有冇人有間歇性抑鬱病？

都好既
佢都好錫我
佢比哂啲錢我幫佢投資
話呢啲錢係比我去買樓 （賺到既話）

嘩……
咁你阿媽應該係好信任你

其實習慣咗有一段親密關係喺身邊，
都要嘗試習慣下獨立自己一個人
呢個係每個人成長必經之路

建議絕交
唔絕都斷

我係要人照顧果類黎
黎左外地之後都迫住要獨立

我都好鐘意睇海希望你快啲搵返屬於自己嘅動力

我又無咁明顯嘅唔舒服，我嗰啲似係心理上太強烈，再影響埋生理
辛苦晒你，咁係咪keep住見醫生就得？

好正面嘅諗法，有啲好好奇你大約幾多歲？
點解可以諗嘢咁成熟，講嘢有道理之餘，又唔會傷害到人？
睇落好似好易，但好多人做唔到

- - - - - - - - - - - - - - - - - - - - - - - - -

我算大約搵到個方向，不過呢行競爭非常激烈，基本上係同世界各地嘅人爭飯食
所以努力緊，唔可以話好標青，但希望自己行嘅路係正確

- - - - - - - - - - - - - - - - - - - - - - - - -

多謝你講咗個盲點我知
我諗自己未識接納同欣賞真正嘅自己，會開始面對自己，不斷認清自己先
人係會長大，價值觀等等會改變都好正常，我唔應該咁抗拒呢個改變
我諗未來要學嘅係點接受自己嘅負面情緒，唔好俾情緒太影響生活先

- - - - - - - - - - - - - - - - - - - - - - - - -

正是
唔一定係事業上，我會覺得個女仔唔揀我有好多原因
例如我唔夠嗰個男仔高，唔夠佢哋識得耐，性格有啲位唔夠嗰個男仔好等等
會有一種俾人比下去嘅感覺
我就係不如其他人咁

- - - - - - - - - - - - - - - - - - - - - - - - -

我單親屋企，細個屋企無咩錢，又成日搬來搬去。
媽咪好鐘意話我同打我，基本上唔會點讚我
聽落好小事，但我諗自小就好無安全感，對其他小朋友嚟講，屋企係佢哋嘅靠山，但我就無呢樣嘢。

雖然我唔熟悉你，但睇你打嘅嘢，覺得你有返咁上下人生閱歷，唔一定年紀好大，但經歷嘅嘢比其他人多
我好羨慕你有呢種溝通能力，好清晰表達自己，分析事物能力高，同埋說話唔會好難聽
呢個年代啲人可能用得太多手機，好少人有呢種能力，仲要識得反思好多嘢
所以你真係好利害

唔知點解，呢個年代好多人都搵唔到內心嘅平靜，特別喺香港
好多人只係過緊表面上嘅生活，跟住人哋嗰套，但無真正諗自己鐘意啲咩，咩嘢先令自己開心

- - - - - - - - - - - - - - - - - - - - - - - - -

好似話d精神科藥物會令到個人有d呆呆地
（fd講）
所以唔會亂諗嘢，
不過係人都知食得多藥就會有抗藥性
西藥始終係治標不治本之餘仲有副作用
D醫生如果見你食完藥，
情況冇好轉，就會加藥比你
可以加藥加到去 冇得再加嘅情況，
然後送你去精神病院住
係精神病院嘅生活又係要你食藥，
仲要限制你嘅活動，
要跟院方人士制定嘅timetable黎做
想出院？首先要醫生判斷你情況ok 先，
你對生活嘅自主權彷彿冇用咁.
明明解鈴還須繫鈴人，
一昧食藥改善唔到問題


每個人情況都唔一樣，
最重要係個心境 同 思緒，
康服嘅人係可以分享但唔好諗住去「教」人，
呢個立場有d危險，
唔係個個都適合教人 一陣教衰左……pk了

我唔想承認自己有

但呢排真係日日以淚洗面

持續都幾年
仲有冇得醫

精神科藥物有好多種，抗抑鬱藥，鎮靜劑，antipsychotic (抗精神病藥？好似中文係咁叫），情緒穩定劑，甚至俗稱嘅聰明藥Retalin，都係精神科藥物

每種藥有唔同功效同副作用，適應服用絕對有助改善病情。以抗抑鬱藥為例，SSRI 改善腦內血清素，改善情緒，推大返病人嘅動力，咁抑鬱症患者有動力就可以外出，去你哋介紹嘅郊遊，放鬆心情，又點會冇用呢？

