電鋸人+炎拳 深入討論 [長文]

特登開post既原因，係想俾一d認為呢兩套漫畫唔係表面上咁簡單既人，可以深入咁討論

我覺得藤本之前既解畫，只係俾緊提示我地向某一個方向諗，叫讀者去發掘剩餘既意思

大家可能有唔同答案，即管講下自己既諗法，當對下答案

答案即使唔啱都冇所謂，引用番某個巴打所講：

雖然人地嘅睇法你未必同意，但經過自己思考再講出黎呢個process先係最重要，亦代表左你係有認真睇套作品

我知道有人唔同意以上觀點

有人可能會覺得以讀者角度無法猜測作者既用意，繼續去猜測係「藍色窗簾」同「過份解讀」

當然某些猜測未必啱，但如果你想參與討論去質疑解讀本身呢個行為既意義，咁電鋸人07會適合你多啲

其實冇話邊一個post好啲，開新post只係希望兩邊人都可以唔駛將就咁討論，方便大家

做個開場白先:

如果你有睇過電鋸人07 post https://lih.kg/aGMGqRV #22 ，而又同意藤本安排槍之惡魔過早出場係別有用意，咁你就會發覺藤本唔會為cult而cult，佢係cult得黎又會帶出某d訊息，呢個就係最正既地方。

只要有深入思考，就會留意到藤本既其中一個用意:
-打破我地固有既價值觀同直覺

如果我一開波就話，電鋸人想講出人類渴望支配，唔想要自由，應該冇咩人相信

所以我先去打長文，以槍之惡魔既過早出場既奇怪性作切入點，再誘導大家去我對主題既理解

我覺得電鋸人另一個主題係同母愛、孩子成長有關，又即係個人/家庭層面去講支配、自由、生存、愛

不過，喺解釋之前，我需要一個切入點，就好似喺社會層面去講「支配 vs 自由 vs 生存 vs 愛」一樣，需要槍之惡魔作切入點

而個人/家庭層面既切入點係七個武器人

由於呢篇係超級大長文，所以我寫番個大綱先，廢時大家盪失路

1.七個武器人打得唔好睇既原因
-mkm既真正目的
-電次幾時察覺mkm既真正目的?

2.點解mkm想被食?
-mkm實現唔到願望既原因
-mkm係一個點樣既人?

3.點解電鋸人主題之一係兒子成長同母愛?
-mkm被定位為母親既可疑之處
-藤本想講出既故事

好多人都批評打七個武器人嗰part唔好睇
其他人會咁反駁：
1. 打鬥唔係重點，所以秒殺
2. 要突顯電鋸狗好勁，所以秒殺

我覺得
1. 係啱，所以槍之惡魔被秒殺

2. 唔啱
-槍之惡魔vs mkm既打鬥好精彩，顯示到槍之惡魔好勁之餘，又突顯到mkm屈機到可以壓倒性地勝利
-咁即係話，藤本有本事畫到一個精彩既實力懸殊既對戰，但去到電鋸狗 vs 七個武器人，就刻意畫到好雞肋

點解要咁做？當然有原因

再仔細發現，就會發現mkm有好多矛盾既地方

表面上，mkm口中所講既目的同priority (第84話) 係：
1. 想改造世界，所以要電鋸狗心臟，打敗電鋸狗
2. 假如打唔嬴，想被電鋸狗食

但mkm既行動同佢既目的不相符
矛盾位:
1.
電鋸狗現身後，mkm既刻擺pose迎接被殺 (第85話)

2.
Mkm叫出七個武器人，被電鋸狗秒殺完一輪，知道電鋸狗唔會食佢，先將電鋸狗降Lv，然後出大技攻擊電鋸狗 (第89話)

矛盾既原因:

1.
如果mkm優先目的係改造世界，咁mkm應該喺電鋸狗第一次殺佢之前，就要削弱電鋸狗既實力，將佢降Lv。未降Lv之前，電鋸狗比mkm強。電鋸狗有心既話，一早就食左mkm，mkm就支配唔到人間

