係呀，我又飛咗喇……又係去日本呀，不過今次我唔係去做嘢，而係以旅客身份，同屋企人四處去食去玩。
呢次去嘅，都係我哋香港朋友，大家都去慣去熟嘅熱門目的地，大阪同京都。一如之前兩次嚟嘅情況，不論喺遊客區，抑或一啲非傳統遊客區，街上面都係人頭湧湧，周圍都係水洩不通。呢幾日日本天氣非常好，陽光充沛，簡直係好熱呀，舉起手機隨便影吓，都影到靚相。天朗氣清，同屋企人四處走走看看，喺大阪，我哋就去咗心齋橋，喺京都，就去咗啲神社同宮廷參觀。嚟日本呢幾日，日日行過萬步，比起平時喺香港行多幾倍，製造更多空間去食啲好嘢。
我同大部分香港朋友一樣，去到日本，食係一個重要嘅環節，可能因為我哋揀嘅，都係一啲比較受歡迎嘅食肆，所以佢哋幾乎都係爆滿，如果唔係阿囡多個月前事先訂好位，真係怕會冇啖好食。
目測所見，喺我去嘅地方，基本上一般食肆生意都相當唔錯，街上面都見唔到吉舖，相信呢個同當地租金較平，都有一定關係。我睇佢哋啲招租廣告，一個四百呎左右嘅住宅單位，月租都係三四千蚊港紙，所以即使當地人薪金水平，都唔算好高，但係因為租金相對低，變咗大家嘅 disposable income，即係可動用嘅收入，都係比較多，變咗大家嘅生活質素，都會比其他地方好。
喺日本，周街撞到香港旅客係平常事，但今次我發現，原來有好多香港人，喺日本嘅服務行業工作。好似喺我入住嘅酒店裡面，有來自香港嘅服務員；去到大丸百貨嘅 food court，又見到講廣東話嘅香港朋友，仲介紹我食葡撻添。我諗近年，真係有唔少香港朋友，移居咗日本闖天下。
一個地方係咪吸引到人嚟，都係要睇嗰度個社會嘅大環境同氣氛，畀唔畀到啲市民信任，信心，安心，安全感，淨係靠烟花，魚蛋呢啲咁樣嘅嘢，就絶對唔係辦法啦。
#又飛喇
#又係日本
人地無官一身輕理得你死，鍾意潤你咪潤你，再唔係返外國養老又得
又撚前朝