琴日叱咤記者會，一班2021年新人盛裝出席，仲玩得好開心，不過就唔見P1X3L三子。事後佢地喺IG story貼黑畫面大呻失望，流露灰爆心情，原來佢地都好想去。Phoebus話：「點解會係咁…一直也沒有一刻停止過，花光了力氣… 連入場券也無緣…」另一位成員George坦言覺得好難受：「看見一班新人可以同台出席，偏偏沒有我們…係真係難受…我地都想被認可為今年新人…」而Marco就話：「我都想嚟㗎。」佢地出道時曾經接受傳媒專訪，指會以拎叱咤新人獎同歌曲獎為目標，仲將呢個目標set埋喺電話wallpaper，睇嚟無得去記招對佢地都好hurt。
三子story一出，有唔少樂迷都覺得佢地好慘，指應該俾佢地出席樂壇盛事。其實P1X3L嘅派台歌《Braceless》有上過叱咤榜，已有頒獎禮入場券，1月1號可以出席。至於缺席記招，本台聯絡環球唱片，佢地回覆指P1X3L因工作撞期而未能出席叱咤記招：「P1X3L本身mark咗有拍攝工作為11am-9:30pm，時間撞咗記者會，所以未能出席。」