2.
Mkm既大技本來就比七個武器人強，所以同槍之惡魔打既時候、以及打到電鋸狗重傷時，都係直接放大技，唔用武器人。mkm做咩一開始要搞個大龍鳯？

咁即係話，mkm根本係另有目的

而電次就係靠搵出佢既真正目的，去打敗mkm

首先要了解電次點樣打敗到mkm
電次既思路係：
-即然攻擊對mkm冇效，咁不如破壞契約
令契約失效有兩個方法
1.令日本首相放棄契約
2.令mkm放棄契約

Mkm既契約內容係：
-只要mkm改造世界，就可以用全日本人既命黎幫mkm回血

電次最後用「食mkm」既方法去令mkm放棄改造世界，從而令契約失效。
咁即係話，電次已經睇穿左mkm矛盾既地方
Mkm既first priority從來都唔係改造世界

所以mkm真正既目的同priority 係
1. 被電鋸狗食
2. 假如電鋸狗唔食自己，就打敗電鋸狗去改造世界

Mkm行動既正確解讀
1.
Mkm一早就希望被電鋸狗食，所以擺定pose，希望用最好既姿態被食。

2.
Mkm派七個武器人出場，係想試探電鋸狗係咪想食自己。知道電鋸狗唔會食自己，實現唔到第一目的，跟住先切換成認真mode去打電鋸狗實現第二目的

七個武器人出場嗰part唔好睇，係因為mkm一開始既時候根本就冇諗住認真打

mkm一開始就已經求死
估計佢當初上人間就係為左揾電鋸狗，想被佢食
由於電鋸狗失蹤，達成唔到第一個目的，所以退而求次去達成第二個目的，即係改造世界，同左日本首相簽左契約

藤本冇解釋點解mkm咁想被電鋸狗食，淨係好簡單咁交代佢既願望
-支配惡魔既願望係建立對等關係同親人般既感覺

電鋸狗所講既「雖然方法不對，但她想創造那樣既世界」
我覺得那樣既世界係指mkm可以得到親人般既感覺既世界，而你會發覺，被mkm支配既人通常都會好鍾意mkm，例如:
-秋
-七個武器人

既然都有親人般既感覺，點解仲要渴望對等關係?
我覺得真正既親人關係，係會展示自己軟弱既地方，會互相扶持，分擔對方既煩惱

但係，mkm既支配發動能力條件係:
-對方覺得地位比mkm低
mkm所創造既世界中，佢係支配者，佢不能夠對被支配既人展示自己既軟弱，否則佢就不能夠支配別人。

所以，mkm靠支配別人係唔會得到親人般既感覺。要有親人般既感覺，就要對等關係

電鋸狗講出支配惡魔實現唔到願望既原因:
-只能用恐懼既力量建立關係

但明眼人應該一眼就睇得出，其實mkm只要唔用力量，就可以建立到對等關係。
就算地獄既惡魔知道佢真正既身份而怕左佢，但mkm可以喺人間同人類建立對等關係，電鋸狗同天使惡魔就係其中例子，可以同人類融洽相處。
而且佢個樣同人類冇分別，憑外表，人類都唔知佢係支配惡魔
咁點解mkm仲要去支配人類?

仲有，mkm明明有願望，點解唔去實現，反而想被電鋸狗食?
被電鋸狗食其實即係永久死亡，冇得死後輪迴
咁即係話，mkm其實係尋死?

可能會有人話，mkm唔係想死，只係想透過被電鋸狗食，同電鋸狗融為一體，成為不分你我既狀態，實現對等關係。

就算當呢個答案係啱，咁點解mkm要用咁既方法去實現願望? 唔去使用支配能力，同人類好好相處，唔係更加直接又簡單咩? 仲要可以唔駛死。

咁即係話，mkm想被吞噬既原因，好大機會係佢其實係想死。

我覺得人唔會無緣無故想死，人係想結束痛苦而尋死。
Mkm雖然係惡魔，但佢竟然嚮往親人般既感覺，有咁人性化既一面。
所以我有理由相信，mkm想死既原因，同現實中既人一樣，都係想結束痛苦
咁mkm點解覺得咁痛苦？

