是咁的，玩匿名交友app撞返個ex【番外篇】

女主無情還無情
唔識溝通還唔識溝通
但係真係有骨氣

可能因為明偉前嘅女朋友都係拜金女，當好幾個都以「分手」同「唔愛」做藉口，用嚟向明偉索取更多禮物，先會令佢先入為主覺得我都係一樣。

佢哋嘅「唔愛」後面隱藏咗「你畀唔夠我想要嘅嘢我」。

我嘅唔愛後面乜都無，就真係唔愛。

唔怪得明偉一直死纏爛打，好似完全理解唔到點解我要分手。

「我明明同你一齊咁耐都唔係一個睇錢，要你送禮物嘅人，點解我話分手你仲會覺得我同你啲ex一樣只係用唔愛嚟勒索你送多啲同貴啲嘅嘢畀我？」

「因為佢哋突然咁講的話都係需要買嘢！你都係突然間就話唔愛，咪同佢哋一樣囉！」

「咁耐以嚟我有無叫過你買名牌畀我？你送個貴啲嘅手袋我都唔要，你仲覺得我同佢哋一樣？」

望住明偉被我問到個腦一片空白，好似電腦死機咁嘅樣我就無名火起。

「我⋯⋯我無將兩樣野拉埋一齊諗⋯⋯」

明偉無考慮過我本身嘅性格，好似計數機咁設定咗個常數，無論我之前做過乜，只要我講「唔愛」佢就自動得出要送禮物嘅結果。

我向來知明偉無遺傳到佢爸爸同媽咪嘅頭腦，但我都係低估咗佢蠢嘅程度。

但某程度上，又何嘗唔係可悲？就好似一個孤兒每次被一個新屋企領養之後，每個後母都不約而同用衣架打佢，咁好難怪佢去到最新嘅家庭，就算後母平時對佢幾好，只要拎衣架出嚟晾衫佢就會驚同喊。

