20 Like
4 Dislike
綠嶺
2023-03-31 20:49:25
「手!」突然,一把熟悉嘅男聲對我呼喊,我正前方就有隻手向我伸過嚟。
嗰隻手就好似一束陽光咁,將密集嘅黑暗人群分開到兩邊。
我毫不猶豫地捉緊我嘅救命手,我捉住嗰隻手之後,嗰個男人就將我從人群中拉起來,我終於重見天日。
人群不再推撞我,我呢個時候先驚覺自己企咗喺離起點不遠處嘅水站,無跑撚會撞擊水站。
「多謝。」我向男人致謝。
「唔洗。」男人講。
呢把聲確實好熟,於是我問:「你係喺隧道為我帶路嗰位先生?」
男人點頭。
呢個男人唔止聲音,就連樣子都帶俾我熟悉感,但係我就係唔知佢係邊個,講唔出佢個名。
「點解你要幫我?錦囊嘅戒指,你一早就知道我會用得上?」我問。
男人點頭,但無回答我。
我凝視着佢,佢馬上別過臉然後伸直手指向終點:「終點。」
「飲。」嗰個男人將裝滿水嘅紙杯遞俾我。
我大口大口咁飲咗成杯水之後就打算出發。
嗰個男人問我:「你真係想返去嗰條地下街?」
我一定要同Yoyo返去,返去活得舒服嘅地方,返到去唔洗因為他人存在而令自己感覺到自卑嘅地方。
喺地鐵站想調低跑返入去地下街嘅我係咁諗。
單純因為我想逃避其他人。
但係依家呢?
其他人係咪真係咁恐怖?
都真係幾恐怖。
不過,真正嘅問題⋯⋯亦都係Yoyo最擔心我嘅問題——我能唔能夠面對佢哋。
以前嘅我只係單純地逃避而走返入房、入地下街,咁樣就無人望到我。
但係依家我有勇氣,頂住他人目光做自己嘅勇氣。
力排眾議,逆行走完一場馬拉松,原來只要我想做,我都做到,當我有想做到嘅嘢嘅時候,我根本唔care其他人嘅目光。
依家嘅我,返去房、返去地下街,大概都係為咗差電同Yoyo。
就算佢哋想迫我行大多數人行嘅路,有目標嘅我已經可以好好咁抗衡住佢哋走一大段路。
目標——令Yoyo同自己幸福。
我唔幸福,Yoyo都唔會幸福。
能夠好好面對外界嘅壓力,將佢哋無視或扮作接受,專注自己重視嘅嘢,唔好被外界壓跨先係最重要。
專注自己內心,因內在去抗衡外在。
以前做唔到係因為我內在都空虛,依家我嘅內在有咗目標。
你有你嘅路,我有我嘅跑道。
呢啲道理走咗一大個圈先實踐到,明白就一早明白。
我已經做到,無嘢好再怕。
我答:「無論如何我都要返一返去。」
「嗯。」男人點頭後我就打算轉身離開。
「等陣⋯⋯」嗰個男人憂心忡忡咁拉住我,佢見我回頭望住佢之後,就喺褲袋掏出一隻戒指。
「又係戒指⋯⋯?」我疑惑地道。
「佢哋本來係一對。」男人講。
「今次可以照當係護身符?」我笑住問。
「當係俾你嘅嫁裝。束手無策時拎出嚟,會幫到你。」男人將戒指套喺錶鏈後,就將佢戴上我頸到。
我無抗拒,佢嘅錦囊幫過我一次,佢今次都應該唔會害我。
近距離一望,我先驚覺佢有一雙同我好似嘅眼珠。
「去啦,小心。」幫我戴好頸鏈之後,男人就拍一拍我背叫我出發。
我向咗幾步後又回頭問:「你係唔係⋯⋯!」
佢已經唔係到,消散咗係呢個靈魂徘徊嘅世界。
所以,我大概一輩子都唔能夠搞清楚佢嘅身份。
但係,佢永遠都係喺我喺危難之中幫助我嘅人,呢一點我會銘記於心。
我深呼吸一大口,走著最後一後逆行之路,雙手頂住人群前進。
終於,雙腿都越過起跑線。
第二十三話 完
綠嶺
2023-03-31 20:50:19
「呯!」黃雷打喺我身上傳出巨響,阿星亦因為爆炸而被彈開。
