【愛情】 我同女仔傾偈就會肚痛

其實我本諗諗住好似嘉豪噉，喺Grad din或者放榜呢啲最後一次見嘅日子表白，噉就唔使怕失敗之後會尷尬。可惜我嘅情況有啲唔同，考慮到Miss So已經開始諗緊同鄭Sir復合，我怕六七月先表白會太遲。


雖然今次就算佢哋一齊返，我都會照表明心意，但係如果可以喺佢哋復合之前表白，就有機會令Miss So唔使再黐返去個賤人度。


當然我又未去到咁有自信，覺得Miss So會喺鄭Sir同年紀差距之下揀我，不過阻止佢同鄭Sir復合只係其次，我想同Miss So坦白自己嘅心意先係最重要。


今次突然咁衝動，主要係因為受到首歌同嘉豪所打動。尤其嘉豪竟然肯放低自尊，再一次面對三年前嘅陰影，呢樣嘢令到我覺得自己並唔係孤單一人，喺追求幸福嘅路上，大家同樣需要鼓起勇氣。


就算最後唔成功，我相信自己都唔會後悔。


因為過去呢兩年，無論係我同Miss So嘅關係變好、贏畢業盃定係幫佢趕走鄭Sir，幾件事嘅共通點都係源於我肯行出第一步。


與其思前想後太多，倒不如行動先係最實際，只有確確實實噉行動，我先有機會換到Miss So一生嘅笑容。


臨時臨急決定表白，基本上我係毫無準備，唯有執靚仔啲個人，喺屋企組織吓到時應該講啲咩好。


唔經唔覺又過幾個鐘，天色入黑之後，我開始越嚟越緊張、行嚟行去等Miss So個Message。


直至去到七點，佢終於打電話嚟。

我哋最尾約咗係一間車仔麵鋪頭食嘢，雖然我好緊張，但係餐飯尚算正正常常，同佢傾吓佢返工啲嘢、我考Dse啲嘢，或者一啲無關痛癢嘅話題。


「你啲豬皮好似幾好食喎......」


「你、你攞啲囉。」


「嘻嘻，我都分返啲魚蛋畀你啦。」


望住我哋喺各自個碗度將啲嘢食夾嚟夾去，我個心好自然又開始猶豫好唔好表白。


萬一表白失敗，我就唔止冇得再成日同佢傾偈，仲好大機會失去埋分享嘢食呢啲咁平凡、但係又幾甜蜜嘅互動。


我盡力用上次大埔件事去說服自己，只要開始咗行動就唔會再猶豫，費事自己再胡思亂想。我甚至喺食飯嗰陣特登唔提起鄭Sir，驚聽完之後又會影響到自己。


因為我今次嘅動力比新加坡嗰陣更加大，所以唔希望自己會再次半途而廢。


「哎呀......都差唔多啦，你返到去記住早啲休息，執齊啲嘢呀。」


埋完單行出門口，Miss So伸住懶腰噉同我講。


「可、可唔可以陪我行多陣......？」


我膽粗粗噉問，因為跟住落嚟先係戲肉。

「好呀。」佢望一望錶，見宜家其實未算好夜，所以肯陪我行吓。


我哋行咗去北區運動場隔離個公園，入夜之後，呢個公園靜靜哋冇乜小朋友，係個傾偈嘅好地方。而且呢度仲有兩個鞦韆俾人玩住傾，可以順便幫我分散吓注意力。


Miss So充滿童真，好快就沉迷喺個鞦韆度，又同我講返佢啲童年舊事。當周圍嘅氣氛適當，我開始同Miss So傾得深入啲，當係喺我表白之前熱一熱身，費事一嚟就單刀直入。


除咗熱身之外，我亦等緊一個時刻。


夜色沉寂，公園只係得返我哋兩個。


俾周圍墨綠色嘅小樹包圍，抬頭只有一道淡雅彎月、細碎星斗之下，呢個公園好似變咗做屬於我同Miss So嘅小天地。


臨陣磨槍嚟講，呢個地方都算係唔錯。雖然比起新加坡嗰陣冇浪漫嘅海邊、清幽嘅沙灘、溫柔嘅大海作伴，但係最重要嘅，係有Miss So喺身邊就夠。


「你係咪聽日就考英文，所以好緊張......？」


「你...等、等我一陣先。」


我拎出一早準備好嘅膠袋，放心將累積落嚟嘅嘔吐感爆發。


因為上次喺新加坡，我印象中係嘔完之後就冇咁肚痛。難得我下定決心表白，我都唔想自己講嘢一舊舊。


其實我個膠袋本來只係備用，冇預計到自己真係又會嘔。我以為有上次嘅經驗，今次應該會冇咁緊張。


「哇點呀你，冇事呀嘛？！」


Miss So見我嘔埋出嚟，即刻過嚟掃我背脊：「放鬆啲啦，你畀太大壓力自己會影響發揮㗎。」


「冇、冇事...我一直都係好易肚痛，慣咗㗎喇。」我抹一抹嘴邊，見自己個冇再肚揦住揦住，終於放心進入主題：「Miss So呀......其實我有啲嘢想同你講好耐。」


