20 Like
4 Dislike
綠嶺
2023-02-13 17:20:30
謝！
綠嶺
2023-02-14 22:56:31
第十一話 終點一世也未到
「呀⋯⋯」我花費唔少力氣先能夠落床，腦袋同埋胃袋都空空如也。
我依稀記得，我暈低之前見到幾個人。
曾經我以為地下街淨係會得我同Yoyo快樂咁生活，但係呢個夢想嘅終點因為「正常人」嘅出現而宣告結束。
「你醒啦？」坐喺床邊嘅Yoyo溫柔地問我，然後遞咗一個草餅畀我，我馬上就打開嚟食。我馬上就打開嚟食。
「我瞓咗幾耐？」我問。
「四日左右。」
「咁耐⋯⋯」我非常震驚，我無諗過自己會昏迷咗咁多日。
「呢段時間發生咗好多事。」
「好多事？」
我由Yoyo口中得知，我老母、前上司、幾個中學同學同埋阿星係呢幾日試圖搵離開呢到啲方法，想盡快上返地面。
當Yoyo問佢哋點解會係呢到出現時，佢哋都不約而同地答唔知道，只係眨一眨眼之後就嚟咗呢到，係佢哋臉懵懵嘅時候，我同Yoyo就出現喺和風餐廳到。
一切毫無先兆而且撲朔迷離，佢哋就好似突然畀人傳送過嚟咁。
最奇怪嘅係阿星，明明佢死咗。
咁到底依家呢個阿星係鬼魂定係人類？又或者呢個阿星係過去時間點嘅阿星？
另外，呢三個人有明顯嘅共通點，令我不適嘅共同點——佢哋都係促使我逃離香港嘅原因。
唔通佢哋嘅出現係因為我？
如果真係因為我，佢哋知道之後一定會怪罪係我頭上，到時候我一定難逃責任。
「嗚⋯⋯」諗到呢到我就胃痛起嚟，我用手掩住口生怕我會嘔出嚟。
綠嶺
2023-02-16 00:16:10
結果，外面嘅人唔會放過我，佢哋無論如何都會閘入我嘅生活去破壞我嘅生活、擾亂我嘅人生。
明明我乜都唔知，但係如果佢哋都認為我就係佢哋被困呢到嘅原因，佢哋一定係怪罪於我，明明我就乜都唔知、我都係被困係到嘅人，雖然我好鍾意留係呢到，得我同Yoyo嘅時候。
佢哋必然會對我無理取鬧，佢哋唔會考慮我嘅處境，只會透過傷害我得到佢哋想要嘅答案或者佢想要嘅嘢。
「唔會有事嘅。」Yoyo突然攬實我。
人嘅體溫好神奇，當被自己心愛嘅人攬住嘅時候，心情都好自然放鬆同埋安心起嚟。
「我冇事啦，多謝你。」我稍微同Yoyo分開，再拍拍佢個頭多謝佢。
「咁我繼續講呢幾日發生咗咩事啦喎，好唔好？」Yoyo應該估到我係因為佢哋嘅出現苦惱，擔心我身體狀況嘅Yoyo確定我想聽落去先再講。
「喺呢樣嘢之前，我想問一樣嘢。」
「隨便問。」
「阿星⋯⋯嗰個係咪真係阿星？」我問。
阿星係一個已經逝去嘅人，但係佢而家就活生生喺我哋面前。
到底佢係鬼魂定係人類？
如果佢係鬼魂話，咁樣係咪代表我同Yoyo都已經死咗，呢度就係地獄？
如果佢係人類嘅話係咪即係佢死而復生？
「係。」
「你覺得佢人定係鬼？」
「兩種都只不過係一種形態。」
「形態？」
「將阿星呢個概念形象化嘅形態，不論佢係人係鬼，佢都係阿星。」
「佢同我以前認識嘅阿星一樣？」
「呢樣要留返你自己做判斷。係我眼中係同一個個體。」
「同一個個體。」
「你唔擔心咩？如果佢係鬼魂嘅話，咁我哋可能都係鬼魂，所以先同佢相遇。」我反問。
同樣問題適用於我前老細同埋老母身上，但係佢兩個死唔死其實我冇乜所謂，甚至乎佢哋死咗嘅話我會有啲開心。
「呢個問題嘅答案同樣係唔重要。無論我哋係人係鬼，我哋都有對方喺度。更何況，肉體嘅感受好確實咁存在。」Yoyo指住我乳房講。
我即刻諗起我哋之前喺Cosplay店到愛撫到對方高潮。
如果冇肉體，我哋又點會有呢啲感受？
咁樣講嘅話，我哋應該唔使擔心死亡嘅問題，我哋應該仲係活生生嘅人。
綠嶺
2023-02-16 00:16:49
「嗯。」我點頭。
因為生存，所以我哋先束縛。
因為感受到束縛，所以我哋依然生存。
「我覺得你可以放心同阿星交流，我喺佢身上感受唔到敵意。」
「敵意？」
「呢個阿星無傷害我哋嘅心。就算佢係鬼，只要唔會傷害我哋嘅話，根本無需要擔心。」
「都啱。」
「可能呢個係個天俾你解開心結嘅機會。」Yoyo道。
「你真係唔驚咩？」
「唔驚。講真，佢要傷害我哋嘅話呢幾日有好多機會可以出手，你又暈咗，我又只不過係一個女仔，佢要用蠻力傷害我哋嘅話，我根本反抗唔到。」
「你唔明喎。而家係死人出現係我哋面前。點解你一定都唔驚訝？」我講出我嘅憂慮。
「我驚呀。但係我可以點？即刻殺咗佢等佢死多次？」
「都係⋯⋯」
「我哋做到嘅只能夠當佢係真嘅阿星咁對待，但同時對佢有額外嘅警剔。」Yoyo總結。
「⋯⋯就咁決定。」我反思咗陣，Yoyo嘅提議算係唯人可行嘅做法，我哋唯有小心翼翼嘅觀察一下呢個阿星。
第十一話 完
N展撚
2023-02-16 22:40:59
Push
綠嶺
2023-02-17 20:51:08
第十二話 難逃避責問
Yoyo之後同我講返呢幾日嘅事。
首先，佢哋喺Yoyo嘅帶領下探索咗呢個只有200米嘅地下街，結論就係冇出口，但係有充足嘅食糧俾我哋生存。嗰三個人知道呢樣嘢之後都鬆一口氣。
然後，佢哋四個討論點樣分配住所，Yoyo劈頭第一句就話佢同我要住唯一有床瞓嘅便利店，其他人都唔可以入嚟，因為妙齡少女唔會想同男人同埋廢老一齊住。加上我哋一早已經霸咗呢個地方住咗一晚，先到先得。
我老母表達過強烈不滿，佢話自己係老人家，後生仔要讓將床俾佢瞓。其次，佢仲話我係佢個女，我哋應該兩母子一齊瞓有床嘅地方，而唔係我同Yoyo「同居」。
當Yoyo話我唔會想同老母一齊住嘅時候，佢就話從來都冇首肯過我哋嘅戀情，唔容許外人對我嘅事說三道四、指指點點，又話同性戀影衰晒佢，叫Yoyo唔好害人。老母仲話Yoyo扮晒了解我咁為我發言，只不過係自以為是，搬石頭砸自己嘅腳，仲威脅話唔讓張床俾佢嘅話就後果自負，佢會用盡一切反制措施破壞我同Yoyo嘅戀情。例如斷絕同我母子關係，令Yoyo成為拆散人哋屋企嘅罪人。
