【一生都不出去】我同女朋友神隱到只有我哋兩個人嘅地下街

112 回覆
20 Like 4 Dislike
2023-01-27 16:29:05
喺日本嘅時候,我(Ivy)同我女朋友Yoyo突然被困喺無人嘅地下街到,然而,我一啲都唔想出返去,仲想一世都留係地下街。

--------------------------------------------------------------------------------------
關於作者:

IG:littlemanhkg

--------------------------------------------------------------------------------------
舊故:
我青梅竹馬同咗個死MK仔一齊//《不懂愛的青梅竹馬們》
Post 1: https://lihkg.com/thread/2583136
Post 2: https://lihkg.com/thread/2656487

《同居女孩》
Post 1: https://lihkg.com/thread/2662244
Post 2: https://lihkg.com/thread/2735039


《是咁的,我一炮過有咗三個女朋友(假)》
Post 1: https://lihkg.com/thread/2987843/page/1
2023-01-27 16:29:27
lm
2023-01-27 16:30:21
空間突兀咁被切割成兩份,右手邊係日本嘅地下鐵月台,左邊嘅就係香港。

其他人都已經走到返香港,而我同我女朋友仍然喺日本嗰邊猶豫不決咁企咗喺度。

正確來講猶豫不決嘅只有我,我女朋友捉實我隻手,佢同我講無論如何都會喺我身邊。

正當我打算同女朋友轉身走返入地下街嘅時候,一條繩憑空出現,再套喺我同我女朋友身上。

繩嘅另一端喺我朋友們手上。

喺香港嗰一邊嘅「同伴」見到「拯救」我嘅方法,即刻費盡九牛二虎之力去拉動嗰條連結住我哋嘅繩,企圖將我拉返去「安全」嘅地方。

完全冇尊重過我嘅諗法。

「你哋可唔可以放過我哋?我哋唔想返去點解要逼我哋?」我一邊向後跑,一邊大聲咆哮質問佢哋。

「你哋唔好再咁固執!嗰到有怪物,好危險㗎!」幾年前自殺身亡嘅星仔活生生咁企喺「香港」拉住條繩講。

「大家都會揀安全嘅地方去逃生,冇人想睇到你哋死!所以唔好再咁固執,一齊返過嚟同大家一齊生存落嚟!」我老細講。

「跟返大隊去做人真係咁難咩??無人想你哋死!可唔可以聽下人哋講嘢?」阿星再問。

又係他人嘅期望同他人嘅失望。

我嘅意願同佢哋截然不同,佢哋對我一定好失望。

因為我唔跟大隊。

點解我已經走到去日本,啲人都仲想逼我跟着大隊行?

我已經為咗逃避你哋走咗去外國,點解我就係避唔開個其他人?

就算返到香港,係香港主流嘅道路上,我都只會係一個落後於其他人嘅失敗者。

社會主流嘅道路上。

所以,無他人目光嘅地下街、只有我同女朋友嘅地下街,就係我從社會壓力中解放嘅烏托邦。

我一定要同女朋友返過去,返去活得舒服嘅地方,返到去唔洗因為他人存在而令自己感覺到自卑嘅地方。

「無問題!我哋一定無事!」女朋友同我打氣。

女朋友嘅打氣為我打咗枝定心針,暖流一瞬間穿透我嘅身軀,力量開始湧上心頭。

「呀!!!我唔會返去!」我聲嘶力竭咁咆哮,再竭盡渾身解數向前奔跑。

呢個時候,我眼前出現一條浮喺空中嘅繩,一條救命繩。

我不假思索咁去伸手想捉住佢——
2023-01-27 16:31:33
第一話 怎麼竟然撞回熟人

被困喺地下街嘅就只有我同我女朋友Yoyo。

我哋以外嘅人好似寵物小精靈朱紫掉幀時咁,世界嘅fps驟然一降,世界嘅輪廓模糊起嚟,重新對焦後就無再生成出人類。

空盪盪嘅街道、照常運作嘅電子廣告牌、發出隆隆聲嘅中央冷氣、整齊排列嘅商品、橙白嘅柔和燈光、電子螢幕上傳嚟結衣BB玩switch嘅聲音、仲有我同Yoyo嘅呼吸聲。

手掌同腳掌有如缺提般流出洪水量嘅汗。

出口⋯⋯會有嗎?

