琴晚大感冒嘅我，一覺瞓醒發現自己變咗條龍？！

自己的價值，不需別人來賦予。 －紅瞳少女


Penana連結：https://www.penana.com/story/135650

奇幻x歷險x超自然！跨越界限的紅龍，與嚮導少女踏上異世界征途。爆笑催淚，愛敢動天。穿梭於千絲萬縷間，發現當日成為龍的真相！

引用自Penana序言：

本篇屬於忽發其想作品，透過以自己丁點能力和方式，宣揚粵語字以及粵語乃至香港文化，我想這亦是屬於自己的一種無用之用吧！

作者目前需同時兼顧工作及學業，因此大部分創作都與晚飯相伴，左右互縛間，錯字等總會看漏掉。因此若發現錯字，不妨留言一下，好讓我能快速處理；希望大家別吝嗇評價及鼓勵，寫作的路不易走，這都是我繼續前行的動力。

日後有任何通知，將會在這裡出現，現暫定每日一更：平日更新時間為晚上九時；週末更新時間為下午四時前。

目前每日一更，每50正評加更一次。若真係有幸多過250正評，為免隻手爆炸，就改為加更字數增加，細節到時再算！

0.她的告別式

深秋早上，陰沉天空正目送著，載著她的靈車進入火葬場。

接載大家的大巴緊隨在靈車後方，車上明明坐滿了人，但是陷入一片死寂，各自在窗邊看著，屬於自己的天空——然而各自的天空仍是陰沉昏暗。

打從上車的一刻，我就坐在我所能揀選位置的最前方，通道旁的座位上。雙眼一直透過車頭玻璃窗，望著她的背影，引離我們前往她的最終場地。

「我一直⋯⋯守護你⋯⋯永遠⋯⋯」她除下了面罩，虛弱無力的嗓音說著。

她將這句話永遠烙印在我腦中，心中。

我想起那日，只有短短的五分鐘，在病榻前守著她。我看著滿床的儀器喉管，機器聲冷漠，規律地為我們計算著時間，坐在她旁邊的我，握著她冰冷的手。那個她曾誇讚「鬼才」、「總會想到辦法」的人，此刻竟想不到半點辦法來救助她。

五分鐘的短暫時光，從此成為了我的陰影。

大巴停在路邊，打開了門，只見靈車繼續行駛，駛入了一所建築內。

「好，我哋喺度落車，前面就係禮堂。」坐在第一排的堂倌首先下車，帶領著大家沿路前往禮堂。

我們在外面等候，等他在門前打點一番後，工作人員才打開門，裡面空曠清靜的環境，一種莊嚴場合內有儀式感的氣味。

我的思緒緊繃著，害怕湧出那不莊重的淚水。

禮堂沒有設置座位，因為大家都知道，這只是一趟短暫停留，不介意站在前面，看著她生前的相片，以及後面蓋起來的棺木。

她一襲長長的棕黑頭髮，戴上生前最喜愛的藤帽，秀麗雙眼水亮有神，睫毛上翹，眼角微彎，一副真誠的態度，總是帶著魔力般讓人感到平靜。鼻樑挺高的她，回想起她的側面，能看到她鼻背曲線，立體感十足。嘴角起梭，桃紅的小嘴巴，溫和動人。

她笑起來有酒窩，是全世界最美麗的笑容。

「各位前來參與嘉倩嘅告別儀式，十分有心。先人吉時起行，百無禁忌。」

「請傳一傳啲香俾旁邊嘅人；有信仰嘅人請自便默禱。」

「儀式開始！」

此刻我終於忍不住落淚，低下頭來抽著鼻。

我知道她不想我哭，但是我實在是無法忍受這種送別的悲痛。

「而家由嘉倩親人代表告別。」

叔叔姨姨一同上前到她棺木前，強裝淡定的兩人，在堂倌的指導下，按下按鈕，輸送帶起動，載著她進入永恆。

「一鞠躬！」

「記得，我會喺嗰邊守護你。」我彷彿聽到她的低語。

「再鞠躬！」

「永遠⋯⋯」

「三鞠躬！」

「禮成！」

我從此將一切深埋，只帶走那五分鐘的回憶，活著另一人生。

1.大感冒

「我真係唔係好掂，瞓先，對唔住對唔住⋯⋯」流著鼻水的我，望著檯上麻雀，忽然感覺天旋地轉，喉嚨乾得像要裂開般隱隱作痛。感覺再下去隨時會搞出人命，只好雙手合十向同檯宿友道歉。

「吓！唔係呀話，三缺一喎！」坐在右邊正舉杯飲水的健明反應很大，對住我口水橫飛。

「算啦俾佢抖下啦，聽吓佢把聲都變埋啦。」對家家樂總算有點人性，拍了拍健明膊頭，即刻被對方一個反手甩開。

「喂！搭走晒啲運氣！」

「Oh！ Sorry sorry！」家樂賊笑一聲。

「Sorry你個頭呀，俾我搭返！」佢這一笑實在太不合時。健明即刻回擊，手回搭著家樂的膊上，兩個在此上演一場你搭我搭的表演。

「喂，咪玩啦，等子建休息一晚啦。」上家文偉出聲阻止：「我哋三缺一，不如出去飲杯嘢啦！」

「又好。」健明將面前已經排好的麻雀推散，起身伸了個懶腰：「唉⋯⋯咁搭膊頭法都打唔到落去啦。」

「賴啦⋯⋯又唔見我驚？」家樂輕撥自己膊頭揶揄道。

「喂⋯⋯你哋落去啦，我瞓先，聽朝去睇醫生⋯⋯幫我同教授講聲我唔上堂啦⋯⋯」我無等他們回應，自己走入宿舍臥室熄燈關上門，呯嘭一聲跌落床上，大字形攤倒在此，合上眼，不知不覺就睡著了。

黑暗中忽然感覺到個鼻尖痕癢難耐，不自覺般用手指甲抓了抓。豈知一陣痛楚突然在鼻尖出現，隨即返神過來，半昏睡的我迷迷糊糊望了一眼檯上的鐘，原來現在才是先凌晨兩點多。

當下一刻，我直觀地覺得自己一定是抓損了，下意識再摸一摸鼻子。

突然發現，不知為何鼻子的位置⋯⋯好像比我印象的要前得多。而且發現自己隻手指頭，戴上了某種硬物，摸著自己的臉時，總是被那東西刮到，彷彿在指頭伸出了多一截來。

心想那一定是健明他們搞鬼，於是我從床上起身，打開燈。

「吼哇⋯⋯」我發出震撼性的吼叫，正正是某電影裡面，暴龍戰勝速龍後發出的吼叫聲。實際上我是要大叫「仆街啦」，但我發現我根本發不出來這三個音。

鏡子所反映的，是一個紅色龍頭！橘黃色豎瞳，長著雙角的龍頭！

我舉起手⋯⋯但那實際上已經不是一隻手。雖然還是有五隻手指，但是上面長有長長黑色的爪子，原來就是它一直在戳著自己的臉。

再看著自己的全身，沿著手臂延伸到後背，都被暗紅色的鱗片所包覆；從下巴一直往胸口以下肚子則是米白色。轉身一望，我幾乎要暈倒在地上，竟然長出了一條暗紅色尾巴和翼來，是如假包換的龍翼，感覺到它的存在之後，更是能夠控制它張開來，上面像蝠翼一樣有著輕柔的皮膜。

「一定係發夢啦！唔怕！」我心想著，用長著爪子的雙手輪流拍打著自己，想要從夢中醒來。

如是者這樣拍打了好一會兒，拍得雙手臉頰發疼，還是醒不過來，仍然是龍頭龍身的模樣在鏡子前出現。

「難道唔係夢⋯⋯」心底裡一直被壓抑著的想法，在此刻爆發出來，陷入恐懼的我腦一片空白，不知道該要怎麼做。

「嗚⋯⋯」我試一試自己能不能說話，但仍是只能發出這種低鳴聲來。

望了一眼鐘，已經接近三點了。我跌坐在地上靠牆著好好冷靜一下，試著讓那一點理智重新上線。

如果是真的話，那就絕不可以以這種形勢出現在眾人面前，那一定會引起軒然大波。我才不想像那隻甚麼獵人的遊戲一樣，被人狩獵而死，但求現代科技會使人文明一些吧⋯⋯也難保不會被人抓去研究⋯⋯