但Yoyo對我老母講嘅嘢嗤之以鼻，Yoyo無反駁太多，Yoyo將喺cosplay店搵到嘅木刀嘅刀尖指住我老母，簡單地同佢講，如果你咁崇尚自然嘅話，呢個自然世界就係弱肉強食，睇吓邊個嘅反制措施強硬啲。
我老母就係咁樣俾Yoyo拋窒，谷晒氣咁放棄拎張床，但佢最後都要攞返個尾彩，話等我醒返之後問清楚我意願。
「對唔住。」我向yoyo低頭致歉。
一來係為咗佢受嘅委屈，二來係未來會受嘅委屈。
可以嘅話我都唔想道歉， 可以嘅話我都想可以同Yoyo講我會為咗佢打柒我老母。
我喺老母面前只不過係一隻鵪鶉，面對佢幾唔合理嘅要求，我都會因為擺脫唔到情緒勒索而點頭。
所以如果我老母同我叫我讓間房俾佢，我一定唔會反抗，將間房拱手相讓。
我知道咁樣好垃圾，女朋友都為我奮鬥，點解我自己就唔可以行出一步？
但我真係做唔到。
你咁樣做好不孝、我咁辛苦養你咁多年你咁對我、我係你老母嚟，單單係呢三個簡單嘅情緒勒索，我已經只能夠跪地求饒。
我明知道呢啲唔算得係原因，可以反駁到佢老母嘅理由多不勝數，但係呢啲牽涉到感性嘅問題，呢個親子嘅羈絆令我冇辦法反抗佢。
尤其是我咁憎我老母，而Yoyo就係我心愛嘅女朋友，身為一個好嘅伴侶應該為佢挺身而出。
但我唔好。
「傻妹嚟嘅，我哋兩個使乜講對唔住。我知道你應付唔到佢，但係我希望至少你暈咗呢幾日有床瞓。之後我哋咪一齊瞓地板囉。」Yoyo笑住講。
「多謝你。」我將頭陷進Yoyo嘅雙峰，淚水隨即慢慢咁流出嚟。
多謝佢為我著想、多謝佢容忍我、痛恨我嘅軟弱。
呢個世界上唯一會接受我嘅人，包括我嘅無能同脆弱。
一般人遇到會發脾氣嘅事，Yoyo都能夠包容。
Yoyo就係我嘅世界。
世界被人入侵時，人會更珍惜背後支持自己嘅人。
以上就係由Yoyo口中得知，我昏迷時發生嘅事。
綠嶺
2023-02-17 20:51:30
擊倒我老母之後，我今次到我老細走出嚟嘈生晒。
我老細就話，雖然現在表面上冇危險，但係大家都唔應該掉以輕心，不如都係一齊住喺同一間舖頭，互相有個照應。即使有突發事件發生嘅時候，大家都可以保護對方。
Yoyo馬上回絕老細嘅提議，佢指出我哋兩個識保護自己，同你哋一齊瞓仲危險。
或者作為老細嘅佢好少被人Ban橋，我老細開始惱羞成怒，指責Yoyo入世未深、感情用事、唔識為大局着想、個人主義、唔識為團隊付出等等。
Yoyo對佢嘅指罵不屑一顧，仲更加強硬起嚟。Yoyo女將木刀嘅刀尖插向地下，左右手掌心放喺木刀嘅刀柄上，威風臨臨咁警告我老細唔好入便利店，否則佢唔會客氣。
我女朋友平時對住我就小鳥依人、千依百順，我講乜嘢都會支持我，相反，Yoyo對住外人、想干預我哋嘅人就盛氣凌人，威風到王子一般，為咗保護公主會不顧一切嘅王子，所有公主都會為之傾心。
呢種對比算係反差萌？
我忍唔住錫佢額頭，Yoyo會心微笑後繼續講。
阿星當時就主動走出嚟做和事佬，建議一人讓一步，阿星同我老細會住喺便利店隔離嘅日本餐廳。
至於我老母，Yoyo佢畀咗兩個選擇我老母，一係去服裝店同兩個男人住、一係自己搵間舖單獨咁住。
Yoyo盡量將我同我老母隔開。
我老母只能夠唔心甘情願地同兩個臭男人一齊往。
「我老母真係會咁聽話咩⋯⋯？」我質疑。
廢老之為廢老就係因為佢哋無用但卻固執、唔聽人建議而且自把自為，視走精面嘅得益為自己聰明嘅象徵。
「唉。」Yoyo嘆口氣後再講：「果然你好熟你老母脾性。」
「⋯⋯」我無言地盯往將手指指向門外嘅Yoyo。
「你老母就坐咗喺出面。佢話佢無係到瞓，只係平日過嚟休息下，唔算瞓，所以無違反約定。」Yoyo無奈地道。
「你竟然無趕走佢？」我驚訝地問。
「我試過啦。但係我要出手嘅時候佢就一哭二鬧，又話自己無瞓所以無犯規則，又大叫『打我啦打我啦！你哋即管蝦我呢個老人家啦！』，我驚佢再大叫落去會嘈醒你，所以我暫時忍耐咗落嚟，由得佢坐喺出面。」Yoyo道出佢忍手嘅原因。
「多謝你，同埋對唔住。」
「又講！」Yoyo鼓埋泡腮盯往我，再講：「我係你女朋友，為你著想係理所當然！」
「係嘅係嘅。」我輕輕拍Yoyo頭頂讚賞佢。
「哼！」Yoyo扮嬲擰歪面，而我就會繼續拍佢頭頂直到佢笑返，呢樣算係我哋兩個嘅默契。
「總而言之，我又要面對。」我失落地嘆息。
又要面對世間嘅期望，然後我又要面對佢哋失望，最後所有嘅不滿再會堆積到我身上。
第十二話 完
綠嶺
2023-02-18 12:34:26
Push
綠嶺
2023-02-18 21:04:35
第十三話 真假虛實
我醒返之後就跟住Yoyo去和風餐廳到搵其他人，同埋食我老母準備嘅午餐。
Yoyo話要去個廁所叫我哋食先，肚餓到爆嘅我唯有食住等。
「到底有冇出口㗎？」坐我後面檯嘅阿星突然擰過嚟問我。
「點知？」我裝再冷靜咁回應。
諗兩諗，有啲嘢我想搞清楚，於是我開口：「所以你係鬼魂？定係你根本唔係阿星。」
「我？我係阿星，生於1999年2月17日，拍過3次拖，單親家庭長大，住將軍澳富康，同你一樣。我仲畀咗五萬蚊你，喺我死之前。」我阿星一口氣講出自己背景，同埋只有我哋兩個同Yoyo先知道嘅五萬蚊。
阿星指住自己，眼球轉上一圈後再講：「至於鬼魂⋯⋯我知我死咗，我可能係鬼？但我又感覺到自己有心跳。」
我伸手試圖為阿星把脈，佢卻反常地縮開。
「呀？縮乜，幫你把脈。」我將佢當成真正嘅阿星咁同佢講嘢。
佢縮開，唔通佢真係鬼魂而且想呃我話自己有心跳？
以我對阿星嘅認識，佢唔會介意我哋有身體接觸。
