（盡量唔爛尾）澳洲塔斯曼尼亞自駕遊及墨爾本之旅

Day 7: 薰衣草園

今日係黎Tasmania 既重點，夏天先有薰衣草觀賞，仲要得12月中至1月初先係最靚既季節。揀早上去薰衣草園，避開中午打後的人潮。首先要駕1小時車去到個薰衣草園，入園費就每人 $20澳幣，10點入到去好彩仲有車位泊車（12點走時已經無哂車位）。經過紀念品同餐廳，就係一望無際既薰衣草海。


獨自表演中


遠觀。

大家只要有腳力，可以走到最出，一定唔會有人做你背景板。呢個時候薰衣草開哂，女人一定可以係度瘋狂影相。








而我都放部無人機上去影下，睇下影唔影得靚。不過大家係要準備防曬用品，天氣唔熱，令大家會唔記得揉防曬。呢幾日少揉防曬，就搞到個咀爆哂。



有d位係未種既

影到咁上下，就去買出名既薰衣草雪糕啦，係有薰衣草嘅香味架，佢仲有d mix 味既雪糕，大家有機會試一試。

之後行下個薰衣草園，再幫另一半影下相，就去紀念品店買隻薰衣草小熊，就去餐廳食個薰衣草鬆餅同朱古力蛋糕，個鬆餅就有d硬啦，而蛋糕就還可以既。




大概12點幾就駕車離開，返返去launceston，想搵間餐廳食炸魚薯條，google左好多餐廳都無開。最後係河邊終於搵到間餐廳食到，呢間餐廳要加$1澳幣先有茄汁，好彩舊炸魚算大份。



出面熱到呢，返去駕車時，張凳係熱既

大概1點幾就埋呢個城市最後一個景點，cataract gorge reserve，其實好方便，係城市入面，類似香港既郊野公園，入面有個峽谷，有個露天游泳池，有d燒烤設施，仲有個自稱世界最長的單軌架空滑車，可以先走過條吊橋先。


遠觀


吊橋

走過對面岸，係上少少既位置見到野生既孔雀同小袋鼠。





再搭滑車返入口，類似係滑雪場既纜車，坐定定都唔算太驚。

補返坐滑車時既景觀

原本搭夜晚9點幾機返Melbourne ，不過見係度無乜做，就提早駕車返機場還車，成功提早搭3點幾機返Melbourne.


最後架車都多塵咋，無乜傷


返到Melbourne ，拎埋行李都將近5點，搭機場巴士出返市中心。


Skybus


Marvel stadium

係Melbourne 呢幾日既住宿會住2間酒店，頭2晚住Hyatt Centric Melbourne ，係機場巴士總站- south cross railway station 既對面。



酒店房間

係Melbourne 最方便係住cbd 區，交通、購物同市內景點都非常近，Melbourne 既電車，係cbd區內都係免費乘搭既，仲有架觀光電車，不過呢幾日就遇唔到啦。

講返間房，雖然比較細，不過擺埋兩個行李都有走動空間，間房個人覺得走簡約風格，最緊要張床舒服。間酒店仲有泳池同健身室，不過最後無用到啦。

大概6點幾就出去搵野食，由於提早返Melbourne ，所以無plan定食乜。不過唔緊要，Melbourne 同香港一樣咁多野食，聖誕假期都多餐廳開，最後揀左間印尼快餐店食雞同羊肉，味道正正常常。



跟住就搵超市買水，結果要行到去Melbourne Central Shopping Centre個頭先有營業緊既超市。買完試下行返去酒店，結果要行左25分鐘先返到酒店。咁個cbd區其實唔算細，好彩夜晚天氣清涼咋。

