最近屋企人入咗醫院,去探病後有感
呀公住院期間要抽血,因為護士整痛佢所以就發脾氣打護士(護士講嘅,我哋無見到佢點打),加上其他安全性問題而要挷住佢雙手。因為挷得緊又令佢唔舒服,繼而佢嘅情緒更加差,有時會鬧人、發脾氣,不過佢並唔係針對護士,因為就算係屋企人佢都會照鬧。屋企人見佢唔舒服,叫護士唔好挷得咁緊,同埋希望佢哋體諒呀公唔舒服先咁樣,結果應該係被呀公打嘅男護士就用唔太好嘅語氣話:「我被佢打我都唔舒服呀。」屋企人已經向佢道咗歉,但之後請佢哋幫手移一移呀公時,佢亦無理會佢隻手被挷住,勁大力咁扯佢起身,然後就好瀟灑咁走咗,就算呀公不停話好痛都無理到。
首先我希望為被我呀公打過嘅人道歉,佢打人係唔啱,但係我想講佢唔舒服亦都唔係佢想,佢係病咗、你哋整痛佢先會咁
當自己屋企人唔舒服,唯一可以做嘅就係帶佢睇醫生,將佢嘅病情交俾醫生、護士處理,但係原來醫生、護士都唔值得你信賴。當家屬探病時睇住都咁「真性情」,當家屬離開後又會點樣?當病人係任你魚肉嘅公仔?定係機械人?
知道香港做醫護係唔容易,人手不足,要處理嘅病人、應對嘅病人家屬多不勝數,自然會好大壓力、有情緒。但係將心比心,當大家將自己屋企人交俾你哋時,唔係話你哋要照顧到佢哋無微不至,但至少可以當佢哋係人,係有感覺、會痛嘅生命?如果你哋屋企人住院,你哋都會希望佢哋咁樣被對待咩?
唔係話你哋人工高包咗要俾人打,但如果當你真係企喺病人角度時,多少會思考/嘗試理解病人做出某啲行為背後嘅原因,至少唔會好似小朋友咁因為佢做咗啲令你唔鍾意嘅嘢而去「報仇」。
或者係樓主太天真,覺得啲人從事服務性行業係真心想幫人,結果好似都唔係樓主係廢J,唔咁當面爆人哋,只可以喺度呻吓,如果too long do not read嘅話我講聲sorry
以下開放討論