會唔會係你睇得唔夠透徹?
再宏觀啲嚟睇,大部份嘅中心思想就係
難為正邪定分界 情義兩難全
金庸當然就係大師級,這點無庸置疑
就係因為佢功力深厚,隨手拈來,就已經妙筆生花
世人用放大鏡嚟睇,話邊個段落係隱喻某段歷史、當時政局,邊個段落係十幾廿年前鋪落嘅伏線,邊個段落係彩蛋 ...
事實上,有啲可能係,但唔係嘅更多
對佢嚟講,可能只係 the curtains are blue
佢自己都承認,啲小說本身係連載故事,創作時段橫跨好長時間,難免會有穿崩嘅地方
有啲人甚至玩到逐粒字嚟研究,創立金學,要將金庸小說提升到與四大名著並列,佢自己都謙虛地話太抬舉了
優秀嘅文學作品有好多,適合改篇做劇集、電影、遊戲嘅亦有好多
揀中金庸嘅作品,係咪因為佢嘅作品最最最優秀?定係當中穿插著佢自己籌劃嘅包裝、宣傳策略?
金庸小說我鍾意睇,亦好尊敬金庸先生
但係睇小說還睇小說,唔駛將啲作品過度神化,我諗這個亦是佢老人家嘅意願
佢在生嘅時候,你哋成日搞金庸 Universe,逼佢答邊個武功最強?最想娶邊個做老婆?
佢都好難做,點答都有 fans 唔鍾意
這些話題,大家茶餘飯後傾下,真係無傷大雅,但係有啲人拗到起晒鋼,反晒面,甚至打大交,就真係好無謂
金庸都唔想楊過嘅 fans 與令狐沖嘅 fans 反面㗎嘛