想當年去到塔斯曼尼亞追女仔，可惜都係失敗收場

下個更可愛呢

點解要買水既？澳洲唔係水喉水都飲得？

好青春

我又係12月尾去左Melbourn & Sydney.
自己一個係Ｍelbourn倒數+鳩遊左5日
Ｍelbourn D塗鴉好靚，大洋路值得一去

幾年前去過Tasmania 去過ge景點9成同你一樣
不過我冇去睇企鵝，
Tasmania 真係啱自駕遊

怕水土不服

之後有去

好多遊記集中兩大城市同東海岸，西邊係無乜人去。應該再原始d

Day 8: Melbourne 飲食購物日

做返個城市觀光旅客，今日選擇悠閒d，畢竟之旅每日都要7點起身，9:30先落酒店餐廳食早餐，之前幾年係香港staycation ，睇到呢間酒店既早餐種類同香港既同一品牌既酒店又少左d既，特別係食物，得大概10幾種選擇。飲品種類，特別係茶，反而就多選擇啦，不過無影到食物




今日第一站先去South Melbourne Market，要搭96號電車去既，係個free tram zone出面，做個好遊客就先去車站、便利店、巴士上、售票機都可以買到Myki 交通卡，可以用全維多利亞州的火車、巴士與電車。由於係free tram zone出面，所以上電車時要拍卡，落車時都要拍卡。據聞搭霸王車捉到既話，都罰得幾重


路線圖






搭96號電車，係south Melbourne station 落車，離開個車站就已經到呢個市場啦。



落車就見到塗鴉


佢就成立於1867年。雖然規模比起之後去既queen Victoria market 細，不過個人認為呢度好行d，因為全室內既，價錢都比較平d。由新鮮食品到香辣西班牙飯、甜品都有。然而，也有攤檔出售各式各樣的產品，由滑板到Ugg靴。建議大家早餐唔好食飽黎，黎呢度食多d。








由於仲係好飽既關係，最後買左半隻龍蝦同一打生蠔，d龍蝦肉係新鮮同爽既，生蠔就都係新鮮同creamy呀。現場勁多人排隊買海鮮，無記錯一打生蠔大概$25澳幣，龍蝦就大概$26澳幣到。至於西班牙飯同甜品就無肚食啦





離開都1點幾，每次旅行都一定去outlet，黎到呢度梗係去返轉outlet，今次揀市區內既DFO South Wharf，純粹係south bank比較方便，同埋鋪頭多，返酒店都係行10幾分鐘就到。可惜既係，用左2個幾鐘行哂成個outlet，我同另一半都只係Nike買左1，2件運動衫，我自己因為唔想洗underwear 關係，買左包underwear ，同日本/台灣既outlet比有出入，可能咁岩呢日d貨無哂掛。


雅拉河

行完去將近4點，有d肚餓就返去cbd 去醫肚，突然想食漢堡包，於是google下仲有乜野餐廳開，去左間本地漢堡包餐廳食，叫royal stack，話英國皇室認可既餐廳，叫左兩個包+薯條+2杯飲品，夾埋30幾澳幣，外國d burger既肉特別有味d。呢度電視唔係播本地節目，而家播mr. Bean，切合返佢間餐廳特色。



之後係呢個區域行下，睇下建築物咁，倒如：市政廳咁，都幾有特色。


China town


市政廳




去到將近6點，就搭電車去南邊。另一半搵左間食pancake 出名既餐廳-stokers fine pancakes。因為間餐廳6點先開既，去到呢間餐廳都坐在幾檯客，叫左2款pancakes ，個人覺得係正常水準，又未至於必定要搭電車過黎既。







食完返去cbd 再行一行，主要睇火車站一帶建築物，就返酒店執下行李，準備明日去完 tour，轉酒店。



火車站


Degraves Street


酒店泳池

電車係咪又密又簡單？

睇路線，你當10-15分鐘一班

Day 9: 大洋路之旅

今日係Melbourne 既重要行程，全日既大洋路之旅。係Melbourne 郊區，呢條公路係無任何公共交通工具到，所以一係自駕，一係跟團。

比較d tour ，最後揀左個反向既大洋路之旅，因為先坐車睇左12門徒石，會避開順走既大洋路之旅既人潮。因為好後期先報名，已經無乜團揀，揀Autopia Tours主辦既tour ，經k look報名。


早上酒店外既景觀


移民博物館

由於酒店係移民博物館附近，所以揀左移民博物館集合，7:30 am要集合啦，已經係市內最後一個上車點。今次既tour 用既24座小巴，上到車就係導遊，亦都係司機，介紹今日既行程，都係講下條路既歷史咁。