但這副身體並不是能夠輕易隱藏過去呢，就算穿上了衣服戴上圍巾帽子，也藏不下背後那雙龍翼，以及那條不太能自由控制的尾巴。

難道我就要一直躲在這裡嗎？抵著飢渴直到找到了變回原形的方法嗎？

話說過來，我這樣靠著牆，時間一久，雙翼就像是手臂被壓住一樣發著麻，不得不挪動身體遷就一下，橫躺在地上去。

肚子餓的時候⋯⋯自己能控制得住嗎？始終身體變成了龍，腦袋會不會也出現了變化呢⋯⋯

躺著躺著，意識也再次變得迷糊，不爭氣再一次陷入了夢鄉去。

2.驚魂

一道強光穿過我的眼皮，張開眼一看，發覺那光芒亮得不能直視，下意識舉手遮擋，卻發現雙手被束在床上，身體也是動彈不得。

「咩事呀！」我驚恐地叫道，有兩人聞聲而至，穿著白大掛，用手電筒猛照著我的眼睛，害得我看東西總是拖著影子。

「瞳孔收縮，清醒。」

「我知道你識聽我哋講嘢，你喺邊到嚟㗎。」

「咩呀⋯⋯我住喺呢度，我喺個大學生！」我才發現周圍的環境起了變化，這裡並不是我的房間，而是一個類似手術室的地方。

「快啲講！如果唔係我就劏開你！」

「唔好呀大佬！救命呀！」我大叫道，不斷地掙扎起來，把床邊的銀白色擋板給踢開，剛好對正著我。

我從那模糊的反射中，看到自己仍然是全身紅色，長著雙翼的模樣，才驚覺這下糟了，那不是夢，更是被人抓住了！

大概有人趁我睡覺的時間把我抓到這裡來！

那人舉起電動鋸，表面鋒口指著我，明晃晃的。

接上了電力的鋸快速轉動，發出嗡嗡聲。「唔好呀！」我嚇得幾乎要尿出來，猛力掙扎，束縛著手的帶子似乎有點鬆脫，我便嘗試抽出手來。

「想走？」那人罵道，電鋸瞬刻插到我的肚子中，噴出鮮血。

「哇⋯⋯」我整個人彈了起身吼叫，猛摸著自己的肚子，除了那被米白色鱗片覆蓋的肚子不正常之外，那根本沒有電鋸穿肚的情況。

「原來係發夢⋯⋯仆街啦⋯⋯我重係呢個樣！」我心想著，用手摸了遍全身，仍然是龍的形態出現在鏡子前。

外面陽光照射進來，我起身去拉開窗簾再回頭看鐘，才發現那已是早上七點。

往房門走去，走了兩步，腳爪敲擊地面，發出響亮的聲音。

「喂⋯⋯子建你醒啦？」外面有人敲著門，是健明的聲音：「你睇緊恐龍片呀？開到咁大聲嘅？喂！」

大碌啦今次⋯⋯

腦袋一片混亂，但是我根本發不了自己本來的聲音。

雙眼到處張望，看看有沒有甚麼脫困的方法，不過這房間一眼看完，根本沒有甚麼能應付這個情況。

唔通真係要跳窗？

想著想著，心寒了半截，這裡可是十五樓，跳下去還能活命麼。

我轉頭一看，看到檯上放著自己的電話，馬上上去拿起來，幸好雙手還能抓得穩電話，螢幕打開，看著它，它卻一直無法解鎖。

頂⋯⋯個臉容識別咁廢㗎！唔係喎⋯⋯

我忽然想起自己的樣子⋯⋯已經不是那個英俊瀟灑的模樣，心裡不禁冒起悲傷來。

我馬上動起爪子點著螢幕，螢幕居然有反應，馬上輸入起密碼來，成功解鎖。

「喂！子建你應下我啦，無事下話？」

我再點開通訊軟件，打開我們四個的群組，裡面有著大量我跟他們的對話⋯⋯當然那些都是無聊的東西，雜七雜八的甚麼都有，我點開了其中一個由我傳送出去的語音。

「哇，玲瓏浮突，真係J-able！」

「下⋯⋯你睇緊乜呀你？你J恐龍？」

仆直啦⋯⋯撳錯嘢！

我再上劃，才發現這訊息之前，都是女生的相片。即刻再上劃到上星期二，我記得有一段是提到我肚子痛的事情。

「唔係呀⋯⋯我重係有啲唔妥，再抖抖先！」我按開其中一個對話，幸好這次按對了。

「係呀？你幾點睇醫生呀，駛唔駛我哋叫醒你。」

「唔駛啦，不過個肚重係⋯⋯」

真是禍不單行，爪子不好使，一直按停止鍵但是卻沒有反應。

「個肚重係咩？你感冒菌入腸呀？」

「可能啲野菌唔熟。」

「你九唔搭八嘅，你係咪燒壞腦呀？我問緊你係咪感冒菌入腸呀！」

「你瞓先啦⋯⋯」

「好啦好啦，通頂兩日真係搞不撚掂⋯⋯你自己睇住啦下！」

「好⋯⋯」

4.逝者

昨天還是生活得好好的，過著我認為最快樂的人生，為什麼就在一夜間，淪落到如斯田地，被人如此羞辱，彷彿就是宣告我的人生已經完結⋯⋯

我可不甘心！

「嗚⋯⋯」想到這裡，心中悲憤難忍，無從表達，眼淚早已盛滿眼眶，流下了一行來。

「做咩呀你⋯⋯你喊呀？」她驚訝地靠近來看：「喂喂喂⋯⋯忍住先呀！」

她從自己的皮製背包裡掏出一個玻璃小瓶，將瓶子貼到我的臉上，收集起流出來的眼淚。

「新鮮龍之淚係魔法珍品嚟㗎，我諗你都唔介意㗎啦！」

八婆！你咁都得呀！趁病攞命呀！我好苦呀！天呀！地呀！

「首先我唔係你親戚，我係冒險協會嘅新任嚮導小晴，而且睇你呢刻個樣都唔係有病囉！」

咩話，你聽到我諗緊咩？

她將我的眼淚一次過收集起來，用塞子堵好，滿意地將瓶子放到背包裡面去。

「係呀痴龍。」她回望倒地不起的我，忽然嘆了一口氣，竟然伸手摸著我的頭：「不過痴得嚟，又幾可愛嘅⋯⋯」

我拖著沉重的身躺仰望，發覺她穿著一身西部牛仔女裝，棕色馬靴，白色連身裙，頭戴米白色闊邊帽，一把亮黑略短秀髮。

長有淡紅色雙眸的她，尚算眉清目秀，一副年僅十七八歲逐漸隱去的稚氣面孔中，帶著倔強的神態。

你係嚮導？

「無錯，我係被派遣嚟接引新丁嘅，我諗嗰個新丁應該就係你啦。」名字叫小晴的嚮導指著我的眉心說道：「真係好對唔住啦，我出發嚟呢到嘅時候迷路，遲咗應該⋯⋯六個鐘左右啦！」