至於食藥唔好，醫生會送病人入院，我諗就真係諗多咗。

香港有大把人食咗抗抑鬱藥10年甚至超過20年仍然日日如常生活，冇住喺精神病房。

精神科藥唔惡魔，事實係，心理治療，社交活動，親友關心以外，藥物都係一個好多嘅助力。

樓豬講嘅6樣全中

可能都真係多咗人有類似情況，但其他人覺得誇唔誇張唔係重點，情緒係你最私人嘅感受，只有你自己最清楚。

我見有巴打提議你可以記錄情緒，搵出自己抑鬱情緒嘅規律，同埋trigger 等，你真係可以試下，改善由記錄問始，鼓勵你試下

以前同你一樣
後來開始冇咗
發現嗰陣係人生冇咗目標

你本身諗法同埋做法都好正面啊
只係當中點都會有一啲負面嘅念頭，都好正常
係人都會有㗎啦
一生中就係會遇到各種唔同嘅狀況，
點都會焗住自己喺過程當中成長學習，
不過巴打係好主動去學習正呀～～

見到你係好積極去面對問題同埋改善情況，
呢個就真係真真正正嘅正面
二尾歲，反而我覺得你嘅思想仲成熟我成個小朋友咁
你係可以做到言行合一，
充滿目標性，
見到自己有一啲狀況發生，
會嘗試努力用唔同方法去面對，
而唔係放hea自己，
唔係怨天尤人，
即使面對呢一條路有啲崎嶇，
你都願意繼續努力行落去
呢一點真係好好好欣賞巴打
同埋又會主動問吓人哋嘅意見，
參考下人哋嘅情況，
唔會以過去嘅經驗限制自己嘅思維同眼界，
會將自己所收集返嚟嘅嘢去思考去分析再轉化整合，
然後落實，呢啲先係真正嘅成熟位

- - - - - - - - - - - - - - - - - - - - - - - - -

基本上係同世界各地嘅人爭飯食
咁又真係需要好花多d時間喺自己個方向wo
加油呀巴打 多d相信自己，相信呢個一直努力嘅自己
或者有時候情況未如理想，
只係代表當中有d細節因素可以調節改變下，
唔好太過迫自己，
有好嘅健康身心狀態先可以穩固紮實地前進

- - - - - - - - - - - - - - - - - - - - - - - - -

有時候做人真係好似好難
所以真係要：
慢慢咁嘗試下 去接納，欣賞，包容，對自己慈愛 ，
容許自己都會有做得唔好嘅時候，
容許自己都會有覺得好攰嘅時候，
容許自己都會有迷惘唔知點樣面對嘅時候，
遇到負面情緒，
如果成日諗住唔好俾負面情緒影響生活，
變咗好易會比負面情緒影響，
自己嘅決定核心都係圍繞住自己嘅負面情緒，
正正因為太過肯定自己嘅負面情緒

容許自己嘅生活係會有情緒，
只要緊記生活除咗有唔開心嘅嘢，
都會有開心嘅嘢
有智慧地選擇用一個相對平衡嘅狀態 去面對有情緒嘅自己去生活，嗰啲一直諗住唔想有負面情緒，對負面情緒有負面想法，甚至係排斥接受唔到有負面情緒嘅出現，先真係真真正正俾負面情緒困住自己

既然咁多個負面字眼，
不如試吓用正面嘅字眼平衡返
就好似打機咁，見到HP下降，
你都會搵返相應適合自己狀態嘅HP水幫自己回覆HP
有啲HP水仲會幫自己加埋MP添
有啲會直頭幫自己提升埋經驗值添
成件事原本睇落好似負面（聚焦於自己HP下降），
但係透過你嘅積極處理 同埋 有後對症下藥
（用唔同嘅HP水），
成件事就變咗可喜可賀又成長左一個grade
（宏觀大局嚟睇）

- - - - - - - - - - - - - - - - - - - - - - - -

原來留言係唔可以超過4000字



















「唔一定係事業上，我會覺得個女仔唔揀我有好多原因
例如我唔夠嗰個男仔高，唔夠佢哋識得耐，性格有啲位唔夠嗰個男仔好等等
會有一種俾人比下去嘅感覺
我就係不如其他人咁」