由呢度開始，就係「藍色窗簾」，我自己對mkm既理解

喺了解mkm之前，我想講一下我對炎拳入面既桑既睇法
我覺得mkm同桑有相似既地方
如果明白桑既心理，就可以對mkm既了解更加深入

桑咁崇拜阿格尼既原因，源於喺奴隸國家既遭遇
-被極度不人道地對待
-被嚴重剝削
-自己完全無反抗之力

我認為桑喺呢個經歷入面，徹徹底底地感受到自己既渺少，感受到巨大既無助感，所以非常渴望有強大力量可以保護佢、幫助佢

呢個遭遇導致佢即使擺脫被奴役既日子，佢都依然咁渴望有神一樣咁強大既存在可以保護佢
例如
-桑在第21話明明被奈奈特直接親手救番，但將奈奈特睇成阿格尼，原因係因為佢渴望強大既阿格尼去救佢
-十年後，桑發覺眼前既阿格尼已經唔係當初會保護佢既「神」，所以要打敗佢，仲要將打敗阿格尼演譯為「神」既試驗，覺得通過試驗後「真正」既阿格尼就會出黎。

由於桑強烈渴望強大既人「神」，所以不會容忍別人質疑自己既「神」既強大。例如:
-奈奈特講阿格尼係可憐人，桑即刻想制裁佢 (第74話)

強烈渴望強大，就會變相看不起比自己軟弱既人。當弱者比自己得到更多「神」既關注，桑就會強烈地妒忌。
-桑捏住失憶既尤達，講「你獨佔住阿格尼大人既愛」(第75話)

我同時都認為桑希望弱者服從自己，從中感受到自己既強大，消除軟弱既不安感，所以佢都會討厭弱者反抗自己
-桑做教主，要人信阿格尼教(呢度我純粹想客觀地指出桑有咁既傾向，並唔係話桑有壞既目的）
-失左憶既尤達(弱者)阻止桑殺奈奈特，桑即時憤怒 (第75話)

由呢度，我地可以了解到崇拜強者既心態，源於體會到自身既渺少，感到無助，對自己既軟弱有強烈自卑感
所以都想弱者跟隨自己，從中體會自己既力量

巨人入面既弗洛克都係屬於呢一類人
而我覺得mkm係走向極端化既桑，並具侵略性同自毀性

雖然，漫畫入面冇講到mkm覺得自己好渺少，但我地知道mkm同桑一樣，都係崇拜強者
證據:
-崇拜電鋸狗

同時，mkm討厭強者既軟弱恣態
證據:
-mkm對電鋸狗為保護小小紅而重創感到失望 (第89話)

Mkm討厭弱者反抗自己
例子:
-天使唔帶秋去殺reze
-Reze想帶電次離開
-對power復活感到憤怒

Mkm同時鄙視弱者
證據:
-mkm講:「我喜歡人，就係人喜歡狗，忠誠容易擺佈，聰明又愚蠢，光看著都覺得有趣，而且非常喜歡我」(第89話)

以上就係我覺得mkm同桑相似既地方
所以，我推測mkm內心其實都覺得自己好渺少，感到巨大既無助感。

我地唔知mkm以前發生咩遭遇，但地獄入面有根源惡魔，佢地比mkm更加強大，有可能令mkm感受到害怕不安。
mkm自身既力量可能唔係咁厲害，佢厲害既原因係佢所支配既眾多惡魔能力。我懷疑mkm單靠自身既力量，係無法打敗槍之惡魔。
mkm為左令自己變得強大，只有支配更多惡魔。而支配所得到既力量會為佢帶來安全感，幫佢擺脫不安感。

Mkm既困境
我估Mkm既自卑感好大，覺得自己好軟弱，需要支配更多來得到安全感。但支配成功只能帶來一時安全感，自卑感又好快湧上黎，所以又要繼續支配更多，直至冇晒強過佢既惡魔。但究竟呢件事係咪真係做得到？呢點又做成左mkm既絕望感，令佢再一次體會到自己既渺少

MKM既願望
Mkm渴望親人般感覺既原因，係想擺脫來自渺少不安感，想得到關愛，但由於mkm自卑感太強，控制唔到支配慾望。mkm支配強迫症就係來自於對自身軟弱既不安感。
所以mkm冇可能同人建立平等關係，無法得到親人既感覺

求死既mkm
Mkm 察覺自己既困境，知道自己冇辦法去實現願望，感到絕望，想自殺結束痛苦。

Mkm對自己被電鋸狗食既睇法：
1.
終結自己既性命

2.
我認為Mkm主觀上覺得電鋸狗係強者，同電鋸狗融為一體，代表化為力量既本身既一部分。mkm本身追求力量既原因源於認為自己缺乏力量而感到不安，所以當成為力量既本身就可以消除不安

