[遊記] 慢慢打，希望唔好爛尾：京都東京梅雨季睇花hea玩之旅

花博紫陽花應該都ok, 果時候都有考慮過，不過最後都係去京都配埋啲寺睇

花博紫陽花我都係心血來潮突然去，鶴見緑地條線就都搭過唔少次，但鶴見緑地真係第一次去

有機會秋天去都正架，前面有一排落羽松，變曬色嘅話，又少人又可以瘋狂打卡 不過好似變色時間同楓葉差少少時間。

上年十二月頭去個時已經紅葉水尾，冇乜嘢睇
結果玩日歸衝左去和歌山城睇，跟手去埋加太渡假村浸個露天風呂

睇花睇葉呢啲真係講彩數
見唔到就真係轉plan 好過

京都嵐山

好，去完善峯寺，就從向日町就搭阪急入嵐山啦。費事搭JR又要入京都站先。




咁一開始都醫一醫肚先啦。費事排隊啦，都係隨便入一間，食左個個湯就比較傑嘅soba。嗯，下次都係鍾意個湯比較清爽嘅soba。不過食落個湯個感覺係，傑得黎係有啲料到嘅湯底。


好特別下，今次黎嵐山都見到有幾間卡通人物主題嘅餐廳。Snoopy同鬆弛熊。Snoopy果間我記得主要係手信為主，啲盒印得好美麗，差啲都敗左。而見到鬆弛熊果間就有野食嘅。啲飯都用曬鬆弛熊做主題。見到咁得意都唔想食唔想落手破壞佢地啦




不過唔食嘅話只會搞到成手都係雪糕，嗯，我只好忍痛食左你佢啦


夏天去嵐山，今次就主要想去入啲。網上見到有間叫祇王寺嘅地方，就比入面成大片苔蘚嘅相迷住。雖然現實去到發現，個佔地其實唔係想像中咁大，行一個圈都完，不過見到夏天見到成大片翠綠嘅苔蘚，感覺特別清涼。而秋天呢大片嘅花園就會鋪滿紅葉，就可謂係另外一個景觀啦。

入去祇王寺條路，感覺到初夏嘅新綠都幾正下。





呢個就唔係正門，不過我就幾鍾意呢一個角落。

由於祇王寺比我想像中細，咁見仲有時間，就再行入啲，去左個叫化野念佛寺嘅地方。本來睇網上都只係睇入面果供俸孤獨亡靈個大約八千座石像，不過無意中發現原來後面有一條種滿竹嘅樓梯，唔記得係咪通往後面山上面嘅墓地。

不過起呢度個感覺係尊重性比較濃厚嘅，咁我都唔多起度影相啦。

再行大約七分鐘，本來都係想放棄，不過一場黎到咁入，就去埋愛宕念佛寺啦。起呢度會見到好多石像，唔同化野念佛寺，呢度嘅石像表情無咁嚴肅，各有唔同嘅造型，有啲大笑緊，有啲個感覺又好和藹，加上一浸青苔，又有一種隱隱清幽嘅感覺。或者，係唔同人對於死亡，對於心靈有唔同嘅一份解讀吧。睇網上見到秋天都係會鋪滿紅葉，亦有另外一份嘅感覺。





新綠同埋鳥居。

咁見仲有時間，又行過，就入埋常寂光寺啦。呢度又係嵐山賞紅葉嘅一大勝地，所以秋天黎就會見到人人人人人。而夏天黎就會感受到一份幽靜。一開始見到果幅斜坡，鋪滿青苔，都係初夏嘅一種面貌。新綠嘅楓葉，起寺嘅建築物前，被陽光照射之下格外嘅顯眼。





寺後面都有一條小小嘅竹林小徑。



行左咁耐，都係出返去食返下野。天氣有啲熱熱地，都係鍾意食下冰。見到泡冰一間就即刻衝入去啦 呢間野好似係起天龍寺個門口嘅對面。


本來就想行去火車站搭車走人啦，不過見到呢間野有蜂蜜雪糕，上面成舊蜂巢都係忍唔住 。雖然呢，好似起將軍澳都有佢嘅鋪頭食得返佢，不過攞住佢坐起河邊度食又係另外一份感覺嘅。


好，跟住就搭返火車去返京都市中心啦。黎到京都，起返酒店之前就總係鍾意去鴨川hea下放下空，聽下流水聲，咁就到夜晚啦 。


夜晚隔離嘅先斗町都有好多餐廳可以幫襯，好似有啲係有納涼床。不過今次就無去食啦。


亂打亂撞就去左間若狹家食平價海鮮丼。佢有得自己拼自己想食嘅海鮮，又可以自己選擇份量，不過我就懶得搞，都係叫返啲 preset。當然一分錢一分貨啦，不過咁嘅價位食到個咁飽肚又咁多料嘅海鮮丼仲有啲乜好投訴。



最後就起 Doutor 買杯野繼續享受京都夜景就完左呢一日嘅京都之旅啦。


=== 待續 ===

睇相應該去咗明月院？我試過非繡球花季節去完全冇野睇，又細，入場費仲唔平

有去到明月院啊！我都覺得係細左啲 不過 500yen 寺院嘅入場費，都差唔多嘅，京都果堆都係呢個價左右。

因為去之前去完隔離個円覚寺，好大，又係500羊，所以覺得呢邊好貴

啲佛仔好趣緻
但又有啲陰森

啱啱見到嵐山嘅西芳寺都係佈滿青苔
好靚好清幽
但係原來要寫信預約抽籤
完全趕唔切

咦
呢間我都想去啊，不過呢排見到 fb 啲post 話好似可以網上預約（當然又係好難搶），你check 下好

Thanks呀
見到佢個網啦

起京都嘅最後一日：大原三千院；貴船

話咁快就到最後一日起京都嘅日子。起 google search 都見到起大原三千院都好似係一個睇繡球花嘅地方，所以就去碰碰運氣啦。都係搭地鐵去國際會館，然後就去等巴士入去。


