[遊記] 最南同最北嘅都道府縣感受日本夏日 [後經台北星宇首航返香港]

有食海膽！我估應該都係馬糞海膽！
好creamy 又新鮮

睇完神威岬，咁就叫司機搵間餐廳去食飯啦。最後都係選左食海膽飯，黎到積丹點可以唔食海膽飯。現場間餐廳比較暗。唔好睇咁嘅顏色，食落係好 creamy，又甜 ，一啲苦味腥臭味都無。




下半場就去埋最後一個想去嘅點 - 島武意海岸啦。



不過可惜，附近好明顯就冧過大型山泥，結果連帶落去下面個石灘條路都封左啦。有機會再黎，希望到時候我可以行埋落去啦。



咁啲人就會玩埋余市個酒廠嘅，不過我就興趣唔大，都係早啲返札幌就算啦。


去到札幌就去下 montbell 咁啦，同埋去下薄野果邊食下野。是但咁入間拉麵舖去食邪惡嘅牛油拉麵。




加埋牛油嘅拉麵，食落又唔係好重牛油味，平衡到個味，加埋就係又鮮甜咁，好味！

都坐得幾近老闆切緊野，咁岩切緊洋蔥，唔知係咪咁就留淚，結果老闆望住我，話，you know why then ？互相望住大家就笑左出黎


呢個季節黎到北海道當然就要食下密瓜 ！之後都買多幾塊去滿足下先。


見到有間 M 記，就要試埋日本M記最鍾意出嘅期間限定產品。


行行下見到無雪嘅大通公園，唔同感覺。


最後見到呢個好似幾吸引，就買埋上火車搭去旭川果陣食。正！

不過就試到 JR 北海道嘅服務，一個鐘先有一班火車上旭川 仲要係我去到札幌站果一下就開出。啊，下次都係唔好掛住 hea 要睇返個時間先得

Day 5 完。

暫時打到咁：
#1 引言
#12 D0：一切從機場開始，CX 502 往大阪關西
#16 飛往沖繩
#17 沖繩｜萬座毛
#18 沖繩｜古宇利島心形岩
#27 沖繩｜美麗海水族館
#30 沖繩｜萬座毛日落
#37 沖繩｜沙灘睇銀河
#44 沖繩｜日出，果報崖，Ukuno Beach
#46 沖繩｜殘波塔，Zane濱
#48 東京｜JAL Tour
#51 東京｜酒店，東京鐵塔夜景
#54 青森｜飛往青森
#68 青森｜奧入瀨
#72 札幌，積丹｜黃金岬，神威岬
#77 札幌，積丹｜島武意海岸，札幌短遊

一個鐘頭一班喺北海道黎講算好密啦

咁旭川都話曬第二大城市，估唔到

8:00pm前係半個鐘一班車
你過咗八點後就變一個鐘一班

咁岩就過左八點果班車

黎到第六日，呢一日就係美瑛一帶嘅攝影遊。咁上次冬天去美瑛一帶都搵佢去渣車帶我周圍去行，咁今次都搵返佢。夏天嘅北海道同冬天嘅北海道感覺真係完全唔同。色彩繽紛嘅花田同冬天全個大地都係白色，個對比真係好大。

個行程就好早就開始，三四點起旭川車站度等，由日出玩到日落。


如果有機會都想住耐啲起旭川嘅呢間酒店，有大浴場，裝修都新。


不過可惜唔知係咪吽雨，呢幾日去北海道個天都係有啲濛濛地，同埋可惜就係一開始都比較多雲，見唔到一個好美麗嘅日出。同埋見相都有啲農地會捲起一舊舊草，然後方便收藏，等啲牛啊等等冬天可以有食物食，不過好似時候尚早，可能要過到八月先會容易見到，不過算啦，旅行就係咁，唯有有機會再黎感受下唔同時間唔同季節嘅美瑛啦。





聽住雀仔聲蟲鳴聲感受下北海道嘅溫度咁睇日出都真係幾舒服。


roller coaster road，好似係咁叫。


唔記得呢個起邊，但最記得係佢附近有個摩天輪。


拓真館隔離啲樹，起夏天黎睇就有唔同感覺。

黎到北海道當然就係要睇唔同嘅薰衣草同花海啦。主要就去左日之出公園，富田農場，四季彩之丘。富田農場就二十四小時開嘅（想食野就另計），去完富田就差唔多時間去埋四季彩之丘，咁早唔算太多人行，都行得幾舒服。

呢堆就係日之出公園，最少人，影得最舒服。不過起薰衣草入面自拍就成日俾蜜蜂纏住 不過對人就無攻擊性嘅。







呢堆就係富田農場，除左薰衣草之外就仲有罌粟花 。






當然就唔少得四季彩之丘啦！ 成個山頭唔同顏色，的確係整得幾正下。不過其實除左薰衣草，另外想搵嘅花係魯冰花。之前睇介紹主要就係六月，但好似七月頭都有，不過應該就係遲左所以無啦








黎到四季彩之丘就開始熱到頂唔順，都要食下個雪糕，同蜜瓜先得 。

中間個 tour 都會 take 個長break，當然啦，朝早咁早開始。咁就聽左司機講，去左美瑛個社區中心度享受下冷氣啊，幫相機叉下電，同埋下面都有間細餐廳食下野。