「你慢慢講啦，係咪我畀到太大壓力你......？」


「我鍾意你。」


「吓？」


「我鍾意咗你好耐，係想你做我女朋友、想一齊行落去嗰種鍾意。」

雖然都唔覺Miss So會應承

嘔完咪好臭

挽歌之聲填啲詞真係好高質

同埋希望你都可以早啲放低佢啦

以我個人經驗又好少會有好濃烈嘅味

我放低咗架啦，仲結埋婚添
只係首歌勾起咗我嘅回憶，諗下諗下就爆喊

「唔好講笑喇男班長......」


Miss So前一秒仲以為我考Dse好大壓力，下一秒就聽到我表白，自然難以置信。


慢慢佢見我眼神堅決，反而開始有啲猶豫：「你...講真㗎......？」


我點一點頭，進一步向佢解釋：「其實我以前已經鍾意你，本、本來我見你鍾意咗鄭Sir，都諗住成全你哋，做返朋友就算......不過後尾見到佢點樣傷害你，又見到你想同佢復合，我覺得與其睇住你黐返去啲賤人度，不如博個機會畀自己去珍惜你。」


「你可唔可以......畀個機會我？」


今次應該係我六年以嚟，第一次夠膽直視佢雙眼咁耐。我嘅心跳不斷加速，期待緊佢會講出我渴望而久嘅答案。


佢以眼神回應我嘅眼神，我哋對望咗一陣，可以感受到佢視線有啲飄忽，似係有好多感情同言語組織緊。

「首先，我想多謝你嘅心意......」


過多一陣，Miss So終於開口回應我：「坦白講同你一齊喺幾開心，好多謝你成日支持我、又對我咁好。」


聽到呢度，我好明白跟住落嚟佢要講嘅嘢先係重點。


「不過，我一直以嚟都只係當你係學生......」


「你係咪接受唔到我細你太多？」


「我唔知呀...因為我冇諗過同你發展到嗰種關係，最多當你細佬噉看待......」


「細佬」呢個詞語，感覺上好似幾親近，甚至比朋友更加有過之而無不及。只係另一方面，「細佬」亦局限咗我作為類似屋企人嘅地位，令我只可以無限接近Miss So，但係永遠去唔到可以同佢拍拖嘅距離。


Miss So見我唔太開心，嘗試說服我去放低佢：「其實你仲係讀緊中學啫，話唔定你第時識多咗女仔，會發覺人哋更加吸引呢？」


「照你噉講，咪要識晒全、全世界啲女仔先可以鍾意人？」


「噉你宜家可能覺得我好......但係你諗吓過多幾年，我可能就老得好快，到時就唔啱你㗎喇。」


「我都未厭你年紀大，點解你要咁話自己？」


「你唔明呢...你值得搵得個更好嘅女仔。」


「你都值得一個識珍惜你嘅男人。」


我不斷反駁Miss So，係因為我真係好唔想放棄：「雖然我喺你眼中未必係嗰個男人，但係你喺我眼中已經係最好嘅女仔。」

同Miss So拗咗一陣，其實我明白我哋已經冇可能。如果要接受現實，我起碼想要一個由佢親口講出嚟嘅答案。


「咁係咪即係你唔會接受我？」我大概係因為開始打定輸數，所以喺佢答我之前就忍唔住喊。


「不如我哋等你考晒試先再傾呢個話題啦...我、我唔想影響到你......」


Miss So講講吓同樣控制唔到啲眼淚，以淚眼同我互相對望。


隔住眼淚望向Miss So，好似忽然令我更加清醒，明白到自己其實幾咁自私。如果我最尾Dse成續唔好，以佢嘅性格實會怪責自己，覺得係因為佢拒絕咗我而影響我啲表現。


更何況枉我仲成日記掛住Miss So嘅笑容，點知宜家令到佢喊嘅偏偏就係我。


「我、我明㗎啦......」我強忍淚勢，準備轉身離開：「放心啦，我好...專業嘅...我一定會繼續、盡力考好個試......」


Miss So講得咁清楚，我都冇謂要佢難做。


「Sorry…...」


臨別之前，佢只係好內疚噉道歉，怕講得太多會刺激到我。


當我自己完全消失喺佢視線範圍，終於控制唔住所有情緒、突然淚如泉湧。我本來都唔想喺條街度喊，但係我發現自己越去壓抑佢，反而喊得越激動。


呢刻我冇再感受到肚痛，而係覺得個心好空洞。

雖然都估到會咁但真係好sad

失敬晒咁都祝你婚姻美滿

happy ending都有好多種嘅

之後Miss So send message嚟關心我，或者係考試之前個別同我打氣，我都只係循例噉覆返佢就算。


坦白講，同Miss So表白失敗又冇話好影響我考試。


喺睇題目嘅時候，有時諗起佢幫我補英文嘅一啲回憶，的確會令我差啲忍唔住喺試場喊。不過我同時諗起佢點樣畀心機去幫我溫書、鼓勵我接觸多啲英文，佢除咗係我一個暗戀對象，亦係我一個好重要嘅老師。


