叫番我出校長室。最後佢都講多一樣嘢話學生依家個心態對未來入學率指日可待。終於唔需要再做額外工作，太好了！叫做恢復番以往嘅工作模式。

無驚無險又一日，收工之後我約咗Max食飯，分享番Brianna嘅後續事件同埋一啲番工日常。

「咁咪幾好囉，解決哂校長比你嘅事務而佢又滿意！你可以專心投放時落教學生身上，做番日常要做嘅事。咁當然，最好就日日都要咁添！」

我伸一伸懶腰並同意Max嘅諗法，打工仔心態就係唔好煩咁多嘢，最好一成不變，由番工都收工，唔好有咩突發事需要處理。

「Kane，話雖如此，但比起以往嘅你，你一定會提及你番工嘅辛酸史，講下校長點當你係阿四咁任佢魚肉，由打雜到做重大決策都係你做哂；但依家嘅你，唔係話你唔講校長壞話，反而仲多咗講關於你同學生嘅相處日常，好似問題學生笑你同女學生傾計、你同班入面嘅女神點互動、豬扒嘅數底有幾垃圾、四眼畫師畫畫畫到落堂都唔知……」

唔講自己都唔知，自從識咗呢班學生之後，事務都多咗（同學生溝通）但心態比起以往都積極咗唔少，除咗Candy之外，其其他嘅交流都係出於自願。不經不覺咁，佢哋成為咗我生活嘅一部分。唔知點解一諗起佢哋畢業嘅時候，我會有一種莫名其妙嘅失落感。

「承認啦！你沉船喇！」

「呢句係我聽最幽默嘅笑話！」

「女神同四眼畫師，你一定沉其中一個，或者沉哂！又或者係沉豬扒……」

「慳啲啦，一定唔係沉豬扒先啦！」

「咁係即係認有沉船啦！人少少認咗無人知嘅！」

雖然我口講唔認，但我潛意識講比我知，既然工作方面已走上軌道，差唔多係時候追求第二樣嘢。

而愛情係我比較渴求嘅慾望，畢竟我由始之終都唔試過拍拖，唔識同女仔相處，亦因為咁所以我有個綽號叫「Kam Sir」。

但奈何地，我仲未有一個合適嘅對象。

唔知點解比Max咁樣講一講，我嘅內心有少少動搖。

說實話，先唔講Candy呢件豬扒，無論Brianna同Eve都各有優勝之處：Brianna有校花呢個稱號，外貌有一定嘅保證，再加上佢健談，好容易識到朋友，爽朗嘅個性確實係幾吸引；Eve呢位藝術家性格比較內歛，外表似一位斯文嘅書生，而佢有敏銳嘅洞察力，任何人內心嘅想法都比佢一眼睇穿，細心嘅女仔其實都唔錯。

最後，我帶住呢個諗法番咗屋企。

「呼！咁就一日！」

為咗令到屋企有啲聲音，我開住電視碌下手機咁。好似一般嘅打工仔心態咁，除咗番工之外，成個人生就只有食同訓，有陣時諗自己個人生都幾可悲下！究竟幾時開始成個人生只有以番工為目標，究竟人生為咗追尋啲咩，除住歲月洗禮，開始慢慢消磨咗內心嘅鬥志。

另一方面，回憶番呢幾個星期同學生嘅相處，通過同佢哋交流，漸漸認識學生之餘同埋了解自己。雖然我知道自己嘅定位，得知自己無可能喺短時間內改變人生方向，但係我嘅身份反而令學生改變佢哋嘅想法，我成為咗一個協助者嘅身份啟發佢哋嘅人生方向，至少我覺得做呢件事有意義，同佢哋相處唔單止填補我內心嘅空虛感，而且透過呢次交流中搵到樂趣。

我碌一碌手機睇IG，之前同Brianna交換咗IG。睇番關於佢嘅相，主要都係佢啲自拍，食嘢相，風景相。嗯......都係一個中學生都會做嘅事，我都不以為意。直到佢Post一張同Eve嘅合照。