如果焦出口,咁即係我哋被困係到,並將會成為夏娃同夏娃?

如果出唔到去點算?

出唔到去先好。

一世只得我哋兩個就好。

可以嘅話,我想一世都唔出去。

正常人如果被神隱,應該會諗盡方法返去原來嘅世界。

但係,我唔係嗰啲人。

我要諗方法留喺呢個只有我哋兩個嘅世界——

———————
2023-01-27 16:33:35
身體好似受到某種衝擊,力量大到好似要將我靈魂推出去令同我嘅肉體分離。

然後,一抹暖光出現將我包裹住。

影像湧入腦海。

有啲係我嘅記憶,有啲係我無經歷過嘅事。

「隔離屋陳師奶個仔同你讀同一間大學又同一年畢業,人哋做到銀行經理啦!你睇下你幾廢、行得幾慢呀!」

「我?我俾開三分二人工做家用呀。屋企人嚟㗎嘛,對佢哋好啲都正常。咩位,你俾咁少?搞錯呀。我理得你辛唔辛苦!我養咗你咁多年唔辛苦㗎,拎你少少錢都嘈三嘈四。」

「讀咁多書,大學都畢埋業,竟然匿埋係屋企乜都唔做,搞錯!話想抖下喎,懶就懶啦咁多藉口!」


以上三句都係其他人話我嘅事。

而我嘅回答:「收皮啦!我唔撚洗錢生活呀?畀撚晒你咁我食屎啦!」

以上只係幻想嘅回答。

真正嘅回答係:「我會畀多啲你,對唔住媽媽。我唔係不孝女。」

我不能夠不孝,因為我係佢個女。

因為我係佢親生女,所以我只能夠啞忍對老母嘅不滿,因為佢係我老母。

「兩個女人拍乜拖?你傻撚咗?」

我無呢段記憶,但我認得講呢句說話嘅人,佢係我女朋友老母。

「仲係得18k,點生存呀?」

「點解唔轉工呀?」

「進修下啦,讀下書可能搵到新嘅好工呢!」

「唔通你真係躺平咩?」


我嘅朋友,每次聚餐都重覆住呢啲話題。

「屌你老母!我夠想轉工搵高啲人工呀嘛!我唔係無努力過呀!無人睇得起我咋!」

無好似上面咁反抗,我只係頭耷耷咁答:「好。」

我都知你哋個個搵緊廿幾三十K,我都想追上你哋,我試過,我好努力試過,但係唔得就係唔得。

升唔到職亦都搵唔得多。

唔係我想躺平,我亦都無資格躺平,我要交家用。

向上無望,後退不能。

只能夠望住他人走遠,同時在原地怪責自己廢,返到屋企又只能被人壓榨。

內心早走想離開呢一切,我只想遠離呢啲壓力。

被困係中間,寸步難行、舉步維艱。

咁樣我哋就一齊走啦。

一把聲音喺光芒中迴盪,然後我又被光芒包裹,最後失去意識——

———————
2023-01-27 16:34:48
頭好痛。

陽光直射,我嘅雙眼只能夠勉強睜開。

我舉高手阻擋陽光,眼前嘅光化成一塊又一塊嘅六角形,然後慢慢褪去。

眼睛重新聚焦,身邊嘅事物開始映入眼簾。

「新宿⋯⋯?」我望住面前嘅街道講。

點解我會係呢到?