「Ivy!」Yoyo大叫。
我⋯⋯好似唔痛。
都合理,我係魂魄。
我張開緊閉嘅雙眼,卻發現我被防護罩遮蓋住,而嗰個男人戴喺我頸上嘅戒指喺我鎖骨綻放耀眼嘅金光。
而我就完孔無缺咁企係原地。
「!!」西裝男震驚地望向我。
阿星同Yoyo兩個連滾帶爬咁走到我身邊,阿星講:「收埋個盾咁古惑!?所以話啲女人⋯⋯」
「阿星,我覺得我有計。」我馬上提出。
戒指發動防護罩後,我聽到一把聲,嗰個男人嘅聲。
佢叫我用紅線。
紅線可以自由揮動,唔會咁易斷。
男人為我提示。
反擊嘅號角由此響起。
我知道紅線象徵嘅係兩人嘅姻緣,斷咗就代表緣盡。
呢啲風俗嘅嘢,唔使死神同我講我都知。
如果真係可以憑念力控制紅線,咁樣就有機會拖住西裝男,再等阿星打爆結界後送我返肉身。
同佢正面硬碰必輸無疑,所以要繞過佢、偷佢雞。
比著以前嘅我,我一定會一早逃走唔面對呢咁辛苦同麻煩嘅一切,但我已經踏出咗改變嘅一步。
無變嘅地方都有,就係唔會正面硬碰。
西裝男並無畀時間得同阿星交代,佢大喝一聲:「一堆遊魂野鬼以為整古做怪就可以打贏到我咩?」
從佢嘅語氣推測,佢見到我有防護罩之後好似焫着咗。
遊魂野鬼?
唔通嗰男人都係遊魂野鬼?
西裝男彈手後黃色雷電應聲彈出,我聚精匯神地諗住防禦,紅線就係𣊬雷之際飛出,宛如一條蛇咁飛身將雷電擊落。
擊落雷電後紅線後順勢地打落喺地下,伴隨「啪」一時嘅係強烈而且穿過成個地鐵站嘅爆風。
我被呢下巨大嘅力量嚇到,我本以為紅線只係有可以綁住西裝男對腳嘅程度,估唔到雷電都搞得掂。
全場人都被我呢下有型嘅格擋震懾,一動都不動。
除咗佢。
「喂你有計一早用啦,我俾人打到仆街你先出手,真係夠老友。」阿星一輪嘴屌臭我。
我沾沾自喜且帶點一朝得志嘅囂張挑釁西裝男:「一係放我哋走,一係打過。」
我對自己突然充滿自信,內心嘅聲音話我知道,只要靠住紅線我就能夠同西裝男打個五五波,加埋阿星嘅幫手就應該可以打贏。
無論西裝男點樣講,我都諗住同佢打過。
佢話唔打嘅話,我都會偷雞綁住佢哋腳,等佢追唔到我哋。
佢話打嘅話,就推阿星出去幫我做肉盾。
總之,我要打響十二分精神,隨時準備戰鬥。
我哋三人都繃緊精神,觀察着西裝男嘅動向,彷似等待法官判刑嘅疑犯一樣。
西裝男舉起手,準備要啪手指展開攻勢嘅模樣,阿星同我同時壓低下盤,頂住頭頂嘅冷汗準備反擊西裝男嘅雷電。
然而,西裝男卻一反我哋嘅預期放低佢嘅手,佢講:「唔打。我嘅目標唔係打。」
雖然西裝男話唔打,但係我因為太過緊張,一時理智斷線咁扔出紅線,紅線有如長鞭咁直飛到西裝男身前。
「仆街甩手。」我忍唔住講咗出口。
西裝男連彈幾下手指接連召喚出雷電格擋紅線,但係只能夠作為緩衝,紅線橫向地鞭落西裝男腰間,西裝男被打飛到陷入牆中,牆身彈出無數嘅小碎片彈到周圍都係。
「呀⋯⋯」我就好似做錯事嘅小朋友咁望向阿星同Yoyo尋求佢哋幫助,點知佢哋就一面無奈兼驚訝咁望往我。
「⋯⋯」西裝男狼狽地企返起身。
「Sorry,我唔小心嘅。」我馬上道歉。
點知阿星突然從後射出幾道雷電,全數擊中西裝男,引發連返爆炸。
「⋯⋯又偷襲⋯⋯」我不禁同情起身為敵人嘅西裝男。
「襯依家搞掂佢!快!唔係Yoyo都會有事!」阿星無理會我嘅抱怨,佢催促我盡快郁手。
話說咁樣打死神,我真係死咗之後會唔會有報應?