我就係嗰個拎衣架出嚟諗住晾衫，見到個仔不停喊嘅後母。

要令佢理解，只能靠講清楚，之後交畀時間去印證。直到個仔相信我拎衣架出嚟只係為咗晾衫，而唔係打佢。

「我好想你知道，你日後再要分手嗰陣唔好再覺得對方係要你送禮物，你亦唔應該諗住用送物質嚟解決。」

小至黑麥汁，大至遊艇。

「你諗下一個女仔用分手嚟逼你送嘢，咁佢會有幾愛你？調返轉，一個知你乜都送到嘅女仔真係唔愛你要分手，你再送咩禮物畀佢，仲有用咩？」

結論係，為錢嘅唔值得你送，唔為錢嘅你送嚟都無用。

條仆街可能因為做老師
解答人都鍾意用問題去解答而唔係簡單直接講晒出嚟

甚至我覺得佢有時遇到疑問嗰陣，都只係諗住對方係戇鳩嘅，跟住唔答

又或者覺得答對方=益咗對方

「真正嘅感情出現問題要分手，唔係分嗰陣送份禮物就解決得到。」

明偉耷低頭：「我⋯⋯應該真係明。我知道我唔使再送咩畀你，因為你真係想分開⋯⋯但我唔明，點解你會突然真係想分開？」

我無力咁嘆咗口氣，我嘅人生就係成日對住兩個我講咗都唔聽嘅阿爸阿媽，之後仲有一個聽咗都唔明嘅男朋友。

我真係唔想再喺度浪費時間，心好累，點令一個真心唔明嘅人明白某樣嘢？

「你要問點解，咪就係我想分開嘅原因。」

最後千言萬語只能夠匯集成一句，明就明，唔明都算啦，唔好煩我就夠。

依個世界係好多人分手，有好多人嘅「唔愛」的確係個藉口，事實上係用嚟掩飾自己出軌嘅理由，又或者索取更多關注嘅手段。我只能夠話我唔係。

「人嘅感覺係會變，好多細微嘅日常事累積到某個點，當我問自己愛唔愛你嘅時候，我已經答唔出。」

我嘅唔愛到底係乜？

係一次送名牌嗰陣明偉自以為我會開心嘅表情。

係一次當我叫佢堅持嗰陣佢選擇咗放棄。

係一次佢同我講住劏房嘅人可以試下住納米樓。

係一次佢叫我啲朋友去少幾次旅行就儲到首期買樓。

係一次佢話唔覺得自己屋企有錢幫到佢啲乜。

係一次又一次我見到好笑嘅事同佢分享，但我仲要解釋有乜好笑。

係一次又一次望住佢個腦一片空白，但又自以為好醒目嘅瞬間。

仲有好多好多，一次一次又一次，令我不知不覺間唔想再同佢喺埋一齊，因為每分每秒我都覺得無特別開心。

同明偉一齊唔會痛苦，但我就係感覺唔到好愛一個人嗰陣，嗰啲五感敏感度全開嘅感覺。同佢食餓媽家姐係好食，咁貴點會唔好食？但我記得我同初戀一齊食嗰個杯麵都好好食，同明偉食杯麵，試過一次嘅，無嗰隻味囉。

