［同路人］關於戒酒呢件事

生活上發生左突如其來既衝擊，然後我開始左飲酒。

酒精同我既關係好微妙，初初我統治佢，後黎我係佢地奴隸。到慢慢我開始了解到自己開始瀨野，其實都係好耐之後既事。

唔同種類既酒，擔任唔同種類既角色。

高度數既酒精如威士忌，佢會擴闊你對酒精既依賴性，佢會令你覺得飲啤酒好似飲水咁無聊。

曾經我一星期會清兩枝Blacklabel。

低度數如啤酒，係一種慢性毒藥。高度數酒精擴闊左你對酒精既上限之後，你會不斷用低度數酒精去填補自己，最後毀滅左你既人生。

我一日三罐金啤。

呢個post我想講下關於戒酒呢件事。

當你意識到自己有酒癮果瞬間，大概係因為你飲完酒做左好多失控既野。你醒左之後，有人對你好失望，你自己好內疚，然後你同自己講我要停止呢件事。

當然你會飲番酒，但呢個係你發現到自身問題既第一步。

好遺憾咁講，我認識既好多酒友都停留係呢個階段。

呢個係最痛苦既階段，因為你不斷係呢個循環到泥足深陷。

我分享一下我點走出呢個循環。

首先，你要認清飲酒既本質。

某一日我發現，飲酒呢個循環其實係我人生入邊既某個黑洞。

往往發生係我收工之後食飯之前/我食飯之後訓覺之前，因為我實在諗唔到用咩方法可以填補到呢段時間，所以我去飲酒。

我冇朋友，同事收工唔會同我社交，我唔會想面對屋企人。即使有一個好照顧自己既女朋友，但係你收左工你會想有一個屬於自己既「metime」。

所以我飲酒。

飲酒既本質係，我們缺乏平靜尋求人生面對自己既時刻。

關於我戒酒既第一步。

我記得係某個我重度飲酒後既某個早上，我係廁所嘔得好辛苦。我阿媽好心痛咁企係廁所門口，默默咁望住我。

佢完全冇怪責我，但我覺得好痛苦。

戒酒既第一步。

你要深刻咁意識到飲酒唔單只係傷害緊自己，更加係傷害緊果班一直支持緊你愛你，知道你墮落都唔願意放棄你既人。

我意識到呢一點，然後我同媽媽講，我唔想令佢再擔心我。

睇到呢到既酒友，我想問一個問題：

你有幾耐冇一個人發呆？當你發呆既時候，你係咪都飲緊酒？

唔知你地係唔係咁樣，但我係。

我企係鏡前望住自己，好憔悴好狼狽，然後深深咁厭惡眼前既自己。

我開始回憶，由出生到目前為止既所有事，所有我曾經覺得快樂，所有我覺得痛苦既事，我一件又一件咁回想。

我發現自己低估左自己。

人其實好複雜，有時候自己都唔了解自己，有種傷痛你以為自己已經好番，有種傷害你以為自己可以唔在意。

「你個垃圾，你忍唔忍到七日唔飲酒？」

望住塊鏡我咁同自己講。

當時我同自己立下左七日既賭約，而呢個賭約成為左自己日後既信仰。

我至今支撐到自己戒到酒既信仰係：

我想要超越自己。

呢個post既第一樣野，我想你記住：

唯有有信仰既人，先可以擺脫到內心既黑洞。

既然你想擺脫酒精，你要唔要試下挑戰自己？

七日之後，我會再番黎講我經歷既第二步係點。

唔知有冇人睇，但我想借自身既經歷，幫助同我曾經一樣咁痛苦既大家。

我一日三罐金啤。
你指係啤酒?

係呀

金啤酒精8.8%，係啤酒中既王者。

同路人 我都努力緊

我呢年飲酒既次數係一個月1-3罐，甚至係完全冇飲。

我會keep住繼續分享自己既轉變

巴打一日三罐金啤就嘔???

呢個po好快變左鬥酒量
數酒名

朋友，唔係量多量少，而係成癮程度。

坦白同你講，初初你可以飲好多，我可以兩枝威士忌，我可以一打大金咁上。以前我北上工作，我可以兩白兩黃溝紅酒啤酒咁飲。

唔係一件好事，都唔應該拎黎吹奏。

因為去到後面你自己飲唔到咁多，當你去到呢個階段，酒精對你身體既傷害都幾深。

夜晚飲到有啲眼訓感覺好正喎
不過啤酒晚晚飲就好傷

酗酒時, 你唔會覺得好訓 你可能訓到一兩個鐘, 之後就眼光光, 等天光

你要注意一下，每個酒鬼初初都係咁覺得。

信左佛 守五戒 其中一戒係不飲酒 從此就同酒精一刀兩斷

我因為工作圈子同關係都經常要飲酒，但我覺得酒癮依家嘢好睇個人，我冇咩事都唔會飲，首先醉又辛苦又易岀醜，第二唔想麻煩人地送我返去，第三咁飲法影響第二日做嘢，又易唔見電話銀包，酒精對我黎講係辛苦又難頂，唔明要將自己擺係依個位置有乜謂

飲開心酒可以，但唔會追酒飲，成日覺得啲人吹到自己幾飲得係到鬥劈好撚on9

唔同ga巴打。

酒癮唔係自己控制到既事。

你好清醒自己onon99，但你仍然會做。

有種人去到一個程度，身上冇錢，屋企冇錢，然後佢會開屋企枝花雕黎飲。然後一邊飲一邊覺得自己好撚折墜。

不如飲少d,飲好d

小弟以前瘋狂隊啤,日日一打起跳以為飲啤酒無事,原來好傷身,結果中酒精中毒入院

而家好好多,一日一支紅酒,啱啱好,又免三高又有半醉感覺又唔洗痾夜尿

多謝唐英年減紅酒稅,一佰幾十蚊就可以享受人生

我會一條友係公園飲啤酒 但只係週末/ 放假時候會, 唔飲d 時間過得好慢

可唔可以具體d講下酒精傷身係指邊方面？

1日半打strong zero

每次同自己講7日
星期5晚就失守

我經歷過，等我下一篇文

肝，你會肝痛，肝病好難醫

今晚戒到酒既人，係呢到比個正評我打個靚卡