不過依家唔諗得咁多啦,我再度揮舞紅線,一鞭又一鞭咁打落西裝男身上。
每揮一下我就諗住要快!要更快!我嘅手速就隨之而變快,有如連環拳咁打落西裝男到。
諗起阿星最後嗰句話Yoyo都會有事,我就忍唔住激動起嚟,不斷提高揮舞紅線嘅速度,更快、要更快地鞭打西裝男!
「呯!」連環鞭打咗近一分鐘,我已經累都無辦法再打落去,於是只能夠迫於無奈地停下手嚟。
塵粒同碎片係四周飄浮,以致我哋睇唔到西裝男係咩境環。
正路應該無事掛?
話晒都係最終戰,一般漫畫劇情應該要打得更有來有往,咁樣先有張力㗎嘛!西裝男應該會傳過沙塵企返起身再好似狂戰士咁攻過嚟。
再者,我同西裝男嘅交流只係好少,我仲係一拎到新力量就單方面打到佢仆街,佢連還拖都未做到就被我打到躺平,咁樣未免差咁啲嘢。
但係西裝男企返起身嘅話,現實嚟講又唔係咁好,始終打落去嘅話對我哋嚟講絕對唔係好事。
沙塵終於散去,一個身影映入我哋眼簾。
西裝男衣衫襤褸咁靠牆坐咗喺地上,太陽眼鏡都碎晒咁到跌落到地上,滿身傷痕嘅西裝男身軀乏力地倒在地上,整個身軀都軟趴趴咁。
睇嚟西裝男已經無力再同我哋作對,佢連一個指頭都郁唔到。
阿星急忙地躍到西裝男身邊,扒光佢身上嘅衣物,再唔知係邊到搵卷牛皮膠紙出嚟綁住西裝男。
「邊到搵牛皮膠紙出嚟?」我問。
「捉鬼用牛皮膠紙㗎嘛,常識嚟。」阿星答。
「捉鬼用保鮮紙㗎喎。」我答。
「Whatever,總之最大危機解除。」阿星鬆一口氣咁坐落地下。
「⋯⋯多謝你。」Yoyo有點兒怯懦地向阿星致謝。
「順便姐,我份工本身就係要幫啲未死晒嘅靈魂返肉體。」阿星有如爽颯少年地回答。
「對唔住⋯⋯係我搞咗成件事出嚟。」Yoyo突然士下座向我同阿星道歉。
我即刻扶起Yoyo,但係佢好堅決要跪係到。
「潛意識你控制唔到,唔關你事㗎。」我講。
「死之前想同愛嘅人相處耐啲都係人之常情姐。講到尾,最錯都係Ivy啦!如果佢唔係咁廢、咁唔識同人相處嘅話,你都唔會有想佢改變嘅諗法啦。」阿星將茅頭指向我。
我無言以對,因為真係無講錯。
「係嘅⋯⋯我知道係我錯。」我認真地講。
或者因為我認真嘅態度,Yoyo抬起頭望住我。
我誠懇再講:「只不過,依家已經可以。我知道要點做,我亦都可以做到。」
我同Yoyo四目交投,透過眼神話畀Yoyo知我真係已經無問題,但Yoyo嘅神情仲有一啲憂慮。
「佢真係無問題。唔洗聽佢啲廢話,我畀你睇。」阿星用食指督Yoyo嘅太陽穴,將我先前係怪空間經歷嘅一切都展示俾Yoyo睇。
「我已經可以走出去,再安全咁走返到嚟。就算出面嘅路係點樣、就算要逆流而行、就算無人並肩,我都知道我可以行落去、亦會有人撐住我。」我握緊Yoyo嘅手講。
「隆隆⋯⋯」
空間恍似呼應住Yoyo嘅內心咁震動起嚟,慢慢開始崩離瓦解,牆身、電梯、椅子、燈等等嘅物品都化成光點慢慢消散。
枱頭一望,天花已經消失,取而代之嘅係無盡嘅黑暗。
專一主義
2023-03-31 21:55:52
你老豆又早死,你係我一個人養大㗎!問你拎返啲回報都唔過份啦?