六個鐘！你遲咗六個鐘？你係咪傻㗎，琴晚嚇到我三魂唔見七魄，到而家都唔知道我點解會變成咁呀！你幫我變回原狀啦，嗱嗱聲！

「唔好意思，恕我無能為力，或者講係無辦法還原嘅。因為，呢個係世界嘅運作方式，係定律。」

定律？咩意思呀？

「意思就你，你人類嘅身體⋯⋯已經死咗啦，而家你要以新身份喺新世界生活？」

你話我死咗⋯⋯係比喻⋯⋯嚟咋話？

「唔係比喻，根據紀錄，你真係已經死咗。」小晴手一甩，憑空打開一個半透明的影像來，上面密密麻麻寫上大量資料，她從裡面抽取了其中一段文字來。

「張子建，係咪你？」

我點了點頭。

「今日凌晨一點十七分，因嚴重急性呼吸道症引發器官衰竭，失救而死。」

器官衰竭？唔可能⋯⋯唔可能！我啱啱先用手機打發咗健明，係我親手撳㗎！

「係，講起來真係好對唔住！我應該早啲嚟到！」她九十度彎腰向我行鞠躬禮：「你嘅靈魂以為自己仍在生，所以有能力影響呢個世界上嘅事物。」

我唔信！我唔信！

我奮力要動起身站起來，去嘗試拿起檯上的電話來給她一看。豈知我接觸手機的一刻，我的爪子直接穿過了手機，甚至穿過了檯面，由檯底穿出，手上並沒有拿著任何東西。

回頭一剎，我更是雙腳無力，跪了下來。看見床上原來躺著一個熟悉的身影，全身發紫，毫無生氣地躺在床上，那個⋯⋯竟然是我！

「⋯⋯」這般震撼的場面，我根本不知道該說什麼，只懂得低嗚著。

或者說，根本就沒有任何一句話可以說明當刻的感覺。

「等等⋯⋯我應該有台詞嘅。」突然回神的小晴打住了我混亂的思緒，她再次打開那個半透明畫面，順著上面的字來讀著：「俾你見到呢一幕很抱歉！註：嚮導應嘗試讓逝者釋懷。這並不是終結，而是另一個開始。」

你究竟係咪安慰緊我㗎⋯⋯點解會變咗書面語⋯⋯

「唉⋯⋯其實都唔係啲咩壞事嚟啦，生死有時呀，睇開啲。」

「吼⋯⋯哇！」

我而家對眼重分得唔夠開呀！呀！我要摙死你個無人性嘅死八婆！

「唔好呀！」

我伸出長長的爪朝她的方向跑去，突然魔法陣又在我頭頂出現，一大塊鐵錨從天而降，重重的砸到我頭上。呯的一聲，我被鐵錨壓住了身體，動彈不得。

「吼呀！」

「95%擊昏率嘅鐵錨，竟然扑唔暈呢條痴龍？」

5. 能力

我搞成噉你重用啲奇怪嘢丢我！你賠返條命畀我呀！

「你冷靜啲先。」

我點冷靜呀，成個死咗嘅我喺我面前，我唔想咁後生就玩完呀⋯⋯

「講起後生⋯⋯好似未睇過你啲檔案喎。」小晴又翻著著資料，點開個人資料一頁逐行細閱：「張子建，年齡20，以人類嚟講的確係幾後生嘅。」

「網絡通訊科學生，最新一期考績分數係1.8⋯⋯真係奇怪嘅科目，同埋1.8算唔算高分㗎？」

我不知道她到底是真的不懂，還是正在挖苦著我，頓時感覺自己的臉漲紅起來。

喂⋯⋯等陣⋯⋯呢⋯⋯呢個我嘅私隱嚟！

「夢想係中六合彩⋯⋯六合彩又係咩嚟？高級魔法效果？」

呢層⋯⋯都算係嘅⋯⋯鈔能力呀嘛！

「都唔知你講咩⋯⋯興趣係打機，打麻雀，打邊爐，打飛⋯⋯咩嚟㗎，全部都咁暴力嘅。」

喂好啦下！唔好再講啦！你幫我拎走個錨先啦，壓住條腰好酸呀。

「得，不過你要應承唔可以咬我，更加唔可以摙死我！」

好啦好啦⋯⋯快啲啦好攰呀！

小晴吟唱了一句，鐵錨發出亮光，接著消失在空中，我才能重新站起來，鬆鬆腰背。

她仍十分謹慎地觀察著我，與我始終保持著距離。

「你唔痛咩？」

酸到死呀我條腰，你係咪傻㗎成個鐵錨掟落嚟。你突然出現喺我間房究竟想點㗎？

「係喎！啱啱講咗我係你嚮導啦，目的就係帶領你到新世界安頓落嚟。」她攤開手，一塊石板在她的手上出現，上面刻上魔法陣圖案：「首先請你伸隻手出嚟，放到石板上確認身分先。」

吓？乜講咗咁耐原來未確認身分㗎？

我依她所說伸出左手輕按到石板上，石板亮起了一道綠光，繞著我的手轉圈。

等待回應的期間，她打量我一番，若有所思地道：「講起上嚟屬於龍族嘅新丁真係好少見，聽前輩講大部份生物死後，都繼續以前世身份前往豐域，有部分就好似你噉會成為其他種族。」

豐域？

「豐域就係你即將要去嘅新世界，實際上呢個宇宙係一個循環，生命不斷喺多個世界上流動。每一個世界嘅設定都唔同，豐域容許生命保留前生嘅記憶，但有啲世界就唔容許，甚至有更多限制。」

叮噹。

石板發出聲響，接著上方浮現出一個畫面，一串數字在上面快速轉動。

「已經確認身分，可以放開手啦。接觸石板嘅同時，亦向你附加永續效果，將豐域文同埋大部分語言轉變成你睇得明嘅文字同方言啦。」

「而家睇下你嘅總能力值先。」

咩嚟㗎，呢啲嘢都可以量化嘅咩？

我用著懷疑的眼神望著小晴。

「緊係可以啦，石板除咗確認身分之外，另一個用途就係用嚟探測你嘅屬性，經過計算後會得出一個數值。以一萬為極限，數值愈高，代表潛能愈強。」

「呢個能力值只有自己同嚮導有能力查看，但作為嚮導，我係無法向其他人透露你嘅能力值。因為被派遣協助新丁的一刻，我同你之間就生成信任魔法聯繫，除非你願意公開資料啦！」

信任魔法？呢樣嘢點解我唔覺存在過⋯⋯

我對她的說法呲之以鼻，才認識她不夠半個鐘，已經把我放倒地上兩次，我們之間真的有信任存在嗎？

而且兩次也一招便被擊倒，看來我的能力值應該也有限吧。

新人嘅數值通常有幾多呢？

「新丁嘅能力值介乎0至1500左右啦，超過一千已經可以稱為強能力者。無論能力高低，只要勤加修練，都可以提升數值。當然啦，選擇唔修練嘅人都有好多，安安份份噉喺新世界生活。」

數字繼續跳動，彷彿好像沒有停下來的一刻。小晴亦似乎感覺有所不妥，雙手上下搖動石板，數字才開始放慢下來，固定在四個數字的範圍內。

「哇！恭喜你呀，係四位數字，會唔會係一千二百以上呢！」小晴自己也是激動得一個小跳步。

這樣看著看著，加上她的反應，連我自己也對此變得期待。

百位數已經分別停在0，5，2上面，結果似乎已經呼之欲出。

「係一千零五十二，都係一個好數值嚟！不過其實都唔駛擔心，堂堂龍族，能力值本來就唔會低得去邊！」

最後千位數停了下來，不知道是定睛太久，還是還未習慣這雙龍目，面前的數字有些模糊，但那數字的輪廓看起來，正如她所說，是數字1。

「哇！咩⋯⋯咩事呀⋯⋯」小晴突然嚇得連石板也抓不穩，沉重的石板恰巧砸到我的腳骨節上。

我頂⋯⋯痛痛痛！

那種錐心的痛使我舉起左腳單腳跳著，就算是隔著鱗片，也能看到腫起一塊來。

搞咩呀⋯⋯痴線㗎你！

似乎這一砸把石板砸壞了，影像不安定地跳動著。她雙手掩著口，一副驚訝的表情看著那閃動的影像，我也好奇朝那邊一看。

最後的數值原來不是1052，而是7052。

下⋯⋯啫係點，壞咗？咁化學嘅咩。

「呀⋯⋯死啦死啦死啦！」她突然失控般在原地打轉。

「嗚哇⋯⋯」我忍不住吼叫道。

你係咪吸咗毒呀⋯⋯停呀！最多咪拎返去同協會道歉囉，有咩咁大不了呀！

「係七千呀！傻龍！痴龍⋯⋯點算呀⋯⋯」她眼泛淚光，幾乎要哭出來，指著上面的數值叫道。

壞咗喎，你話嘅，唔會超過1500喎。

「接我一招試吓！」

一個魔法陣出現在我面前，又是那一團綠煙，瞬間將我包圍。這次我可學乖了，馬上閉起氣來，輕輕鬆鬆躲過一劫。

下，同一招邊個會瀨嘢兩次呀。

一個鎚子穿過綠雲飛來，擊中我的下腹氣門位置。雖然沒強烈痛楚，但是這種突如其來的衝擊，打斷了我的閉氣，反射動作般吸了一大口綠氣，臭味頓時充斥在我喉嚨和鼻腔中，特別難受，彎下腰乾嘔。