「咦！呢個咪Eve！」

邏輯上，Brianna喺班入面係比較受歡迎，而外表比較出眾。唔知係唔係因為同Brianna熟咗嘅關係，就算睇完關於佢嘅相/Post都未至於觸動我神經。

但Eve未去到同Brianna好熟嘅源故，對佢嘅認識比較多神秘感 。而我突然間因為呢張合照而發現到Eve嘅IG id，我內心有少少期待，再了解佢IG嘅日常，本以為係同佢出網誌一樣，只係post關於佢嘅畫作，後來發現大錯特錯。

唔睇由至可，一睇就番唔到轉頭！

要可愛有可愛，要成熟有成熟！

我就好似發現咗個新世界咁不斷睇佢嘅相。原來女大十八變呢句說話係講得無錯。佢IG嘅相唔止有四眼馬尾相，仲有背心吊帶衫配熱褲、學生妹服、冷衫配格仔裙……只要係時尚嘅服飾佢都有穿。

「只係大開眼界！」

曾幾何時我認知嘅Eve只係一位學生，喺Ig入面竟然係的180度轉變，成為一位女性。

「呢個人生唔再沉悶，我嘅人生已經有咗方向！」

我自己就好似着咗魔，嘀咕咁講野。

「我會出手，我嘅目標就係佢！」

我凝視手機入面着得時髦嘅Eve，露出一個既詭異又噁心嘅笑容。

喺同一時間，我仲未知道原來危險正向住我嘅方向潛伏緊。連自己都唔知，我正在比人偷窺緊，我嘅一言一行，一舉一動！

由呢個reply開始唔再係上一個post嘅內容

我將小標題del咗同埋proof read番之前嘅內客加咗少少修改

唔保證一日一文，但我承諾唔會無尾，點都會寫到最後（好唔好睇另一個事），只係時間問題。

新序章

三個月後，Kane再約Max食飯，Kane分享佢番工嘅經歷，主要講下佢嘅呢三個月嚟嘅煩惱

時間一瞬即逝，轉眼間三個月。我同阿Max相約喺同一個地方食飯，並唔係因為無新意，只不過係果間餐廳比較寧靜，適合同Max盡訴心中情。

「Kane，你睇下你，無見一排姐就成個人謝曬皮咁。唔好怪我直接，同埋你嘅外型本身已經好瘦，你依家睇落比以前更加瘦。打份工姐，你好似搏埋條命咁喎，人工好高嫁？」

我嘆一嘆氣，搖一搖頭。呷了手上嘅水果酒。

「平時滴酒不沾嘅你竟然會飲酒，睇緊壓力都有啲大喎！係唔係有啲想逃避現實呀？」

「總之就一匹布嘅長.....我由呢件事講起先......」

於是我將呢三個月嘅經歷一五一十咁講比Max知。

第十一章

我一邊睇住手機入面嘅相，一邊露出奸狡嘅笑容，發誓要將佢搶到手。而相中嘅人正正就係一身少女般打扮嘅Eve。單身都接近三十年，就快煉成法師嘅我經歷過打工嘅洗禮之後，漸漸對身邊嘅人和事漸漸失去興趣，當然我嘅個性本來就係摺友，對外界嘅事物頗抗拒，直至我認識到佢。

我腦海入面浮現咗一段畫面......