當時候都有相展，睇下人地相都幾寫意。




下半場啦！聽司機講有啲位冬天都去唔到，要夏天先去到。睇返地圖應該係美田一帶嘅呢啲位。而呢一帶都係今次美瑛之旅最深印象嘅地方。夕陽西下之下呢一度個景色真係好美麗。


咁當然仲有美瑛一帶其他地方嘅相啦。








中間見到狐狸一隻 。


咁果晚可惜就唔係好好天，好多雲，果晚本來想去睇星星都無得去睇啦。

之後果朝早都搵返佢帶我去埋青池果邊。夏天見到青池溶曬水，同冬天個感覺真係截然唔同。



白鬚瀑布都係冬天黎個樣比較正，附近好似有溫泉旅館果類，所以都有機會見到有啲雲有啲煙起瀑布附近。


其實去青池呢個位都係臨時臨急起前一日同司機遊緊美瑛果時候約，好彩佢得閒搵到少少時間帶埋我去，之後其他人都約左佢帶團，所以第七日嘅頭頭就只好這樣啦。

待續。

咁樣photo tour一日收幾錢?

30,000 yen 不過都值得嘅
網上見到其他嘅photo tour 都差唔多價位。如果有同行人會唔同價。

第七日去完青池，同司機講完再見之後，就開始自己一個人起美瑛附近玩啦。見啲人都會選擇租架單車玩美瑛，雖然前一日就話搭左私家車周圍走，不過如果用單車代步嘅話應該係唔同感覺，同埋查過天氣預測就應該得返幾粒鐘好天，之後就開始落大雨，又去唔到太遠咁。所以就咁就租架單車玩下啦。有電池嘅單車起操控上面個感覺的確係有啲唔同。

美瑛站，租單車果間鋪頭就起美瑛站對面。



我唔記得呢棵叫乜嘢樹。


見路就起美瑛附近轉黎轉去，


竟然去返尋日覺得好正好舒服果個位度。 我以為係去緊美馬牛果邊架嘛

不過都真係落雨啦，中間有幾下都要著返件 goretex 外套擋下啲過雲雨。還單車果下個天已經密曬雲。隔多一陣就開始落大雨。


還單車隔離果度其實係食店黎嘅，咁黎到北海道，當然就要食多幾次蜜瓜，同埋試埋呢度嘅牛奶啦。真係同平時飲開果啲牛奶唔同味 ！


美瑛站果時候都有個七夕展板俾人掛願望。當然就努力支持啦！


之後都搭返架車返旭川啦。呢架火車都係特別塗裝，幾好樣。

上次去旭川都想去旭川站隔離果個Aeon mall，貪佢夠近嘛，蜜瓜當造嘅季節當然就有好多蜜瓜賣啦，不過想買切開左一半果啲蜜瓜返酒店食，始終一個人食成個又好似太誇張搞唔掂。就因為太遲而無曬啦。退而求其次就唯有買西瓜啦。





咁起旭川果度都有間 starbucks，當時就有期間限定嘅桃嘅產品，就試埋啦！正

夜晚就食埋起旭川比較出名嘅拉麵－山頭火拉麵總店，香港好似都有分店，不過當然用返日圓計數同起返日本果度食會好好多啦。味道唔會話太鹹．同埋比起其他拉麵鋪，個湯底又好似比較 creamy 咁。





去日本都係鐘意去 mister donut 買donut 食，呢排係 minions 嘅芒果系列，不過一食落去第一印象就係藥水味道...仲記得以前最深印象係發燒嘅時候有一款係黃黃地色嘅藥水，個質地都係痴痴地嘅，然後果款藥水就應該係扮芒果味 。果排 starbucks 有個香蕉朱古力沙冰期間限定又係同一道理



起美瑛度買左本書，入面除左有個攝影師嘅作品之餘，就更加有地圖介紹返究竟啲相起美瑛邊一個位左右影嘅，對安排下次美瑛之旅都幾有用

day 7 完。待續

屌 同一日又係喺旭川Aeon
可能食緊同一個西瓜

嘩 咁都有得撞到正
分分鐘真係同一個西瓜

draft 左個行程 希望成功去到同順順利利

道東冬天幾靚、有機會想再去
如果住阿寒湖酒店、不要住雅鶴、上次食飯、個女服務員成支鼓油倒落身上、好彩着果件係浴衣

睇相，道東如果一切順利應該都幾多特別野玩同睇到
一定要再去啦！

黎到 Day 8。今日就主要係去旭岳。去旭岳如果係識得揸車嘅話就比較方便嘅。唔識嘅話就只好靠一日五班左右嘅巴士來往。去旭岳條巴士線，個站就係起旭川JR站對出個巴士站，第9號月台上，等66號巴士車。條巴士線都會經一經旭川機場，所以都會見到行李乘客上車。