記憶好混亂。

我好似無咗一段記憶咁,對於自己點解會喺新宿,我毫無頭緒。

「Ivy你無事呀嗎?」一把熟悉且溫柔嘅女聲問,同時聲音嘅主人輕輕咁撫摸我背脊。

我嘅注意力從街道轉移到聲音嘅主人身上,或者我可以由佢身上問到啲情報。

因為直視陽光嘅後遺症未散,我眼中嘅事物仲未完全對焦到,聲音嘅主人喺我眼中只有輪廓。

雖然只有輪廓,但係呢個人,我有印象。

「Yoyo⋯⋯?」我腦海浮現呢個名字。

「咩事呀你,女朋友都唔認得?」Yoyo甜笑住回答。

「⋯⋯呀sorry。So sorry!」

原來係我女朋友,雙眼終於對焦到,安心感𣊬間湧上心頭。

記憶同時返到嚟,去到琴日嘅事情我都記得一清二楚,只係今日嘅所有記憶消失得一乾二淨,無論我點樣用力都回想唔到丁點。

而且,每當我想回憶今朝嘅事,腦袋馬上就會痛起嚟,強行中止我嘅回想,令我無論如何都諗唔起我嚟到新宿嘅原因。

「點解我會係到⋯⋯?點解我哋會係到?對唔住呀,我係咪好多問題?」唔能夠正常回憶嘅我向Yoyo提問。

「你搞咩呀?唔舒服咩?」Yoyo伸手摸我額頭,然後再講:「無發燒喎。咁你仲記唔記得點解我哋係日本?」Yoyo叉腰再鼓埋泡腮稍有唔滿意咁質問。

「日本⋯⋯呢到係日本。我哋嚟working holiday 㗎嘛。」我答。

我記得我哋喺日本原因,但係點解呢一刻會喺新宿,我唔知道。

就係諗唔起,記憶有斷層。

頭好似被勒緊似的。

Yoyo再問:「你記得點解我哋係日本,但係唔記得點解我哋今日喺新宿?」

「我記得點解我哋係日本,但係唔記得點解我哋今日喺新宿。」我覆述。

「咁呀⋯⋯」Yoyo露出滿意嘅笑容,彷彿對我呢個答覆感到高興,佢直白咁再講:「今日我生日。」

大撚鑊!

我唔記得女朋友生日,點部署!?
2023-01-27 16:35:36
2023-01-27 17:59:07
死得,今次又得罪女朋友,諗到呢到就想喊啦。

等等⋯⋯笑?

另一半唔記得自己生日都笑得咁開心?

放心同滿足嘅微笑。

正常女朋友應該怒不可遏,或者多少都會唔滿意,點都無可能係覺得開心。

同Yoyo講我個腦壞壞地,記憶非常之混亂,咁樣講嘅話佢會唔會信我?

唔可以再諗落去,我要盡快俾人個答覆Yoyo,再唔行動佢就真係會嬲到仆街。

「對唔住呀⋯⋯」我低頭致歉,而Yoyo就一臉無我咁好氣咁款挨落我到,再攬實我。

怕怕,好在道歉後無再被Yoyo追問。我唔係怕煩,而係怕自己令Yoyo唔開心。

返到記憶嘅問題,整理一下現有資訊,因為Yoyo生日,所以我哋嚟咗新宿。

硬係覺得有啲唔協調嘅地方,但係講唔出。

「錫我。」Yoyo嘟起嘴唇請求。

「唔係咁好嘅⋯⋯好多人呀,Sorry呀!」我左顧右盼,見到咁多人喺街上,我生怕我一錫落去就會吸引大量途人嘅目光。

「傻。」

Yoyo主動抱住我後腦勺將我拉近佢,然後開始強吻我。

果然,有啲路人用奇異嘅目光望住我哋。

路人們應該覺得兩個女仔kiss好奇怪,始終世人對同性戀嘅歧視仍然存在。

他人嘅目光令我好想作嘔,我做唔到無視他人。

路人嘅目光有如繩般飛到我嘅腰間再綁上一個圈,試圖將我從Yoyo身上拉開,將我變返做一個異性戀「正常人」。

我求下你哋,可唔可以唔好望住我哋?

我好怕他人嘅目光。

我只係同我鍾意嘅人接吻,可唔可以唔好judge我?

