【十年之約】 北九州自駕畢業之旅（福岡．長崎．熊本．阿蘇．高千穗）

喺熊本講到食，「馬肉」絕對係繞唔開嘅一環。老實講，樓主唔抗拒馬肉，但我地三個係唔係好大欲望想試呢？又唔係。然而一場嚟到，無理由唔食嫁，為咗平衡選擇，我地特意唔揀啲專食馬肉嘅餐廳，而係揀啲有馬肉刺身食之餘，亦有其他菜式食下嘅餐廳，於是乎我地就入咗一間聲稱主打熊本鄉土料理嘅餐廳もなか試下啦。

一坐低就見到熊熊烈火，究竟係功架定搶火，真係要試過先知。

由於擔心唔啱口味，我地都係叫啲最基本嘅組合試下，例如馬肉刺身同壽司，另外由於見到廚房咁好火，我地亦決定叫份燒馬肉。至於其他嘅，嗌啲無馬肉成分就得了。

率先上檯嘅就係今次嘅主角，馬肉刺身。當然少不了，啤酒﹗

相比起食開嘅魚料刺身，馬肉刺身明顯有咬口好多，可能係筋比較多，所以一路食，一路有種𡁻香口膠嘅感覺。樓主食第一舊嗰陣，就咁無蘸任何醬料食，第一下食落去，其實唔係好試到味，但𡁻多幾𡁻，就會慢慢試到有種淡淡嘅肉香甜味滲出嚟；到食第二舊嗰陣，樓主就加埋豉油同洋蔥一齊試，只可以講呢兩款佐料其實對提升馬肉味道嘅幫助不大，只係用鹹度同刺激填補咗馬肉一入口至咀嚼期間，味道空缺嘅呢段時間。

至於馬肉壽司都分別不大，同刺身嘅感覺差唔多，係幾鮮，都好食，但未必會再叫。

最後一道馬肉料理——烤馬肉。烤得幾香，送酒一流，啱哂我地三個酗，不過亦唔係咩一試難忘嘅美食。

雖然馬肉唔係好得我地三個歡心，不過其他鄉土料理就有啲驚喜。

眼前呢碟「辛子蓮根」，係我喺熊本食過最特別嘅食物，師傅先將蓮藕切片蘸麵糊，然後將Wasabi塞入去啲蓮藕窿入面再炸下，炸到表層有少少焦就可以上碟。咬落去，既有蓮藕嘅清爽，入面嘅Wasabi又吊到啲味出嚟，爽爽辣辣咁，而且因為係黃Wasabi，食嗰陣成日聯想到燒腩仔。個人認為唔蘸沙律醬都可以。

至於另一碟呢，樓主都唔記得係咩嚟，我估係關東煮唐揚版，原意係叫嚟送酒，一如當初所想，送酒一流。

其實我地仲有叫其他嘢食，不過都係啲普通嘢，所以就唔詳述了。食到一半嗰陣，樓奴朋友已經建議今晚食完行一陣，然後再去食碗拉麵先返歸。明顯樓奴朋友試過尋晚拉麵宵夜後，食過翻尋味。既然佢都咁講，我地都無再加單，淨係全力主攻酒水就算，Haibōru、Sake、啤酒樣樣齊，飲到廁所都要去兩、三轉，最後食咗¥14,791，每人大概$250，叫做完成咗馬肉呢個Checklist Item啦。

酒と肴 もなか
地址：熊本県熊本市中央区下通1-6-12 2F

一出門口，連行陣都廢事，直接就走去黑亭排隊食拉麵，相比起桂花，黑亭似乎喺熊本人氣少少，但都係排咗5分鐘就入得了。

延續今朝嘅策略：兵分三路，唔好撞機﹗於是乎我地就叫咗上圖三款拉麵，チャーシューメン(左上)、招牌嘅「玉子入ラーメン」(右上)以及「ちびたまラーメン」(左下)，如果你有興趣想知點解我地叫呢三個？無錯，因為佢就係自動售賣機排最前嘅三款拉麵。當然，亦都恪守我地食拉麵嘅原則，一定要叫炒飯。最後三麵一飯，叫咗¥4,680，換算返港紙就係$243，即每人$81，計返今次成個旅程，呢餐拉麵就最貴嫁啦，希望唔好令我地失望啦。

喺叫完等緊嘅期間，我地環顧咗一下個環境，或者因為適逢係星期五，見到好多男女上班一族三五成群咁係度食緊拉麵。唔知佢地係唔係同我地都一樣，都係食完第一餐唔夠飽，所以要嚟食多個拉麵打底先返屋企。