大洋路係1917年開始興建，全長約276km，澳洲在第一次世界大戰中，共投入左33萬士兵作戰，但傷亡率高，戰後如何照顧這班歸國士兵，讓他們重投社會，可謂重中之重，當然當然係就業問題。當時興建「大洋路」的計劃就為他們提供了就業機會，1932年就完成興建。講完就比大家休息，車程大概1個多小時先到第1站。

第1站：colas鎮

呢個都唔叫係乜野景點，只係一個小鎮比大家落車去廁所，到當地麵包鋪買早餐。我地就無買啦，係酒店食左。不過見到go west tour既團有提供熱茶同茶點，即刻覺得人地團又幾好









係度停左大概20分鐘度。當地有個公園，見到個繩索設施，香港無得玩，於是就玩下，自得其樂。 跟住就上車，繼續向第2站出發，就係直達12門徒石，要坐2小時車先到架。




沿途景觀


第2站：The 12 Apostles （12門徒石）

接近12點先到12門徒石，落到車係visitor Centre。如果唔落車就係車你去搭直升機由高空睇12門徒石，機程20分鐘，價錢$6xx澳幣到，仲要唔知要排幾耐先上機。考慮價錢太貴，都係去觀景台望算。

記得落車時，個導遊無講呢度落車行3分鐘就去到12門徒石。我地聽到停15分鐘，以為又係廁所位。點知等左15分鐘都未見團友同導遊。

過多10分鐘終於見到導遊，原來呢度向前行3分鐘就到12門徒石，時間得返25分鐘，於是我地即刻跑過去。

去到成個海岸就有幾舊石企係度，肯定就會12舊石既。見到d都幾大，係咁拍打住d石，應該過多唔知幾多年就倒塌埋。








第3站：Loch Ard Gorge

去完12門徒石，就上車去幾公里外既景點，呢度有幾樣野睇，分別係Mutton Bird Island、The Razorback、Island Arch，前2者都係睇下舊石企係海度。






Mutton Bird Island


The Razorback

不過沿住樓梯行落去，見到有個沙灘（提大家要帶拖鞋），再向前望就見到個奇景：海水從兩側高大懸崖所形成的閘門湧入，個人覺得仲正過12門徒石。


近距離望個閘


由上面望落去




由沙灘望過去

Loch Ard Gorge是由一艘發生海難的帆船而命名，在1878年時在此處的外海翻覆，全船54名船員和乘客，除左兩名生還者外全數罹難，呢度為紀念這些罹難者故而命名。

睇完導遊就分左light lunch,即係三文治，比大家充飢。

Day 9:大洋路之旅（續）


第4站： Great Otway National Park

正確黎講，導遊只係放左我地係呢個公園既Maits Rest or Melba Gully ，唔記得左邊個地方，跟住叫我地自己沿住郊遊徑行一個圈，話可以見到世界上最高既tree同會見到動物。樹我就無留意係咪特別高啦，至於野生動物就見唔到啦，行左35分鐘就完成。呢個景點無乜太大特點。覺得如果導遊陪我地行個圈更好





第5站： Apollo Bay

之後搭車去呢海邊渡假小鎮，算係大洋路中比較大既鎮，好多人自駕遊都會係度停一晚休息下。我地係度落車都係休息，順使食呢度出名既雪糕，要排15分鐘隊先食到，係好食既，不過無影相再去Apollo Bay Bakery買個批食，肉汁多又熱，正！時間關係，無得出去海邊欣賞成個小鎮。



小鎮周邊


雪糕鋪


牛肉批

第6站：Knnnett River

黎到呢站前，導遊話可以見到野生動物，點知沿住步道行走。只係見到1隻樹熊食緊野，同埋有隻雀仔係樹上。





之後見過河邊有人釣下魚





第7站：Memorial Arch

最後就黎呢個紀念碑打個卡，就搭返個幾鐘車返Melbourne。




行程表

返到去都已經7，8點啦，夜晚去食間酒吧食西班牙菜。前菜份量比預期中小，個西班牙海鮮飯就係正常份量啦，味道正常水準。






最後又係行路返酒店，好好體驗晚上既Melbourne。




由於頭先個餐唔多飽，經過d快餐pizza 鋪都買返份pizza食。

Day 10: 雅拉河谷品酒之旅

今日又係join tour，係trip advisors 搵到既，主辦機構係Rick's Wine Tours。今次就9:30am先主辦，係大教堂集合。今次既tour 去3間酒莊同1間朱古力廠。