————

我約咗Eve喺主題樂園嘅入口等。

為咗展示我嘅品味，我着咗件淡黃色短袖襯衫再加條卡其色降落傘短褲再加對波鞋方便走動，頸上仲噴咗淡淡嘅古龍水。

睇嚟靚女打扮喺要啲時間，比約定時間遲咗半個鐘Eve至出現。

「阿Sir，唔好意思，我遲到！」

女大十八變呢句話真係無錯，我竟然有幸見到Eve除咗校服以外嘅打扮。

粉紅色高領背心配白色熱褲同埋波鞋，而髮型則以雙馬尾為主。見到呢個咁可愛嘅打扮，係男人都嬲唔落啦！

「都唔係好遲姐，不如我哋直接入場啦！」

呢個主題樂園嘅賣點係摩天輪，可以同理想對象一齊遠眺風景同埋享受獨處嘅時間。

「同埋出到嚟見，我有個少少要求，就係希望你叫我Kane！至少唔會叫到我好老。」

「OK， Kane！咁我哋去玩摩天輪先！」

雖然，排摩天輪嘅人都幾多下，話哂都係周末，一家大小放假，人流自然多。但Eve都好有耐性等，至於我緊係唔介意啦，我不知希望時間停留喺呢瞬間。

等咗足足一個鐘左右，終於到我哋。

講到尾，風景都只係背景，最重要嘅主角往往係同你搭摩天輪嘅人。風景雖然唔錯，但我嘅目光都只係望實Eve唔放。

「高空嘅時候吹出嚟嘅風特別舒服，好清爽！」

Eve伸咗個懶腰並稍微叫了一聲。

「無錯！」

望見Eve表露佢自然嘅一面，即係同我相處嘅時候都係處於舒服狀態，唔需要做得特別拘謹，係信任嘅表現。

「Kane，幫我渣機！」

原來坐係對面嘅Eve突然間過咗嚟坐我附近。我完全反應唔切，接過Eve嘅手機之後，我問佢：

「下一步要點做？」

「哎呀，緊係開手機嘅自拍模式啦，我都已經擺好pose等你，快啲啦，風景唔等人！」

Eve雙手擺出「V」字手勢喺面頰旁邊，上半身亦微微傾前。

呢個係第一次經歷，由出世都依家都係第一次同異性（除咗親人）單獨影合照。

我內心有兩種感受，第一係緊張，話哂我當咗Eve係女性咁看待，本身我對異性接觸得少，自然有少少怯場。另一個感受係興奮，我能夠近距離感受到Eve嘅體溫以及體香味。我表面扮到無嘢但內心好似有線耳機放入背囊之後再抽出嚟咁樣，打哂
撠。

「一、二、三、笑！」

於是我影咗一張人生之中我覺得最接受到自己個樣嘅相。

影完合照之後，Eve首先打開話匣子。

「Kane，其實呢，我有少少羨慕你！」

「無啦啦講啲感性嘅嘢？但我都想知個原因！」

「你能夠令每一個學生都搵到屬於佢嘅定位，再加上同你相處得嘅學生都係開心，毫無疑問你嘅感染力頗強。我係其中一位，本身我都只不過為咗自娛，但識咗你之後，我能夠做番自己，同你分享我嘅故事，我嘅畫作。係茫茫人海能夠搵到一個信賴嘅人唔係容易嘅事。我希望日後可以成為你嘅定位，幫到每一個正在受現實折磨嘅人！」

