【愛情】 我同女仔傾偈就會肚痛

推推推

推

「傻、傻咗咩......洗乜咁博命呀......」


佢猶豫噉接過獎盃，然後破涕為笑。


「唔該借借！」


呢個時候，有個校工突然趕到。佢手上拎住一個急救箱，應該係有同學去咗醫療室嗌佢嚟。


「哇，呢位同學搞咩嚟呀。」


佢望到我個傷勢之後覺得幾意外，一邊嗌我瞓返低，一邊拎啲紗布幫我止血。


「呃......唔覺意撞親條柱。」


「噉你仲有冇邊度唔舒服？唔使驚呀，我哋叫咗白車嚟㗎喇。」


「吓......咁大件事？你嗌咗白車嚟我仲驚喎。」


「佢哋話你啱啱暈咗呀嘛，去醫院檢查吓穩陣啲。」


個校工係噉聊我傾偈，似乎想睇吓我啲精神狀態如何。


冇幾耐，救護車好快就嚟到。由於Lunch時間都差唔多，所以大部份同學已經返晒班房，得返Miss So同啲隊友喺度。

啲救護員又係檢查吓我，然後將我搬上擔架準備抬入救護車。


「阿哥哥仔....可唔可以畀我同Miss講幾句？」


臨上救護車前我問。


「幾句好喇喎，唔好拖咁耐呀。」


個救護員幾好人，幫我嗌咗Miss So過嚟。


「做咩呀男班長......？你唔使驚喎，我會通知你屋企人㗎喇。」


佢依然仲係眼濕濕，好擔心我個情況。


「唔、唔係呀，我諗住答返你啫。」我揮一揮手示意佢貼埋嚟，費事俾太多人聽到。


「係......？」


不過佢貼得實在太埋，啲頭髮幾乎遮住咗我半邊面，甚至可以聞到佢啲洗頭水嘅香味。


「因為......」


我冇俾啲香味沖昏頭腦，繼續回應返佢啱啱個問題：「約、約好咗要一齊睇戲呀嘛。」


Miss So嚇一跳噉望住我，雙眼又再忍唔住喊。

「講完啦唔該。」


我笑住望一望Miss So，再同個救護員講。


雖然我講完之後，都有啲後悔自己睇落瀟灑得濟，但係我話晒幫手捧咗個盃返嚟，懶吓型應該唔係問題啩。


去到醫院之後，醫生幫我處理完個傷口，就叫我留喺醫院觀察返兩三日，搞到我屋企人以為好大件事。


「哎呀，我個仔仲要考Dse㗎，佢平時已經烚吓烚吓，宜家噉樣撞一撞會唔會再蠢啲㗎？」


「放心喇伯母，留院只係方便我哋檢查㗎啫，因為一啲腦部受損可能會喺三日到一個月內先出現，但係現階段睇你個仔係冇大礙嘅。」


總之因為噉，令到我呢個星期六日要留喺醫院渡過。啲醫生護士通常會隔四個鐘同我做一次檢查，照吓隻眼呀、測試吓啲動作同問吓我問題噉，我除咗有啲暈同埋會作嘔外，基本上冇咩問題。