呢碗就係樓主叫嘅「ちびたまラーメン」，淨係睇相都Feel到黑蒜迫人。不過唔知係唔係因為我減咗隻蛋，我食嗰陣唔係好感覺到隻蛋嘅存在，可能單春真係唔係幾夠力，下次都係叫返雙黃算。

同桂花相比，樓主覺得黑亭嘅拉麵口味相對大眾化，無咁騷，湯就無桂花咁濃咁香，但成碗整體比較易入口，樓奴同長髮武士兩個都鐘意黑亭多過桂花。至於炒飯呢，黑亭就行醬油風路線，從色澤上嚟講已經可以見到每粒炒飯都好上色，單食都好夠味，反而再配拉麵湯底就偏鹹；從質感嚟講，相信各位睇圖都可以見到，係偏濕同淋，如果以香港標準嚟講，呢個炒飯就肯定唔合格，不過又未話去到濕到一Pat嘢，而且日本炒飯好似一向都偏濕（唔知佢地係咪唔興用隔夜飯炒飯），所以我又覺得問題不大。

黒亭 下通店
地址：熊本県熊本市中央区下通1-7-14 ノグチビル B1F

食完今餐宵夜，就要等到後日先可以出街食宵夜了。事關聽日，將會係我地今次旅程準備已久嘅部分——無錯，重陽節，一定要登高﹗既然阿蘇火山近在眼前，聽日，我地一行三人將會會一會呢座名岳，將重陽登高呢個傳統帶到去東瀛﹗

日本炒飯偏濕係因為珍珠米嘅問題

同埋唔知係咪因為佢地習慣煮飯前要浸米餵水 所以佢地啲飯永遠都好濕潤 不過都好味

日本仔不嬲鐘意軟淋淋既野食

樓主終於更新

多謝你支持

樓豬呢

lm

Hello 樓主，我去完熊本返來喇

熊本城真係好靚 可惜帶住囡囡去，未能夠好詳細咁睇啲展板介紹，淨係快行咗一轉影咗啲相買咗啲紀念品就走


去咗水寺前成趣園影和服相，撞正櫻花盛開，真係幾靚~
想奉勸各位有興趣去呢度影和服相嘅師兄，千祈唔好幫襯和服店果個跟攝服務！22000羊，1小時跟攝，會影 100-150 張相，影完直接比返張 SD 卡你 唔會執相，响和服店官網度 book。攝影師係個呀叔，攝影技巧，硬件器材都好差 鬆郁蒙咩都齊，相機像素低，out fo，構圖千篇一律，成日叫我地同啲路牌影... 之前本身諗住靠呢度啲相都夠做，點知越睇越唔對路，影完之後都係要出動返私伙嘢，set 腳架咁再影多轉先掂，白白浪費咗我地個幾鐘




去埋樓主介紹嘅長崎次郎喫茶室
雞蛋布丁係幾濃厚幾香雞蛋味 西多就普通~
呢度係食個 vibe 可惜坐個位對唔正電車路個轉彎位，個窗又細隻影唔係好到出面風影


今次响熊本仲經歷咗一件驚心動魄又難忘嘅事，就係地震！
夜晚返到酒店，坐响床睇緊電話，度緊第二日行程之際，
成個人突然 feel 到少少暈暈地好似暈船浪咁
跟住就聽到窗簾同窗簾繩左右搖擺緊，撞到啪啪聲，呢一刻知道係地震緊喇
個震唔係好強烈果種，係 feel 到楝樓左右搖緊咁樣，過程大約 20秒左右，但我已經嚇到成個人僵硬咗，第一次經歷地震

迪米兄 估唔到你去完寫埋賽後報告我都未寫完 睇到你啲相都好掛住日本

囡囡肯陪你去睇城堡都幾好啦，有時都明佢地唔係好明點解男人對城堡啊，模型啊，鐵路啊咁有興趣，慢慢導下佢囉，下次你去日本陪佢睇衫睇潮著，食下甜品咁，我初初都對甜品無興趣，睇下睇下宜家仲大癮過女朋友(但我對甜品嘅興趣僅限日本)

水前寺成趣園反而我真係唔知有租和服影相服務，除咗個園本身，我淨係記得佢入口旁邊有間味千拉麵 至於長崎次郎…我發現熊本啲cafe似乎都係食個vibes，不過最緊要囡囡開心啦

想問吓你搵唔搵到一啲關於熊本城“易守難攻”呢方面嘅資料？印象中城入面有部電視機係播緊呢樣嘢，講解緊個城個設計，結構之類，但果陣囡囡面口開始有啲...所以都無睇到全速離開