比着如果對象係Brianna嘅話，一定會搵位入佢，令到本身個氣氛正輕都變得唔正輕。但依家嘅對象係Eve，為咗唔係破壞氣氛，我決定正經啲答。

「Eve，有阿Sir係到，我點到支持你！」

「係Kane！點會無啦啦又變番阿Sir嫁！」

我哋異口同聲咁笑咗一笑，轉眼間，摩天輪已經轉番到起點，同時亦到達終點。

「我send咗比你喇，Kane，你睇下收唔收到？」

我收到嘅係啱啱喺摩天輪頂層影嘅合照。

「收到！」

「我今天玩得好開心，呢張相比你做個留念，無論點都好，我都會留住呢一張相，呢張相為我帶嚟難忘嘅回憶。」

「Kane，我有啲嘢想同你講......」

「請講！」

「其實我...」

————

畫面突然停頓咗，當我再打開隻眼嘅時候，發現已經係第二日嘅朝早。

原來我訓着咗，明明下一句應該係表白嚟，真係遺憾！

點都好，打好領呔，穿好恤衫，又到咗做社畜嘅時間。

呢個夢我唔會忘記，我渴望夢境會成為現實，我決定向Eve展開追求。

今日暫時去到呢到先

如果各位讀者對呢個故有啲咩建議/感想不妨留言交流下

你仲有冇做呢行

利申：無做過老師
只係將經歷再加少少想像力而寫成嘅故

第十二章

為咗吸引Eve嘅注意，我專登電攣自己啲頭髮，衣着方面就拎咗啲直條紋襯衫配亞麻長褲。比前自己連裇衫都唔着嘅我，叫做正正常常，合格線以上啦！

唔洗問，我入到課室。啲學生見到我嘅新外型都露出驚訝嘅表情，心諗Kam Sir終於似番個人咁樣。

當然，對於佢哋嘅睇法，坦白咁講一啲都唔重要，我着重嘅只有Eve。遺憾嘅係Eve望完一眼之後就繼續做番自己嘢。

係唔係我嘅吸引力唔夠呢？

我對自己嘅魅力有所懷疑，雖然我自問自己唔係帥，但不足以只係看一眼就完事啦！

「阿Sir，個髮型好夾你衣着，我都係第一次見到阿Sir着得咁
四正！」

講出呢句話正正係Brianna，我見到佢嘴角含春嘅表情，我不經義得戚起嚟。

「仲洗乜講，我本來就係時尚達人，只不過以前進入沉睡狀態！」

「唉......又來啦......」

Adolf一邊聽住我哋啲對話，一邊苦笑咁嘆息。

————

不經不覺就上完堂，轉眼之間就係小息時段。

我都準備番教員室，準備下一堂嘅教材，正當我入去嘅時候。

「咦，你咪Kam Sir？」

忽然有一把優美嘅聲線從我後方傳來。

我回頭一望，一位身穿學生服，帶着成熟的蓬鬆捲短髮髮型身形比較嬌小女學生企咗喺到。

「Kam Sir，你好！」

「呢位同學，我有名你叫，我叫Kane，唔係Kam...... 」

雖然我唔係太介意學生改我花名，但對於一個初相識用「Kam Sir」呢個稱呼，心入面梗係會有種唔係好舒服嘅感覺。直白啲講，佢比我嘅感覺係——無禮貌！

「我叫到Destiny，多多指教！」

但佢對我講嘅嘢係就充耳不聞。我都未完講嘢佢就已經開咗口。

「咁我重申講一次，我叫Kane！明白未！」

我強調自己嘅真名，並希望佢唔好講錯名。

之後佢就同我分享咗關於佢嘅背景。

佢叫Destiny，係隔離班嘅同學嚟，同Brianna有少少交情。佢亦係善於溝通和容易同同學都打好關係，所以關於佢果班嘅事情佢都撩如拍掌，無一樣係佢唔知。

「Kam Sir，你咁受歡迎一定會受人妒忌，你記得要提防一個人，佢叫Kevin。唔怕同你講，唔知點解過咗幾個月之後，佢成係人唔同咗，不論喺打扮上同社交上都有顯著嘅進步，佢以前仲好似個自閉仔嘅嘅款，但現家唔同哂，佢連坐都有氣勢過人，總該你小心點啲！」

於是我道謝之後就頭也不回行咗入教員室。

第十三章

當我行入教員室嘅時候，一打開門就見到校長。

「Kam Sir，你終於出現，有啲事要同你傾下！」

原來校長一直係到等緊我，唉......我嘅十五分鐘休息咁就無咗。

「Kam Sir，你覺得你最近工作表現如何？」

每次一聽到校長問問題就知心知不妙，問嘅原因並唔係問你嘅睇法，而係引導佢之後口中嘅重點而已，比起單刀直入核心問題叫到有個好嘅開場白。

「一如以往，幫學生準備教材，有事都要處理行政內容咁，每日都過得好充實！」

番咗咁耐工，都知佢唔係想問我睇法，不如快啲入正題好過。

「Kam Sir，我明白你有好多事要處理，對比起其他老師比較忙，但唔知點解，我巡視課室嘅時候，發現到你果一班啲學生有少少......我唔知點講，學習氣氛都好似仲未夠咁。