每個女仔心目中嘅男神都唔一樣
男神嘅標準又會隨着自己嘅改變而改變

何必強求自己要成為人哋心目中嘅男神呢

呢一刻你成為得到，你可以俾佢揀中，
咁係唔係永遠都會主動做到佢心目中嘅地步？

當然如果真係好鍾意一個人，
就自自然然會去迎合對方
呢一個係慣常狀態

就睇吓自己呢個迎合狀態係唔係可以一直持續落去
不過去睇返一啲 人哋婚姻美滿、
長長久久嘅例子
會發覺佢哋願意去改變自己，提升自己，
當然唔係話圍住對方黎轉，
我而係做好自己嘅角色同埋本分之餘，
有自己嘅目標同埋理想，
努力發憤，
懂得去平衡自己嘅生活
唔會着重於自己嘅感受同利益而唔理對方，
唔會覺得對方要為自己去承受啲乜嘢，
唔會覺得對方有責任去為自己嘅野負責任，
唔會持住對方愛自己就亂咁嚟

講嘢係用「我哋」而唔係用「我」
出街買嘢，幫自己買嘢嗰陣，
見到對方鍾意嘅嘢可能都會買埋；
見到一個地方好靚想去參觀下，
會邀請對方一齊去，想同佢分享自己鍾意嘅嘢，
（唔會強迫對方）
心中唔係淨係得自己，而係仲對方
就好似一個人係100%，佢又係100%，
兩個人喺埋一齊透過磨合同埋成長改變，
大家一齊係可以變咗去到1000%，互惠互利關係
（我咁樣講好似有啲抽象）

換過角度諗
反而如果佢欣賞你，你又欣賞佢，
唔會要求對方做到自己心目中所定立嘅條件，
而係Focus做好自己

理性同感性地接受大家都係成長當中，
明白每一個人都會有自己嘅處事作風，
喺內在同外在大家係可以夾得到互相配合，
個感情先會比較容易發展


事實上，個女仔都冇拎你同個男仔比較
你就已經拎自己去比較 呢啲叫作死

本身啲嘢就冇分好定唔好，
當你將一啲嘢set做 好/ 唔好，去建立一啲嘅標準，
係當然冇問題，咁你咪努力繼續去做囉

但見到個男仔擁有一啲自己想要嘅特質，
例如高度上，性格上，
就立刻拎自己去比較，而且感到自卑，
為咗乜嘢呢

試吓唔好佢比較自己同埋他人
·有啲人會覺得高就係好，
但有啲人都唔會當高度係咩一回事
· 有啲人覺得瘦就係好，
但有啲人都唔會睇重外型，反而注重品德修養
要比較嘅話好多嘢都可以比較，
唔係叫比人好先係好

美好嘅係
我哋可以選擇去敞開心扉接納自身的優與好，
可以有意識地欣賞唔同嘅嘢而不作批判，
用新嘅角度去觀察呢啲嘅事物本身冇所謂好定唔好，
只有單單存在

係人類自己去建立一套標準，不斷活在批評當中.
批評可以令到我哋成長，但都可以令生活充滿痛苦，

當然痛苦都可以成為 成長嘅一部份，
你對自己嘅批評都可以成為自己努力上進嘅一個動力
可以選擇做好理想中嘅自己
而唔係不停攞外界嘅嘢同自己比較
唔係將自己嘅價值 交俾人哋去批評，
唔係將自己活在他人嘅標準/價值觀 當中，
「境隨心轉，心能轉境」
「把心安住，如如不動」
「有所為 有所不為」
「一心不亂」
煩惱可以因自己而生，因自己而滅
視乎你點樣決定
視乎你接唔接受當下嘅自己
反正我覺得你真的很好就是了

做一個願意客觀對待自己，
正面看待自己，欣賞認同自己，肯定自己嘅人
不卑不亢，不自我摧毁，愛護自己
其他人嘅肯定/認同/意見 都只係你生命中嘅點綴

- - - - - - - - - - - - - - - - - - - - - - - - -

「我單親屋企，細個屋企無咩錢，又成日搬來搬去。
媽咪好鐘意話我同打我，基本上唔會點讚我
聽落好小事，但我諗自小就好無安全感，對其他小朋友嚟講，屋企係佢哋嘅靠山，但我就無呢樣嘢。」

