是咁的，玩匿名交友app撞返個ex【番外篇】

暫時planning係番外篇長過正傳應該3分1左右

比較多嘢鋪，無諗過咁耐先接到

「佢依家愈出愈多囉，以前唔係度度有。」記得最初嗰陣時，百變怪嘅相關周邊產品好少。好難得先喺觀塘apm發現到有佢份嘅扭蛋機，全部都係比卡超，得一款係百變怪特別版，我仲一扭就中，好好彩。

「係呢，你A幾？」

「都A5喇，你呢？」咁快就問我係咪單身，仲咁直接。不過還好啦，反正我真係單身又唔介意答佢，唔排除真係好啱傾的話可以進一步發展呢？

「A8啦。」都幾多喎。

「你實係fuckboy嚟！」

「係，我叫張天賦。」笑咗。不過佢係MC我唔介意做佢SP架。

笑聲引到美姐望咗我一眼。

「在我海綿下體找你～」我都唔弱。

「你有海綿體？」

「女人唔可以有海綿體？」

「你真係有定假呀？Elliot Page？」

「假！人體有70%係水，我有90%係鳩噏！」平時都無乜機會畀我表現嗰九成真我出嚟，依家遇上一個可以盡情畀我鳩嘅陌生人，我梗係有風駛盡佢。

「以後只信你一成。」

「咁你會雙目失明。」

「或者變郭富成。」

「咁我以後叫你成成。常姐撚，撚軚能。」

「嗰個係古天樂⋯⋯」

「鳩噏ing」

「你似真係唔識分郭富城同古天樂。」

「我識囉！國貨城同今期流行吖嘛！」

「ok暫時信你。咁我點叫你好呀？」

「椎名林檎。」真係順住首《今期流行》嚟鳩噏。
「笑死，咁我叫你蘋果啦。」好野，又畀佢諗到，我又明，林檎咪就係蘋果。

「叫阿檎囉。」

「你好阿琴。」

「你好成繩。同你都幾啱傾，比你做住我朋友先啦。」依句真心嘅，佢暫時都仲正正常常，而且戇鳩方面嘅品味同我差唔多，起碼可以得閒傾吓偈。

「謝主隆恩。」

「你可以退下喇，本王要返工了！」

「喳！」估唔到佢嘅回答同樂仔一樣⋯⋯咦？佢唔會就係樂仔啩？真係咁啱？

原來女主角係以為match咗個新仔先傾落去嘅

我入咗唉豬想問樂仔有冇玩交友app，但打完句問題諗咗陣，都係算數。我自己都想保持吓神秘感，如果真係同依個男仔發展落去，而佢又真係樂仔的話，都真心幾有緣，見面嗰陣實好大驚喜。

不過邊有咁啱得咁蹺吖？佢話鍾意百變怪，但樂仔個結他袋扣住角落生物炸豬排喎⋯⋯又唔可以咁快下定論，因為兩隻公仔都係戇鳩可愛屬性。

⋯⋯好啦，個世界咩都有可能發生嘅，就懷抱住依百分之一嘅可能性同佢繼續傾吓偈啦，如果佢真係樂仔咪當係bonus囉。

美姐即刻過嚟： 「嘩睇你個含春笑樣，中咗個啱傾嘅男仔啦？」

「我先無含春笑。」中咗個啱傾嘅男仔就真嘅。

「係咪配中依家嘢真係好易睇。都好嘅，你個樣無今朝咁難睇喇。」

好多嘢未發生前都係難以置信，其實會喺交友app識到個啱傾嘅人真係完全無諗過會真係有可能嘅事。

就好似夢想無成真過嘅人唔會相信依個世界真係有人追夢成功一樣。

再通俗啲講，好似無玩過依個app嘅人以為依度只係得肥婆。

原來生活係咩都有可能發生，而且總係喺你無諗過嘅地方畀驚喜你。

睇到個懵婆中伏好開心

「嗱，傾偈方面我真係專家嚟嘅，有咩隨便問我，不過再進一步你就要靠自己喇。」

「先啱啱傾咗兩句，邊有咁快進一步吖？」

「真係啱嘅人，可以發展得好快架。」

現實中都真係發生過，通常兩情相悅一個月之內，最遲三個月內就會一齊。再拖耐啲大家嘅火花好似就會無咗，之後我就會定性咗對方只係朋友，但對方反而會向我表白。

暫時我想像唔到同城繩會發展得有幾快，但既然連喺交友app配中個啱傾嘅正常（戇鳩）男仔，或者之後真係又會有啲我意想不到嘅發展。

嗰陣我仲未知道本身以為嘅驚喜原來只係上天同我開嘅一個玩笑，一場毫無意義嘅惡作劇。

「最緊要自己心態擺正，要知道幾啱傾都好，可能佢聽日配中另一個，咁就慢慢會唔理你。每次傾偈都唔包保有下一次，但又唔使太大壓力，好好享受就得。」

美姐唔講我又的確無諗過依個可能性，現實認識一個人如果傾到偈，雙方都無得突然間斷聯絡，但喺依個無樣匿名嘅聊天室，大家隨時都可以㩒「退出」，毫無代價，不帶走一片雲彩。