近距離一望,我先驚覺佢有一雙同我好似嘅眼珠。
老豆
綠嶺
2023-04-02 13:59:15
「終於完成任務,呢個空間好快就會消失,到時候你哋就會自動返到去你哋肉體。」阿星道。
「多謝你,我愛你。」我同Yoyo講,我終於可以昂首挺胸咁同Yoyo講,我終於做到唔需要你擔心嘅另一半,我哋可以一齊並肩而行。
「我同愛你。」Yoyo吻落嚟我到。
大概,我哋好快就會返到我哋嘅肉體。
我哋當阿星無到咁親吻住對方,然後Yoyo嘅身影就突然之間化成光點消散,紅線都隨之而消失。
「喂,你保重啦。」阿星向我告別。
「你都小心。」我回話。
「你⋯⋯真係唔問我點死?之後就無機會再問。」阿星講。
「話唔埋我會瀕死多次呢?講下笑!每個人都有秘密,你唔想講嘅我唔迫你啦。再次,你係重視我呢個朋友嘅話,一早就同咗我講啦。」我使出一招情緒勒索。
「⋯⋯真係好對唔住。」阿星難得地道歉。
「無嘢啦,我feel到我差唔到要走啦。睇嚟我無時間聽你講故事。」我苦笑道。
「咁⋯⋯真係再見啦。」阿星講。
「Bye。」我背對阿星告別。
然後,我成個身軀彷彿被乜種力量向上拉扯,準備返去我嘅肉體。
離地一小段後,突然有嘢拉住我隻腳。
正確嚟講係咬住我對腳!
俾阿星五花大綁嘅裸體中嘅前西裝男竟然咬住我隻腳想拉住我!
阿星見狀就想拉走裸體中嘅前西裝男,但係裸體前西裝男竟然可以啪腳指,藉此射出雷電將阿星打飛。
阿星隨即飛到九仗遠。
我感到下沉嘅速度比上升快,我慢慢被裸體前西裝男拉落去!
呢個時候嘅我已經無咗紅線,無晒反擊嘅手段,救星阿星都俾人打到仆街,唔通我今次係咁大?
我唔想死住,我仲有要做嘅嘢。
我仲有等着見我嘅人!
綠嶺
2023-04-02 14:00:31
「叮!」我胸口嘅戒指忽然傳出清脆嘅聲音。
一個人影從戒指中掙脫出嚟,係嗰個幫咗我過海底隧道同喺馬拉松時幫我嘅男人!
嗰個男人程半透明,男人先突出頭,然後身軀,最後到腳穿越戒指,最後成個身軀出現喺我眼前。
裸體嘅西裝男一臉驚訝,雙眼都瞪大到就快跌出嚟。
男人雙手各自捉住裸體男兩邊嘅手腕,再用膝頭撞擊佢嘅春袋。
男人開聲:「走。」
聲音沉穩得嚟帶威脅性,就彷彿唔容許任何人拒絕佢嘅指令。
「游魂野鬼唔好咁大口氣!」裸體男強忍下體嘅痛楚咆哮。
裸體男試圖啪手指去召喚出雷電,但係男人同時扭動去雙手,痛到裸體男冇辦法啪手指。
「你啲死神嘅弱點,就係出招嘅時候一定有既定動作,只要你哋出唔到招嘅話就同我哋游魂野鬼冇分別。」男人兩三下散手就宣告裸體男嘅失敗。
男人一腳踢落裸體男到,將佢踢入無盡嘅黑暗當中。
喺後面望住呢一切嘅我唔敢輕舉妄動,生怕有咩閃失會返唔到去自己嘅肉體。
到底今次佢係咪嚟幫我?