「嗚，依啲嘢真係唔係人食架喎⋯⋯你想食不如我叫明哥煮拉麵啦？」係一次同我食杯麵嗰陣嘔返啖麵出嚟，淨低我一個食埋佢嘅片段。

太多太多原因，要我講晒出嚟就好似要數晒沙城堡嘅每粒砂咁困難，而我知道就算講一百個理由都唔夠，仲有一千個未講，講咗一千個都仲有一萬個未講。

既然點都係講唔晒，倒不如唔講。

「希望過咗今日，你唔好再搵我喇。」

我轉身離去，無幾耐聽到明偉大叫同拍打船板嘅聲音，最後係好似小朋友咁嘅喊聲，隨我腳步遠去而淡出我嘅世界。

真正嘅感情出現問題要分手

呢條女諗嘢真係好撚偏激
首先問題係有分可解決，同唔可以解決
當啲問題係冇可能解決嘅話，就當然係要分手啦

但係你試都唔試下，你點知唔可能解決？

而我知道就算講一百個理由都唔夠，仲有一千個未講，講咗一千個都仲有一萬個未講

你睇？又當人戇鳩喇
雖然偉哥真係戇鳩啫，但係咁唔justify到呢條女乜撚嘢都唔講㗎嘛

回程嗰陣，我收到Suki嘅訊息：「阿偉唔會再煩你，我保證。」

佢話媽咪同意佢今次送遊艇箍煲，即係事前Suki已經知道，話唔定仲係佢嘅主意。

「唔咁做過，佢唔會死心。」

我又明白，對明偉嚟講送遊艇係最後嘅絕招，我就好似打機遇上嘅大魔王，當佢出埋絕招都打唔贏我，先會真正死心。

有Suki擔保，我終於唔使再理劉明偉。

返到屋企，兩老問返我同明偉咩事。

「無乜嘢，處理咗喇。」

「妹呀，你咩都唔講，我哋會擔心架。」

「真係無嘢。」

我已經過咗會因為佢哋話「你咩都唔講」就崩潰同佢哋理論嘅歲數，千言萬語都留返喺心入面嘅小劇場上映，消化成一句「無嘢」以作回應。

「過兩日我哋再食過啦。」

過兩日，即係正日慶祝。

我諗都無諗就答：「約咗人喇。」

「約咗人？雯雯呀？叫埋佢一齊食囉。」

實際上唔關係咪約咗人事，係我唔想同你兩個食。一陣去到又見到個新相睇對象點算？

「唔係雯雯，另一個朋友。」

「你仲有朋友我哋唔識架咩？」繼續咄咄逼人，但我唔可以爆一句唔想同佢哋食，唔係又會被佢兩個鬧一餐。

真撚憎哩啲

「⋯⋯」

我沉思咗兩秒，今日我心情好差，點解唔講真心話？係呀，係嘈完都無用唔會有改變架，但我想講呀。

「唔好要我講到咁白啦！我唔想同你兩個食呀！」

媽咪愕晒然：「你⋯⋯依家咩態度呀？」

「鄧芯玥！」

「我點知同你兩個出去會唔會又多個相睇對象呀？」

「我哋兩個擔心你無著落先幫你安排相睇咋！唔係著緊你使鬼做咁多嘢呀？你估雞仔媒人好易做呀？」

「我有叫你哋做媒人咩？我有叫你哋幫我搵對象咩？依家好心做壞事又當自己好偉大，知唔知我咩感受呀？」

「你唔講我點知你咩感受呀！？」

「鄧芯玥，你好收聲喇下！」

我轉向爸爸：「我唔收又點？打我囉，我都預咗架啦！」

啪一聲，爸爸就冚咗落嚟，我隻耳仔仲耳鳴嗡嗡聲。

老竇做得好

「你睇你似乜吖，本身泊到個好碼頭就自己抛錨，我哋安排個好男仔比你，一去到叫人早洩，邊個教你咁無禮貌架？」

「肯定唔係你兩個！因為你哋無教過我嘢！成日淨係逼我迎合你哋，我依家話唔肯呀，你哋有無尊重過我想點呀？」

「咁你講你想點吖！？」

「我一開始咪講咗！我唔想同你兩個食飯！」講完我就衝入房，砰一聲閂埋門。

「咪鬼理佢！」爸爸喺外面叫咗聲，喝停想入嚟搵我嘅媽咪。

「你沖咗涼先好瞓上床呀。」媽咪隔住門嗌入嚟。

我聽完就即刻坐上床，塊面又紅又痛，但我無喊，淨係不停唞大氣。

又再一次證明我點講都無用，真係每一次講出口都會搞成咁，我永遠都被佢兩個夾住嚟鬧，所以我先要用咁多婉轉嘅說話拒絕佢哋嘅「好意」。

由我講唔想同佢兩個食開始，其實我期望過佢哋會問下點解，而唔係直接開拖。可能佢哋覺得我唔想同父母食生日飯好不孝？但中途我都講咗係驚出到去又多個相睇對象，只係佢哋聽唔入耳啫。