又或者,呢啲目光只係自我意識過剩,根本冇人在意我哋。

我試圖遠離Yoyo嘅嘴唇,令他人嘅目光唔好再聚焦係兩個熱吻嘅女仔身上。

Yoyo無令我如願以償,佢捉實我衫袖將我搵返去佢身前。

我哋繼續淋浴係他人目光下熱吻。

脷疊脷,交纏。
2023-01-27 18:00:43
「きもい!」一個中年大叔對住我哋大叫。

果然,好想作嘔,真係有人望住我哋。

視線刺痛得我好緊要。

唔好將我從Yoyo身邊拉走!

「Ivy⋯⋯」突然有把男聲以柔弱嘅音量呼喚我個名。

係我個名,有人叫我!

我瞪大雙眼,生怕係認識嘅人想責罵我,我隨即氣喘喘咁遠離Yoyo。

我環顧四周,卻搵唔到試圖同我講嘢嘅人,甚至乎接近我哋嘅人都搵唔到,每個人都企到遠一遠。

呢到係日本,已經唔係香港,又有邊個會追到嚟呢到指責我?

我望返向Yoyo:「Sorry,我好似聽到有人嗌我。」

「係咩?」Yoyo反問,然後將食指放到嘴唇。

正當我猶豫好唔好再係街上錫Yoyo時,頭先嘅男聲用更響亮嘅聲音嗌我:「Ivy!」

「!」我猛然抬頭,再度朝四處看,終於係不遠處發現一個望向我嘅男人。

熟悉嘅身影,親切得可怕嘅身影,我不由自主地流起冷汗。

啪!

我望到嗰個男人嘅一剎那,我嘅內心好似有條粗壯嘅樹枝斷裂,啪咗一聲分成兩段。

我嘅心慌亂起嚟,雙腿抑制不住咁褪後幾步。

嗰個男人無可能會喺到,100%無可能!

所以只不過係人有相似?

唔係,我內心嘅直覺好肯定咁話我知,係佢,唔會係其他「人」。
2023-01-27 18:01:13
我捽捽眼再望清楚,個男人仲係到。

唔係幻覺。

真係佢。

但係⋯⋯無可能。

佢無可能會再出現喺我哋面前。

佢已經唔係世上。

我哋依舊距離幾個身位,嗰個男人同我哋都無向前邁進。

我曾經嘅知心好友、一年前已經自殺身亡嘅阿星活生生嘅企喺我面前!

第一話 完
2023-01-28 00:43:04
Push
2023-01-28 04:26:28
2023-01-28 16:27:35
第二話 幻惑

「星⋯⋯」我吞嚥一下口水先能夠吐出眼前呢個人嘅名字,我想確認眼前嘅人到底係咪我所想嘅人。

Yoyo用力地拖實我,用行動話我知唔使驚,佢會喺我身邊。

我望向Yoyo,呢個時候我先察覺Yoyo端正嘅五官扭成一團,雙眼緊閉著。

「Yoyo你都見到佢?」我問。

我唔肯定Yoyo有冇回應我,我被眼前嘅景象吸引到,已經無閒暇理會身邊嘅Yoyo。

阿星真係活生生咁企咗喺我哋面前。

明明,阿星已經自殺死咗。

係我面前嘅真係阿星。

「Ivy⋯⋯街角⋯⋯擁吻⋯⋯?不過唔重要⋯⋯時間⋯⋯多⋯⋯走⋯⋯唔係嘅話⋯⋯!⋯⋯我⋯⋯一定⋯⋯救⋯⋯肉體⋯⋯西裝⋯⋯走⋯⋯」阿星嘅說話斷斷續續,只有幾個詞彙傳達到俾我。