推

推

如果要數嘅最大問題，就係喺醫院入面真係幾悶。


尤其我撞親個腦，啲護士通常會叫我休息多啲、唔好用咁多腦，就算睇電視都唔好睇咁耐，所以我大部份時只可以攤喺張床度、放空晒成個人。


不過一個人只要冇嘢做緊，個腦好自然會搵啲嘢嚟思考，我不自覺諗起琴日場比賽，嘗試搵返最尾一刻嘅細節。


始終我難得可以做到絕殺英雄，偏偏因為忍唔住匿埋眼去頂波，再加上撼埋落條柱度暈咗，令到我對自己點樣入波係完全冇印象。


更唔好彩，當時現場竟然係冇任何觀眾拍緊片。結果我對於自己人生中嘅重要一刻，只可以透過其他人口述嚟得知實際情況。


而且呢個星期六，本來我同阿烽佢哋約好咗，只要我哋贏到冠軍就會去網吧同打邊爐慶祝，順便試吓拎個獎盃嚟熝肥牛食。宜家我要住院嘅情況下，只可以無奈睇住佢哋Happy。


「唉，點解我咁慘㗎。」


望住阿烽喺個Group度Po晒相話出發，仲特登影住個獎盃，搞到我忍唔住開聲呻吓。

「後生仔冇咩病痛算係噉喇，呢度大把人仲慘。」有個姑娘語重心長噉講，佢本來喺隔離照顧緊個老人家，但係聽到我講嘢之後，忽然擰轉頭聊我講嘢。


唉，瞓得太耐直頭當咗做自己屋企張床，唔覺意講埋啲心聲出嚟。


「有個同你差唔多年紀嘅，要喺度住咗成幾個月添，噉你有咩咁慘呀？」


「呃......贏咗場比賽冇得同啲Friend去慶祝？」


「哦...呢啲小事喇，之後再補返咪得囉！」


之後俾佢Chur住傾咗陣偈，我唯有不停附和，最尾再靠借尿遁避開佢啲呃偈傾。雖然有啲姑娘同你吹吓水係會冇咁悶，只係呢刻我實在未有心情。


返到去間病房，我差啲以為自己入錯地方。因為喺我張床位前面，竟然圍住咗四、五個人喺度。


其中一個，當然係我幻想得最多、最希望見到嘅Miss So。


「你哋......？」


我細細聲試探吓，始終怕自己係咪撞親個頭認錯人。

「去咗邊呀男班長，想偷走呀？」


「梗係嚟睇你死得未啦，唔通嚟參觀咩。」


「行得走得，即係冇咩事啦。」


面對佢哋一人一句，我唔識反應噉慢慢行返自己張床。


然後，我見到我張檯上面，擺咗座我哋琴日贏返嚟嘅獎盃。


「你哋.....唔、唔係去慶祝咩？」


明明阿烽仲特登喺個Group度晒命，宜家忽然間又咁人齊出現喺我間病房，我開始以為自己有精神分裂。


「你琴日咁威，梗係預埋你一齊喇。」Miss So撳住我兩邊膊頭，輕輕將我壓落張床坐喺度：「喺我嗌埋佢哋嚟㗎，你個頭見點呀？」


「好、好好呀......」


突然間咁多人嚟探我，梗係好啦。


當我感受到Miss So溫暖嘅雙手，我先肯定自己唔係出現幻覺。對於眼前呢片景象，我自然有種感動蘊釀喺心頭。


之後我哋圍埋一齊聊吓偈，講返琴日比賽啲細節同我撞暈咗之後嘅事，話晒呢度係醫院，我哋總唔能夠喺度開Party。


佢哋臨走嗰陣，我哋仲一齊同個獎盃影咗張相。


雖然比起獲勝嘅球場上面，喺醫院病房影團體相係冇咁型，但係望住我頭上嘅紗布，呢個背景對我嚟講亦別具意義。


趁阿烽佢哋去咗睇張相影成點，Miss So喺身邊搭住我膊頭，細細聲講：「多謝你咁盡力呀，男班長。」


佢個笑容感覺幾安慰，可以隱約睇得出佢對我有幾分驕傲。


坦白講，我冇諗過自己會成為絕殺嗰個人。由訓練去到實戰，一路以嚟都係阿烽負責指揮大局、助攻助守。要數英雄嘅話，我諗班上面嘅人本身毫無疑問會覺得係佢。


不過全靠Miss So，如果唔係我喺球場上面醒起佢嘅格言，去到最後一刻依然盡力而為。恐怕我都唔會有嗰個突擊戰術嘅念頭，甚至係最尾嘅埋門衝頂。


要數贏波英雄嘅話，Miss So絕對佔一席位。


「我多謝你就真......」


我細細聲回應返佢，費事俾其他人聽到：「不過你諗定想睇咩戲喇喎，我、我就咩都啱睇嘅。」


講到贏波，點可以唔再提一提我哋之間嘅秘密。


就算去到贏咗冠軍，阿烽佢哋依然唔知我同Miss So有呢個約定。


