歡迎舊生或者有心人入嚟推post
有咩非私人問題我都盡量答
TLDR
1. 及早調整生理時鐘， 經驗話我知需要至少一個星期。 DSE 係8點半開考， 你需要確保自己呢個時間清醒。
2. 全日嘅卷都可以用鉛筆/鉛芯筆做 （長題都得）， 方便修改， 唔會扣分。
3. 長題著重表達， 唔係話答案啱就滿分， 唔建議用out syl方法。
4. MC卷著重速度， 做卷策略同操練都好重要， 確保自己有睇過所有題目。
過往嘅posts
有啲地方想避免重複所以無特別提起， 想要完整嘅資訊就可能睇埋之前啲posts。
[DSE MATHS 2023] 9年5** + 連續3年全卷滿分心得分享， 好人一生平安
- 分享自 LIHKG 討論區
https://lih.kg/3292145
[DSE MATHS 2022] 8年5**+2年全卷滿分心得分享， 好人一生平安
- 分享自 LIHKG 討論區
https://lih.kg/2898927
[DSE MATHS 2021] 7年5** + 滿分心得分享， 祈求今年M2爆機
- 分享自 LIHKG 討論區
https://lih.kg/2467982
[DSE MATHS 2020] 6年5** +MC滿分 心得分享，好人一生平安
- 分享自 LIHKG 討論區
https://lih.kg/1995341
開post目的
純粹係積福祈福， 上年實力不足無滿分到， 今年再嚟過
做返數學科嘅集中討論， 有DSE數學嘢問嘅人可以入嚟
背景
HKU MATHS GRAD， 舊制AL， 全職補習。
教學 + 執靚 CV + 追夢， 幾乎每年都去考DSE (連M1/M2)， 考咗 10 次， 20 個 5**。
10年嚟MC淨係錯過一條， 喺2016年； 2020 至 2022 年亦好好彩地CORE全卷滿分。 M1 初見爆機， 但 M2 未， 所以仍需努力。
唔會用網上身份收客， 識我嘅人都希望你唔好爆我出嚟
計數機
計數機跟身， 檢查好係DEG MODE， program完好。
兩部計數機就夠， 枱面多過兩部嗰啲通常都唔會有好下場。
建議program有四個， 比起上年加多咗個四心， 至於啲program點用就留俾大家發掘。
1. Two equations two unknowns (linear)
2. Cosine rule for angles
3. Intersection of straight line and circle
4. Centres of Triangles
略略講下點解加四心入去
近兩年嘅長題目似乎玩硬計為主， 2022同2023年到最後都係俾齊晒三角形三點嘅坐標俾你， 用四心program可以check到數， 甚至可以喺某啲分題直接拎到分， 所以都算係有啲價值。 就算你完全唔知點樣搵到個心出嚟， 都可以篤機至少拎到部分分數， 好過無。
當然如果實力足夠嘅同學， 都係用返正常步驟求個坐標出嚟啦， aim 星嘅基本就係可以洗走晒program都做得到全份卷。
卷一甲部建議
練熟SECTION A， 無論你目標幾高幾低都係要練熟佢。
Aim low嘅， 要學識晒SECTION A題目要嘅相關概念， 考評局唔會成份卷都咁有創意， 你嘅任務係要喺翻炒嘅題目入面拎到分。
Aim high嘅， 要學識點樣喺翻炒嘅題目用最精簡嘅步驟作答， 試下大概計劃一下答題嘅鋪排先出手。 平時改卷見識過同學就係寫得太多字， 又或者計多咗好多無謂嘅嘢先去到個答案， 喺坐標幾何嘅題目尤其明顯， 計咗好多無用嘅數字同坐標出嚟。
一般嚟講長題目唔會好陰濕， 因為考評局都唔希望大家因為一個細微嘅careless， 令你由part a錯到part d。
考生需要留意清楚題目嘅指示， 要明白題目入面每一隻字嘅意思， 同出現嘅原因， 你當做好似作文審題咁就啱， 你就會知點解有啲人好似點樣扭條問題都解得到。