咁即係話，mkm既願望係想有親人既關係
所以首先要建立對等關係

但係佢控制唔到支配慾望
強烈既支配慾源於體會自身既渺少所造出黎既無助感，要靠支配弱者得到力量

Mkm發覺佢既矛盾，感到絕望，所以去尋死

關於mkm尋死既疑團已經解開

但電鋸人仲有幾個疑點

其中一個係：點解要將mkm定位為母親？

將mkm定位為母親，係想突顯電次就算被mkm玩9，都咁愛mkm?
但點解我地唔覺得佢地之間既母子感情唔深刻？

藤本借mkm把口，講出佢將秋定位為哥哥，將power定位為妹妹
由電次、秋同power相處，我地都好明顯感受到佢地家人既關係。所以，後來秋同power死左，我地明白電次好傷心既原因

藤本有能力去用好少既篇幅，交代到角色既心境變化同角色之間既關係，講得到秋原本好討厭惡魔同魔人，後來好變成好關心佢地既「哥哥」，為左佢地放棄報仇

既然藤本有本事做得到，咁點解一開始佢唔將mkm同電次之間既「母子」關係描述得更明顯？

如果藤本佢唔親口講電次一直喺mkm身上追求母愛，我諗冇咩人會發現到

講左咁多，藤本分別將秋定位為哥哥，power定位為妹妹，而佢又好清楚咁展示到佢地既親人關係
但當將mkm定位為媽媽時，佢又特登整到好唔顯眼，原因係點解？

首先，我地對母子既一般理解係母親會疼愛自己既兒子，無時無刻都會關心佢同會擔心佢

但mkm同電次明顯唔同。
我地好明顯睇得出mkm係唔愛電次，但電次好似著左魔咁好鍾意mkm
我覺得藤本係有意想刻劃出非一般既母子關係

咁即係話mkm係代表唔愛自己孩子既母親。而mkm本身係支配惡魔，而佢既支配慾有又好強，所以mkm係代表支配慾好強，但唔愛自己孩子既母親。

而電次係代表好鍾意母親，渴望母親支配既少年

進一步解釋之前，同大家整合番我目前對電鋸人既睇法先:

我覺得電鋸人由兩個角度分別去睇支配、自由、生存、愛
1.社會角度: 宏觀上，去睇人類整體既取向
2.家庭/個人角度: 以輕鬆搞笑既方式，暗喻一個家庭慘劇: 鐘意母親既少年+支配慾強既瘋狂母親

呢兩個角度講出：

社會角度: 人渴望支配
個人角度: 少年渴望母親既支配

社會角度: 人只有生存受到威脅，先會加入自由既一方，反抗支配
個人角度: 少年發現自己正受到母親既扼殺，被迫以傷害母親既方式，脫離支配

社會角度: 人可以為愛而活下，為愛而反抗支配，所以支配唔能夠容忍愛
個人角度: 母親要少年只愛自己，對自己絕對服從，所以母親要阻礙少年既戀愛

關於社會角度既詳細討論:
-電鋸人 07 https://lih.kg/aGMGqRV #22 槍之惡魔過早出場既意圖

-電鋸人 07 https://lih.kg/aGMGrmV #34 reze初戀故事

留名先

但點解藤本要特登去講一個家庭慘劇？

退回一步諗，點解唔一開始直接將mkm定位為一般既壞女人、玩弄人地、壞版本既reze?

由mkm尋死既原因，我地知道mkm都係一個可憐人，但點解藤本要將mkm設定成咁既奸角，同時又將佢定位為母親？

我諗到既解釋係：
藤本想借mkm想殺電次既故事，想講出一個無情母親背後既可憐故事。佢照顧兒子既目的並不是出於愛，而係滿足自己既支配感。佢鐘意支配兒子既原因，係想透過支配弱者中，感受自己既強大，擺脫自己既自卑感。不過其實呢類人唔只唔鐘意弱者，佢地其實連自己都唔鐘意。因為佢地覺得自己都係弱者。

其實點解成套漫畫入面，藤本用咁少篇幅去講mkm既願望?
我地都係由電鋸狗把口中講出黎，先知道佢渴望親人既地方，然後再番睇電影嗰part先留意到。
我覺得藤本有意帶出
-我地一般會認為父母傷害同虐待自己既兒女，係純粹因為殘忍冷血既本性。但其實呢D父母，自己本身都可能受緊痛苦，唔識得用啱既方法去治療痛苦，不過常人一般難以察覺