我同阿星打鬧式嘅身體接觸，由外人嘅角度睇應該好似情侶，所以為免令Yoyo誤會，我哋三個人相處嘅時候我都好收斂。
所以，呢個阿星真係鬼嚟？否則點解佢要避？
「哦⋯⋯Sorry，嚇親。」阿星好合作咁伸返隻手出嚟。
咁奇怪都有？我抱住懷疑伸手為阿星把脈。
「卟咚。」阿星嘅脈動傳到我指尖。
活人。
有心跳。
但阿星話佢知道自己死咗。
「死者蘇生？」我吐出四字。
「可能？我都唔知咩事。」阿星不以為然地答。
「你返生喎！點解可以咁隨便！」
「可能你死咗呢？有心跳又唔代表啲乜。邊個話鬼無心跳？」
「呀⋯⋯係。fine。」阿星一言驚醒夢中人，邊個話鬼魂無心跳同無肉身？
加上，真係有可能我哋佢死咗，如果唔係邊有可能有呢個咁奇怪嘅空間？
綠嶺
2023-02-20 09:16:59
「咁到底咩事？你係咩存在？」我追問。
「我唔知喎⋯⋯我淨係知道我都會肚餓。」阿星𢳂起一啖飯再吐出嚟，再向我老母大叫：「乜嘢嚟㗎！屌，清蒸三文魚生？伯母，你做乜煮狗糧呀！煮房嗰啲三文魚魚生嚟㗎，唔洗煮熟㗎！」
我老母馬上反駁：「魚生生勾勾咁邊有益㗎！同埋我聽講魚生好多蟲㗎！蒸熟佢為你哋好咋！」
「唉算。伯母，今晚我煮飯啦！你休息下，辛苦完一日我唔想再食狗糧！」阿星口出狂言。
「你煮你煮！啲後生都唔識感恩，就睇下你煮到啲乜出嚟咁巴閉！」我老母邊抱怨邊食佢整嘅狗糧。
阿星又望返向我：「言歸正傳，我係咩存在應該一時三刻都解唔開。不過，你驚我？」
「咁又唔驚嘅，暫時睇嚟你都係阿星。」知道只有阿星先知道嘅嘢，眼前呢個人好大機會真係已死去嘅阿星。
「咁咪得囉。」
「啲男人⋯⋯成日都求求其其。」我嘆氣。
不過我對眼前呢一個阿星仲有戒心，始終我仲未接受到人死可以復生。
只能夠當住佢係真阿星，咁嘅話就係時候問啲我關注嘅嘢。
「點解⋯⋯點解你要自殺？」我問。
「呢層⋯⋯」阿星尷尬地拗住自己後腦勺講。
「連我都唔講得咩？」我傷心地問。
作為佢最好嘅朋友，最少我自認係佢最好嘅朋友，點解佢可以乜都唔同我講就突然走咗去？
點解死前要畀五萬蚊我？係同情我定擔心我？定係想我為你做啲嘢？
我再講：「我哋識咗咁多年，就連我呢個朋友都唔可以知咩事？」
「我唔係咁嘅意思⋯⋯只係我講唔到。」阿星繼續尷尬笑。
「講唔到？點解？」我隨即追問。
「我依家講唔到。對唔住。」阿星持續逃避。
「就算以我哋嘅關係，你都唔可以講出口？定係一直只有我單方面感得我哋係好朋友？」
「⋯⋯俾啲時間我⋯⋯」阿星別過臉講。
見到阿星呢個樣，我都無謂追問落去，佢點都唔會答我。
綠嶺
2023-02-20 09:17:11
Push
綠嶺
2023-02-20 09:18:52
失落。
我唔明，以我哋兩個嘅關係，點解唔可以對我開口？
我哋之間有乜嘢唔可以俾對方知道？
「喂喂，你唔好靜落嚟先！講下第二樣嘢。」阿星回復到平日輕浮嘅感覺，以輕佻嘅語氣轉移話題。
我只能無奈地問另一個問題：「幾日前嘅朝早，我哋新宿見到你。嗰陣時嘅你想同我哋講咩？」
「見過我？我唔記得喎。我最近嘅記憶就係我突然出現喺呢到，再對上就係喺嗰日同你去做gym。」阿星樣子帶心虛地講。
「你真係唔知道？嗰日我哋差啲就可以走到去對方身邊，但係被突如其來出現嘅人群迫走，令我哋被迫分開兩邊。」我憶述。
「對唔住，我真係唔知道你講咩。我完全無印象經歷過你講嘅嘢。」阿星言之鑿鑿地講。
「無可能⋯⋯咁樣我見到嘅到底係咩嘢⋯⋯幻覺⋯⋯唔係⋯⋯」阿星嘅點答令我陷入沉思，阿星唔似講緊大話，咁樣嘅話我嗰日朝早遇到嘅係唔係阿星？如果嗰個唔係阿星，咁又會係咩人？
「喂！」Yoyo突然從後拍我膊頭，將我從沉思中拉出嚟。
「Yoyo係你呀⋯⋯係啦！阿星話嗰日喺新宿無見到我哋。」
「嗰日？你講咩呀？我哋有喺新宿見過阿星咩？」Yoyo一臉純真地回答。
「！！」我猛然地企起身，身後嘅凳都被我推跌，我續道：「我哋明明見到！我仲俾人群推開，搞到我去唔到阿星嗰邊！」
「Sorry呀，我真係唔知道你講乜。你冷靜啲先好唔好？」Yoyo雙手捉住我雙手去試圖令我冷靜落嚟，但係我雙腿就情不自禁地鬆軟落嚟。
「呯！」玻璃水杯碎落喺地上嘅聲音將我從思緒中拉返到現實當中，玻璃碎片飛濺到四周，其中一塊刮傷咗Yoyo嘅腳踭，黑紅色嘅鮮血慢慢地由傷口滲出嚟。
令水杯跌落地上嘅，正正係我。
「Yoyo！你無事呀嘛！要⋯⋯要止血⋯⋯要止血！」我依然處於慌亂之中。
比我早行動嘅係阿星，我一手按住櫃檯檯面跳到收銀櫃內，然後喺翻開幾個櫃桶，喺入面搵到急救箱。
「嚟！」阿星將膠布同埋噴霧膠布扔畀我，我馬上用雙手接晒佢哋。
「Yoyo你忍一忍痛，我依家幫你消毒。」我講完後Yoyo就點頭，之後我就為佢噴上消毒膠布。
近鏡一睇，傷口都幾深，我臉色低沉起嚟，強忍眼角快跌落嚟嘅淚水同Yoyo講：「對唔住。」
「唔緊要。」Yoyo以微笑回應我。
「真係好對唔住。」面對Yoyo嘅溫柔，我忍唔住落淚起嚟。
傷到心愛嘅人，我自己都心痛起嚟。
然後，各人就散水返到自己嘅舖頭。
我同Yoyo同埋我老母就一齊返到便利店。
第十二話 完
綠嶺
2023-02-22 09:12:40
第十三話 如臍帶總飾演因果的樞紐（上）
「媽。」我走到便利店鋪面同我老母打聲招呼。
「醒啦你？無鬼用㗎真係！無啦啦暈咁多日！人哋星仔呢幾日鬼死咁叻呀你知唔知？你真係羞家死人！」我老母馬上就開我波。
「對唔住。」我低頭。
果然喺老母面前我就係鵪鶉。
即使有千萬個不願意我都唔可以駁嘴，駁咗我就會俾人屌我不孝。