水寺前間租和服都係响入口度呀，租和服有得 walk in，跟攝就要上網book 定。應該附近係得佢呢間租和服，熊本城果邊都有分店，klxxk 都搵到。

唔記得講，就係比個攝影師呀叔搞到用多咗個幾鐘，令到我地唔夠時間去長部田睇日落

期待你高千穗嘅包膠呀！我去果日揸車途中開始落雨，去到淨係玩咗小火車。仲要著住雨褸咁玩，雨越落越大全程dup低頭，只係希望快啲完返轉頭落車 之後 book 咗嘅撐艇都放棄無去喇 成個行程最期待嘅撐艇

回迪米兄嘅話，「易守難攻」呢點我喺わくわく座見到下，主要都係話城牆本身設計個斜度好高，敵人好難爬上城牆，同時城池座立於比較高嘅地勢，有居高臨下嘅優勢，最後一點我記得就係當時城主已經有諗過被圍攻嘅問題，所以喺城內廣種銀杏，即使真係俾人圍城，城內將士都唔會餓死。至於本城就唔係好見到有解釋，純粹就係用咗西鄉隆盛圍攻熊本城不果反而要退兵一事做例。

長部田睇唔到就下次啦，反正著咗和服，打打底先，而且一定要有啲美中不足先會令大家更想有下次旅行嘅，總之成個Trip囡囡開心你開心就好﹗

至於高千穗，實不相瞞我地都冇坐船仔，不過勝在個日天氣好，景色真係幾靚，希望今個月可以加快打文進度出埋佢啦。

Day 4 熊本 → 阿蘇
Highlight：阿蘇火山、黑川溫泉

來了來了，是次旅程最期待嘅登高環節，阿蘇火山終於來了！

前文講過，樓主同朋友Plan呢個Trip嗰陣，其實係有考慮過究竟由南線鹿兒島玩起，定北線福岡出發，不過無論點Plan，我地都係向住一個目標進發：阿蘇火山！其實係咪因為睇過相覺得阿蘇火山好靚，所以一定要去？又唔係，只係純粹覺得火山呢類型嘅景點唔係話去就去，難得九州有一座，難度又唔係高，就征服咗佢先，去過覺得靚嘅，以後呢個組合就可以增加啲去森林啊，高山啊嘅行程，更甚或乎可以棄車從行。咁當然，所有事情都要有開始，而阿蘇火山，就係呢個三人組合嘅起點啦。（同時亦希望唔係終點啦）。

Check Out前，先同鎮県之寶熊本熊影返張相先啦。

收拾好行裝，去7仔買埋個早餐同咖啡，一行三人就馬上出車趕路。

睇睇導航，都要揸成個鐘，但成班仔去有一度好，就係再長嘅路，都只會嫌短唔嫌長。而且樓主深信，每個揸車嘅男人，心入面都有一個公路旅行夢，自己或者同埋班死黨，揸住架車無拘無束咁跑，跑到咁上下喺路邊停低食少少嘢，去個廁所，然後再揸，周而復始，直到夠鐘瞓教為止，你都咪話唔爽。

經過前兩日嘅操練，我地三個對於九州嘅路面情況已經有一定認知：由於我地本住「近就行路，遠先揸車」嘅心態，如果半個鐘頭可以行到去嘅地方，我地基本上都係唔揸車，所以凡係我地揸嘅話，通常一揸都係轉兩個街口就直上高速，不論係長崎去島原又係咁，熊本市中心去長部田海床路又係咁，而今日，我地由熊本揸去阿蘇都係咁，所以幾日落嚟，其實我地塞車、等燈嘅時刻真係唔算多，或係因為咁嘅緣故，今次北九州自駕之旅，其實都幾有公路旅行Feel。

一路向東咁揸，車窗外漸漸由高樓大廈變成綠油油嘅草原，但藍天依然不變，大力一索，係日本獨有嘅清新爽氣。

食住早餐播下歌，揸住架車飲下啡，談笑風生之間，我地已經嚟到阿蘇市。望一望導航，登高第一站——米塚，已經近在咫尺。

據說米塚喺好早期係開放俾公眾上山遊覽，不過後來為保護佢近乎零瑕疵嘅植被地貌，所以就禁止登山。要欣賞呢個「阿蘇抹茶布甸」（示意圖），目前就只有遠眺呢個選擇。

從車上遠望，米塚零零舍舍聳立喺草原之上，背後有阿蘇山脈做背景，雖然講唔上雄偉，但眼前呢個畫面，相當日本。不過可能因為都已經入秋，米塚睇落去似乎冇想像咁抹茶、咁Creamy。不過一場嚟度，一於搵個可以停車嘅位落車睇下。