發唔發覺你又將d野分成 大事定小事
我都明白呢種思維模式，一時之間係未能改到

將過去嘅經歷企圖去縮細黎睇，
放輕呢個過去經歷，
有時好似會令自己唔太受其影響，
但心底裡知道如果真係小事，
就唔會仲記住🙈
就好似你唔會記得1年前嘅自己食緊咩野.
盡管係再細微嘅事，只要係觸動到自己嘅內心，
就係對自己有一份嘅意義存在


好多老一輩嘅家長都採取嚴厲嘅手法「教」小朋友，
令到小朋友即使長大成人，
原生家庭嘅問題都影響深遠
習慣左活在批評當中，去接收人地嘅批判，
自己嘅內心受到束縛影響，
繼而影響埋自己嘅判斷行事
就好似d人不負責任地講野，
而接收者又唔識去分類 咩係可接收，
咩係當耳邊風，個心受到人地一言一行去牽動，
咁會造成痛苦. 

但係當你覺知到自己嘅情況
就可以慢慢咁探索下自己嘅內心世界
如果你有興趣，可以去接觸下 內觀/靜觀課程，
相信對你人生有新嘅體會同幫助
（ps . 搵值得信任，有認可嘅主辦單位，坊間太多呢d工作坊/活動班，一個好嘅導師唔係睇有咩學歷證明，個先決條件係品德修養好，三觀正確，除左識得講，仲要將信念想法 實踐有道，身口意合一，有一定程度嘅心路歷程）


安全感….
一個唔識得欣賞你嘅人，
即使你做得幾好佢都係唔會讚你

「點解自己嘅核心，
要放喺好怕自己進度太慢，唔夠人哋快？
懷抱着恐懼去迫自己前進，你開心嗎？
咁樣會變成身心唔平衡
要自己好似人哋咁快做咩？
進度慢，就會比人哋拋離？
你嘅人生路線，同人地嘅人生路線係一樣？」

你做得比人好，做得俾人叻，就會有安全感？
事實上如果用社會角度去比較嘅話，
你真係做得俾人好，已經做得俾人叻，
咁而家有安全感？

跟上人哋嘅步伐，人哋就會比到安全感你？
定係你覺得唔跟想人哋嘅步伐，
自己就好似同人哋埋唔到堆(＞人＜;)
冇辦法有資格地同佢地平起平坐(｡ ́︿ ̀｡)
只有同佢哋差唔多嘅水準，
先可以融入到佢哋，
先可以平起平坐 真誠交流 互相尊重，
先可以得到佢哋嘅認同 同 肯定

咁樣
用外界嘅事物係冇辦法永遠地填補自己

反而係 你肯定左自己先，認同左自己先
當然唔係叫你自大自負，
而係希望你可以睇到自己嘅努力，
可以明白自己有好好打理自己嘅生活，
有好好為自己嘅人生拼搏

明白自己有足夠嘅能力去面對大大小小嘅情況
回顧一下咁多年以來，自己超越咗幾多難關，
成長到佢今日呢一個地步，
自己嘅努力同 外界嘅因緣 成就左今日嘅自己
值得為自己鼓掌，你真係好勁

試吓用一個第三人嘅角度去看待一直以來嘅自己，
嘗試抽離一下
咁樣就會再客觀d，睇到多啲嘢
假設如果有一個同你完全相同經歷，
一唔一樣性格嘅朋友，你會同佢講啲乜嘢？
你會想鼓勵佢嗎？你欣賞佢嗎？

有一份嘅安全感係來自於對自己嘅看見，
有一份嘅安全感係來自於對自己嘅一直以來努力，
有一份嘅安全感係來自於對自己嘅祝福，
有一份嘅安全感係來自於對自己嘅呵護

從來喺外界比你嘅嘢，
都會受外界嘅影響。
假設以下情況：
呢一日同事覺得你做得好，所以讚美你，你開心
呢一日另一位同事覺得你做得差，所以鬧你，你傷心
所以你嘅內心就受到外界嘅聲音影響
一時滿足，一時失落