喺依度，人嘅關係可以好脆弱，所以要做好基本心理準備。唔係，其實現實嘅關係都一樣脆弱，我明明就係個人板，對明偉就係一次「退出」。

「不過又咁講，依度無樣無聲乜都無，淨係靠傾偈去建立關係，或者先係認識大家靈魂嘅方式。」

「嘩，你突然講到咁浪漫嘅？」

「係吖嘛，佢幾靚仔都唔重要，講嘢唔啱傾又悶你都會走架。我都係玩咗先知，原來其他嘢真係唔重要。」

美姐同老公其實好早就無乜共同話題，但老公始終係太子仔，當年個樣同身型都唔差，美姐總會聽到好多好姐妹羨慕嘅評價。

加上拍拖拍得耐，好穩定，久而久之好似結婚就係順理成章嘅事。

「但係一切一切都係雜音嚟。樣會殘、身形會走樣、錢夠生活就夠、旁人幾羨慕都好，開唔開心得你自己知。」

美姐嘆口氣：「當日我揀錯咗，今日我先喺依個app度知自己錯乜。」

拍拖又好、結婚又好，其實為乜都得，真係可以為錢，有大把人真心覺得有錢係開心，亦可以為真愛、為對方靚仔、為名利、為其他人羨慕嘅目光、為性格、為啱傾、為性愛、為平淡、為浪漫、為安穩、為激情⋯⋯統統都無問題，只要自己知為乜。

但係女主角好明顯唔知自己要乜
好彩佢今次終於點醒金仔

美姐最大嘅問題係唔知當初嘅自己為咗乜拍拖，又為乜結婚。

為錢嘅人的確可以忽視感覺，為浪漫嘅人亦可以捱麵包，但為錢嘅人同個性愛好勁嘅窮撚一齊，長遠落去就會出問題。為浪漫嘅人同個過年如過日，連「儀式感」係乜都唔知，買花淨係識買康乃馨嘅太子爺一齊，長遠落去都唔會有幸福。