定係佢係嚟搵我徵收返之前幫我嘅代價?
我唔敢因為裸體男俾佢解決咗而放下心頭大石,反而更加緊張。
我咬住雙唇等候男人嘅發落。
男人擰轉身望住我,將手伸向我。
我驚到我將雙手放喺身前,合埋眼格擋。
1秒過去、2秒過去、3秒過去……
嗰個男人並冇打我。
我慢慢地將張開雙眼,發覺男人只係對我伸出手,手掌向天。
「戒指。」佢問。
我即刻將掛係頸上嘅戒子除落嚟交到男人手上。
戒指交到男人手上後就「沙」一聲化作微細嘅光點散落喺空氣之中。
「咁樣兩隻都無晒。」佢講。
「⋯⋯」我警戒地望住男人同時持續受引力被向上拉,但男人依舊喺原地。
「唔洗擔心,我唔會阻你返去。你已經經過咗試煉,成長咗好多。」出乎意料地,嗰個男人用溫柔而且帶點可惜嘅眼神望住我。
個種可惜嘅程度就好似眼淚隨時都會係佢眼角都流出嚟咁。
我肯定諗返起喺馬拉松穿過終點之前我有個問題想問佢,但係佢又搶先開口:「你父母嘅戒指都消失咗,兩隻戒指都為你所用。佢哋嘅姻緣已經斷咗,母親亦都唔會再係束縛到你嘅嘢。」
戒指⋯⋯父母?
果然,我應該冇估錯。
「爸⋯⋯」我伸手撫摸眼前呢個男人嘅臉,卻已經上升到接觸唔到父親。
果然,佢就係我死去嘅父親。
「女⋯⋯」父親全身都震抖住,手都向上舉起,希望可以掂到我。
雖然我討厭母親,但係我對喺我細個就死去嘅老豆就無反感,甚至有所憧憬。
「多謝你幫我!爸!」我大叫。
我冇追究點解佢係游魂野鬼、點解佢要幫我、點解佢會喺海底隧道同埋嗰個奇怪嘅空間。
內心有啲灼熱,卻無感動,反而較多嘅係感恩。
同我冇乜交集嘅老豆嘅鬼魂竟然會係奇怪嘅地方助我一臂之力。
「你要好好咁生活。阿媽嘅事你就隨心處理。」
佢冇逼我遷就我老母,睇嚟佢都睇得出我好憎老母。
然後,我就失去意識,一切歸於虛無。
父親點解要幫我、點解係游魂野鬼、阿星嘅下囉等等嘅一切,係我失去意識之後就注定我永遠都唔會知道答案。
我唯一肯定嘅,就係我依然活着。
綠嶺
2023-04-02 14:01:11
醒過來之後,我即刻撳咗製叫護士過嚟,用唔太流利嘅日文講我要搵女朋友。
我肯定,Yoyo同我一樣未死,我好想見佢。
比着以前嘅我,一定會因為太麻煩到人哋唔敢叫護士過嚟。怕畀啲護士覺得我係閪客而在內心掙扎到乜都唔敢做。
如今我已決定為自己而活,亦都可以好好咁面對他人嘅目光,我唔再擔心其他人點睇我。
對方馬上為我準備一張輪椅,坐上去後對方就將我推到Yoyo嘅病房前,再為我推開門。
坐喺床上嘅係一位美若天仙嘅女孩,佢微笑住望向我。
Yoyo搶先講:「早晨,我愛你。」
「多謝你。我愛你。」
完。
綠嶺
2023-04-06 09:54:42
Push
STAT
2023-04-08 23:43:50
好睇
綠嶺
2023-04-10 15:18:46
感謝
呢個係我最鍾意嘅故,但好少人睇
STAT
2023-04-10 20:52:50
可能前段講畀老母情緒勒索嗰part太沉重同討厭