典解日本兵殺左人，李鳳儀(牙儀)就要死？

其實劇情初段已經話咗畀你知大隻佬係睇到其他人嘅前世今生，所以李鳳儀嘅上世明顯就係日本兵。至於點解佢又會話唔係，個人認為有兩種解讀：

1）佛教主張「無我」，簡單講即係每位有情眾生嘅軀體同精神都係剎那生滅、頃刻不住但又相續不斷，相互依存嘅身心元素之中並無獨立自成、常住不變嘅生命主體。喺呢層意義上嚟講，呢一刻嘅「李鳳儀」尚且唔係上一刻嘅「李鳳儀」，噉上世嘅「日本兵」就更加唔可以話係今世嘅「李鳳儀」；

2）大隻佬揀咗個略為粗暴嘅方式迫李鳳儀接受眼前現實，因為無論佢點解釋對方將要面對嘅禍殃都冇咩可能令佢因此坦然放下，再詳盡嘅解釋都只會令佢不斷圍繞住「當下我冇得揀」同「點解要噉，點解咁唔公平」兩點打轉然後含恨而終。所以大隻佬冇喺呢個關頭仲同李鳳儀去糾結乜嘢前世今生、乜嘢係咪同一人，而係直接要佢硬食一個聽落更加無理嘅解釋：「總之日本兵殺人你就要死，呢個係因果」，同時強調佢就算冇辦法逆轉既成事實都仲有得揀用咩方式去面對眼前現實，佢依然可以選擇懷抱勇氣、保持善良噉去直面殘酷現實同埋改變未來走向，而唔係索性躺平又或者以暴易暴。

呢套戲由始至終想帶出嘅key msg就只係大隻佬嘅法號「了因」二字，因為佛法嘅真正意義不為其他而全在於呢兩隻字：為阻斷惡趣苦果嘅因而行善止惡，為了斷生死輪轉嘅因而練就正觀。有智慧嘅人投入一切於「了後苦因」而唔係追溯前因，了因者活在當下、展望未來而唔會糾結於無法挽回嘅往事。

當然，撇開總係有人望文生義嘅問題唔講，你可以話純粹參考一套so called用佛教教義做題材嘅電影、仲要只係揸住戲中主角嘅一句對白去解讀佛理本身已經好有問題。