我拎手機出嚟，又將頭先嘅委屈同家姐講。起碼咁做可以抒發到一啲情緒，但講真依然係唔健康。

我諗返上一次媽咪入嚟話會同我安排相睇，今次比上次仲唔開心，除咗同家姐講就係搵樂仔。

入到唉豬，樂仔無dm我又無放新相連打開話匣子嘅神器story都無擺嘢，咁樣貿貿然搵佢都唔係幾好意思。

無辦法之下，我唯有又開返個交友app睇下識唔識到正常人吹水，上次就係咁玩咗成粒鐘，成功轉移晒我嘅注意力。

又嚟喇

入到去，已經見到啲聊天要求係咁彈出嚟，見到咁樣都好鬼煩，我全部無視，只睇我有興趣嘅標題。

「法國要識戇鳩妹唔係咁易」有興趣。

「26 A3 車巴 樹窿」有興趣。

「我嚟見識依度啲肥婆」無興趣。

「人哋 齋吹水」無興趣。

「180 紀巴 鍾意影相有無同好？」無興趣。

「中上樣 消防 瞓唔著吹下水」有興趣。

「鍾意睇戲」有興趣。

「93 想搵個啱傾嘅」有興趣。

「失戀 放負圍爐」無興趣。

「走肥 重甜」無興趣。

不停刷新主頁，會不停有新聊天室彈出嚟，但我㩒咗又唔代表對方會即刻收到，我都唔清楚個配對機制係點，總之㩒十個入面大概有五個可以喺限時之內接受開啟聊天室。

26 A3 車巴 樹窿

「你好。」

你好樹窿，我啱啱被我阿爸冚咗一巴⋯⋯

打完，我又覺得突然要個陌生人聽啲咁沉重嘅經歷好似太強人所難，同埋我都無乜心力由頭講晒啲前文後理，最後我刪除句說話，決定逼自己瞓覺。

有咩留返聽日先講。

第二日一早起身，兩老都係晨咁早出咗去。我有個習慣，如果前一晚同屋企人吵大鑊，第二朝就會食白粥。

成日覺得心情唔好嗰陣食咩都唔係特別好味，食太貴太好反而嘥咗。好西就係應該心情好嗰陣先食。

唔知今日係咪諸事不宜，返到幼稚園又有突發事件，有個仔嘅家長踩到入嚟投訴。

我係個仔班主任，梗係首當其衝要用生命力硬接。

「我個仔有乜可能唔係最高分嗰個？」

事緣之前我哋搞油顏色比賽，其他小朋友油到出晒界，啲色又亂咁嚟，比如蘋果油紫色，香蕉油青綠色咁，正常三歲小朋友發揮。

佢個仔就超高水準發揮，油到達文西上身咁，又識加光澤同陰影形造立體感，點睇都係佢家長油出嚟。

「林太你冷靜啲先。」美姐趕過嚟做和事婆。

佢平時已經成日嘰嘰趷趷，恃住有少少錢就用個鼻窿望人嗰種闊太，同Suki相比無論係身家定教養都差十億八千萬光年，但已經覺得自己比一般家長優越好多嘅女人。

「油顏色比賽吖嘛，邊個油得靚就邊個贏架啦，有乜理由嗰幅有得貼堂，我個仔依幅無先？」

佢指向我哋貼喺走廊表揚板張第一名，係張油到出晒界嘅畫。

呢啲怪獸家長真係好撚戇鳩

「你個仔依幅定你依幅呀？」

美姐喺旁邊聽到眼都突埋，拉一拉我。

「你咩意思先？」

平時我都會忍，但琴晚先被爸爸冚完，我今日就咩都唔忍，要爆就爆。

「你個仔平時上美勞堂做嘅習作係點樣你唔係以為我唔知下話？」

美姐細細聲提我：「喂，佢去教育局投訴你會釘牌架。」

「咁我係咪就要怕咗佢投訴唔講真話呀？你個仔平時做勞作好有創意架喎，佢啲配色好大膽唔係我哋大人接受到，但你夠膽話佢唔靚咩？如果真係佢自己油，本身就係佢貼堂啦。」

「你依家抬舉我個仔都無用架。」

「我得鬼閑抬舉佢，你嘅所作所為教緊佢咩呀？走精面吖嘛，油顏色比賽又無話要自己油，媽咪出馬囉，咪確保一定靚過其他三歲小朋友囉，為咗個貼堂要做到咁樣衰，知唔知對小朋友影響幾大呀？仲夠膽踩上嚟問我點解佢無得貼堂，咪就係因為你囉！」