一落車就撞正車聚，十幾個男人浩浩蕩蕩咁揸住兩個轆遊山，真係車未到，聲先到，啲引擎聲勁到呢。不過深受香港油價之苦嘅樓奴呢個時候就講出一句人間清醒嘅肺腑之言：香港嘅話呢度響咗幾舊水了。

可能係鏡頭問題啦，樓主宜家睇返影出嚟嘅相，係影唔出嗰種綠草青青嘅迫力。現場睇嘅話，米塚嘅綠係煥發生機，充滿生命力，令人一睇就感受到佢嘅能量。而且一個畫面入面，雖然都係綠，但米塚嘅綠又同草原嘅綠，山脈嘅綠又唔同。同為草綠，但層次分明，難怪即使唔可以攀登都好，都吸引到咁多行山遊客駐足欣賞。既然一場嚟到，當然要整返幾張Icon式獨照留倩影啦。

無限天地行將綠﹗

看似天人感應，實為模仿朗尼(Wayne Rooney)。

一句到尾，有Feel﹗

由於我地稍為喺米塚逗留得有少少耐，所以當上返車準備繼續向上揸嘅時候，先發現原來已經就快12點半，再咁拖落去，如果要按原訂計劃景點咁玩，再一路向北，5點去到黑川溫泉Check In，幾近係不可能嘅事。於是乎拉一拉手掣，架車bell一bell，馬上向住阿蘇火山嘅大本營——草千里進發﹗

香港人叫湯底
強國人先叫湯頭

我兩個詞都會用：如果好似拉麵，啲湯會飲埋嘅，我自己就用「湯頭」；如果好似邊爐，啲湯淨淥唔飲嘅，我自己就用「湯底」。

不過都感謝師兄賜教

雖然導航話車程只係5分鐘，不過撞正Lunch Hour，個個又要泊車入草千里停車場，結果都搞咗接近半個鐘先入到停車場泊好車。

由於時間緊迫，再加上我地好晏先食早餐，所以上到草千里之後，我地就把握時間，馬上奔向草原﹗

有去過草千里嘅朋友可能會知，如果以草千里停車場為中心點嘅話，直望草千里會剛好呈現一個「凹」字格局：草千里中心有大小不一嘅湖泊，而左右兩側剛好都係山丘，可以等人行上去後望返中間凹入去嘅草原，更甚至望返山下嘅景色亦可。具體嚟講就好似上圖咁。

反正最後都係去中央位啲湖泊睇睇，先沿右邊上山，睇下望返落嚟咩樣先啦。

嗯……就係咁囉。由於正值晚秋，雖然草千里仲係綠油油一片，但大家可以見到草千里上嘅湖係幾近乾塘。亦因景色無甚特別，我地都冇多作停留，快快手手行返落去中央位睇下仲好。

落返草千里前，會有一檔騎馬踱步嘅活動，價錢係幾多我都冇印象了，不過見到所有馬都頭耷耷，而且只係可以喺草千里最邊陲嘅地方騎五分鐘，難怪玩嘅人寥寥可數。

頭先各位都見到，其實草千里上嘅湖都乾得七七八八，呢個時候就不得不讚嘆「角度」嘅威力，樓主走去最多水嘅一個湖，然後盡量貼住湖面影，效果？都呃得下人啦，既影到山嘅湖中倒影，又影到草千里廣闊無垠。

循例叫兩位老友企定定影返啲Icon相。

不過平心而論，眼前嘅草千里係有啲平平無奇，又或者可能係我地唔係喺最好嘅季節嚟，所以唔係太感受到草千里嘅美，亦因如此，我地三個都冇多作停留，一個箭步就鼠咗入草千里休息站堆舖頭度買手信。都出咗嚟咁多日，總要買啲嘢返去交下差，唔係就無下一次兄弟行了。

行返去見肚仔餓，又唔想再坐低食嘢，就求其喺路邊買咗條熱狗腸填填肚，喺呢啲遊客區買一條都居然只係¥160，同香港街邊啲麵包舖嘅雞尾包都係差唔多價錢，馬上覺得抵咗。

雖然目前Chiikawa當道，但一場嚟到熊本，冇理由唔支持下本地薑熊本熊。或者係因為去緊呢個Trip嗰陣覺得自己諸事不順，當我一見到呢個熊本熊不倒翁嘅時候，馬上感懷身世，剎有共鳴，尤其是句「七転八起」直程係中到應一應。啱啊，返工唔順，明知係死局拆唔到嘅話，咁不如轉換下環境。係，出面大環境係差，但留低亦唔見得有好轉嘅可能，而且人生就好似呢句嘢咁，總會有好多挫折，但只要夠決心，夠堅毅，「起」一定比「転」多。於是二話不說，Shut Up and Take My Money，同時心入面對返港後會做嘅決定又多咗幾分堅定。