為咗唔好辜負佢，我強忍住淚水，盡力去考晒淨低落嚟嘅考試。


表完白之後，我忽然覺得自己好似如釋重負。除咗Dse之外，基本上我已經冇乜煩惱，雖然我成日會諗住Miss So，諗緊佢會唔會同返鄭Sir一齊，但係我可以做嘅嘢已經做晒，事情最尾發展成點都唔到我控制。


喺考完Dse嗰段時間，我聽咗Claire姐講走去學羊毛氈嘅興趣班。我覺得既然每日會諗起Miss So，噉就不如索性整返隻羊毛氈公仔，當係正式紀念我同佢之間呢段感情。


我記得Miss So除咗鍾意毛毛，第二鍾意嘅係巴斯光年，於是就決定整隻巴斯光年畀自己。


Claire姐有講過，如果我繼續抱住呢種心態，之後應該有排都放唔低Miss So。


某程度嚟講，呢樣正正係我想要嘅嘢。


我並唔係諗住精神虐待自己，而係覺得就算我哋失敗收場，Miss So對我嚟講依然係個美好回憶，我唔想刻意去放低或者淡忘對方。


呢段旅程，係對我青春嘅最好見證。

推推推

「你真係唔再搵佢嗱？」


「唔、唔啦，好尷尬喎。」


「又係你自己話就算一齊唔到，可以做佢朋友已經好好。」


「噉...噉冇諗過之後見返個感覺真係咁奇怪呀嘛。」


喺我眼前一身文青打扮、眉清目秀嘅女仔，其實係Claire姐。


因為我Dse意外考得唔錯，好好彩噉比我入到中大嘅宗教研究，令我哋之間由網友提升到去同學關係，佢亦因為噉終於肯同我約出嚟見面。


我嗰班朋友方面，阿烽本身都有晒計劃，所以順利去咗台灣升讀大學。而嘉豪同木村各自揀咗啲Asso同HKDI嘅高級文憑，都係恃住搵嘢讀住先嘅心態見步行步。


「其實都幾可惜啫，好難得可以同個老師咁Friend。」


「少、少少啦。」


其實又真係幾可惜，尤其喺Grad din嗰日，我本來怕尷尬冇直接去搵Miss So單獨影相，諗住等多啲人搵佢嗰陣，先乘機去影返張留念。點知好多老師因為第日仲要返工，所以冇留到好夜就走咗。


偏偏Miss So喺臨走之前，竟然出咗去宴會廳外面同其他學生影相，結果我掛住喺入面同阿烽佢哋影相，完全唔知佢已經準備要走。

雖然我食飯嗰陣，佢都有行埋嚟我張檯度，同成檯嘅男仔一齊影咗張相，但係我哋始終冇個機會好嚟好去，感覺最後就只有嗰晚傷心嘅回憶。


講起Grad din，唯一嘅好消息係嘉豪竟然同阿Wing表白成功。


阿Wing究竟然係點解接受佢，我哋作為局外人始終唔太清楚。唯一可以睇得出嘅，係咩為之「一物治一物」，佢哋一齊咗之後嘉豪就被逼戒口，唔可以再喺阿Wing面前話其他女人係臭雞。


佢哋相處嗰陣依然會互相鬥氣......或者宜家應該叫打情罵情，總之整體上阿Wing係比較強勢，睇嘉豪平時嘴角含春嗰樣，應該以後都會俾對方食住。


不過作為朋友見到佢成功追求幸福，我點都會衷心祝福佢哋。


Claire姐撥一撥佢嘅深啡色長髮飲啖咖啡，見我忽然唔出聲，決定轉個話題：「係呢...噉其實你宜家同我講嘢係咪都會肚痛？」


「冇以前咁痛嘅。」


自從讀咗大學幾個月，我嘅社交圈子半推半就噉擴大唔少。無論係Ocamp、住Hall、Groupmate，我被逼要多啲同異性交流，長期間唔時就痛吓之下，慢慢減低咗我啲肚痛嘅嚴重性。


突然識多咗咁多朋友，我忽然明白Miss So嗰陣點解會話我第時識多咗女仔，就會發覺人哋更加吸引。上到大學之後，同中學嘅生活果然係截然不同，感覺好似去咗一個花花世界，你會探索好多未知嘅嘢，亦會見識到好多唔同背景嘅人。


可惜喺呢班人入面，依然冇人可以畀到Miss So嗰種感覺我。