之前同佢哋去歐洲，佢哋會話啲嘢唔啱食，係咁話要食中餐都算
特登晒幾皮嘢同佢哋去瑞士，入到間餐廳食芝士火鍋
然後係咁話好苦，問點解咁杰，係咪要溝啲水落去
大佬，人哋叫芝士火鍋，唔係真係俾你落肥牛魚蛋落去打邊爐啊
食都話係文化差異，睇風景得啦掛？
已經就晒佢哋每個地方起碼留四日，等個節奏可以慢啲
三句唔埋就話地下啲石仔路好難行，要返酒店休息，結果全日咩地方都冇去
再唔係就話呢個風景有咩特別啫，XXXX都有啦，洗咩搭10幾個鐘頭飛機過嚟睇
我就當你文化水土不服，Shopping呢啲唔死得人啦掛？
帶你去買本地土產特色嘢，喺舖頭係咁指住人哋啲嘢話呢個屋企樓下超市都有，洗咩喺度買
見到牛鈴叫你買返個，你哋就話同喺$12店見到嘅「鈴鈴」有咩分別，點解要晒幾舊水喺度買
即係咁，我帶你嚟呢度係見識下原來世界係咁闊，咁多嘢睇
但你嘅思想仍然將自己困喺香港呢個漁村入邊，咁我帶你來做乜嘢？
.
.
.
.
.
.
.
.
.
.
.
.
.
.
.
話雖如此，但下次我都係會選擇同佢哋去旅行，再有機會嘅話
家母年前患上淋巴癌，發現嘅時候已經係末期（呢個旅行係發現前去）
而我哋，包括佢自己都想舒舒服服咁離開，所以冇特別去做咩治療，
見住佢面色一日比一日蒼白，到後期甚至要食止痛藥先瞓到，
上兩個星期佢離開咗我哋，去咗好遠嘅地方啦
最近執拾佢嘅物件嘅時候，發現佢將我哋旅行嘅相全部曬咗出嚟入咗落本相簿度
想後面寫晒嗰日我哋做咗啲乜嘢，發生過咩趣事，為咩鬧交等等
其中一張寫住「期待下次旅程
」⋯自問自己都算堅強，但見到嗰一刻真係流晒馬尿
最後想講嘅嘢，即係想「警世」大家嘅事就係
記得要趁屋企人仲健在有氣有力嘅時候同佢哋去多啲地方，建立多啲回憶
千祈唔好俾自己後悔，失去後先懂得珍惜。
最後最後
送上呢排成日聽嘅歌一首
「要錯失 它終將錯失，明日過 要接續明日」
https://youtube.com/watch?v=sATGLIQdIiQ&feature=shares