早上既Melbourne

點解揀wine tasting tour ？因為去搭蒸氣火車加動物園都唔夾時間，又唔想去Philip island 睇多次企鵝，所以揀呢個tour

其寶wine tasting tour 就大同小異,分別係去邊幾間/幾多個酒莊，包唔包午餐（唔包就會車你去個小鎮，放低你自己搵野食），去唔去朱古力廠/士多啤梨園咁。

唔join 團，自駕都得，不過做司機個位就飲唔到酒啦。

今日天氣轉熱，係Melbourne 夏天就係天氣溫差大，同一日都可以日頭熱，夜晚涼。

首先就搭架小巴，坐左成粒鐘車，去到酒莊既集中地區。




第一間酒莊：St Hubert's
成立於1862年，呢間酒莊會比4杯酒你試，個人覺得普普通通，不過呢間酒莊既內部建築係最靚既，有個art gallery比你參觀。d酒由$30澳幣起，比較貴，所以無買到酒。



酒莊外觀


同團友一齊試酒

今次試既酒



室內環境




室外環境



Art gallery

第2間酒莊：Rochford



酒莊外觀

成立於2002年，呢間酒莊除左wine tastings,仲有間餐廳提供餐飲，同埋定時會搞戶外音樂會。今次就試5杯酒試，我會話呢間酒莊d酒幾唔錯







同埋lunch會呢度餐廳食，包杯酒同主菜，揀左牛同雞黎食，普普通通啦。





食完飯就出去行下，呢度規模又大，可以近距離接觸葡萄園。





最後呢間酒莊有d package賣，揀左$25澳幣，1枝白酒同1枝rose wine，拎返黎香人港，可以係聚會一齊飲，質素都唔錯。

呢類tour大約幾多錢一個人

第3間酒莊：Helen& Joey

呢個酒莊就係2010年買返黎，對呢間酒莊既印象係佢係小山丘上，坐係度望落去成個葡萄園區，同埋有隻獨角獸





呢度就提供左7杯酒你試，有1杯酒係罐度倒出黎，味道幾特別。仲有枝甜酒，係佢地最賣得既些品，幾印象深刻，所以買左2枝帶返香港飲。







甜酒

計落都試左17款酒，個人都有少少攰啦。




葡萄園

第4站：Yarra Valley Chocolaterie & Ice creamery


整緊朱古力中

最後一站就黎到朱古力廠買朱古力，其實呢度既雪糕都好食，不過黎到已經人山人海，仲要得半小時停留，所以唯有放棄雪糕，買朱古力返香港當手信。d fd既評價都唔錯既。




最後再5:30返到集合地方。



將d酒同唔用既野放低先酒店先，跟住去下royal arcades 打個卡。



去下Melbourne shopping centre睇下有無野平，特別個陣話阿根廷波衫香港無哂貨，要捱貴價波衫 （純粹美斯奪冠，印返件留為紀念），點知都係無。

之後，因為政府個陣時放寬左檢疫措施，加上鄰國人既關係，搞到必理痛貴哂，咁我就行下藥房，買返1，2盒傍身（估唔到之後返到香港真係要用到），個陣時d藥房已經限購一盒，再幫屋企人買下魚肝油丸，又真係平過香港。




行下行下都到7:30 pm, 就去間食pizza同意粉既餐廳（11 inch pizza)，個人認為呢間比起tas 個餐廳都差唔多水準，價值又平d，性價比高d




食完就今次行下south bank，主要係河邊漫步。



見仲有時間就上去Melbourne 的Eureka Tower ，樓高91層，觀景台設於88層，話係是南半球最高的建築物內公眾觀景台。門票要$20澳幣度 （其實KKday/Klook 早一日買會平d)。之前就無打算上呢類大廈，因為Melbourne 唔係以夜景出名。上到去望夜景都唔差既，不過比起幾年前去過芝加哥夜景又遜色d。