「唓...唓！」佢好似有啲唔忿氣，細細力打咗我一吓：「等你做晒我啲Mock卷先講，你話同我瘋狂補英文㗎！」


「哇，乜、乜你咁奸茅......」


望住Miss So怕羞又含蓄嘅笑容，我覺得自己終於成功喺最後一年，留到個開心、特別嘅回憶畀佢。

今晚冇文抱歉

推推推

經過三日檢查，醫生見我冇咩大礙都正式批准我出院。雖然之後仲要返去覆診，但係起碼可以正常返學，唔使驚學習進度有好大落後。


重新返到學校，額頭上面嘅紗布令我吸引咗唔少目光。當中識得我嘅同級同學大約知發生咩事，見到我嗰陣會特登行埋嚟表達敬意。


不過冇諗過連佢都會過嚟。


「你個頭......冇嘢呀嘛？」


鄧逸俊趁我小息得一個人嗰陣，走咗過嚟關心我。


事實上，自從選班長之後我同佢基本上係冇乜交流。可能因為佢心入面有些少不滿輸咗俾我，又或者因為我哋本來就唔係好熟，總之佢冇主動去迴避我，同樣哋亦冇主動去同我有任何交流。

「冇事，皮外傷啫。」


同佢唔太熟嘅關係，令到我哋就算同樣係男仔，依然會有種尷尬感覺：「贏到個冠軍畀Miss So就冇所謂喇。」


入咗醫院嗰陣，其實我無意中醒起一樣嘢。


我記得中一班際排球嗰陣，我哋班經過Miss So半場鼓勵，成功靠鄧逸俊絕殺對手反敗為勝。嗰次之後，鄧逸俊望住Miss So嘅就眼神唔同咗，甚至應該話佢喺嗰次之後，先開始同Miss So越嚟越Friend。


我今次個情況，同佢嗰陣可以話有異曲同工之妙。


一樣受到Miss So嘅鼓勵振作，一樣因為噉而成為絕殺對手嘅關鍵。


我忽然明白，自己同鄧逸俊喺呢方面係幾相似。

唔知佢之後成日接觸Miss So，係因為同我一樣鍾意咗佢，定純粹覺得佢係一個好老師。無論佢係邊一種感覺，至少我宜家或多或少都明白佢當時嘅感受。


因為大家有類似經歷，所以我對佢忽然又少咗份敵意。


「係幾犀利嘅你嗰吓......辛苦晒。」


「唔使客氣，之後排球靠返你哋喇。」


鄧逸俊依然唔太自然，但係可以睇得出佢同樣對我少咗份不滿。


去到之後嘅班際排球比賽，大概係因為我嘅烏鴉口，我哋最尾係輸咗俾C班，而班際籃球方面，就輸咗俾擁有眾多籃球隊嘅E班。


點都好，其實我唔太Care呢兩方面嘅成續，話晒我已經完成咗對Miss So嘅約定，排球籃球贏定輸我都冇咩所謂。


最重要嘅，當然係可以單獨同Miss So出街。

推

講起個約定，我哋之後幾個禮拜仲未去到睇戲。為咗追返落後咗嘅進度，呢段時間我要馬不停蹄噉做Miss So啲額外功課，再加上其他學科催逼，搞到我要喺星期六日抽啲時間出嚟都唔係咁易。


尤其難得可以同佢單獨出街，我又唔想淨係睇套戲食餐飯咁單調。


最後因為臨近聖誕節，我哋約咗喺Boxing Day嗰日出街，而平安夜同正日就留返畀佢同鄭Sir。


雖然已經過咗正日，但係我諗到時應該仲會有些少節日氣氛，等我可以FF吓同Miss So過聖節噉。


不過估唔到，我哋呢日個約定最尾都係去唔成。


因為喺聖誕節前夕，發生咗一件事。

Miss So發現鄭Sir出軌。


對於實際發生咩事，我其實仲係一知半解，唯一可以肯定嘅係，之後嗰日佢理所當然唔會有心情同我去街。


俗語成日話：「有咩慘得過食屎......就係食兩舊屎。」宜家Miss So某程度上驗證咗呢句說話，當你以為跌一次已經夠痛，實在好難想像個天要你再跌多一次。


我曾經聽Miss So講過，佢當初覺得鄭Sir某程度有種白馬王子嘅感覺。當佢第一次俾人出軌嗰陣，鄭Sir就恰好出現，令佢喺絕望之中重拾返一點希望。


尤其當Miss So因為工作需要，成日要掩飾自己內心嘅真實情感。偏偏鄭Sir竟然可以睇穿偽裝，察覺到佢唔開心之餘仲會主動氹吓佢。


久而久之，鄭Sir就好似太空入面忽然出現嘅氧氣，令Miss So可以賴以為生、慢慢有返動力。