「你話呀，我係咪生件叉燒好過生你？呢到得嗰一千零一張床，你個女朋友竟然話要俾你呢個後生瞓，唔可以俾我呢個老人家瞓，你話有冇搞錯呀？大佬呀，你只係暈下姐，無生命危險㗎！我就唔痛啦，老人家壞骨頭，唔瞓床瞓啲咁硬嘅地板嘅話好快就會腰酸背痛到死㗎啦！你話呀，有冇搞錯？」我老母連珠發炮，佢咁有中氣，一啲都唔似係一個遇難嘅人。
我猶豫一會，向後望了Yoyo一眼後，Yoyo輕輕地將手放到我背後示意可以，然之後我就答：「嗯。」
「你知衰就好啦！咁老母我今晚就瞓床，你呢啲後生女挨得苦，瞓下地板，好快就慣。」我老母嘅聲線講下講就高咗幾度。
「嗯。」Yoyo嘅手依然放喺我背後。
「仲有呀Ivy，你每日收到嘅食物要分一半俾我呀！個阿叔每日分得咁少嘢邊夠我食呀？你啲食物當係家用，每日都要分俾我呀！」我老母又提出另一個要求。
「食物⋯⋯分享？」我疑惑地反問。
「下！佢無同你講呀？啲gay婆真係無用。」我老母搖頭晃腦地嘆息。
「喂！」我情不自禁地喝道。
「喂咩呀！你喂你老母？你係咪喂我呀！？」我老母不滿地叫囂起嚟。
「唔係⋯⋯Sorry，對唔住媽。」我低頭致歉。
「由佢啦！講返食物，呢到啲食物有限，為咗大家都有足夠嘅生存糧食，過去幾日我哋將所有食物都收集到嗰間架仔餐廳到，再由陳生keep住條廚房鎖匙，每日食飯時間先派丁屎咁多嘢俾我哋食去吊命。」我老母豎起手指尾講「丁屎」咁多。
Yoyo補充：「你老闆話食物有限，我哋又唔知要困係到幾耐，所以我哋將所有食物收集到日本餐廳到，再由你老細管理每日嘅食物消耗量，盡量去令延長我哋嘅生存時間。當時我因為要照顧你所以無理到佢哋嘅行動，當我知道呢件事嘅時候佢哋已經收集晒啲食物。我想搶食物都唔得，佢哋出入時會落鐵閘，後面又搵嘢頂住推唔開，一定要靠鎖匙先開到餐廳嘅閘門。」
生存物資被他人掌握，咁樣絕對係壞事。
「總之Ivy你記得，每日都要分你嘅食物俾我呀！養你咁耐，你無得話唔好！無我養你嘅話，你一早死咗啦！所以你要養返我呀！」我老母強硬地道。
「⋯⋯嗯。」我只能夠答應。
我老母就係咁，從來都唔會為我著想，只會喺我身上掠奪，而我就無力去改變呢件事。
就連搶奪我生存物資呢一點，我老母都毫無掙扎同罪惡感去做，對於佢嚟講，佢養咗我咁多年，我一定要聽晒佢話去回報佢。
「仲有一樣嘢！」我老母又發炮。
「又嚟？」我疲倦地吐出呢句話。
「你要去幫手搵出口呀！呢幾日佢哋捉埋我呢個老人家去，搞到我依家腰酸背痛，你醒返就好啦！你搵埋我個份，你咁後生，瞓少啲，用多啲時間搵出口啦！咁樣我就可以抖下，養返好個身體。」我老母扮晒嘢咁用手敲自己條腰。
「搵出口⋯⋯」我默念。
理所當然嘅事。
我唔想出去，但係正常人當然想出去。
好想同佢哋講我唔想搵出口，你哋出唔出到去唔關我事。
但係咁樣嘅話，又話令人失望。
Ivy你咁樣唔得㗎喎，我哋個個人都努力搵出口，但係你竟然背道而馳唔想搵！？
Ivy，留喺呢到對你都無好處，我哋一齊、團結一心咁去搵出口啦！
你唔想走，你都要為下你老母著想，你想佢老人家係到受苦咩？
如果我講出我唔想搵出口嘅話，佢哋大概會咁樣回應我。
面對呢啲情緒勒索，我只能夠點頭。
「媽，我會搵埋你個份。」我答。
我唔想搵出口㗎，但係個個都搵嘅話，我無得唔搵。
再者，我唔搵嘅話，我老細就一定唔會分嘢食俾我。
為咗生存，我無得唔加入搜索出口嘅隊伍，去搵我唔想搵到嘅出口，並換取糧食去食存同埋養我老母。
「咁咪乖女囉！聽阿媽話就啱㗎啦！唔好好似有啲人咁，對住老人家都兇神惡殺。返到去阿媽會幫你搵返個男人去嫁人㗎啦，正正經經咁組織個家庭啦。」我老母筆直地望住Yoyo講。
「⋯⋯係。」
我果然係廢柴。
去到呢啲反檯位我都仲係唯唯諾諾。
但係Yoyo嘅手仲喺背上支撐住我。
呢個咁好嘅女朋友俾人羞辱，作為佢伴侶嘅我卻乜都無做，甚至附和羞辱佢嘅人。
無計，我要孝順老母。
我斬唔斷同老母嘅關係，佢一世都會係我老母，所以我無辦法睇住佢死。
佢養大我，我有欠於佢，我必須對佢負責任。
所以即使係地上嘅時候，喺日本嘅我都會定期過錢畀老母做家用。
綠嶺
2023-02-22 22:26:50
我斬唔斷同老母嘅關係，佢一世都會係我老母，所以我無辦法睇住佢死。
佢養大我，我有欠於佢，我必須對佢負責任。
所以即使係地上嘅時候，喺日本嘅我都會定期過錢畀老母做家用。
我都想斬斷呢斷親子關係，但係就係落唔到手。
嗰種我要對父母負責任嘅諗法牢牢地扎根喺我腦海深處，揮之不去。
呢啲諗法，將我綁喺我老母身邊綁到實一實，我無處可逃。
親子嘅詛咒。
第十三話 完
綠嶺
2023-02-23 09:09:03
第十四話 如臍帶總飾演因果的樞紐（中）
啱啱係餐廳發生嘅事，加埋我老母呢排對我嘅壓迫，我忍唔住爆啦。
啱啱係餐廳發生嘅事我之後先再講，依家俾我屌咗自己老母先。
「呀！！！屌屌屌！！」喺衫舖嘅我發晒癲咁將所有嘢掃落地，再亂打一通去發洩壓抑嘅情緒。
我醒返之後已經過咗幾日，呢幾日我跟住大隊喺呢二百米嘅地下街入面試圖搵出口。
搵完一日之後就返到日本餐廳到食飯，將我一半嘅糧食分俾老母，然後餓住個肚瞓地板。
先講食物後講住嘅地方。
我哋有嘅食物真係唔多，每日分到嘅得一個手掌咁大，仲要分三餐食。
我老細話食咁多就夠生存，拒絕分出更多嘅食糧出嚟。
而咁細分量嘅食物將會變得更細，因為我要再分一半畀我老母。
我女朋友Yoyo每一次都會將佢嘅食物分畀我，因為佢都唔想我挨餓。
我當然係拒絕，佢分咗畀我嘅話，係佢都會唔夠食嘅情況下。
但係Yoyo好倔強，佢會將分畀我嘅食物放喺檯，然之後佢就一啖都唔食，就算我唔食佢都唔會拎返嚟食。
最後我同Yoyo傾掂數，我哋將我哋手上有嘅食物一人一半咁分。
但係咁樣做嘅結果係我哋兩個人一齊挨餓。
「你真係唔洗分畀我喎。」我滿懷歉意地對Yoyo講。
