GK/雕像討論區（4）

智孝bb豬 2021-10-25 12:24:06

https://www.toy-people.com/?p=58495

到底咩係GK？
可以睇咗以上條Link先

亦都有人概括有版權嘅叫雕像；
無版權嘅叫GK。

到底邊啲先有版權？
其實有好多工作室都有開訂同搵廠整GK賣。
大部分都無版權，質素就要視乎工作室。
有版權既唔算多，因為就算同一套漫畫版權都有細分，同埋要不斷續約，而且價錢不非。
最底會有一啲版權工作室介紹。

我亦都聽過好多師兄話GK不外如是，原來佢地係睇完信和用膠盒包裝既大膠「GK」，其實個啲完全唔係GK，最多叫「假景品」。

不過而家現時點同信和多左啲公仔機，SHOW返啲真GK出黎，相信有見過既師兄都會睇得出有名既工作室同真既GK真係靚到一個點。

當你想訂某款，但又心大心細，可以黎問下大家意見。
（不過請上圖）
請上圖
請上圖
請上圖

當你買左新款，除左自己開箱開心
（或者不幸中伏好嬲），可以黎分享一下。
請上圖
請上圖
請上圖

而家咁多工作室百花齊放，有好有唔好，
好就有良性競爭；唔好就侵犯緊版權，
同埋好易中伏或者呃錢。
有啲工作室官圖無限好，大貨係篤屎。
（想睇屎請參考鵝工作室嘅炎柱）
所以最好問下/做下research先買。
新入坑玩家千祈唔好再以景品角度比較。
你比嘅錢多左咁多，
唔好委屈自己買啲根本唔似樣嘅垃圾
—

以下會有啲簡單Q&A，歡迎有問題再問，
未必識答，但識答一定答。

1）講左咁耐，邊啲工作室有版權？
日漫就主要Tsume、開天、RYU、UA、鐵風箏、集美、Oc
美漫就主要Prime 1，XM，Sideshow
等等

2）邊到可以買到/訂到？
現貨就要問下代理，有時某啲款會有少量現貨
或者上Facebook d 二手Group徵。
由於涉及版權，灰色地帶，唔會有鋪頭明碼實價擺現貨賣（海關有機會搞）
有錯請指出。
-
訂嘅話請搵比較出名嘅代理，聽過太多騙案，
唔好貪平個少少。
我自己搵龍珠gk toys同專業gk訂開，
香港gk都係比較大嘅代理。
淘寶最好搵啲大店，龍珠Home，小智，猴子，萌布歐等。
如果想係gk zone hk訂野之前做少少資料搜集再決定訂唔訂。

其餘嘅代理自己決定，你可以照問有冇人訂過，但冇人寫到包單唔會走你數，亦都未必有人答你。
大代理都有可能走你數，不過so far頭幾間未聽過。

3）訂 / 轉單嘅流程係點？
訂：搵間信得過嘅代理，
比訂金代理>等工作室整>準備出貨>補款>速遞到付
-
轉單：同賣家傾好價錢，最好開個WhatsApp group，代理+買賣家，講明轉單，
到時準備出貨>補款>速遞到付

4）土地問題，啲盒掉唔掉好？
隻雕唔係好貴，或收藏價值高嘅話，啡盒就唔建議留（衞生問題）；彩盒就最好留，除非你肯定自己唔會搬屋/唔會賣/唔會移民，或者好瀟灑平賣都無所謂，否則無盒你要將隻野帶離屋企都幾困難。
但有啲盒成個洗衣機咁大，所以我自己就租倉擺盒，全部都有留盒。

想搵迷你倉自己search下xx區迷你倉就大把
想平就租啲偏僻啲，我就租開屯門，大約600蚊一個月。

5）全新同拆檢同拆擺有咩分別？買返黎爛左點算？
全新 = 字面解釋，全新，未拆過，連啡盒（即運輸盒）、彩盒
買得全新就預左有機會有損/缺件要自己負責，但可以享受一手開箱

拆檢 = 拆開檢查過齊唔齊件同有冇爛，但未砌過、未組裝過
最多試埋燈有冇問題

拆擺 = 曾經擺放過，會有塵/有組裝痕跡
其實砌過就一定會有痕跡，冇得避免

新買嘅諗住自留
建議就算無位拆出黎擺，都拆開檢查下
（除非一心轉賣，有人追求全新未拆）

發現有損，即刻通知代理同工作室講，通常售後都會寄返補件比你，由於香港寄返廠唔平，佢未必要你寄返爛件比佢。
-
二手買嘅照問下代理，太耐無得售後就只能夠課金搵手藝人/上色師傅修復。
唔想課金就自己買啲混合膠痴下，最緊要過到自己個關。

6）閒閒地都一二千，大舊啲就三四千，
我買返十零廿隻景品唔好？

當然閣下有自己嘅選擇權，我只能夠以過來人嘅經驗同你講，
當你開始買雕像，會發現完全唔同層次，
慢慢覺得景品買黎只會阻掟。
我間唔中都會買返一兩隻景品，
但對景品嘅需求愈黎愈細，
只會諗留返啲錢買雕或者點樣可以擺多幾隻。

當然閣下有錢有位嘅話，WHY NOT BOTH？

7）咩係翻模？

有啲工作室專做翻模
例如古羅、Tf toys、鼠先生

即係將啲有版權/炒起左既款，照炒照做多批黎賣，但價錢平一半甚至1/3。
簡單黎講即係A貨。質素就見人見智，但有啲的確幾可亂真

有啲人會睇唔起翻模；有啲人會認為自己收藏無乜所謂。
即係你想買隻撈，但又覺得貴，最後買隻A貨。
有無問題就視乎你自己價值觀。
但香港地gk市場已經算細，翻模嘅二手市場仲細。

智孝bb豬 2021-10-25 12:32:59

實物圖參考