起大原三千院前面嘅食店。由於時候尚早，都仲未開舖。


門口一攝。


而三千院除左繡球花之外，最出名就係個庭園。個庭園主要就有兩部分嘅。第一部分就係有個景，而你又可以坐起隔離度，叫份茶點一路食一路慢慢享受呢個庭園。



而第二部分就係青苔為主。夏天望住綠油油一片又真係覺得幾涼爽。而吸引大家眼球嘅應該就係起青苔上面嘅一個地藏。我見上面綠色果啲應該都係楓葉黎嘅，咁秋天嘅時候呢個位應該都係一個睇紅葉嘅好地方。


一開始以為呢個寺都係得呢兩個地方，不過睇一睇入場券嘅門票，原來後面仲有一大片地方未去嘅，其中一個就係紫陽花苑。不過去到個災情仲慘烈過之前起善峯寺，可以話係一啲繡球花都見唔到 不過算，行下行下都見到其他庭園樣都幾好樣。


寺院入面有個水池。


而一條河都穿過寺院嘅範圍。綠色同紅色嘅橋，個對比幾大，但係個畫面又黎得幾舒服。


後門一攝。

樓主真係深度遊，同我去嘅京都完全唔同

唔敢當唔敢當 ，我覺得自己都係好表面架咋，咁可能係關唔係第一次黎京都掛

如果可以認識到果個地方嘅風俗習慣，我就覺得仲正啦。

之後搭埋火車去貴船。首先就搭巴士經過八瀨比叡山口站。轉火車去宝ヶ池轉車之後上貴船。


呢度好似係香港嘅輕鐵咁，起車站果度有入站機同出站機。起宝ヶ池無留意，出左站拍左出站，但係轉車之後果下唔記得拍返入站機。好彩去到貴船有 counter 補返足咁出站。

貴船口去貴船，除左行路之外都可以搭佢個巴士嘅。咁巧合唔使點等就有巴士，咁就費事行上去啦。


去到貴船神社之前，沿路兩邊都有鋪頭。黎貴船點都要試下起川床上面食下野。應該唔係間間都要預約嘅，而一個人就費事食太貴啦，最後就入去食一間豆腐料理嘅店鋪。






好似附近都有一間食蕎麥麵，流水麵嘅川床料理舖，不過我見平均輪候時間為兩個小時，咁我都放棄果間啦。我覺得起呢度最正都係食個氣氛，坐起川床上面聽住流水聲咁慢慢享受野食。啲流水聲好似就係幫你一掃夏日心入面果啲苦悶感咁樣。


食飽飽當然要慢慢欣賞貴船神社呢度最出名嘅一個畫面啦。睇網上啲相見到，冬天落雪點燈嘅畫面好正，唔知有無機會起冬天嘅時候黎到呢度親身睇下雪呢？不過要見到京都落雪好似都要一定嘅幸運程度。




不過總係會有一兩棵樹自己變左紅葉

最後就搭返火車出返去京都市區啦。呢種火車好特別，啲位係對住個車窗嘅，而窗又特別大隻，天花板又有窗，咁見到走出去嘅風景，都係綠綠嘅楓葉樹，咁我估就係特別設計嘅觀光列車啦。我估秋天紅葉季節黎呢度搭呢款車應該會見到好正嘅畫面。




日頭見到鴨川附近嘅畫面又係另外一個風味。

起京都剩底嘅時間主要都係行下街啦。咁呢方面就唔寫咁多啦。不過，行行下嘅時候，比我見到間星乃，又諗起我好似呢幾日都未試過佢個厚pancake，咁終於有機會入去試一試啦。呢度好似有京都特有嘅抹茶口味，不過，我都係試左最基本嘅款式先。

鬆軟，食完又好有滿足感，正。

關於今次遊覽京都嘅部分都差唔多啦。雖然唔係第一次黎京都，但好似未行曬咁。有機會都想再去下京都其他嘅寺院，好似西方寺，琉璃光院呢次都係夾唔中佢果啲特別開放時間，等等，應該仲有其他特別嘅地方嘅。再遠啲可以上埋福知山，同伊根町果邊。

返到酒店開埋青森蘋果同西瓜食， 而酒店個職員話夏天京都好熱架，本來我都唔係幾信，點知去到最後果日終於感受到三面環山，熱氣焗住曬起京都入面果個感受！好彩最後食返堆西瓜降降溫。

=== 待續 ===

想問你係咪識講日文

已經成功book咁西芳寺
呢個院都好靚完全唔夠時間

唔識

恭喜你 之後影靚相返黎！
三年前睇過西方寺都想去架，跟住就係見佢又要寄過去預約應該搞唔到所以就無考慮。咁以為都係咁啦，點知原來已經有網上預約系統

唉 唯有等下次有機會


三千院我覺得唔錯架地方都大。唔夠時間就排下次啦，趕頭趕命都辛苦

巴打你為我打下一支強心針
以為京都地區普遍得日文 食嘢會好唔方便

樓主用iPhone 影定相機
好靚
同埋有冇去比叡山