「唔得，要捱就一齊捱。」Yoyo強硬地答。
「但係你分咗啲食物畀我之後，你都會唔夠食。」
「我哋話過要同甘共苦㗎嘛！邊可以我夠嘢食時你唔夠？」
「不過我係自己攞嚟，你唔洗陪我受苦。」
「我唔理！你係我女朋友，我唔可以見到你受苦！你唔洗再由佢係到發霉啦！」Yoyo將麵包搣咗三分一放係我面前。
「真係唔好啦⋯⋯你食啦。」
「唔得！我畀咗你，你食唔食係你嘅事！我唔理！哼！」
就係咁樣，我同Yoyo嘅食物都同樣不足。
明明最好嘅解決方法就係唔理我老母，但係因為我嘅無能，Yoyo被迫同我一齊受苦。
我果然係廢柴。
住所方面，我哋由便利店後場搬到去外場，同貨架為伴入眠。
我同Yoyo有諗過搬去服裝店到瞓，咁樣嘅話，落閘之後我哋又可以享受二人世界。
但係我老母一聽到我唔同佢住就馬上發火，話我唔可以扔低佢。我同Yoyo係店面瞓嘅話，有咩風吹草動我同Yoyo都可以保護到喺後場嘅老母。
所以，我同Yoyo嘅二人世界已消逝。
返到去一開頭，壓抑咗好幾日嘅我終於忍唔住，喺搵出口期間，我一個人走咗去衫鋪到打爛啲嘢發洩。
「呀！！！！！」我邊打邊叫，盡量將情緒釋放出嚟。
大鬧一餐後，我喘住大氣咁坐落地下休息，然後肚子又餓起嚟。
「舒服啲？」Yoyo突然出現喺我身後問。
「你呀⋯⋯我好啲啦。你塊面咁白，你有冇嘢呀？」我問面色蒼白嘅Yoyo。
「我無事，只係有啲累。」Yoyo從身後遞枝水俾我後再講：「飲呀。」
「唔該你。」我大口大口地將水灌入喉嚨，但係唔理飲幾多水，我個肚都仲係好餓。
呢到我要解釋一下，呢條地下街嘅水龍頭依舊有水，我哋依家嘅飲用水都係嚟自水龍頭無煲過嘅水，而攞水呢一件事係唔需要得到我老細同意去做。
「我就知道你會嚟呢到。」Yoyo坐落地下講。
「你又知？」
「感覺。」
「果然係我女朋友。」
「其實你有冇諗過唔再俾食物你老母？」Yoyo剎有介事咁問。
我就知道Yoyo會遲早會問我呢樣嘢。
第十四話 完
「有係有嘅。」我嘆口氣再講：「但係你都知道⋯⋯我做唔到。」
「即使佢嘅存在令到你生存都成問題嘅時候？即使佢明知你唔夠糧食都要喺你到搶奪嘅時候？」Yoyo平靜地反問我。
「道理我都明白，但係我就係做唔到。我都知道正常人都會expect老母係愛自己嘅仔女，又會為兒女犧牲同付出，which is我老母做唔到。但係以前嘅佢的確好辛苦咁打工去養我，或者就係因為見到佢咁辛苦返工，加埋佢細到大都洗我腦，叫我大個咗就一定要養佢，所以我先擺脫唔到佢。」我坦言。
「另類嘅束縛。」
「另類嘅束縛。」
「就好似臍帶咁，你唔剪斷佢嘅話遲早你就會由胎兒變做母體，養份被貪婪地吸走。」Yoyo氣若由絲地講。
「臍帶⋯⋯」
我話語未落 ，Yoyo嘅肚子就傳出「咕嚕」嘅吼叫聲。
「⋯⋯So sorry。已經唔夠嘢食，你仲要分你個份畀我。」我低頭。
唔怪得Yoyo今日講嘢好似有氣無力咁。
「傻豬嚟嘅。佢叫下姐，我哋好快就有飯食㗎啦。」Yoyo氹返我轉頭。
喺衫舖偷懶咗一輪之後，我同Yoyo又走返出去搵出口，廢事揸流灘太耐被人發現。
「不如你抖下？你行路都腳步浮浮咁。」我扶住Yoyo講。
「我無事，繼續行啦。」Yoyo離開我嘅手，繼續向前行。
當我同Yoyo去到遊戲機中心嘅門口時，我突然覺得條街都係到晃動，我環顧四周，果不其然夾公仔機內嘅夾、獎品櫃內嘅獎品同埋籃球機嘅籃球，無一例外地搖晃起嚟。
「地震！」意識到唔妥嘅我馬上大叫，然後伸手拉住Yoyo走。
然而，Yoyo卻隻眼無神地抬頭望住天花板。
「Yoyo！」生怕假天花會倒塌落嚟嘅我，想盡快帶Yoyo到櫃檯下面避難，但係無論我點搖Yoyo，佢都係無反應。
「呯！」一塊假天花跌落我哋側面。
那一聲巨響令Yoyo回過神來，然而Yoyo卻乏力地回答我：「我⋯⋯無力⋯⋯」
語畢，Yoyo雙腿就乏力地跪坐喺地上。
無足夠嘅食物下，Yoyo終於支撐唔住。
只係派咁少食物嘅老細係仆街，將我哋嘅糧食交俾我老母嘅我都係仆街。
但係依家唔係諗呢啲嘢嘅時候，我要盡快將Yoyo帶到去安全嘅地方。
我將Yoyo成個人壓到我身下，我背對地花板，試圖用肉體擋下所有有可能跌落嚟嘅嘢，廢事佢哋打到Yoyo。
「Ivy⋯⋯」Yoyo吐出我個名。
「無事㗎，好快會無事。」我安撫著Yoyo。
「已經無事啦。」Yoyo堅定地講。
「無事⋯⋯？」我抬頭環顧四周，地震原來已經停落嚟。
我有種突兀嘅感覺，地震停得好奇怪，佢係係突然就停落嚟咁，無嗰種慢慢減震嘅感覺。
「你起唔起到身？」我問Yoyo。
「我要抖多陣。」Yoyo答，然後佢就側躺喺地上休息。
Yoyo因為食物唔夠，差啲就命喪黃泉，而我有份做就呢件事發生。
我差啲就殺咗Yoyo。
因為我嘅怯懦，令到我同我嘅愛人一同受苦。
依家嘅我因為擺脫唔到情緒勒索而令我同Yoyo一齊受苦，而我唔想見到Yoyo受苦。
傷害到我唔緊要，但係我愛人都受苦嘅話就唔同講法。
雖然唔肯定可唔可以好好咁同老母講出我嘅諗法，同埋令我老接受我唔再畀食物佢，但係我依家必須硬住頭皮上。
只能夠搏一搏，希望我老母畀次機會我。
綠嶺
2023-02-24 18:41:09
第十五話 如臍帶總飾演因果的樞紐（下）
我腰間被一條觸手綁住。
嗰條觸手入面有條黑色嘅幼管，外面被白色而且帶點透明嘅管包住。
放出觸手嘅係一隻怪物， 正確嚟講係我老母化身嘅怪物。
怪物約三米高，四肢卻出奇地瘦削，而佢下陰就係射出觸手嘅地方。
時間返到好無幾耐之前，我走到便利店後場搵我老母，打算同佢講我唔可以再分食物畀佢。
「媽⋯⋯我可唔可以唔再分啲食物俾你？我都唔夠食。」我怯生生地答。
面對老母，我始終都係淆底。