唔講武⋯⋯德！八⋯⋯婆⋯⋯

「嗚⋯⋯」眩暈感比之前更是強烈，手腳更像不屬於自己般無法使喚，眼前忽然一黑甚麼都看不見。

加油

我會努力㗎

6.龍息

回復意識一刻，發覺已經身處在另一個房間的床上。這個地方裝潢簡單，用上鎢絲燈泡作照明，一片暈黃，到處浮現老舊感。

除了床之外，就只有一張木檯以及兩張椅子，以及旁邊的一面全身鏡。

從床上起來，迷迷糊糊的半合上眼，想揉揉眼睛看清周圍，豈料第一時間就不慎被爪子戳到眼睛，痛得猛流著淚水。

馬上認清一切，所發生的種種事情完全不是一場夢。

「嚎哇⋯⋯」

哇頂，我真係受夠啦⋯⋯

一股怒氣沖著胸口，伸出雙爪來朝牆猛爪，試著要把爪子給磨得短一些。更直接把牆都挖出一個坑來，抓下大堆石灰，停手一看，爪子還是老樣子，尖銳無比。

此時後面的房間門打開，回頭一看，是小晴拿著藤籃子望向我這邊來。她後方的走廊處，更有眾人探頭偷看著。

「睇唔睇到呀，係嗰條龍！」

「係喎⋯⋯」

「哇，停手呀！」她即刻掉下放滿物品的籃子，快速關上門，緊張得朝這邊衝來，以為她是要來看我，沒料到她居然朝那牆壁的坑望去，一臉憂心地查看著上面混亂的抓痕。

「哎呀！呢次實比酒館老闆鬧啦⋯⋯你正一痴龍嚟㗎！」

展示出雙手給她看，搖著頭。

好唔習慣的呢個身體呀！最多我咪賠錢囉⋯⋯

「錢？你有咩！」

有！港幣收唔收！

「呢度只係收克茲帝國金銀銅幣！」

乞嗤帝國？咩鄉下嚟！

「克茲帝國呀！」她叉著腰字正腔圓地重複一遍。

「係喎你都係啱啱醒無耐，歡迎嚟到豐域，係我趁你暈低嗰陣時將你帶過嚟。」

你咁大力嘅咩。

「我只係將入口施放喺你瞓低嘅地面，你就自然跌落去啦⋯⋯不過落哋嗰吓真係嚇親成個酒館嘅人。」

她這樣一說，才察覺自己的背正隱隱作痛。這樣一說，腦海構想起當刻的畫面：一條紅色的龍在熱鬧的酒館裡掉落，呯的一聲落地，把人們通通嚇跑。

究竟我前世係咪殺咗你全家，點解要噉對我⋯⋯

「唔緊要啦，能力值咁高嘅龍族，唔係喺半空跌落嚟都跌唔死啦！」

吓？石板真係無壞咩。

「我趁你未醒嗰陣，聯絡咗冒險協會幫忙修理石板，大嗱嗱洗咗兩銀幣先整得返⋯⋯兩銀幣⋯⋯嗚呼！」她按著胸口表情痛苦地說著：「你要知道嚮導要完成一次委派先會收到人工。」