人或者可以短期內自欺欺人，被外在因素干擾，但長期總會打回原形。

「我最大嘅錯，係唔了解自己。」

美姐係個重視交流嘅女人，佢寧願喺公園餵蚊傾偈都唔想喺西餐廳相對無言。有錢好無錢好，對方同佢可以傾吓今日發生咩事佢就好滿足。

了解自己嘅人唔一定開心，但唔了解自己嘅人總會漸漸發現自己唔係咁開心。

「人生無非都係得幾個重要嘅選擇，伴侶啦、事業啦、朋友啦。我就衰咗喺伴侶依關。」

朋友同事業嚟講，不過不失。人生入面花最多時間一齊嘅枕邊人已經唔係真心愛嗰個，連佔用日常最多時間嘅工作都做啲唔鍾意嘅事的話未免太慘，但事實上都有好多依啲人。

「所以我都幾羨慕你，真係夠膽悔婚。我就無依個勇氣喇，雖然當年都唔係真係咁清楚自己想點，就算清楚我都未必做得到。」

做人就係需要少少自知，少少狠心。

「今次依個真係覺得啱的話，我祝你好運。」

「識咗十五分鐘啫，唔使講到我同佢情定終身咁嘅。」

美姐別有深意咁一笑：「who knows~」

到我放工嗰陣，好罕見地爸爸架車停咗喺對面馬路，媽咪就喺幼稚園門口等我。

「芯呀。」佢當琴日嘅事好似無發生過咁同我揮手，我今日亦無咗琴晚嗰度無名火，都行咗過去。

唔係啲咩「兩母女無隔夜仇」嘅老套觀念，而係我向來都係咁面對，唔通繼續發脾氣咩？盞又被媽咪鬧被爸爸打。

「你爸爸今日特登嚟接你放工，車你去食好嘢當賠罪架。」

爸爸係個典型大男人，對我又好對媽咪都好，做錯咩事從來唔道歉，只會直接做啲事當係認咗低威。

仲未到生日，佢兩老就咁勤力同我食飯，細個嗰陣真係諗都無諗過。

我上咗車，同媽咪坐後座，爸爸透過倒後鏡望向我：「今日返工點呀？開唔開心呀？」

又係一句我讀緊小學嘅時候好恨聽到嘅說話，可惜遲嚟咗廿年，我亦無講出細個喺心入面預演過好多次嘅答案。

我諗返林太嘅無理取鬧、校長嘅照肺、走廊表揚板君臨天下力壓群雄嘅油畫⋯⋯

「無咩點，還好啦。」

「今晚同你鋸扒吖。」

「好。」

爸爸揸住車向目的地出發，一路上講吓東講吓西，我都係虛應幾聲，但唔係迆嘅無力回應，費事佢哋又覺得我態度唔好。

終於去到一間中環蘇豪區嘅扒房。

爸爸去咗泊車，媽咪帶住我入：「卜咗位姓鄧。」

侍應帶位，坐低之後睇餐牌。都算佢兩個有我心，嘢食未知，但至少餐牌上睇落啲相唔差，同埋都偏貴。

佢哋向來唔會識得喺心意上花心思，所以即使我唔係太睇重一餐幾多錢嘅人，但佢哋揀嘅餐廳愈貴就代表佢哋歉意愈大，依個係佢哋專屬嘅道歉指標。

「睇定想食乜，等埋爸爸一齊叫。」

無幾耐爸爸就泊完車，行到我身旁，身邊仲有另一個三十幾歲，著住T恤牛仔褲，個樣好似楊明咁嘅中年男人。

「妹，依個係你三姨丈個仔個朋友，叫囉拔。囉拔，我個女芯玥。」

囉拔向我微笑，伸出手：「你好芯玥。」

嗰一刻，我個心好似向下跌咗落去。

明明下面係我啲肺胃脾肝腎，但好似咩器官都無晒，得返一個無底黑洞，個心一直向下，之後就發覺左胸入面好似空空如也。

原來所謂嘅賠罪晚餐，都係一場相睇。

又相睇

又相睇
好似真係老豆老母搞到女主角咁閪格

由琴晚到依家，現實連續兩次將我個頭撳落地吓。平時死忍爛忍到忍唔住爆發，但到講咗出嚟又點？

正如香港社會發生咩事我都唔會出聲，出咗聲都係咩都唔會改變，太陽照常升起。久而久之睇到荒謬嘅新聞都懶得再評論，但當日日打開報紙都係荒謬事，總會忍唔住批評幾句，其實純粹係忍無可忍嘅發洩，但發洩完會有令我有更抑鬱嘅後果。

只係對社會嘅荒謬我仲可以忍，距離我相對比較遠，仲可以唔理。屋企人點對我係一個切身嘅問題，我早就明知佢哋係唔會聽我講乜，但我仲會發脾氣因為幫我搞相睇自以為為我好真係好困擾我，而我每次真係爆發嗰陣其實內心深處都真係希望佢哋會聽我講。

結果再一次證明係唔會。

望住囉拔隻手，我心諗我哋一家食飯，你兩老向我賠罪道歉嘅晚餐，叫個外人嚟做乜？

我無講出口，因為琴晚同今朝嘅經歷已經將「講咩都無用」五個字烙印喺我靈魂之上。

我笑，笑自己蠢，笑自己心底仲有啲不切實際嘅奢望。

如果家庭關係都係可以分手嘅話，我諗兩老同我以前嘅男朋友都會係同一個反應。佢哋一定直到我離家出走，都搞唔清楚點解我會咁絕情。

事實上唔係因為家庭關係，我會長期對住佢哋，可能佢哋都唔會睇到我爆發個樣。只係因為先天就將我哋綑綁埋一齊，佢哋先有機會一次又一次逼到我唔爆唔得。

啊，直到依家爸爸媽咪都仲係一面期待咁等緊我嘅反應。

雖然女主角都可憐，但係佢點解唔試下用唔通面相對唔同嘅人？
毫無疑問，呢個世界有啲人係無辦法溝通，但係點解就要假定任何人都無法溝通？

樓主寫得好好
都真係有入到女主角角度令上個故更完整
某程度上女主角呢種性格都係家庭背景造成

「你好囉拔。」我同佢握手。

我哋四個坐低，媽咪望落特別緊張，可能怕我又失禮或者明偉又出現。

不過依間唔係明偉有份經營嘅餐廳，同埋我都唔打算再好似上次咁反抗。算啦，是但啦，你哋鍾意啦。

我無乜點認真參與過成晚嘅交談，但囉拔係個鍾意高談闊論政府政策好好嘅建制派，依家香港繁榮穩定，大灣區好多機遇，明日大嶼會解決到香港土地問題，北部都會區買樓只升不跌之類⋯⋯