我睇住林太塊面谷到通紅，佢指住我隻手指震晒：「你⋯⋯我實port爆你架！」

「Miss Tang！」校長把聲震懾在場所有人，佢踩住高踭鞋咯咯咯咁趕過嚟。

「你好林太，老師依家都係時候上堂，唔介意嘅入我房傾下。」

「校長嚟得啱喇，你依個咩老師呀？依間咩幼稚園呀？」

「唔好勞氣，跟我入嚟吖。」

美姐喺旁邊拍拍我：「你今日咩事咁躁呀？嚟m？」

「依幾日突然咩都唔想忍，想講乜就講乜。」事實證明講完出嚟都無用，我一陣仲要為我講真話付出代價。

「明嘅，忍得太耐係要爆發下，但都睇對象丫嘛。你又唔係唔知林太麻煩。」

「唔爆都爆咗啦，可以點。」

最無奈係，我講嘅嘢係啱，但就因為對方係家長，可以投訴，可以喺媽媽群組唱我，我就要被逼向錯嘅做法低聲下氣。

我都唔知自己今日哪來的勇氣咁樣兀返林太轉頭。

女主角喺戀愛以外嘅嘢真係好charm

唔知係咪上個故太影響到我
我成日都覺得女主角係唔識控制情緒

我都有呢個感覺，其實佢應該都好feel到無力感

lm

成個上午我都要壓制自己嘅不安教小朋友，有時做小朋友開心之處，就係大人嘅嘢唔係好關佢哋事。哪怕我哋自己好大鑊，都會擺出最佳狀態喺佢哋面前。

午飯時間，我就被校長召咗去照肺。

我都唔係好記得佢講乜，但至少佢安撫咗林太情緒，唔會去教育局投訴我先。

我最在意嘅，係走廊塊表揚板貼咗林太張巨作，排位喺第一名上面，泰山壓頂咁君臨喺一眾充滿特色嘅油畫之上。

我就係唔想咁。

講咗啦，爆咗啦，有用咩？

我重重咁呼咗口氣，就返去食午餐，已經得返半個鐘時間。

返到自己位，見到美姐食完飯喺度同交友app啲男仔傾偈：「返嚟喇？點呀？」

「都係咁。食飯先。」

見佢玩得咁開心，我都想轉換下心情，開返個交友app，決定今日要用同琴晚唔一樣嘅方式打開話題。

琴晚就算睇到有樹窿畀我發洩唔開心都好，當我打返件事出嚟只會加深我嘅負面情緒，倒不如今日試吓唔好諗住吐苦水，求其鳩噏吹下水，話唔定可以放鬆得到。

入到去又被我見到琴晚個標題「法國要識戇鳩妹唔係咁易」，條友琴晚無接受，唔知今日點呢？

㩒落去，無幾耐就打開咗聊天室。

「試吓喺香港識囉。」

「唔係咁易架葉師傅。」

「不如入佢中路？」

當時，我唔知道依個男仔，原來就係金耀。

「好嘢喎，唔係咁多人接到落去。」

「本身鍾意睇戲，咁啱睇過啫。你鍾意戇鳩妹？」正好我就係，不過平時無乜機會表露出嚟。

「我鍾意戇鳩仔。」吓？基嘅？

「失敬失敬，原來係姐妹。」

「我係仔。」

「我知你係仔，我意思係鍾意男仔。」唔緊要啦，個頭開得幾好，姐妹都照殺，吹水啫，又唔係過人世。

「it’s a粥。」

「我今朝早餐真係食joke。」我無講大話吖，真係食白joke吖嘛。

「戇鳩都分好多種架喎，即係人都分黑人白人亞洲人咁，樣樣都鍾意？」

睇下佢係邊種鳩，我都唔係全部都接受到。有啲人鳩得太過火都係溝通唔到。

「至少要傾到計，互相講嘅戇鳩嘢可以接到落去囉。」

戇鳩真係好需要啱青勞，如果我叫佢入中路佢回我點解唔入上路，我就知同佢一個睇緊無線一個睇緊亞視。

「暫時我同你都傾到嘅。」

「好難得啦。同埋我都鍾意百變怪。」

「真？咁啱嘅。」

「真，鍾意咗好耐。」

「我本身唔係咁鍾意架，以前有個ex好鍾意百變怪，初頭覺得隻嘢無乜特別，後尾先發覺佢個鳩樣幾過癮，就真係鍾意咗佢。」

多得何金耀令我知道有依隻寵物小精靈，同埋類似設計嘅公仔同生物我都鍾意。

比如《大英雄聯盟》隻醫神，或者銀針魚。總之對眼係兩點，個嘴係一條線嘅都會自動有好感。

我記得佢同我講過，戇鳩公仔嘅重點在於個嘴，畫兩點做眼同橫線做嘴係唔夠鳩，但個嘴向上移近對眼，就會自然散發一種戇鳩可愛味道。

「係呀！佢最正係個鳩樣！」

「唔係單純可愛，而係戇鳩！」

「唔樣隻隻嘢都可以叫戇鳩，所以好罕見。」的確，我都覺得戇鳩係一種特別有味道嘅可愛，但唔係所有可愛都可以叫做戇鳩。

估唔到短短幾句已經有種好深層次嘅啱傾感覺，仲要係喺交友app上面撞到個咁嘅人，令我覺得有啲奇妙。

終於接到上個故

唔知個故講左有無一半呢