乜做嚮導咁慘㗎？

「點都好啦，你再放隻手上嚟試吓先啦。」

我再按著石塊，這次不消兩秒便出現了資訊，上面的數值的確顯示為7052。

「而家睇吓詳細數據先。」她憑空一揮，畫面變成更密集的文字和表格：「能力由六大屬性：包括力量，敏捷，體力，靈性，精神同運氣，另外加上唔同嘅特性計算而成。」

「六大屬性各自以一百為極限，而你嘅六大屬性全部都係66⋯⋯痴線㗎！」她忽然大叫起來，把我嚇一跳。

「先天防禦特性有終極暈眩抵抗，抗暈率99%⋯⋯唔怪得鐵錨扑唔暈你啦！」

我啱啱先俾你啲綠煙搞到不醒人事喎。

「防龍噴霧效果只對龍族有效，擊昏率100%，無視特性。」

「噴霧有獨特香味，大部分情況會拎嚟當香薰噉用，多過拎嚟防龍，始終平時好少會遇到龍族。」

香？臭過鯡魚罐頭呀！

「都話只對龍族有效咯⋯⋯之後係終極毒素抵抗；終極詛咒抵抗；鑽石龍鱗，物攻魔攻免傷率50%。攻擊特性有魔鋼龍爪，物理同魔法穿透率50%；黃金龍目，爆擊率50%。」

「主動技能方面，龍息，爪擊，揮尾⋯⋯奇怪啦，呢啲都屬於基本技能，一個進階技能都無。」

龍息聽落好似好有趣，要點樣使出嚟。

「呃⋯⋯呢個靠你自己摸索啦！可能好似用口呼吸噉掛。」

聽了小晴所講，試著張開口吐氣，的確感覺到口腔內有些東西正在匯聚。

「係呀係呀，就係噉啦！」小晴興奮地說著：「而家試下噴出嚟啦。」

噴出嚟，會唔會係吐口水噉呢？

朝著打開的窗戶一吐，一陣火光噴出，火柱擊穿了雲層，直射到天邊去。

轟隆！

吐出火焰後的我，感覺喉嚨舒服了不少。回神過來，面前的窗戶消失不見，被轟出一個焦黑大洞來，周圍仍然有黑煙冒出。

「呢⋯⋯呢種程度嘅威力⋯⋯」小晴跌坐在地上，凝視著破爛的牆壁喃喃自語。

街上的人聽到爆炸聲，馬上慌忙走避，周圍陷入一片混亂。

「發生咩事呀！」房門猛然撞開，幾個人衝了進來。

「點⋯⋯點解會爛晒㗎！」中年男子大驚，跑到原來窗所在的位置驚呼

「呀⋯⋯呢層⋯⋯我可以解釋㗎！」小晴不斷欠身道歉。

「嗚嗯⋯⋯」見到這種情況，我也跟着她一同彎腰賠罪。

「你哋賠錢呀！賠錢！」

7.龍淚

喂喂，你重有錢㗎可？我瞄了瞄旁邊的小晴問道。

「我邊到重有錢呀！」她瞪著我抱怨著：「一日都係你呀，試技咪試技囉，做咩嘢出全力呀！」

我⋯⋯點知啫，啱啱真係吐口水嘅力咋喎⋯⋯

「唔好咁多口水，無錢賠我就叫糾察長嚟！」

「哇⋯⋯嗚⋯⋯」一聽到他要叫糾察長，我緊張伸出雙爪阻止，這種情況必須要講清楚！

幫我同佢講我哋幫佢打工還錢啦！

「喂，你唔駛緊張到打開埋對翼呀，收返埋先啦⋯⋯冷靜啲。」她被我迫得靠到牆邊，按住我一邊翼喚道，我才發現自己太緊張，緊張得連背後的翼也張開來。

「嗱嗱嗱！你⋯⋯你咪以為恃住係龍族就可以發難呀！」那中年男子回頭一看：「同我拎晒啲防龍噴霧嚟！」

「快啲去！」

「老闆！唔係你哋噉諗㗎，佢唔係呢個意思，佢係想⋯⋯」

「吼！」小晴！幫手解釋呀！救命！

「傻龍咪叫呀！收聲！」她一腳踢到我膝蓋處，害我腿一軟跪倒在地上。此時剛才離開的人帶著一個木桶回來，連接上一枝噴鎗。

「噉樣重可以有咩意思呀！拎支嘢畀我！」那人將噴鎗交到酒館老闆手上，正對著我。

「睇你重敢唔敢發難！」

面對著那防龍噴霧，急中生智，轉身一個躍跳從閣樓邊跳出。

「我有辦⋯⋯啊唔好呀！」聽到身後小晴呼叫著我，但此時的已經跳了出去，管不了她的呼喚。

用力拍打雙翼，驚覺自己無法憑拍翼昇起，跳到最高點後便回頭俯衝。

「哇⋯⋯鳴⋯⋯」我一頭栽到外面泥地裡，瞬間一片漆黑，雙手亂抓亂爬著，才能把頭給抽出來。

倒頭躺在地上喘息的我，發覺口裡一陣腥臭泥味。

「啊⋯⋯傻龍你點呀無事呀嘛！」小晴在閣樓邊探頭下望：「我醒起我有你啲龍之淚呀！」

噉又點呀！

「拎去變賣咪有錢賠囉！」

「鳴嗯⋯⋯」我頂點解你唔早啲諗到呀！

「你咪又係諗唔到⋯⋯」小晴抱怨道。

「原來佢唔識飛㗎？」有人在我不遠處說著話。

我彎起腰來，發現周圍的人把我包圍起來，議論紛紛。

「呢條真係龍嚟？咁渣嘅！」

「講起又係，外形真係唔多似其他龍族。」

我到處張望，在人叢之間，一個人影在樹後看著我，對望了僅僅一刻，那男子對我點頭一笑，便戴上黑色帽子轉身離去。

咩人嚟㗎。

「咩咩咩人呀，你講緊咩。」小晴追問道，我舉頭一望。

無，無事⋯⋯

——————

「嗱老闆，你嘅。」小晴從背包裡掏出玻璃瓶，放到檯上。

「呢枝真係龍之淚？」酒館老闆打量起裡面的眼淚，雙手抱胸，一臉不相信的表情看著我倆。

「咁大條龍喺你面前重有假嘅咩！」小晴指著我的腦袋說著，為了作回應我亦點了點頭。

「唔俾佢係識變形術呀，騙徒手法層出不窮。」

「佢重唔識飛㗎，老闆⋯⋯」圍在桌邊的人低聲插嘴。

「係囉！」老闆一手拍案：「佢講得啱！」

「好。」小晴拍檯站了起身：「咁就拎交易符咒出嚟啦！」

「你話㗎，打死無怨！唔好後悔呀你兩個！」

交易符咒？

小晴點了點頭：「用嚟交易物品嘅中介，可以驗證物品嘅真偽。如果係真嘅話，對方必須要購買；如果係假嘅話⋯⋯」

假嘅會點？

「根據真品本身價值，賣家將受到相應時間嘅石化詛咒，無視特性。」小晴補充道，見她的額頭滲著香汗。

哦，原來係噉，呢個符咒聽落都幾似H漫橋段喎呵呵⋯⋯但係點解你好似好擔心噉。

「其實我唔知道⋯⋯你係唔係真係龍嚟！只係一時口快，衝口而出⋯⋯」

吓？！

8.懲罰

老闆此時拿著一張舊黃的符咒，放到我們面前。上面用上黑色墨水畫上一些圖案，隱約能分辨出一個天秤的輪廓在上面。

「外面水池咁啱爭件有威勢嘅雕像喎。」他指著外面說著，又把那瓶龍淚擺在上面。

我隨他所指往外望，那個水池只有一水柱噴出，看起來的確有些單調。若然能有些點綴的確會比較好看⋯⋯現在不是想這無謂事的時候！

回頭望住這符咒，若然小晴所講的後果屬實，而我又真的不是龍族的話，那我們倆個都完了。

而家點算呀⋯⋯正擔心著的我嚥下了口水，望向小晴。

「快啲啦，你兩個伸隻手出嚟！」

小晴她緩慢地把手放到符咒上，回望著我，眼泛淚光的她大概是為著後果憂心不已。

「快呀！」

這個形勢，我也只好依著辦，用手按住符咒的一角。接下來酒館老闆也伸來了手放在上面，符咒發出微光，圍繞住玻璃瓶。

「你講，入面嘅係咩嚟？」

「呢個係⋯⋯龍⋯⋯龍⋯⋯」小晴想開口講，但是她又鼓不起勇氣說。一個少女在這般壓力底下，眼淚終於忍不住流出。

唔駛擔心，我相信我一定係龍族，只有我自己最清楚，相信我，講出嚟啦！

「嗯⋯⋯就算受罰⋯⋯都有你呢條傻龍一齊。」她直望著我的雙眼，點了頭，深呼吸了一口氣。

「新鮮龍之淚！」她將身體靠前叫道，符咒隨即發出金光，一個影像出現，是一個比檯上玻璃瓶精緻不少的瓶，用上寶石作裝飾，一串數字浮現在下方。