我嘴上虛應，扮一個乖乖女同正常相睇對象，心入面就諗緊住邊區比較好，計算我嘅決定每個月會令我儲少幾多錢。

表面上我同大家有講有笑，同明偉分手前一晚嘅晚餐一樣，海平面上嘅鄧芯玥一切如常，但當晚我已經決定好第二日要講分手。

相睇嘅今晚，我已經決定好要搬出去住。

好似真係會辭職的人，都係一開始係無人知，永遠成日話辭職果個都係唔會辭職咁

食完飯返屋企嗰程車，兩老問我覺得囉拔點，我話都幾好吖，不過可以再見多幾個人先決定嘅。

佢哋交換一個眼神，好似被老師讚完決定繼續讀書嘅小朋友咁。

我諗嚟緊佢哋會更加落力幫我搵對象。

為免佢哋繼續撩我講嘢，我打算拎手機出嚟扮忙。我突然諗起今朝配對咗嗰個戇鳩仔，唔知佢有冇搵我呢？

打開app，有啲失望，搞錯呀無搵我嘅？不過都好，佢唔係嗰種極煩嘅痴漢，而且好明顯都有自己嘅生活同工作。

佢係忙緊？定已經識咗另一個更加啱傾，比我更加戇鳩嘅女仔呢？

唔深究啦，但真係想扮忙，以手機螢幕逃離父母嘅目光。

「攰死。」反正佢又未quit我，咪試吓打啲嘢搲水吹囉。

「返地盤？」

都唔使三十秒，佢就覆我。哈哈，有啲開心，扮忙成功！

人物性格好立體

但好難寫

「唔係囉，唔係返工呀，相睇呀。」我將真實情況講出嚟，但無將我心底嘅憤怒同失望表現畀對方知。

我只係嚟輕輕鬆鬆傾吓偈。

「好高興認識你哦。」同一時間，囉拔竟然搵我。唔撚係呀？兩老又畀我電話出去！？

媽咪偷望我，睇嚟佢以為我同緊囉拔傾偈。

「你有得相睇仲使乜玩交友app呀？」

「我唔想去囉，勁煩。屋企人逼我去，咩年代呀仲相睇。」其實無逼我，而係我唔知情下安排咗，個感覺同以前被人賣豬仔嘅華人差唔多。不過費事解釋咁多啦。

我扑咗囉拔。

「你對個對象唔係好滿意咁喎。」

「梗係唔滿意啦，本身都係應酬吓屋企人之嘛。今日嗰個仲成個楊明咁。」

「起碼有啲燉湯鋪吖。」依條友個腦都轉得幾快，我睇到陰陰嘴笑，費事兩老見到又問長問短。

「執晒啦有鬼用咩。跟住又高談闊論啲咩香港繁榮穩定，見到都唔開胃。」咁香港都真係穩定繁榮嘅，你睇吓開心香港幾開心。

「咁唔好諗佢啦，諗我啦。」

「真喎，頭先佢喺度發表偉論嗰陣，真係有諗起同你鳩噏，舒服好多。」沒有比較就沒有傷害，啱傾真係好重要。

或者應該話搵到相同頻率嘅人好重要。

「鳩噏最緊要明對方講乜同舒服啫。」我非常同意！

「你有興趣嘅同我一齊上大灣區，我可以帶你睇樓哦。」囉拔啲訊息又亂入，好似啲趕極唔走嘅烏蠅咁。

大佬，我已經扑咗你，你仲用第二個電話搵我？仲直情無視我扑你，繼續搲水吹，依招係咩名堂？咪再咁煩得唔得呀？

「同意。佢仲煩緊我囉，一早叫咗兩老唔好亂畀我電話人架啦！」

「冷靜冷靜。」

「佢哋次次都係咁，我已經唔係第一次換電話號碼⋯⋯」

「煩得咁誇張？」

「你實係唔知撞著個變態可以有幾煩。」我人生中遇過嘅變態都真係唔少。

「唔知喎，通常我係煩到人移民嗰個。」

「哈！」唔知點解依句篤中我笑點，沉默嘅車廂突然爆出一吓笑聲。

兩老嘅眼神之中有幾分滿意嘅神色，睇嚟佢哋以為係囉拔氹得我咁開心。

「哈哈！勁誇張喎！我笑咗出聲。」

「笑吓咪好囉。」

終於返到屋企，泊完車就喺停車場行返上樓。爸爸媽咪特登行快咗，留低我一個喺後面，明顯就係費事阻住我同囉拔傾偈，佢哋實以為今晚好有成果，我同囉拔進度良好。

「你安全到家要跟我說聲哦。」

屌！我真係心入面怒罵咗十九幾次，個時機咁準，擺明係兩老通水。好彩曾經嘅阿俊咁痴線，我已經習慣咗轉電話號碼，唔係年終淨係收啲煩鳩訊息都部機都可以做震蛋。

好想知女主角發現自己一路同緊金仔傾偈嗰時會有咩反應