Kam Sir，你會唔會優先考慮投放家長同埋學生嘅溝通？唔係話其他事唔重要，而是比起處理行政事務，同家長學生溝通會比到佢哋嘅感覺似幫緊佢。」

以往我都係同班中六嘅家長又好學生又好，真真正正嘅傾計郁只係一次，之後就無再溝通，事隔咗兩三個月，自己都鬆懈咗。無他，真係太多行政事務要處理，有陣時校長又唔喺學校，啲事邊個做？咪又係搵我做埋。做教畜話就話人工高，只不過一個人處理兩個人嘅職務就點都講唔通。我有諗過同校長理論，但有用咩？咪又係死死地氣咁做。呢個就係人生！

「講番隔離班先，你仲記唔記得你咪的過學生入校長室嘅？果個Kevin，自從比我訓話完之後成個人脫變哂。佢一有時間就拎past paper做都不特止，佢果班定期放學之後同我申請借課室自修，當然，佢哋拉埋佢啲friend子一齊溫。起初我都覺得佢係玩玩下，但後尾個成績出嚟發現佢真係有讀書。

你可以從呢方面入手，喺班入面搵個最大影響力嘅學生傾下，由佢帶動其他學生嘅讀書氣氛。我目的都係想提升學生上大學率，你做到呢一步，咁你咪可以做少啲嘢。就係咁！」

於是我就死死地氣咁離開教員室為下一節上堂佢準備。

「阿Sir！」

呢把聲嘅來源正正係Brianna。

「就嚟考試喇，我有預感我衰硬喇！」

「唔係呀嘛，堂堂學霸級嘅Brianna竟然會驚考試肥佬？」

一如以往，我都會調侃一番，唔知成為咗我同佢嘅溝通模式。

「我認真嫁！明明唔似初中咁多科目溫，但每一科都考哂三年高中嘅內容，點記入腦。死啦，我今舖衰硬喇！」

「Brianna，與其你同我講，不如用多少少時間溫得幾多得幾多啦！點呢，你都係想求安慰姐。講，你想我點安慰你？」

Brianna並無回應，只見佢雙手放喺背面，個身扭扭擰擰，嘴角上揚，瞇起雙眼對住我笑。而我亦無再延伸任何話題，儘量佢無再作任何回應。

自問自己好少同異性相處，就算係以往嘅女學生都鮮有遇上類
情況，佢嘅表情同行為係唔係代表住佢怕羞呢？細心留意一下，我發現佢身上散發出一股獨特嘅香味。唔知係唔係佢用咗沖涼液定抑或係與生俱來？

「叮噹～叮噹～」

聽到鐘聲，我至回過神嚟。

「同學，係時候夠鐘上堂！」

一如以往，都係同佢講番啲既低能又白痴嘅官腔對白。

「我唔制！」

Brianna對住我吐咗舌頭，身體卻是誠實，漸漸咁離開我視線，往自己嘅課堂走去。

唔知點解同Brianna相處會有種講唔出嘅感覺，明明上一刻煩緊校長施壓帶出嘅壓力。當同Brianna溝通之後，煩惱可以即時放喺一邊嘅同時，心情忽然由愁轉喜。我諗極都諗唔明點解Brianna有一種魔力令我身心舒暢。

我開始問自己一條哲學性問題，明明老師對每一個學生應該要人人平等，自從我教咗呢一班之後，點解我內心會產喜同惡嘅感覺？呢一點我諗唔明。