「⋯⋯正品龍之淚一滴⋯⋯現值兩金。」小晴斷斷續續讀出上面的文字。

兩金，噉個樽裡面究竟有幾多。

「大概五滴⋯⋯」

十金⋯⋯如果係假嘅，噉我哋要被石化幾耐。

「用真貨減去假貨價值，一金⋯⋯等於一年⋯⋯」

「吼哇⋯⋯」我聽到這數字，幾乎要暈倒過去。

十年！我哋要喺度石化十年！

符咒此時突然發出紅光，我頓時感覺到雙足癢癢冷冰冰的，低頭一看，我雙腳正在變成石頭！

「哇嗚！」

小晴我變緊做石頭呀，點算呀！

「事實證明係假貨！」老闆指罵道。

她被嚇得完全失去了對外界的反應，我猛搖著她，她卻只不斷流著淚。

我也察覺到她的腳一點一點地變成石頭。

「轉頭完全石化之後，將佢哋固定好喺噴泉中間。」

「搵人拉開佢對翼，噉先好睇！」

幾個人合力拉動著我背上的龍翼，我身上的石化不知不覺間已經蔓延到腰上，漸漸感覺到沒力氣與眾人對抗。

「對唔住呀⋯⋯傻龍，係我⋯⋯害咗你⋯⋯」她的石化已到達胸口上。

唔係，你無害到我！你無害到我呀！

「十年後⋯⋯我哋⋯⋯」

唔好呀！

我看著她完全被石化，變成一尊精細的雕像，心中激動萬分，奮力想掙脫這堅硬的外殼，卻只是徒勞。

被人用鐵枝強行撬開了口，此時石化已到達下巴處，感覺到有種倦意襲來。

我⋯⋯真係⋯⋯唔係龍？

「唔錯，對天吼叫嘅龍，真係好威武。」黑暗中，我還隱約聽到外面的人說話。

喂⋯⋯小晴你聽唔聽到呀！應下我啦！

可是一直都沒有人回應。

9.口誤之過

唔可以噉樣⋯⋯唔可以放棄㗎！

我繼續嘗試擺動著身體，黑暗中找尋著當中的破綻來。

想起小晴跟我說過我的能力值，除了力量之外，還有其他屬性值也是在同一水平。既然物理上沒有效用，那就試一下用魔攻吧！

但係魔法要點樣用呢⋯⋯

嘗試以龍息開始，那是我唯一用過的技能，現在我的口是張開的，只要模仿著吐痰的動作就可以了。

我試著動起喉嚨來，但是發現自己的咽喉彷彿不存在般，不懂得用力控制。不能動，也代表著我不能施展龍息。

一定有啲唔駛郁都施展到嘅能力⋯⋯係啦！

我又想起她在那時候能憑空施放魔法陣，召喚出鐵錨來，那個魔法陣的圖案我還依稀記得。

我集中精神，在黑暗中將那魔法陣的圖案構想出來。這樣努力地想著東西，感覺到有種不明的力量在身體流竄，痕癢痕癢的。

「喂，條石龍發光呀！」我聽到外面有人叫著，似乎真的正起著效用。

再加把勁繼續想著，身體那種力量開始集中在的胸口處，一股熱氣匯集。

「小心呀！」

突然我頭頂上發出鐺的一聲，震動聲之大，彷彿要把耳朵都震聾掉，震動感蔓延全身。

「咩嚟㗎。」

「鐵錨嚟㗎喎！咁大個嘅？」

一種開裂聲突然出現，我動了動身子，似乎有了活動的空間。

小晴，要頂住呀！

「吼呀！」我用盡了氣力大展雙翼來，朝天大吼。一絲陽光重新透進我的眼睛，我猛甩猛跳，把身上的碎石塊甩出去，石塊到處飛彈，擊中周圍的建築，亦把剩餘包圍我的人給嚇走。

小晴！

我轉了一圈，發現她正身在我後方，上前一看，她身上的石頭亦到處出現裂縫。小心翼翼地一塊塊剝開，她正合著眼，似乎陷入了昏迷的狀態。

「吼！」我對著她大叫。

醒呀！

「哇！唔好食我呀！」她聽到我的叫聲瞬間被驚醒，深深吸了一口氣。

「傻龍？十年啦⋯⋯我終於見到你啦！」

有排都未十年呀！醒下啦！

「點⋯⋯點解會噉㗎！交易符咒失效？」人們大驚。

「喂傻龍！快啲敲碎埋我身上啲石先啦！」

係咩⋯⋯哦⋯⋯等等啦。

我打量著她半身，仍然是石化的狀態，她以這種羞恥的姿勢站著，無法移動半分，臉泛著紅暈，驚恐的表情反應，忽然使我起了些色心。

「你諗緊咩呀變態龍！」她向我大罵，面前又突然出現魔法陣，一枝鐵棍從虛空揮來，擊中我的眉心。

「嗚⋯⋯」痛得我蹲在地上雙手掩著額鼻，眼淚直冒。

八婆！你咪再讀我心呀！

「鬼叫你諗變態嘢呀！過嚟幫我呀！」

我搖搖頭清醒清醒，用利爪一點一點地敲，把剩下石塊都敲碎，她搖擺搖擺身體，用力向前走一步，終於脫困。

跟著她隨走到酒館中，往剛才那檯面望去，符咒上的玻璃樽還在。

「展示結果。」她伸手對交易符咒施法，符咒顯示出最後的狀態，寫著刑罰已結束。

刑罰時長則寫著二十分鐘。

「二十分鐘？二十分鐘⋯⋯」她呢喃道，又翻到下一頁看：「原來物品價值與正品相差好少咋！」

上面寫呢枝嘢嘅真名係龍之淚⋯⋯吓？咪一樣囉！

我伸手指著上面的物品名，側著頭大感不解。

「呀！對⋯⋯對唔住呀！」小晴忽然尷尷尬尬地向我欠身道歉，我頓時意識到不對勁。

咩呀！做咩對唔住呀，你做咗咩嚟呀！

「我嗰陣太緊張⋯⋯講咗呢支嘢做『新鮮龍之淚』！啲確係貴一兩個銀幣㗎⋯⋯」

「⋯⋯」我低嗚著，瞬間明白我們無故被石化的原因。

你點做嚮導㗎⋯⋯呀⋯⋯我要摙死你呀！

「唔好呀！起碼確認咗你真係龍族嚟先啦！」

我猝然止住了雙手，冷靜下來思考，心中頓時暗喜。

如果龍之淚係真嘅，我哋咪可以向老闆收錢囉，順便拎埋壓驚費！

「吼⋯⋯！」老闆！啱啱唔係牙詀詀嘅咩！出嚟呀！

我隱約聽到到那邊的櫃枱後發出聲音，朝著那邊走去一看，恰巧就發現了酒館老闆。我踏著小碎步靠近，在他面前張牙舞爪起來。

「救命呀！龍大哥唔好呀！」

「喂⋯⋯喂！」小晴這個時候拉住了我的手臂：「唔得呀！唔好噉啦。」

咩唔得呀！

「呢枝的確唔係新鮮龍之淚！」

係龍之淚就得啦，新唔新鮮有咩咁大分別喎！

「交易符咒係睇實物名稱做交易㗎，我哋中咗石化詛咒嘅話，代表交易已完成，符咒失去效力，唔可以迫人買㗎。」

我聽了小晴的說法，整個人愣住了，見到老闆猛點著頭，心裡一沉⋯⋯

咩規矩嚟㗎！就嚟痴線啦我！呀！

寫嘢都好講天份

啱，自己從來都係無寫作天份。
好諷刺嘅係，成世人堅持得最耐嘅嘢，就係最無天份嘅寫作。
現實殘酷，就俾我呢個身心所剩無幾嘅人喺度發下夢，抒發一下自己啦。
因為夢裡面甚麼都有。

10.巨型鐵錨

「唔好做傻事呀！」不管她的呼喊直奔到外面的我，不斷挖著外面的泥土發泄。

忽然之間，我的爪子撞上些硬物。

「傻龍！」她似乎追了出來：「哇⋯⋯鐵錨⋯⋯唔係單體術嚟嘅咩！」

我忽然回神，才發現自己挖得太深。踮起腳尖一看，也僅能剛好看到外面的情況，有幾個人昏倒在巨型鐵錨周圍。

我舉頭一望泥坑邊上的小晴。

我想試下可唔可以敲碎身上嘅石頭呀嘛，記得你之前用過嘅魔法陣圖案，所以咪召喚出嚟囉。

「你⋯⋯記得⋯⋯日？」她睜大雙眸，震驚得下巴要掉到地上去：「鐵錨係中級魔法，唔係淨係『記得』就施展到出嚟⋯⋯」她又不知從哪裡掏出那面石板來，舉了起來將它對準前面的鐵錨，聽到咔嚓一聲，它顯示出剛剛拍下來的相片，以及一些資訊來。

原來個石板重有影相功能⋯⋯

呢招係⋯⋯鐵錨.Ex1.R？原來係鐵錨嘅最終技能嚟，Ex1代表屬於第一類擴展表內嘅進階魔法，R代表佢係範圍技能。呢一招要有相應嘅屬性傾向，同埋魔法值支持先用到！」