本來以為自己可以當當正正咁問，點知去到面對面嘅時候我就馬上縮沙，講嘢都窒晒。
「你癡線咁？你唔畀我，咁我食乜？」我老母一下就回絕我。
「但係依家呢個分量真係唔夠我食⋯⋯」我細細聲地反駁。
更加重要嘅係Yoyo分唔低我，只要我唔夠食佢就一定會分嘢食俾我，之後佢都會唔夠食，最終就係得哋兩個都唔夠食。
「嗰丁屎咁多邊夠我食呀？我係你老母嚟㗎，你唔係想餓死我呀？有冇孝心同人性㗎？」我老母氣沖沖地講，佢仲豎起隻手指尾表達食物分量嘅稀少。
「對唔住⋯⋯另外⋯⋯唔知道⋯⋯我可唔可以⋯⋯可唔可以唔同你住⋯⋯唔同你住係同一間舖頭？」目標一失敗之後，我就繼續驚驚青青咁問我老母。
「你無撚嘢呀？你扔低我？我養你咁多年你扔低我？你咁即係恩將仇報姐！你咁仆街嘅！我俾人襲擊點算？你依家威啦，有毛有翼啦！飯就唔分畀我，起居就唔睇住我！生女啦生女啦，無用㗎啦！你夠膽就走！睇下你仲有冇老母！」我老母怒髮衝冠地連珠發炮。
「我會返嚟睇你⋯⋯真係唔得？」我提出另一種做法。
「咁樣有撚用！」我老媽秒ban我。
「就當我求下你，只要一次⋯⋯為我著想可以嗎？」我氣若游絲咁哀求我老母。
「為你著想？我無為我著想？知唔知生咗你出嚟之後，我嘅人生變到幾痛苦呀！你對我付出係應份㗎！」我老母講。
承受唔到大量情緒勒索嘅我開始想縮沙，但係我又唔想再見到Yoyo受傷。
搬屋同食物兩個目標都達成唔到，我唯有做最後嘅掙扎，苦苦哀求或者佢會應承我唔再令我同Yoyo再受苦。
綠嶺
2023-02-25 23:04:35
我細細聲咁講：「食物⋯⋯真係唔可以放過我？我真係要食多少少嘢⋯⋯依家我真係唔夠食。」
「後生女，食少啲嘢又有乜所謂！唔好扮晒嘢話唔夠食啦！」我老母又斥責我。
敢怒不敢言。
呢個moment其實我已經爆爆地，但係我就係無勇氣正面反駁我老母。
只不過我又真係好燥。
呢個時候，我只能夠出下策，發晦氣式通知老母然後轉身走人。
「我⋯⋯真係唔可以再分食物畀你⋯⋯」我細細聲咁宣告。
語畢，我就離開後場，閂埋門，任由後場內嘅老母發癲。
過咗十秒左右，我身後突然傳嚟巨響。
「呯！」
通去後場嘅門以飛快嘅速度同我擦身而過，我馬上回頭睇發生咩事。
說時遲那時快，一條觸手喺我腰間纏上一圈。
觸手嘅主人由後場走出嚟， 果然係我老母。
我老母全身赤裸，我老母嘅下陰就係觸手嘅另一端。
觸手用力地收緊咗一下，我隨即感覺到某種東西由我身上被吸走，我老母吸收到嚟自我身體嘅某種嘢後，身體就膨脹起嚟，一口氣長高到三米多，但係手腳仍然瘦削。
我老母喺我心中嘅形象第一次同現實重合。
「呀！！！！」我老母大聲咆哮一聲，震耳欲聾嘅音波震飛便利內所有嘅貨架。
唔止！好似成個空間都不受控制咁震動。
我隨手喺地下執起一把較剪，將尖端插向觸手，但係我嘅攻擊對佢不痛不癢，觸手仍然緊緊地綁喺我腰間。
我又嘗試向後跑，出奇地我跑得到。
條觸手好似可以無限伸長咁，我走幾遠佢就伸長幾多。
我老母化身嘅怪物當然想追上嚟，但係雙腿瘦削嘅佢行得非常之慢。
走出便利店後，我老母又再咆哮。
同時，海量嘅意念透過觸手傳到我腦海。
「呀！！！！」今次到我叫出嚟，無數嘅語句同時湧入我腦海，我頭痛得就快要全身爆炸咁濟，我成個人有如斷線木偶咁一下子攤咗落地下。
養咗你咁撚多年，加少少家用俾我都唔得？
生活係咁辛苦㗎啦，我當年養你都係咁，都係要畀家用我老母。
養你就係為咗未來有人養返我，唔係生你出嚟做乜？
不孝女！隔離屋陳太個女嫁畀醫生之後，每個月畀到一萬蚊家用，點解你咁無用！
養你咁耐，你唔養唔返我咁自私？
唔係生咗你出嚟，我嘅生活點會咁辛苦？
我唔理你去日本做乜，總之你要定期交家用。
點解你好人好者要同女人拍拖？你知唔知咁樣我好無面？好羞家呀！
點解你大學畢業都搵得咁少錢？你智障㗎？
我理得你有冇錢出去玩，我淨係知道我收唔到你嘅錢。
你又唔畀錢我，我又唔返工，啲錢邊到嚟？你想餓死老母搵山拜？
你老豆又早死，你係我一個人養大㗎！問你拎返啲回報都唔過份啦？
孝順呀，識唔識呀大學生？唔識孝順老母，你幾叻都無用啦！
拎你少少錢就嘈嘈供，後生就咪掛住玩，唔夠工咪返多份工搵錢囉！
你放工咁多時間，點會無時間返多份工？
朋友重要定老母重要？與其同朋友玩，不如為咗老母去賺多幾個錢啦！
以上，全部都係我老母嘅諗法，亦係我痛苦嘅源頭。
道理我都明白，我都知道我有我自己生活，父母係可以疏遠嘅關係，但係情感上我做唔到。
我怕成為不孝女，亦會因為我擺脫唔到「我係你老母，為我做啲唔係唔得呀」呢一句說話而搞到自己遍體鱗傷。
綠嶺
2023-02-28 11:24:11
突然，意識彷似清晰起嚟，Yoyo同時出現喺我面前。
「走呀！我老母變咗怪物！」我向Yoyo喝令。
然而，Yoyo卻無視我嘅喊話，雙眼無神嘅佢講：「你都有選擇家人嘅權利。」
「呀！！」Yoyo語畢，我老母又放聲吼叫，吼聲大力到掀起一場烈風，我將手臂提到眼前擋風。
風停下來，Yoyo也隨之消失。
「Yoyo！你喺邊到呀！」我大聲叫喊，但卻無回音。
「噠噠！」就係我尋找Yoyo嘅同時，我老母開始跑起嚟，其響亮嘅腳步聲喺地下街迴盪，亦到距離我越嚟越近。
我再度跋足狂奔，然而我老母化身而成嘅怪物卻以飛快嘅速度緊追住我。
我打算拐彎跳進一間舖頭，但係我老母一躍跳到我身前，佢著地時嘅衝擊波更將我擊飛到兩米後，狠狠地撞到柱上。
我橫臥在地，吐出幾口唔知係口水定唔知名嘅液體，背脊嘅痛感好似病毒咁擴散到我全身。
我老母無俾時間我企返起身，佢用瘦削嘅雙手捉實我嘅頸。
我早就知道我走唔到，我從來都離唔開我老母嘅擺佈。
我早就知道想逃離我老母嘅話，我只會迎嚟更大嘅傷害，最後又只會返到佢身邊。
