交代一下背景先
小弟同老婆人在外國 暫時冇小朋友 但計劃可能會係兩年之後生 間唔時會車下兩老同嚟探我嘅朋友
一直最鍾意嘅車款都係D房跑 four doors coupe之類 可以將靚同實用兩樣野夾埋一齊 本身嘅dream car係Taycan（已經考慮咗我買得起嘅時候得返電車）近排想換車 試咗幾架之後 同老婆係呢兩架之間掙扎咗好耐
BMW M440i GC
講真呢個價位嘅房跑都冇乜選擇 一係4 series 一係Audi s5 但S5入邊仲未改版 睇落有少少outdated 所以應該唔會考慮
我知實會有人講個鼻哥窿 初初岀嘅時候我都覺得好核凸 邊有人會買㗎 但睇睇下真係會習慣咗 仲覺得幾靚添 而家睇返3系sedan嘅車頭反而覺得佢太細
其次都好鍾意呢隻酒紅色 我想架車靚得嚟又可以特別D唔會同人撞色 個人覺得呢隻紅係啱啱好
最後就係想係油車收皮之前都揸返架叫做有D performance嘅車 感受下踩油個下轟轟聲嘅感覺 嗰D環保嘅regulation只會越嚟越嚴 再遲D連油車都冇埋就永世都冇機會喇
總括嚟講無論外型 performance 內櫳我自己都好鍾意 去showroom睇過facelift咗之後入邊嘅兩個curved screen都幾靚仔 副偈夠用好玩得嚟又唔會太痴線太食油 啱哂我嘅日常需要
缺點：老婆唔鍾意
佢覺得架車唔靚 房唔房跑唔跑咁樣 隻色仲好核凸添 坐得又唔舒服（同SUV相比）而且有好多Jaguar有嘅function都冇 呢樣野我係認同嘅 下邊我會整返個表比較下兩邊嘅equipment
Jaguar F pace
其實我都覺得呢架係SUV嚟講算係數一數二靚 但一嚟Jaguar冇乜特別嘅顏色 揀得落手嘅唔係黑就係白 講真SUV已經通街都係 仲要係黑白色到時真係認錯車都唔岀奇
我想自己架車唔係獨一無二都可以特別少少呀 我唔想揸公廁車呀hi
雖然佢坐得舒服 設備都好齊全 但始終覺得自己未到揸SUV嘅年紀 而且我最鍾意嘅車款都係4 doors coupe 唔通而家買SUV 四五十歲先嚟買返coupe咩
設備嚟講最重要係塊發熱玻璃 係香港大家一定會覺得冇乜用 但係呢到你經歷過最凍嘅時候就會知佢有幾重要
原本我自己都好唔想天寒地凍係岀邊又要鏟雪又要淋水去溶冰又要除霧 每次岀車都要搞成三個字先郁得 偏偏BMW 連加錢都冇呢個option
但諗諗吓一架車最重要嘅始終都係副偈同個樣 設備呢家野我最多再額外買D windscreen cover 同de-icer啫 但老婆就好insist要呢樣野 又話自己冬天返工好慘好辛苦 又要搞好耐先開得車
Engine方面 F pace應該都係要買diesel 加上車身咁重 就算係直六 300匹嗰部 點都冇M440i咁爽
總括而言 我唔係唔鍾意嘅 但始終冇寶馬嗰架好想要嘅感覺囉
我知道連登仔一定會話男人買車女人唔俾錢岀咩聲呀
重點就嚟喇 我老婆竟然話如果買Jaguar佢就會夾返一份 買BMW就要我自己俾哂 呢樣野先係令我最糾結
雖然唔係話俾唔起 但寶馬嗰架帶俾我嘅快感係咪真係值得我嘔多一份錢呢？我又好驚買完Jaguar之後日日會上BMW個網睇返 先至嚟後悔同揼春 到時錢就駛咗但反而日日唔開心咁樣就仲唔抵
到底我應該乜尻都唔理用錢買自己最想要嘅野定向現實低頭屈就一下呢？除咗錢之後都諗緊係咪要就下D女人 我都唔想買完架車之後佢覺得日日篤眼篤鼻 睇又覺得核凸 揸同坐又唔開心 求各位俾D意見小弟
BMW M440i GC
Jaguar F Pace我知實有人TLDR 我自己都不知不覺打咗咁多野 睇哂嘅好多謝你哋 希望可以攞D有用嘅意見
希望巴打氹掂老婆