阿星說話中間嘅斷續唔係因為佢口窒,而係好似收音機接收不良,因為訊號受到干擾依無法傳遞到我耳中。

詞語同詞語之間嘅聲音聽起嚟同電視嘅雪花聲一模一樣,雪花聲徹底遮蓋阿星講嘅關鍵字。

有某種嘢干涉緊阿星嘅說話,令佢嘅想法唔能夠完整咁傳遞俾我。

「星!我唔明!你想講咩!同埋你唔係已經⋯⋯」我激動地搖頭。

見到阿星,我根本無可能冷靜。

因為阿星係我嘅青梅竹馬,某日佢無預兆地突然自殺,連遺書都無留落嚟。

阿星自殺嘅朝早,我哋仲一齊去做gym,當時佢都正正常常。

關於我嘅心境,請容許我之後再講。

逝者出現喺我哋嘅眼前必有其意義。

但係,面對活生生嘅死人,恐懼早已盤踞於我內心。
2023-01-29 11:38:55
矛盾地,因為對方係認識多年嘅人,我又冇辦法轉身逃跑。

又要驚又想知。

或者,我內心深處期待着眼前呢個阿星同我講佢根本冇死到,我之前瞻仰遺容見到嘅屍體只不過係偽造嘅。

或者,我只係單純因為可以重遇摯友而高興。

我想知點解你要扔低我?

走定係唔走?

兩種敵對嘅諗法正在拉扯。

「係,我死咗。」阿星呢次嘅回答可以清晰地傳遞到我耳內。

我「咕嚕」地吞啖口水,藉此去安撫我混亂不堪嘅內心。

果然,阿星真係死咗。

眼前嘅係死人嘅鬼魂。

阿星煞有介事地再講:「⋯⋯係⋯⋯小心⋯⋯地⋯⋯街」

阿星嘅說話又斷斷續續起嚟。

「你講咩呀?我聽唔到呀!」

腦海正在掙扎時,我身體已經率先動起嚟,我伸直手同時一步一步咁走近我呢位朋友身邊。

忽然,風雲色變,天空被烏雲遮蓋,五十多人穿過馬路蜂擁而至,佢哋充滿默契地穿過我同阿星中間,就好似特登隔開我哋兩個。

「星!」我馬上大叫,但人群不斷將我推後。

「Ivy!」見到我被人群推開,Yoyo試圖拉我。

但係當下嘅我冇時間理會Yoyo,我全神貫住地奔去阿星身邊。

無論我點伸盡手臂,我嘅指尖都係掂唔到阿星。

被人海擠擁嘅我根本無能為力,只能夠不斷被推到後方。

阿星漸漸被埋無喺人海當中,消失喺我視野中。

當人海散去時,阿星已經徹底消失。

陰陽嘅聯繫就此莫名其妙地落幕。

我只係得一個問題,點解你唔留遺書,仲要毫無先兆地突然自殺?仲要你死嗰日朝早,你扮作一切如常咁同我出去做gym?

點解,點解唔可以畀我開口問?

世界彷似圍住我轉咗一圈,然後嚟自360度嘅重力聚集到我頭上,再化身鐵球垂直咁重壓落嚟我身上。

阿星,點解你要自殺?

又點解你要係呢個時間點出現係我面前?

全身忽然劇痛起嚟,身體浮現咗啲淤傷然後又馬上散去。

我只能呆呆地望住人群流動,而阿星早就淹無喺人群當中。
2023-01-29 22:11:45
2023-01-29 22:35:28
一睇到tooic就諗起

https://youtu.be/JNocLV9gXuw
2023-01-29 23:23:34
即係女主角而家已經身處地下街?
2023-01-29 23:35:40
第三話 所有相遇必有意義