要懲罰，家用畀咁少仲要駁我嘴！
我的頸開始被勒緊，呼吸都變得困難起嚟，而我只能無改地用手拍打我老母嘅雙手，但係我嘅反擊對佢不痛不癢。
衰女包！仲要打老母，知唔知邊個生你出嚟！
我只不過係做下樣反抗，我深知道我點樣反抗都唔會影響到我老母，佢唔會畀我離開佢。
牢牢地捉住我。
「對⋯⋯唔住⋯⋯」我試圖請求原諒。
講對唔住有咩用！
「我⋯⋯咩都應承你⋯⋯」神智開始混亂嘅我隨口講。
呀。
一直以嚟，我都反抗唔到我老母。
無論我點樣反抗，佢都會將我拉返去佢身邊，然後迫我跟佢嘅意思去做。
我老母突然鬆開勒緊我喉嚨嘅雙手，然後雙目無神地盯住我。
「呼呼呼！呀！」我大口大口地吸住新鮮空氣。
你話咗，畀咩我都得。
我老母用手指指住我嘅手臂講。
臍帶突然收緊，然後臍帶微微發光。
「呯。」
除咗呢隻手，你所有嘅食物都要畀我！
「得⋯⋯」喉嚨被勒到快透唔到氣嘅我只能夠點頭。
一剎那，我整條右臂被臍帶吸走，然後傳送到我老母嗰一邊，之後我老母嘅手變得粗壯而且有返血色，然後我老母就好似電腦熄機咁合埋眼，一動也不動。
至於我嘅右臂同身體嘅接口位卻一滴血都無流，而我都無任何痛感，意識卻有啲混亂。
「呀！！」
雖然唔通，但係我依家因為呢個狀況而驚慌到大叫起嚟。我左手不停去摸右臂本來存在嘅地方，但係卻只係摸到空氣。
「叮。」
我老母頭上突然出現一組數字。
3:00
2:59
2:58
3分鐘？
咁即係代表3分鐘後我老母會重新郁過？
我狼狽地企起身，屏住混亂嘅呼吸行起嚟，拖住就快走唔郁嘅雙腿背對我老母逃跑。
汗水流進眼珠令我嘅視線模糊起嚟，我試圖用手抹眼，卻發現手已經不在。
呢個時候，Yoyo又出現喺我面前。
「無了期嘅縱容，只會帶嚟傷害。」
「Yoyo⋯⋯走呀⋯⋯」我有氣無力地講。
「你有選擇嘅權力。父母唔一定愛仔女。」
「Yoyo⋯⋯」我用手拭去眼裡嘅眼珠，然後Yoyo嘅身影就消失了。
係幻覺？
不過既然Yoyo唔係到就好啦，咁樣佢就唔會受傷。
但係見到幻覺，睇嚟我傷到幾嚴重下。
我硬住頭皮企起身，慢慢地背地我老母走。
一步、兩步、三步⋯⋯
我知道，無論我點走，我老母最後都會將我捉返過去，而我係無能力反抗。
我依家狼狽地逃走只不過係本能驅使，生存嘅本能，絕望中無力嘅掙扎。
我就係敵唔過一句——「我生你出嚟，你咁對我？」
綠嶺
2023-03-01 21:51:15
我一拐一拐地去到便利店，打算再搵下有冇啲鋒利嘅嘢去切斷條臍帶，但係我淨係搵到一個有刀嘅指甲鉗。
我鋤落去臍帶到，不痛不癢。
「呀！！」我老母再度吼叫。
然後，就沒有然後。
我以為我老母會跑過嚟，但係我卻完全聽唔到腳步聲。
我好奇地探頭往外一望，左右前都見唔到我老母嘅身影。
正當我鬆一口氣時，腰間嘅臍帶突然收緊，我成個人被臍帶猛然拉住走，我連滾帶跑地被拉到我老母面前。
無論以前定係現在，我老母總係有方法將我拉到去佢身邊，我根本唔能夠由佢身邊逃走。
以前拉我返去嘅係無形嘅聯繫，依家就係得到具象化嘅呢條臍帶。
我老母就係用臍帶將我拉到去佢面前，用佢嗰隻喺我身上搶走嘅手。
報孝。後生時養你我辛苦過，係時候到你付出。
「我咪畀咗隻手你！你仲想點？！」我怒斥。
你嘅肉體係我十月懷胎生出嚟，所以一切都係屬於我！
「咁我點算？你有冇諗過我？」
無諗你我會養到你咁大！？
我老母單手將我拎起，無論我點用力擺動雙腿都掂唔到地。
我要對腳。
「對腳⋯⋯！我唔可以無咗對腳⋯⋯」我講。
自私！
我老母用喺我身上奪走嘅手勒緊我喉嚨，但係當我快窒息嘅時候佢又鬆開心畀我重新呼吸。
我老母仲然蠢，但係佢都明白唔可以殺雞取卵。
我要對腳。
「⋯⋯求下你⋯⋯please」我喘住大啖氣，淚水、汗水同鼻涕唔知幾時混埋咗一團，令我吸氣嘅時候唔小心吸入呢啲體液。
平時我嘅內心就係被老母迫到咁樣，如今我嘅肉體終於受到同樣嘅煎熬。
我係你阿媽！係我生你出嚟！你嘅一切都係由我畀你㗎！
「無咗對腳⋯⋯我生存唔到⋯⋯已經無咗隻手⋯⋯」我喊住答。
吃子。
咁樣唔係你不孝嘅理由！有毛有翼就唔想理阿媽！？
「真係⋯⋯求下你⋯⋯」
我老母又勒緊我，去到極限前又放開我，重覆數次。
我就被迫死去活來幾次。
只要我想反抗，我就會被迫死去活來幾次。
以前嘅話，我老母會講「得啦，唔使理阿媽㗎啦！無孝心㗎啦！恩將仇報！」
對佢好啲佢對唔識感恩，買按摩椅畀佢仲會畀佢屌我晒錢。
畀多啲家用佢，佢都仲會怪我畀得少過隔離屋陳仔。
每次都期待令佢開心，到最後由我受害。
少少嘅犧牲都唔肯為阿媽做，咁生你出嚟有乜用！
腦袋經歷多次窒息邊緣，我已經唔能夠正常思考。
加上老母嘅情緒勒索，我對於無將雙腿送畀我老母呢件事感到歉意同愧疚。
比起肉體嘅痛楚，老母心靈感應傳嚟嘅話更傷害到我。
我覺得好難受，唔滿足阿媽嘅要求令我好難受，亦到充滿愧疚感。
只係今次嘅代價太大，我先稍微想反抗。
只票過係稍微嘅程度。
但係，已經到咗極限。
我已經堅持唔到，我只能夠點頭答應我老母。
我嘅愧疚感已經浸滿咗我全身，再多一點點，我就會全身爆炸。
綠嶺
2023-03-01 21:52:08
作為你老母我點會害你！你啲手腳，我只係幫你保管住！我死咗之後，咪乜都留晒畀你！
「⋯⋯對唔住媽媽⋯⋯聽你話⋯⋯畀你⋯⋯」早已全身乏力到趴喺地上嘅我講。
臍帶勒緊，吸取，我嘅雙腿就此離我而去。
我老母嘅雙腳剎那間充滿血色，而且變得粗大起嚟。
我老母頭上又出現一組數字。
10:00
9:59
9:58
我已經無力，亦都無法逃跑，我就只係淨低一隻左手。
我躺在地上，眼泛淚光地望住蒼白嘅天花板。
放棄抵抗吧。
只能夠任我老母魚肉。
無論我點掙扎，我老母都會貪得無厭地喺我身上榨取一切。