咁今次目標唔係為左登頂，都係去個展望台條路行下就算。


啲人主要都係揸車黎，所以臨落車都塞左一大輪。





上到纜車站都會有人講下大概路況係點，會見到啲乜植物之類。


好可惜今日個天未開曬嘅。所以都見唔到最清楚嘅旭岳嘅一面。條路就簡單嘅，大概係香港最普通嘅郊遊徑 level （唔上旭岳頂嘅話），隱約都見到有對母子著拖鞋行。呢段路都比我想像中多好多人行。但又未去到旺角level嘅。


比較近距離咁睇住啲火山口咁噴啲煙出黎係特別嘅！

Day 8 原諒少圖 mode

之後乖乖咁等返巴士落返旭川啦。咁越睇個天就越清，咁就多口問下尋日個司機果晚得唔得閒啦。咁佢話得閒，太好啦。可以去影星星！不過就要快快手處理住宿問題啦。果晚就本身住札幌，尾班車都唔夠夜，又正值三連休，旭川啲酒店都幾爆下。check check 下都放棄啦，不過起架火車上面，臨開車前兩三分鐘check到有酒店有房，咁就拿拿林落車book 房啦。咁就成功book 到呢一晚睇星星之旅。

不過都要搵返起果晚預計會起札幌住一晚果間酒店，因為啲宅急便行李去左果度，同佢講返聲啲行李我會黎攞返，不過臨時臨急我唔會check in，咁樣好似好啲嘅 。

一切安頓好啦，食返個拉麵，又去行下aeon 都係見唔到密瓜，都差唔多時間啦。


今晚就主要去左兩個地方，首先去左 Christmas tree 度，不過時候尚早，又未月落，所以就影一兩張就算啦。


跟住就去mild seven hill （？）果邊，正 ！肉眼都見白色一團團嘅星，之前都check 過係睇銀河嘅機會，咁就影埋啦！

伸手不見五指，得蟲鳴聲，又少人，一望上去就係密密麻麻嘅星星，靜靜地咁睇星星都真係正。

如果有機會都想去多幾個位，希望有咁嘅機會啦！

day 8 完。

清唔係自駕點樣去影星？
點樣返去

眼殘
睇漏咗原來有司機

同一日我都有去
夜晚影出嚟效果原來咁靚 我都想影

日頭我都有去！ 不過無你去果日咁好天～
夜晚真係幾正架，不過真係伸手不見五指，睇路果陣手機都唔係幫到好多

Day 9 就係南下函館嘅日子啦。
本來都唔想走落去函館嘅，不過睇睇下函館果頭好似有煙花睇，咁咪走埋落去啦。首先就一早就搭車落返去札幌間酒店認領返啲行李先。


真係搭第一班車架，連車站入面堆鋪頭都未開。

同埋手痕買多左野，認領完啲行李乖乖走去郵局寄野先得。


每次去札幌都係會去札幌站間 mister donut 去食早餐。


其實札幌去函館，如果就到時間，或者行程緊逼，我寧願搭國內線好過，但見今次去函館唔多行程，所以都係搖火車去算啦。


去到函館，聽人講呢排好似柯南同函館有啲關係，所以一落到去就見到柯南嘅紙牌。其實都差唔多 lunch time 啦。咁就是是旦旦去函館朝市搵一間解決啦。啲海鮮真係好正。





然後其實都幾熱下，當然就要黎個夏天黎北海道要做嘅事-半個哈密瓜就咁啪啦 ！

差唔多時間 check in，今次都係住返上次黎函館住過嘅果間 東急ステイ函館朝市 灯の湯，貪佢一黎房入面已經有洗衣機 ，二來就係佢有啲房係可以望住函館山同函館港一帶，咁就可以 set 定另外一部相機起間房入面，然後就可以自動咁影煙花啦。

起間房 hea 多一陣就出發啦。


一落樓就感受到夜繽紛。呢啲先係夜繽紛架嘛。不過時間關係排唔曬咁多個攤檔。


然後就搭電車去十字街度搭纜車上函館山。不過我低估左函館山嘅吸引程度，上到去已經無曬位企。如果見識過秋天京都嘅清水寺嘅四五排逼人程度嘅話，呢度就係差唔多，而且啲人係唔會走嘅 。


函館纜車站有DJ 。

總算搵到個位可以影到。不過就落唔到腳架啦，只好手持挑戰相機嘅能力。場煙花分左三四節，起山上面都唔太知道幾時完，所以有時候等緊車走，點知就又放 。第一張就係山上面影嘅，第二張就係酒店房影嘅。




總算睇完，都搭返電車去返酒店啦。都已經好夜啦，除左小丑漢堡之外，都唔知仲有乜餐廳開，隨意搵到間拉麵舖食就算。我記得果時候二月去函館都搵左好耐都見唔到拉麵舖。所以今次見到一間都唔猶疑啦，入左去食左先算。間鋪頭個招牌好似漆黑中嘅螢火蟲咁 。




返到酒店當然就要開箱日本便利店嘅野啦！我唔記得影巨峰提子味果個。呢兩款黎講我個人就比較鍾意巨峰提子味多啲。

Day 9 完。

Ching咁勇上函館山影煙花
試過平日等成粒鐘都埋唔到去
如果喺酒店露天風呂浸住睇煙花實好正