「呼。你無事呀嘛,無啦啦俾咁多人推開。」Yoyo比我早一步鬆一口氣。

「點解⋯⋯點解要阻住我⋯⋯」我問Yoyo。

「你無嘢呀嘛?啲人咁奇怪都有嘅,無啦啦湧出嚟搞你。不過你無事就好啦。」Yoyo安撫我。

「我聽到阿星話小心,可能佢係嚟警告我哋。」我低聲地憶述,我拾頭問Yoyo:「到底點解我哋會喺呢到相遇?」

「阿星??咩阿星?不過你話相遇⋯⋯相遇⋯⋯所有嘅相遇必有意義。」Yoyo若有所思咁講。

「所有嘅相遇必有意義。」我覆述。

「嗯。」Yoyo點頭,然後佢提議:「我哋落地下街食個飯?」

「好呀。」語畢,我就拖住Yoyo落地下街搵嘢食。

我嘅心情依舊屈住屈住,煩惱嘅事數之不盡。

因為阿星嘅出現,我成個人開始鬱悶起嚟。

當我諗起當初嚟日本嘅原因同埋以前嘅生活,頭殼內嘅腦袋就發漲起嚟,不斷頂住頭骨令我成個頭都赤赤痛。

最後,今朝嘅記憶仍然殘缺不齊。

先係記憶嘅殘缺,然之後係撞鬼。

到底發生了甚麼事?
2023-01-30 16:44:04
當我哋走入地下街嘅一刻,地面嘅聲音一下子就清零,就好似地面嘅人同事物恍似同時消失晒。

但係因為阿星嘅出現,我無太過在意聲音清零呢樣嘢。

到底點解阿星會突然之間出現?阿星想警告我嘅到底係咩事?點解會係呢個時間點?點解係香港死嘅佢會出現喺日本?

諗唔明嘅嘢太多。漸漸地,疑惑已超過恐懼,我無再因為撞鬼而驚恐。

新宿街頭十餘萬人,怎麼竟然會撞回熟人。

熟人⋯⋯是人嗎?

我同Yoyo求其食咗間便當,食完飯之後,心情都放鬆咗好多。

我哋沿樓梯拾級而上想走返去地面,走到半路卻發現去路被發出藍色光芒嘅透明牆壁阻擋。

我試過用手掂光牆,但係光牆上卻有股力量驀然彈開我隻手。

「!」我震驚都出唔到聲,我從未預過呢種物理現像。

「你無事呀嘛?」Yoyo上前檢查我隻手,出奇嘅係我隻手無任何傷痕。

「咁奇怪⋯⋯無啦啦有牆係到⋯⋯」講完之後,我猝然察覺都有啲唔妥,我快速地擰向後面,確定咗我嘅猜想。

成條地下街,除咗我同Yoyo之外,一個人都無。

「一個人都無⋯⋯」我目定口呆地凝視住眼前嘅光景講。

成條地下街嘅鋪頭原封不動,所有商店同物品都一如既往地井井有條。

電力供應正常,燈光同埋所有電子產品都運作正常,廣告牌仍然播放住新恒結衣嘅switch廣告。

我同Yoyo心知不妙,我哋隨即回頭跑返落返地下街,試圖搵另一個出口,但係另一條樓梯都有光牆。

當我哋試過行幾條樓梯都走唔到,試圖去搭𨋢走人,但係光牆同樣擋住咗喺𨋢口。

好快,我哋發現,地下街形成咗一個「循環」。

當時我拉住Yoyo向前跑,突然Yoyo喝停我,我馬上擰轉頭,卻發現Yoyo只淨低一隻手,拉住我嘅手。
2023-01-30 16:59:23
「Yoyo!」我嚇到叫出聲,生怕Yoyo被截肢甚至死亡,因為我眼前嘅Yoyo淨低一隻手!

「我係呢到呀!」Yoyo嘅聲音喺前面。

我擰頭望向前面,發現Yoyo人喺正我前面約兩百米遠嘅前方,但佢隻手係正我後面。

Yoyo隻手無可能有兩百米長掛!?

我試圖將Yoyo隻手拉近自己去睇清楚,我一拉,我將Yoyo成個人完好無缺咁拉咗話嚟。

嗰一刻,我就知道我哋陷入咗循環,loop。

由某個起步點計起,只要我哋向前走約兩百米之後,我哋就會返到去起步點。逆行嘅話係唔會只會係另一個方向嘅循環。

尋找出路無望,我哋試圖搵下有冇其他聯繫外界嘅手段。

我哋掏出電話檢查,發現電話收唔到訊號,左上角寫住圈外。

完。

無出口,無聯絡手段,無我哋以外嘅人。

世界清靜得很,成個封閉嘅地下街得返我哋兩個。

我同Yoyo無言地對視。

遇到朋友嘅鬼魂,被困地下街,失去同外界嘅聯絡手段,世界所有人消失。

我哋兩個喺地下街,只有我哋兩個。

地底街裡失蹤。

第三話 完
2023-01-31 00:42:41
咁佢哋個世界咪得二百米?
2023-01-31 08:25:47
Yes
2023-01-31 17:15:48
第四話 草餅當飯

天旋地轉,我眼中嘅世界彷似以我為中心轉咗一圈,跟住再次聚焦到我身上。

心跳嘅「卟卟」聲響亮到就快會喺地下街製造出回音。

到底發生了甚麼事?