想唔畀佢，佢又話用另一種方法傷害我。
無論如何，面對老母時我都會係輸家。
愧疚感消失，但係現在我又被無盡嘅痛楚包裹。
我生存都成問題，但我老母依舊對我有所要求及奪取，而我卻擺脫唔到情緒勒索。
我知道呢段關係有害，我卻無法擺脫。
親子關係係天花，無論我點樣否定都會存在嘅關係。
令老母失望，我嘅內心就會被內疚、歉意同埋各種負面情緒包圍，只有順老母意行動嘅時候，我嘅內心先會好過。
我老母唔會理我點諗、唔會理我辛唔辛苦，喺佢眼中我就好似淨係得工具價值。
我內心有過無數次呢個諗法——佢唔係我老母就好。
Yoyo無預警到出現喺我視線內，佢由上面下望住我。
「你知道係你嘅母女關係有毒，但係你唔斬斷佢。」
分唔清眼前嘅Yoyo係幻覺定係真實存在嘅我流住淚，一言不發地別過臉。
我唔想Yoyo見到我呢個難堪嘅模樣，亦到開唔到聲，喉嚨卡住卡住咁。
「跟住佢嘅意思做，你係無咗愧疚感，但係你開心咩？」
我無回答，呢個Yoyo係幻覺，我死前嘅幻覺。
我如此斷定。
「你受苦，唔開心嘅唔止你一個。仲有我，愛你嘅人唔會想見到你受苦。」
呢個Yoyo開始嘴遁我。
「一次。只要你say no一次，然後斬斷呢段有毒嘅關係就得。」
Yoyo消失，然後又喺另一邊閃現。
「擺脫對你嚟講係解脫。要為自己而活，呢樣係最基本嘅人生道理。」
消失，閃現。
「嚟到呢個世界，你都唔可以為自己活一次？」
消失，閃現。
「只係痛苦一次。你同佢講唔好一次，然後離開佢。無勇氣嘅話，我會拖住你一齊講。」
消失，閃現。
「父母愛仔女唔係必然嘅事。」
消失，閃現。
「你要打敗嘅唔係你老母，係你內心嘅自卑感。你無必要對你老母感到自卑，佢明知無錢都要生你出嚟，佢明知香港生活費高都要你畀咁多家用、呢啲真係親子關係？咁樣只係寄生蟲，會殺害宿主嘅寄生蟲。」
消失，閃現。
「唔係為咗我，你係為咗自己，唔好再被毒害。被有毒關係綁住嘅係你，但係受呢段關係傷害嘅唔止得你。」
我知道Yoyo講嘅一切都係正確，但係我真係無呢個勇氣去反抗。
即使去到依家我遍體鱗傷，我都唔能夠反抗。
係我無勇氣同埋廢。
我都想我可以斬斷我同我老母呢段只有劇毒嘅關係。
但係，我打唔斷呢條因果嘅樞紐。
我流住淚用左手嘅拳頭敲打仍然綁喺我腰間嘅臍帶，但係徒勞無功。
N展撚
2023-03-06 16:40:45
推個post
綠嶺
2023-03-07 13:04:05
我乏力地吐出一句話：「根本⋯⋯由一開始就唔得⋯⋯」
消失，閃現。
「逃避嘅就只會得一到樣嘢，前進嘅話就會得到兩樣。只要有決心，再微小嘅一步都會產生巨大嘅轉變。」
消失。
又得返我一個人。
可以點前進？
我連腳都無埋，我用人棍只有一手之遙。
我難看地用一隻手爬行，但卻前進得好少。
所以，前進就得到呢一副難堪嘅樣子？
莫名其妙地嚟到地下街，以為可以同愛人過上淨係得我哋兩個、無需要理他人目光嘅生活，然後一群同我有所關係嘅人毫無預警地出現，將我嘅理想鄉破壞。跟著我仲要睇住佢哋目光做人，生活資源被掌握，乜嘢都握唔到喺手中。最後仲要俾親生老母化成嘅未知怪物奪走手腳，生命危在旦夕。
世界總係同我對著幹，我唔想要嘅，佢就會大大方方咁送到我面前，破壞我嘅一切。
總之，世界就唔會畀我好過。
我只係想簡簡單單咁匿埋喺令我安心嘅地方生活，我唔想同外界、同外面嘅人交流，喺一個封閉嘅空間生活就夠。
點解，點解，我以外嘅個體硬係想迫我做啲我唔想做嘅嘢？
因為個個都交家用，所以我老母都要求我交家用，唔交就係不孝、係異類。
我交家用交到生存都成問題，四肢得返一隻手，啲人都當我嘅犧牲係理所當然，因為大概都要受因為畀家用而影響自己生活嘅苦。
我老母再次活動，今次佢無大叫，我亦都無逃跑。
我背對住佢，我已經懶得逃跑。
「Ivy！你係邊到呀！？你無事嘅話應下我呀！頭先地震呀！」Yoyo喺不遠處大叫。
睇嚟頭先我老母嘅吼叫被當成係地震。
點解淨係得Yoyo？我老細同阿星又去咗邊？
「Yoyo，走呀！唔好過嚟呀！」生怕我老母會傷害Yoyo，我馬上叫佢走。
但係，女人就係唔識聽話，Yoyo馬上跑向聲音嘅來源。
然後，得返一隻手攤起地下嘅我就映入Yoyo眼簾。
「唔好望我呀！」呢副模樣，我實在唔想俾我愛嘅人見到。
「Ivy！發生咩事呀！後面嗰隻咩嚟㗎⋯⋯怪物⋯⋯」Yoyo見到喺我身後化身成怪物嘅我老母，就情不自禁地向後退幾步。
但係Yoyo最後都係都係跑到嚟我身邊，佢緊張地蹲下，手足無措地抖動著住全身。
「Ivy⋯⋯點解會咁⋯⋯」Yoyo開始流起淚嚟。
「對唔住⋯⋯」我都忍唔住喊起嚟。
就係因為我受苦，我愛嘅人見到我受苦都會心痛起嚟。
令我愛嘅人都心痛，咁先係我最心痛嘅事。
「呀！！」我老母從休息中醒過嚟，佢以迅雷不及掩耳嘅速度，用由我身上奪取嘅手捉起Yoyo嘅頭將佢抬起，再用臍帶將我舉起。
Yoyo離地嘅雙腳不斷擺頭，卻點用力都甩唔開我老母。口亦都只能發出「嗚嗚」聲，因為Yoyo成個頭都被我老母手掌掩住。
我要你做正常女人。
「正常女人？」
同男人結婚。
「⋯⋯」
我要拎走你同呢隻孽畜嘅回憶。
「唔好呀！」
阿媽係為你好，嫁個好男人先會有好生活。
「唔好呀⋯⋯嗚⋯⋯唔好呀⋯⋯」
其他人見到我有個同性戀嘅女，你知唔知道幾羞家？你知唔知你唔生個孫畀我係幾卑鄙嘅事？人人都生兒育女，但係你係都要搞對抗。
「我只係鍾意一個人⋯⋯對唔住⋯⋯」
咁多男人你唔鍾意走去鍾意個女人！
「乜都可以畀你⋯⋯但係就只有Yoyo⋯⋯你唔好拎走佢⋯⋯求下你⋯⋯」
呢隻妖婦到底對你落咗乜嘢迷藥令你連老母嘅說話都唔聽！
我老母當Yoyo係玩具咁fing。