本來都真係唔想打擊同路人，但間屋既問題搞到我女朋友過敏入院（懷疑係油漆），而家都未完全康復；由於廁所過左3-4個月都一直有陣油漆味，想搵佢哋睇睇發生左咩事，點知佢地電話訊息都唔願意回覆！一如既往地不負責任，缷得就缷！為免再有同路人受害，我諗我點都要寫出嚟。
以下為最後一次對話… 可能block左我，藍剔都無。
小弟第一次置業，諗住會長住所以裝修裝得好少少同一世人一次梗係要經濟圈。格價格左幾間，冇揀到同事介紹（超後悔），冇揀到最平，揀咗深水埗楓樹街連埋賣咖啡同水泥產品嘅設計公司。
第一次見面，開左40萬連傢俬電器既budget（因為水電野唔多重做）。本來我都擔心連電器做唔到，但佢哋拍晒心口話冇問題，而且好似好有心會做好件事咁。因為新工好忙好難抽空，揾設計公司可以跟少啲，我同女朋友就決定俾啲機會年輕人。但呢個係惡夢嘅開始。
罪行總結：
1. 唔識project management。永遠有遲無早，俾唔到進度表，俾左亦唔會跟 （遲左幾星期都唔理，永遠話只供參考。）
2. 能力低，錯漏百出。3D圖只會出rendering，而且每間房只出一張一個角度。尺寸經常出錯，而且錯唔會認，仲夠膽鬧返個客轉頭。（最經典係鬧我無睇到施工圖出錯。做錯都算，施工圖俾客睇？！）做錯左野無能力執生，要我不停揾朋友俾補救方法同提供慳錢方法。
3. 唔識同無控制成本。佢地開頭話要等設計完成先可以最後確認條數，結果俾左個漏動佢… 如果唔係我頂唔順自己砌個excel表計返佢個cost，佢都唔知自己out budget左好多，仲一直話我過慮！
4. 電話長期唔會聽，一定要WhatsApp，寧願WhatsApp幾小時都唔肯講電話（打字都浪費曬啲時間）
5. 所謂material list係永遠都唔會齊，而且跟住買係唔會夠入伙（比如，沖涼房唔會有位掛毛巾，唔會有位放沐浴露，唔會有飯枱）。所有佢畫左上去既傢俬佢地都唔會揾，話係客人自理（你設計完但揾唔返件傢俬，咁設計黎做咩？）
唔識project management同能力低既例子：
1. 出第一稿設計圖都用左6個星期，仲夠膽同我講係我太心急唔係佢哋慢，對得起業界有餘
2. 不特止，為左可以早啲開始裝修早啲入住而早左半個月收樓（同佢地確認完之後先提早），但施工圖就收樓後半個月都未出到。我當時租緊樓，等於白交半個月租。最後又遲左一個月交場，我又白交多一個月。搬入既時候都未完成浴屏同大門口位。
3. 因為佢地出唔切圖，新年前揾唔到木器廠報價，結果要我自己不停揾朋友cold call木器廠報價。
4. 佢地未裝窗簾就叫木器廠跟圖上牆，但原來佢地啲圖無留窗簾位，結果要拆返再裝，錯曬次序。叫佢地負責返，第一句就話木器我外判左唔關佢事。爭執左好耐傾左幾次佢地先肯負責返。
5. 我一早問幾時要啲咩物料既時候又唔講，永遠到最後一刻就突然提出要求我幾日內準備物料唔係就要delay，搞到我成日要早走/請假。例如制面，一直問佢要幾多，要預時間英森送貨，一直都答唔到，一答完（仲要答錯）就話好快要用，唔係師傅唔裝，搞到我怕左佢食緊午飯都買左先。（更正既係佢搞錯左數量，搞到我補買要硬食多一次運費。）但結果最後臨入伙先裝制面。
6. 沒有監督工程。佢地啲師傅話佢地無出現過亦都叫唔到佢地上去。結果我每2-3日食飯時間飛的去監工一次，仲要每次都揾到幾個問題。
7. 錯漏百出，度尺錯左起碼四次。尺寸喺現場做唔返！第一日開工就俾我發現飯廳燈錯位！
8. 手工差。牆身一睇就知油唔夠，仲死拗話無問題；天花板未入伙就甩灰；廚櫃極度難開合。
9. 設計差。廁所塊鏡高到要1.65m以上先照到個頭，電視機條暗槽出口喺電視機下面，變左明槽；無端端話浴屏唔夠高要加返15cm, 但實際出到黎浴屏高過鏡櫃15cm，唔知做咩咁。
（其他詳情待續。先放一些交場當日狀況既相片。對了，佢地連交場都無出現過！）
（你無睇錯，交場果日係咩架生都無執！）