聽落真係好似打機咁喎，唔係⋯⋯係複雜過打機！

「究竟咩係打機啫。」

er⋯⋯一種遊戲嚟，有類似呢個世界屬性值系統嘅遊戲。

「原來係咁⋯⋯」她點了頭回應：「快啲上返嚟先啦，我哋喺到搞咗咁多事出嚟，繼續留喺到會惹上麻煩㗎。」

等多我一陣先，我好似挖到啲嘢。

我抓住那東西的一角，將它從泥土裡抽出，原來是一個鐵箱子，上面佈滿銹跡，似乎已經埋在泥土裡有好一段日子。將它高舉起來放到小晴的面前，一起來好好地研究一番。

我從坑中爬了上來，好奇起裡面擺放著甚麼，伸出手來正要打開這個箱子，但又被小晴攔住。

「停手！喺豐域呢啲箱好多時都附上詛咒㗎！」

唔好生人唔生膽啦！

我直接抓住箱子的蓋，突然它發出紫光，一條紫色藤蔓出現，把我的手給緊緊纏繞起來。

「哇，係劇毒詛咒呀！」小晴一眼認出詛咒，大驚之下她不知所措，只懂猛搖著我的肩大叫。我被她的叫聲給嚇著，不斷想甩掉手上的藤蔓。

「呀！死啦，叫咗你唔好多手㗎啦！死啦死啦！」

「吼哇⋯⋯」靜呀！又唔係你中招！

「哇！」她掩著雙眼不敢直視，但是我手上的藤蔓除了緊纏著之外，根本沒有使我感覺到半點不適。

喂⋯⋯其實呢種究竟咩毒嚟㗎。

「紫色藤蔓⋯⋯可能係侵蝕類嘅戲毒，可以係蝕骨毒⋯⋯溶屍毒⋯⋯唉呀！你唔好叫我講啦，好恐怖呀⋯⋯」

噉幾耐會生效先。

「講⋯⋯講起上嚟，你而家就會變成一團屍水㗎啦喎！」

聽到她的講法後，心裡動起些壞主意。

「哇嗚⋯⋯嗚⋯⋯」我立刻裝作跌倒在地上，按著肚子一臉痛苦地打滾著，猛喘著氣。

呀！我⋯⋯我好痛呀！我係⋯⋯係咪要⋯⋯要死啦！

「係咩？」她口風一轉，冷漠地說道，我瞬間發現不對勁。沒過一秒，一個小鐵鎚在天上掉落，撞上了我的鼻！

「嗚！」我按住鼻子，痛得彎起腰來打著轉。

又係鼻！我靠個樣搵食㗎！

「喂傻龍！都話我知道你諗緊乜㗎！唔好咁低能啦！」她又拿起石板，一看，馬上舒了口氣。

「呢種的確係蝕骨毒，但係你身上有終極詛咒抵抗同終極毒素抵抗，完全免疫咗。」

講下笑啫，唔駛下下都掟嘢落嚟下嘛。

我把手上的紫藤撕下，扔到坑裡去，它立刻化成了一團灰燼。

11. 激運

我的注意力又重新放到那個箱子上面，再伸手將上蓋打開，裡面竟然擺放著五條金條。

「哇！」我大叫起來，大張著口，指著箱子要小晴來看。

「係金條呀！」小晴興奮地想要拿起一塊來看，但金條十分沉重，她雙手抱著也顯得有點吃力，它在陽光之下閃閃發亮：「發達啦！」

石板發出嘟嘟聲，她於是將抱著的金條放到我手上，拿了石板出來一看：「石板話你啱啱發動咗被動技能。」

咩技能呀。

「激運！」她跳了起來：「呢個係運氣值超過50時自動習得嘅技能嚟！但係發動機率極低！」

我憑單手就拿起了那金條，不太能感覺到它的重量，曾聽說過用牙咬金可以分辨到真假，於是將它放到口中輕咬了一下。雖然還是挺堅硬，但不知道是不是咬合力太強，稍一不慎用上了一點力，便咬出了一排牙痕來，金塊也隨即變了形。

咁金條值幾多錢？

「一條值五十金⋯⋯終於可以過好生活啦⋯⋯我好想喊呀！」小晴瞻仰般凝望著那滿箱金條，心裡難忍激動之情，雙手握拳說道。

「係啦，你可唔可以拎一條金條將佢分開一半。」

可以⋯⋯不過有咩用。

「你分開佢先啦。」

依她所講，拿起了剛才咬得變形的金條，用力一咬，咔啦一聲，一邊金塊掉到地上。她隨即拿起了那一半，跑到酒館裡去。見到她將金塊遞給酒館老闆，講了兩句她便轉身離去，臨走時老闆又鞠躬又揮手送行。

點解你畀嚿金佢呀。

「我同老闆講呢啲係你打爛晒條村嘅賠償金，應該夠重建成條村㗎啦。」

成⋯⋯成條村？廿五金夠重建一條村？咁我哋重有二百二十五金，咪可以起一座城堡出嚟？

「差唔多呀，不過金條唔可以就噉用，要去鑄幣局鑄成金幣先可以使用。」小晴打開石板上的地圖來：「附近嘅鎮咁啱有一間鑄幣局分行，我哋去嗰度啦！」

好呀！我哋起行啦！

哈！起座城出嚟放滿錢，我咪真正做咗看守寶藏嘅龍囉！

「係呀！守財龍。」

都係算啦，個名咁核突，聽落好似啲四五十歲，有中年危機嘅男人噉。

「中年危機又係咩。」

er，有機會先詳細解釋你聽。

12.盛裝劍客

我隨著同行的小晴，從村莊支路轉入了比較寬闊的道路，她在一處樹下停下腳步，查看著樹幹上釘上的指路牌。

「沿住呢條路行嘅話，我諗行一個鐘頭左右就會到。」她遙指左手邊的路動身前行。

要行一個鐘，噉叫附近咩？會唔會有其他代步工具呀？

「噴⋯⋯」舉起捧在懷裡的箱子，搖了搖頭，鼻子噴出空氣表示不滿。雖然這箱子重量，對於現在的我來說根本不值一提，但是長時間用雙手捧著，難免有些酸痛。

「鬼叫你唔識飛咩！唔好扭計啦。」她雙手交叉抱著，對著我一輪挖苦。

我都想問點解會噉，唔係有翼就識飛㗎咩。

「雞都有翼啦，都唔算識飛㗎！至於你呢，係因為你未學識飛行技能。」

唉我都估到㗎啦，又係技能⋯⋯點先學到呀。

「搵人教，或者自己領悟。」

我稍為張開翅膀，撥了撥，擾動了氣流，一陣怪風從小晴背面吹襲，把她頭上白帽子給吹飛。

她回眸一看，一把短髮亮出，上昇的氣流令裙擺飄揚，她急忙按住幾乎被掀起的長裙，帽子沒抓穩，徐徐落到路邊去。小晴此時與我四目交投，擁有淡紅瞳色，瞳孔神秘深邃，一種莫名幸福的感覺應運而生。

她突然一把掌朝我的長吻搧來，我整個人都給搧呆了，保持著被摑後的動作。

「變態龍！」

我見到那仍在輕擺著的裙，她不忿的表情。我心裡察覺有異，難道她認為我是故意搧風來掀起她的裙子？

唔⋯⋯唔係你噉諗㗎！

「成個做咗壞事後嘅幸福樣出晒嚟，重話唔係！」

「嚇⋯⋯」吓有噉嘅樣嘅咩⋯⋯但係就算我做個死老竇樣出嚟咩，到時咪又有藉口俾你打我。

「再亂嚟嘅話，就唔好怪我笠住你個頭噴防龍噴霧！」

又變態又神經質⋯⋯正一痴線婆⋯⋯

「夠膽再講多次呀啦！」

喂喂喂唔好！對唔住！

她這樣來向我警戒，隨即向前逃走，與她保持著一定距離。

「你就係⋯⋯嗰條龍啦下話。」前方忽然有人攔住了路，使我注意過去，那一套西裝服以及手上黑色帽，原來是剛才在村裡看到的那名男子。

「嗯⋯⋯？」我反射動作似的用鼻子朝那方向嗅了嗅，這樣一做，才發覺自己的思想也似乎漸漸被龍化。

「唔好意思⋯⋯你係？」小晴來到我身邊，向著那男子問道，能隱約聽出她的嗓音帶著些顫抖。

「在下係暗翎騎士團成員文英才，我無惡意㗎。」一雙明亮的眼睛，透露出一種深邃和神秘的魅力。他的眉毛濃密而輪廓分明，展現出其堅定而冷靜的氛圍。高鼻樑和輪廓分明的下巴展現出男性的魅力。