點解突然之間會被困地下街?

點解會係我哋兩個?

點解就淨係得我哋兩個?

點解有光牆?光牆又係咩嚟?

唔通係電視台嘅整蠱節目?無可能,電視台唔會有呢個能力斷絕電話電波,更加無可能玩鳩兩個日文唔太好嘅外國人。

所以,我哋兩個真係被隔絕喺世界之外。

只不過,地下街同平時睇嘅一模一樣,只係無咗啲人。

燈光正常、冷氣正常、電視廣告都播放正常。

點解?點解?點解?點解?點解?點解?點解?點解?點解?點解?點解?點解?點解?點解?點解?點解?點解?點解?點解?點解?點解?點解?點解?點解?

諗唔明同埋唔合理嘅事實在太多。

唔通我係被選中嘅人?

係嘅話我又憑乜嘢被選中?

唔通呢個係神隱?

恐懼,但係更多嘅係混亂,突如其來嘅一切令人無所適從。

Yoyo倏忽用力地拖住我,將我從思緒中搵返去現實,佢講:「唔會有事嘅。」

喺呢個詭異嘅情況下,我女朋友選擇先安撫我,明明佢自己都好驚。

真係一個貼心嘅女朋友。

Yoyo嘅舉動令我稍微放鬆落嚟,我馬上用力地深呼吸一口令自己冷靜落嚟。

思緒無咁混亂之後,我既緊張又膽怯地問:「我哋⋯⋯會唔會有事㗎?」

Yoyo忽然背對我向前行幾步,然後擰轉身面向我:「你想要嘅嘢,終於到手。」

Yoyo臉上睇唔出一絲恐懼,而且臉上掛住笑容,為我感到高興而流露出嚟嘅笑容。

Yoyo為咗安撫我,佢用雙手包裏我嘅右手。

我問:「我想要嘅嘢?」

Yoyo肯定地道:「你想要嘅嘢。」

我不確地地追問:「呢個得返你同我嘅世界?」

Yoyo再答:「得返我同你嘅世界。」

我捧讀地答:「呢個就係我想要嘅嘢。」

Yoyo眼球碌一圈後講:「其中。」

Yoyo嘅態度彷似一切都意料之內,而且我感覺上佢完全唔驚被困喺地下街入面。

好奇怪。

但係我安心,Yoyo令我安心。
2023-01-31 23:17:12
「點解你好似唔驚咁?」我又問。

「點解要驚?」Yoyo反問。

「如果好似啲動漫作品,我哋可能會遇到怪物、或者被人追殺、又或者⋯⋯」我細數各種可能嘅可怕結局。

死亡、逃亡、被追殺、與上怪物,喺各種影視作品入面,我哋必然係陷入咗某種奇異嘅事情,更會被怪異嘅事物纏繞,總之就係我哋嘅生命危在旦夕,除時會被人或者怪物追殺。

「傻仔。」睇到我嘅恐懼,Yoyo將一舊嘢塞落我手中。

「呢個係⋯⋯草餅?」我望向手心,Yoyo畀我嘅係一個嘅甜品,其後我又再發現Yoyo手上都有一個草餅。

「頭先我哋行圈嘅時候我順手拎咗舊。」Yoyo用雙手包裹住我一隻手,再講:「唔會有事,呢到就只有我哋兩個。」

「偷嘢⋯⋯唔係!你點知道呢到得我哋兩個?」我急忙地問。

「頭先我哋咪行咗幾個圈,唔好話怪物同人,連蟲都唔見到隻。」Yoyo指出。

「呀!」Yoyo一言驚醒夢中人,呢個循環嘅地下街內,根本就無我哋以外嘅生物。

頭先因為太慌張,我只顧搵出口,根本就無好好咁留意四周圍。