Day 11: 迎接2023年

今日係2022年最後一日，第一次係外國過年係特別興奮朝早首先去埋Melbourne 最出名既Queen’s Victoria market 行個圈先。從1878年開始營業，呢個market同時也是全球第三大規模的露天市場。我就係搭電車過去，係Queen’ Victoria market站落。


Market外邊

呢個market規劃完善，環境都整潔，入面劃分成多個區域，例如：水果蔬菜區、雜貨區、肉類海鮮區、熟食區、美食廣場，個人認為行得幾舒服





咁快有美斯奪冠圖

如果到夏天，夜晚有限定版的夜市，係星期三17:00-22:00舉行，除左野食，仲有街頭表演、樂團演奏可以欣賞。





由於仲係好飽既關係，係呢度我地買左出名既熱狗，大大份都幾好味，同埋買左衫紀念tee，有d後悔係酒店食左d早餐。都有買杯咖啡同麵包，不過就無影啦。




之後行去royal exhibition building 行個圈，原本想join佢個導賞團，係可以沿住個圓頂行個圈，點知full左



咁唯有轉去另一個必去既位，就係state library 啦，一個超過百年歷史，佢個閱讀大堂最靚既，叫做到此一遊啦。


圖書館出面既棋盤


地下望過去




座位




係高位望返落去

Day 11(續）



F1舉辦既地方-阿爾伯特公園賽道（Melbourne Grand Prix Circuit）

下午搭96電車落去 St. Kilda beach, 係Melbourne 近市區既沙灘，一定唔係水清沙幼架啦，勝左夠長，非常多人黎呢度曬太陽。雖然係有少少曬，不過唔熱，又有風，都幾舒服



沙灘


竟然禁酒





之後係度搵下藥房買下supplements ，搵間餐廳食個下午茶，都係叫下pasta個d。黎到外國食西餐，點都唔會太伏。起碼個burger 舊肉一定有肉汁先。





好彩唔係太多車

食完又抖下都差唔多5點，係時候坐電車返cbd，嘗試睇下運動鋪有無野買啦，結果係無收獲，條街開始多人去倒數地點。


街上開始多人

去埋係Melbourne cbd 內最後既景點-塗鴉巷，其實係有幾個位置，我地之前有經過既，今次去出最出名既，hosier lam street art，一條由上而下既小巷，最有印象係oneal 既畫，畫得超正！







其實原本就想試Melbourne 最出名既泰國餐廳-，chin chin 之前上網就book唔到，打算walk in，點知要等2小時，咁唯有放棄啦。


4個慶祝地點

Melbourne 迎接2023年既倒數活動，竟然分左4個區域，有係海港，亦有係河邊，都有係公園內。我地就揀左去Docklands ，即係海港區域，係marvel stadium 個邊。驚電車係夜d會封路停駛，所以早左搭電車過去，睇睇附近有無餐廳，點知已經收哂工，咁唯有係呢度搵間便利店買枝水同小食啦。



Dockland 區

2022最後黃昏

之後就慢慢搵到個位置，望住大橋，等待迎接2023年來臨。點解揀呢度呢？澳洲既中文媒體話有無人機表演，9:30 pm同 00:00 am都有煙花滙演。天氣唔太凍，適合休下息。另一半已經表示喉嚨唔舒服，有d痕，個陣時仲ff 無咁好彩既


台上表演

9:30 pm既煙花係日落既餘暉之下盛放，感覺仲靚過夜晚既。係呢度又唔駛好似香港咁人逼人，係幾舒服架。不過最後係無左無人機表演


叫唔叫magic hour?






等到12點，終於2023來到啦。係異地慶祝都特別有感覺，最緊要舒服，仲有係前後都有煙花，真係不得了。個陣時仲祈求身體健康，工作順利，結果就做唔到。煙花時間就唔夠香港長架啦同多花臣架啦。






另一邊都有放煙花




睇完就行返10分鐘返酒店，沖涼同執行李，明日就離開Melbourne啦。

仲有篇就完成是次遊記！

如果去旅行住dockland 方唔方便？