今日我去咗睇醫生,確診咗自己有白蝕,仲要係全身大範圍擴散,比較棘手嗰種。白蝕係一種唔會傳染嘅皮膚病,唔會死唔會痛唔會痕,但會令人嘅皮膚隨機一撻撻白咗,因為個免疫系統唔知做乜九走咗去攻擊皮膚嘅黑色素,冇咗黑色素,嗰撻皮膚就會白咗,冇咗正常嘅膚色。如果生喺塊面到而且好嚴重,你可以想像到啲人會當你生痲瘋,唔想接近你,甚至暗中歧視你。
呢個病最恐怖嘅地方就係唔知佢幾時擴散,所以你會驚同灰,但偏偏情緒低落又會掉返轉頭刺激個身體,令到病情更加嚴重。
其實我前排Google過,都大約估到自己係有呢個病。今日確診咗,都係意料中嘅事,只係我估唔到原來病情遠比我想像中嚴重,之後醫唔醫得返,甚至乎控唔控制到病情,講真,我依家都冇咩信心,只可以盡量樂觀啲去面對。
我本身多數只係做cd-rom,但今日確診咗都忍唔住有感而發。原來你每日見到自己皮膚有正常膚色呢樣咁簡單嘅嘢,都係一種幸運嚟,並唔係一樣咁理所當然嘅事。老土啲講句,希望大家可以珍惜返自己眼前擁有嘅嘢,尤其係你哋嘅健康,因為原來喺呢個無常嘅世界入面,好多嘢都真係話冇咗就冇咗,你唔知仲有冇機會失而復得……