我呢個女朋友真係天不怕地不怕,遇上呢個超自然現象都可以咁處之泰然,同時又保持到佢嘅細心。

「你擔心嘅話,我哋食完呢個草餅再行一個圈?」Yoyo為咗令我安心落嚟就提議。

「一係行完再食?」心有戚戚然嘅我反建議。

「好呀。」Yoyo點頭,然後佢又開口延續先前嘅話題:「雖然我唔驚,但係我都想返去。」

「返去原本有人嘅地方?」

「係。因為,我哋無可能一世都唔面對其他人。」Yoyo語畢就開始食嘢,一臉唔打算再回應我。

Yoyo始終都係想返到原來嘅世界,嗰一個正常人嘅世界。

反之,被嗰個世界傷害到體無完膚嘅我,則想留係到。

我想留係到⋯⋯但係我女朋友唔想留係到。

期望不同。

我都知道自己好唔正常,邊到會有正常人想留一個未知、神秘、無人嘅地方?

但係我唔介意,我唔想思考,只要無外人就夠。

我望住Yoyo,萌生出一個卑鄙且自私嘅諗——迫Yoyo陪我留喺到。

只要Yoyo唔知道有出口、只要現實係無辦法走到嘅話,只要係呢一種迫於無奈嘅情況,咁樣Yoyo就只能夠同我一齊留係到——

第四話 完
2023-02-03 22:42:26
第五話 環迴迷路

我將嗰個卑鄙而且自私嘅想法收藏係內心嘅深處,唔能夠被Yoyo發現呢個諗法。

發現出口嘅話我一定要隱瞞。

搵出口嘅時候我要揸流攤。

為嘅就係令女朋友迫不得已地留係呢到陪我。

明明呢個女朋友總係為我著想、總係接受我嘅任性、總係陪住我面對一切,但係我就係唔想失去佢同埋呢一個環境——呢一個只有我哋兩個嘅世界。

對唔住。

我喺內心道歉,儘管無用。

回到現實,Yoyo同我袋好個草餅之後,我哋就慢慢咁探索「屬於我哋」嘅二百米循環地下街。

我哋先入咗一間雜誌店嘅,基本一眼睇晒,我哋仲走埋入員工專用嘅休息室,結果人影都唔見多隻。

出返去之前,我拎起放喺收銀處附近嘅報紙,檢查出版日期。

「真係Yoyo生日。」我默念。

日子上無奇怪。

睇嚟唔係啲時空穿梭嘅事件。

「睇咩報紙呀?你想拎佢嚟做被鋪?」Yoyo打趣道。

「凍啲嘅時候可能真係要㗎。」我笑答。

離開雜誌店,我哋又搜索咗便利店、餐廳、玩具店、時裝店等,全部商品都整整齊齊一塵不染,而且雪櫃依舊「轟隆轟隆」咁細細聲運作,新鮮嘅食物,例如肉類同蔬菜可以保存一段時間,罐頭嗰啲就更加唔使講。

我哋又搵到幾箱蠟燭同打火機,就算斷咗電我哋都有辦法搵光出嚟,始終地下街冇太陽。

之後,我哋又去咗廁所視察,水龍頭水正常、沖廁都正常、廁紙同鹼液充足,為咗慎重起見,我哋打開咗清潔工嘅儲物室,拎晒佢哋啲水桶出嚟裝水。

最刺激嘅就係檢查廁格嘅時候,我哋就好似李小龍上身咁唔敢用手打開道門,每一次都大大力踢道門,咁樣做話就算入邊有人都會俾我哋嚇死,唔嚇死都會受吓傷。可惜嘅係空無一人。

總而言之,生存物資尚算充足,冷氣正常運作嘅情況下空氣都非常足夠,清潔嘅資源勉強都叫夠。
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