原生家庭未能成為自己嘅靠山
但係你已經成為咗自己嘅靠山
反而原生家庭嘅情況成為咗你嘅成長燃料.
所以你真係好靠得住
希望自己都可以成為一個美好如你嘅人


花開花謝，落完雨又會放晴～
人有長短，本身做得好嘅嘢就繼續做好
可以進步嘅嘢，就努力提升
有開心嘅時候，當然都會有傷心嘅時候
只係睇吓點樣將呢個起伏放緩～～～

就好似大海 每一個波浪，
高低起伏，後浪推前浪，
呢1秒 波浪 相湧向前
下1秒 波浪 消失無蹤
試下去感受～
去捉拿自己心中嘅平靜喜悅
「境隨心轉，心能轉境」
「把心安住，如如不動」
「有所為 有所不為」
「一心不亂」

- - - - - - - - - - - - - - - - - - - - - - - - -

「我好羨慕你有呢種溝通能力，好清晰表達自己，分析事物能力高，同埋說話唔會好難聽
呢個年代啲人可能用得太多手機，好少人有呢種能力，仲要識得反思好多嘢」

跟住果手機mon打字有一個好處

就係可以俾我一邊打一邊思考，
打錯又可以del咗再打
而且又冇人push我要打快啲，做快啲
而且一個人又可以保持冷靜

邊思考邊打字打咗好耐…….
都多謝你願意花心機時間去睇我嘅留言
謝謝巴打
所以先會表達得清晰咋

相信你同埋其他人都有呢種溝通能力
只係大家都礙於冇花咁多時間係清晰表達自己，
分析事物事情上，
將時間投資喺其他認為更有價值嘅地方

同埋都係向咁多位巴打絲打、相遇嘅人學習
向他人學習美好嘅一面
修正提升自己，助己助人

Me現實中講嘢比較「難聽」🙈
鍾意正中紅心，一語道破，用詞鋒利
而且講嘢缺少和氣 🙈
亦都會有意無意地容易批評一啲人事物
用自己嘅角度/價值觀去批評人
造成一啲不和

所以有時一啲生活上嘅難題危機係自己做比自己
而且內心都對過往嘅事情存有陰影，
背住過去嘅包袱做人，未能好好前進，
只能令自己暫時慢慢適應返生存

所以見到巴打咁勇於誠實面對自己嘅情況
反思自己，理性與感性並存
願意將睇嘢角度擴闊，參考吓其他人意見，
而唔會一昧將焦點投放喺自己感到唔開心嘅事情上，
積極處理
將遇到嘅挫折轉化為提升嘅動力，
無形中都給予了我些許鼓舞同勇氣
亦都令我有反思嘅機會
多謝巴打

- - - - - - - - - - - - - - - - - - - - - - - - -

「好多人只係過緊表面上嘅生活，
跟住人哋嗰套，但無真正諗自己鐘意啲咩，
咩嘢先令自己開心」

係呀，多謝一啲位高權重嘅人
多謝一啲填鴨式教育

有時候清醒嘅人更加會俾人話唔清醒，
唔好諗咁多，人哋講咩你就做咩，
自己先係異類所以覺得難以生存

之前機緣巧合下，
睇咗一篇出自魯迅嘅節錄：

「‘’假如一間鐵屋子，是絕無窗戶而万難破毀的，里面有許多熟睡的人們，不久都要悶死了，然而是從昏睡入死滅，并不感到就死的悲哀。現在你大嚷起來，惊起了較為清醒的几個人，使這不幸的少數者來受無可挽救的臨終的苦楚，你倒以為對得起他們么？”
　　“然而几個人既然起來，你不能說決沒有毀坏這鐵屋的希望。”
　　是的，我雖然自有我的确信，然而說到希望，卻是不能抹殺的，因為希望是在于將來，決不能以我之必無的證明，來折服了他之所謂可有，于是我終于答應他也做文章了，這便是最初的一篇《狂人日記》。從此以后，便一發而不可收，每寫些小說模樣的文章，以敷衍朋友們的囑托，積久了就有了十余篇。 」

所以如果自己有能力嘅話，時機啱啱好，
就適量地協助人哋 觀望下自己
協助佢哋理清返心入邊嘅諗法，
互相分享吓睇法，
睇吓點樣可以遵從自己內心的生活
建立生活上一點點嘅美好

體驗過比人好好照顧，
相信日後有機會，
你都有能力有經驗好好照顧他人
獨立幾好呀～
獨立嘅男人先有型又吸引