卷一乙部建議
對一般考生嚟講， 乙部就係盡能力去逐分逐分執返嚟嘅地方， 唔需要每題都由頭到尾破解晒， 寫一啲步驟， 積少成多， 睇下呃唔呃到一兩分返嚟。
對十幾歲嘅考生嚟講， 你無乜可能真係乜題型都見過晒， 總有啲題目係要即場思考， 所以要喺SECTION A偷時間用， 呢一點亦係大多數突破唔到樽頸位嘅同學忽略嘅地方。
做熟啲瘋狂翻炒嘅題目， 例如completing the square (配方法)、 Transformation of graph (圖像變換)， 唔好睇小呢度一兩分， 事實係2023年乙部嘅平均分得7分左右。 如果你喺呢度執少少， 嗰度執少少， 湊湊埋埋就贏到好多人。
面對長題目， 千祈唔好咁快就放棄同skip， 留意下有無咩地方係可以篤下機或者計到少少數。
以2023年Q19為例， 你喺b(ii)利用返t=24， 用四心program篤返啲坐標出嚟， 再解釋三點collinear， 係可以拎到滿分 (因為計坐標嘅步驟分去咗part a)， 而解釋collinear呢個位我會形容係SECTION A(1)嘅程度， 大部分考生都做得到， 留白即係你直接放棄咗執分嘅機會。
要溫熟四心嘅定義， 所有嘅解題方法都係來自定義， 諗真啲circumcentre外心、 incentre內心個定義係咩， 畫返相關嘅圖， 然後就諗方法解決。 學生要記嘅係定義、 性質同運算工具， 唔係例題， 唔好喺腦入面搵自己做題嘅記憶， 如果唔係所有非翻炒題你都唔會識做。
卷二
選項平均分佈， SECTION A 7788， SECTION B 4443， 提醒一次7788唔代表係7個A+7個B， 只係有兩個選項出現各7次。
長題目唔玩得嘅陰濕， 考評局就會喺MC陰到你一棟都無
留意下自己有無試過好肯定咁圈咗個錯嘅答案， 代表住你俾考評局估中咗你會錯啲乜， 心入面記熟呢個伏位， 喺下次做題嘅時候留意返。 會咁講係因為考評局每出一條數， 都要作多三個錯嘅答案出嚟。 而據我觀察， 考評局並唔是咁有創意， 年年啲伏位都係差唔多， 作distractor嘅靈感都係好相近。 如果你留意到呢個嘅話， 你命中率肯定會高極多， 亦會知有啲咩錯係唔應該犯。
卷二最大問題係時控， 要做得快， 就要喺簡單同常翻炒嘅題種入手。 喺簡單題目偷到時間， 你到後期就有好長時間思考同check卷。
見識過太多同學淨係掛住應付自己唔識唔熟嘅題種， 完全忽略簡單嘅翻炒題， 結果投資咗極長時間， 換嚟一個唔可靠嘅回報， 到時又未必識做， 更唔講未必真係做得快咗。
舉個例， 普通一條identity恆等式如果你都要超過一分鐘先做完， 咁你諗下後面嘅題目會唔會全部都簡單過佢， 計算量少過佢， 呢個時控你問心又有咩可能做得晒全份卷。
濃縮你嘅步驟， 寫字量盡量縮減， 喺以秒為時控單位嘅試卷入面， 寫字嘅多少絕對會明顯左右到你嘅速度。
學會適當地放棄， 尤其係幾何類嘅題目， 幾何最大嘅問題係會俾到假希望你， 你會以為計多一條邊計多一隻角就掂， 但結果仍然係卡死晒一直突破唔到， 然後浪費咗幾分鐘， 甚至十幾分鐘。
唔好諗住一次過做得晒45條問題， 我自己落場都會skip一兩條， 之後再做返。 未必係當時諗唔到， 有時純粹係嫌條題目麻煩唔想做住。
卷一卷二比重
近年嘅比重係傾向卷一佔6成， 卷二佔4成。 如果你想估grade嘅話， 你係需要拉勻兩份卷嚟睇， 唔可以齋睇一份然後打晒飛機咁話自己 5**。
例子： 卷一 85/105， 卷二 40/45
總分 = 85/105 * 60 + 40/45 * 40 = 84.1%咁就大概係level 5左右。
實際分數嘅cutoff年年都會有變， 上網唔難搵到資料
不負責任地鳩估嘅話， 我會估今年係卷二難 + 卷一淺， 即係卷二嘅weighting會升
祝大家考試順利