呢個熊本熊不倒翁宜家都放喺我書檯檯頭，話就話買手信俾女朋友，但佢收到後選擇直接放喺我屋企，絲毫冇拎走嘅意思。

至於樓奴同長髮武士，兩個都買咗啲手信返去慰妻嘅，只不過我都冇特別留意係啲咩，因為時間經已係2點半，我地係時候要登頂上中岳火山口，唔係就真係趕唔切5點去到黑川溫泉了。

阿蘇火山，我們來了﹗……？喂，好似，封咗登山口？唔係啦，拿拿臨泊好架車，行去閘口前睇睇啦。

阿蘇火山雖然已經開發到適合遊客好輕鬆咁上去，但如果撞正火山活動，令佢排出嚟嘅煙超過正常水平嘅話，佢地就會提升警戒級別，禁止遊人接近。而今日，我地三個千里迢迢，從香港東渡至九州，一心打算重陽登高，豈料天公不造美，阿蘇火山當局真係封山唔俾上啊﹗

經過一輪觀察同用有限嘅日文查詢後，已確定中岳火山口今日係唔會開放。天啊，成個旅程最期待嘅行程，居然就咁就去唔成了。

慘食閉門羹後，只能遙拍中岳，影咗當去咗。現場所見，一絲煙都冇，甚至乎現場亦冇任何硫磺氣味傳出，但就係唔俾上。

冇辦法啦去唔到火山口，往好處諗，本來緊湊嘅行程宜家就多番不少時間。既然去唔到，就去閘口旁嘅阿蘇山本堂 西巌殿寺 奥之院到參拜下。

話說樓主有好多興趣，除咗去日本100名城儲印仔外，另一興趣就係儲御朱印。如果有去開日本嘅巴絲都會知，其實儲御朱印係一項幾燒錢嘅活動，動不動就要¥500，夠我地三個人一人一條熱狗腸了。不過樓主上次去日本三十三間堂參觀嗰陣，見到啲學生好多都會手揸一本朱印帳，當我見到佢地打開本密密麻麻，儲滿哂御朱印嘅朱印帳嗰陣，我就知道，要入坑了。

呢本就係樓主嘅朱印帳，出自京都龍安寺，唔知大家又睇唔睇得出帳上嘅紋章係咩呢？正確解讀方法係由東至南，逆時針咁讀起，所以答案係「唯吾知足」。諷刺嘅係，本身於中國西漢時代銅錢上常見嘅一句話，如今居然喺日本見返，見到嗰陣，樓主腦入面突然冒起「禮失求諸野」五個大字。

上圖就係西巌殿寺奥之院嘅御朱印。樓主去兌嗰陣，撞到冇人排隊，所以好快就寫好，而且時值秋天，負責寫嘅姨姨仲加咗兩片期間限定嘅楓葉印落去。

搞埋哂所有嘢，御守、御朱印咩都買齊儲齊，都係3點未夠，要去埋阿蘇最後一個景點都綽綽有餘。回望返阿蘇火山，雖然去唔到火山口，不過都叫做嚟過，惟有遠遠咁咁佢合照一張啦。

合照完畢，又輪到自駕環節。一上車，喺導航上輸入阿蘇市最後一個目的地：Yamada, Aso, Kumamoto, 869-2313，車程為45分鐘，okay，出發。

等樓主繼續update

Lm

Lm
啱啱都喺九州自駕，行程同樓主掉轉
不過唔知係咪旅行去得多滑瓦，感覺有啲平淡，就無樓主既豪情萬丈
睇睇下又會諗起自己去旅行既初心
加油加油~

樓豬一定要好好珍惜呢2個兄弟！
今生好難會再有呢d朋友

Btw個時我去米塚係黃色的, 又有另一番風味

我咁啱因為工作上有少少波折先多愁善感
我本意都只係想同班兄弟玩下開心下

去旅行，最緊要令自己內心唔好有抗拒或者仲有意猶未盡嘅地方就得啦，希望游水巴你下次旅行都係盡興而歸！

已經密謀有第二次 由於各方表現良好，三位申請出境似乎無乜阻礙

伊度奧巴係幾時去，你呢個Feel都幾正，而且睇得出我地係停喺同一條路影，不過你似係三岔口位附近就影

唔係，因為今次都係打算同兄弟去玩下，無諗住影相，所以全部相都係樓主部Samsung S22+隨手影

不過都多謝你讚賞