後梳髮造型整齊優雅，西裝革履，腰邊掛配西洋劍，這男子帶點異國面孔，竟然有著如此漢化的名字，反差感非常巨大。

佢乜水嚟？

我傾首用一邊眼睛瞄著小晴問道，這個時候她臉上泛起了紅暈。

「文英才係劍客榜前五位高手，佢最出名嘅係⋯⋯有型靚仔⋯⋯」

咩話？

「呀⋯⋯我指係敏捷型劍客！」

「呢位美麗嘅小姐你好！請問芳名係？」他用魅力的一笑向小晴打招呼。

「呀！我⋯⋯我叫小晴！」害羞的她張惶起來，看見他如此出眾的面孔，瞬間漲紅了臉，很靦腆的對他一笑。

「小晴，好有陽光氣息，個名真係好襯你！」他繼續拋出電眼，小晴她完全失去了抵抗能力，雙腿發軟跪倒在地。

她袋中石板忽然嗡嗡作響，發出提示聲。

「終極詛咒抵抗已發動。」

下，原來靚仔係一種詛咒嚟，不過我都可以理解嘅！

13. 華服鎗使

「我開門見山啦，啱啱見識過你嘅火柱技能，確實係罕見嘅火屬性高手，我哋暗翎騎士團需要你呢種龍材。」

「嗚⋯⋯嗯？」除了吼叫聲外發不出其他聲音的我，只好指著自己回應：「哇嗚嚇！」

他眉頭一皺，似乎不知道我究竟在說甚麼，於是我轉而指著正陷入腦袋超載的小晴，又指了指自己的喉嚨示意。

「你要佢做翻譯？」

我點了點頭。

「唔緊要啦！反正你聽我明我講咩！如果想加入嘅話你就點個頭啦。」

「唔好聽佢講呀！」此刻又有一把女聲在樹上傳來，聲音輕柔曼妙，馬上朝樹冠仰望。

女子穿著淺藍色晚禮服，躍跳到空中，以輕盈腳步落地，期間長裙一擺，可見她右邊大腿上綁著鎗袋，一把銀白色手鎗若隱若現。

秀亮黑長髮在風中輕飄，她的眉毛修長而優雅，幽幽目光帶出那淡淡憂鬱感。鼻子小巧精緻，粉嫩嘴唇微張，加上一抹淡裝，怡到好處。簡單來說，就是一個絕色美女。

哇⋯⋯不得了！

「我喺晨翎盟嘅成員楚鶯韻。」她雙眸水汪汪的，楚楚動人，面對這種程度的對望，我根本挪不走自己的雙眼：「龍大哥，千祈唔好上佢當，小女子想你⋯⋯」

「嗚？嗯⋯⋯」我低頭輕聲咕嚕著，她溫柔地搔抓著我的下巴，久久緊繃的神經得以放鬆，一種舒爽感覺充斥著我腦袋。

「加入我哋，保護我。」

雖然真的很舒服，但是仍甩了甩頭退後。

禮義廉都有蛇齋餅糉啦，憑你噉樣就想色誘我入會？會唔會睇得我太低！

無咗小晴真係溝通唔到，叫返醒佢講清楚先！

「終極詛咒抵抗已發動。」

「唔好噉啦⋯⋯我哋第一次見㗎咋⋯⋯」搖著她的肩，她似乎陷入了幻覺，無力拉著我的手，怎樣也搖不醒。那只有一個方法有效，然而這方法對我來說，有生命危險⋯⋯

呵呵，等叔叔嚟幫你檢查身體哦！

「唔好呀！」她瞬間清醒過來，看到我蹲在她的面前。綠煙突然冒起，我隨即合上嘴巴退後。

停手呀！你中咗詛咒我想叫醒你咋！

「我中咗咒？」她晃著神，發現多了一個人在場：「佢係⋯⋯楚鶯韻！鎗手榜頭五名高手！」

又係高手？估唔到呢個世界啲高手都幾得閒。

「楚鶯韻，乜你哋晨翎盟淪落到用埋啲下三流手段嚟搶人。」文英才手用擺動著腰間的劍。

「哼！文英才，你而家又做緊乜呀？真係唔知醜㗎喎！」楚鶯韻撥開長裙，拔出手鎗來：「今日呢條龍我就一定要收編㗎啦，有本事就打低我搶佢走囉！」

佢哋好似想開拖喎，出句聲啦小晴。

「兩位冷靜！我係冒險協會嚮導小晴，呢位係⋯⋯係⋯⋯」小晴舉起雙手阻止。

「你其實想人哋點稱呼你㗎傻龍。」她低聲向我問。

我⋯⋯我咪張子建囉。

「唔得呀，你喺呢個世界行走江湖要改個新名，唔可以俾人知道你嘅過去。」

吓，一時之間我真係諗唔出叫咩名好喎。

「快啦⋯⋯諗個啦。」

我留意到文英才皺著眉頭踱起步來。

噉⋯⋯就叫⋯⋯叫⋯⋯成龍？唔得，我無咁好打；尊龍？好似又睇得自己太高！尋龍？好似係一條魚嘅名嚟喎⋯⋯

「呢位嚮導姑娘介紹到佢係邊個未？」楚鶯韻問起來的語氣帶點不耐煩。

「佢叫龍子亦！」小晴忽然喊出一個名字來，龍子亦這名字聽起來也挺不錯，於是猛點著頭和應。

咩事咁多負皮

14.頂級對決

「哦，原來係龍先生，失敬！不過你對於加入邊一方，有冇咩諗法？」文英才用試探的語氣問道。

「係噉嘅，佢話佢暫時無意加入任何勢力，想對兩位講唔好意思。」小晴行起鞠躬禮。

「吓，邊有可能唔想有個靠山呀？係咪暗翎他們威脅你，唔駛怕佢哋㗎！」楚鶯韻直指對面的文英才說道。

「睇嚟真係要同你上一堂，教下你咩叫威脅！」這句話似乎惹得文英才很是不爽，拔出長劍與她對峙。

他一個衝刺，以極快速度越過小晴，瞬間來到對面楚鶯韻身處的位置。她面對快速接近的銀光，不慌不忙拔出手鎗就是一輪猛射。文英才躲過子彈用劍劃地，劍深陷泥土中，起了支撐，自己一躍便跳到了兩三個人的高度，順勢拔劍下刺。楚鶯韻兩步後退，退出彈匣，如魔術般的手法將一排新彈匣插入，一邊優雅地步行著，一邊用手鎗朝對方連射。他一個迴身，躲過了幾顆，動劍一揮，劍發出叮一聲，似乎是正面擊中了一顆子彈。

我集中精神注視子彈，透過豎瞳所看見，子彈正以緩慢速度在空中飛行。及後撞上劍身，被切割後分成兩片朝不同方向飛去。

小心！

衝當我們而來的碎片，加上那種快速靠近的呼嘯聲，使我意識到危機，用身軀撞開小晴，感覺到一顆碎片擊中我的腰邊。

「傻龍！」

我聽說中彈瞬間不會感覺到痛楚，鼓起勇氣朝腰一看，子彈竟然被身上粗大鱗片擋下，速度把彈頭壓成一塊鐵片，我擺了擺腰，它便脫落跌到地上。

「吼嗚⋯⋯」頂你個肺！打還打都唔好整親其他人啦！

「不過你無幾耐之前先拆咗人哋條村。」

噉⋯⋯點同呀！

楚鶯韻見久未能分高下，轉換了姿態，魔法陣在手中出現，喚出了一把雙管散彈鎗。文英才也察覺到危機，向著長劍吟唱起來，它閃動藍色電光，一個迴旋斬，將周圍所有東西都給斬成兩半，再半秒後所劃過的地方發生爆炸。

「係高級劍技雷光破！」

楚鶯韻及時一躍，躲過這一次攻擊，她在半空中拉開鎗管，塞入兩顆發光子彈。按動扳機，啪的一聲，她被反衝擊力推到更高空去，而地面一個更大的火球炸開，炸出一個坑洞來，一陣熱浪襲來。

「係高級鎗技超壓彈呀！」我回頭一望，她居然選擇躲在我身後解說著。

「嗯⋯⋯」我覺得你唔需要匿埋喺我後面！

「點解？」

佢噉樣一劃就爆炸，佢又係一射又爆炸，有咩地方係安全㗎，不如趁而家偷走啦。

我轉身拔腿逃跑，才沒幾步，我鼻子直接撞上了一面隱形的牆來。

「嗚嚇！」頂！好Q痛！

我動手一摸前方，的確有一面隱形牆擋住我的去路。

「走唔到㗎，因為佢哋設立咗競技圈進行決鬥，係一種陣法嚟。」

吓，傻㗎！決鬥咪決鬥囉關我哋咩事。

「的確唔關我哋事，但喺我哋無及時離開，所以只可以等到分出勝負，或者時間夠先走得。」她這樣一解釋，我瞬間無奈得直搖著頭，跌坐在地上。

大佬呀，就算係放陣法，可唔可都顯示下個邊界呀，如果有人喺出面經過，咪好似我噉撞上去？

「所以我先話佢哋係高手！普通嘅競技場的確係有邊界顯示嘅。不過高手如佢哋嘅人，已經視任何細節為一種對自身嘅突破！」她愈說愈興奮，握起拳頭說道。

「佢哋故意施放無邊界提示嘅陣法，等自己除咗要留意敵人外，亦都要兼顧身處嘅位置。稍一不慎，就會不知不覺，俾人迫到死角！」

押埋韻添，你贏。

唔覺得你無天份
連登多盲反唔係第一日嘅事
唔好打沉自己先