《我專門幫人擺分手和頭酒》（分手的意義是什麼呢？）[3]

阿濤同歐雪拍咗咁耐拖 但唔知對方屋企情況?

就好似有啲人鐘意曖昧但唔想拍拖
確認咗關係會有咗責任？束縛？框架?
有咗依啲恐懼感情自然會變質

同埋幾多人會二十幾歲就傾結婚

太把人拍幾十年拖唔結婚

唔想結可以講出黎

個問題係佢完全冇負責任嘅意識

結婚要負責任，拍拖就唔駛?

一句冇感覺就走左去

真係好自私

sorry眼瞓
係二奶！

怕sad end唔敢再追落去
不過呢幾日諗諗吓阿濤同歐雪會一齊係因為似
阿濤家庭唔完整
所以歐雪係破碎家庭長大
果然

不過怕commitment又走去同人拍拖嘅人
都係仆街！係自私精！
呢啲人應該孤獨終老！
刀片都廢事寄俾歐雪呢啲垃圾人

巴打誤解咗 可能我表達得唔好

我係比喻有啲人當要進一步關係就會因為心中既憂慮而卻步(你問點解變咗冇感覺) 唔係話拍拖唔洗負責任

而結婚等唔等同負責任就值得討論 最緊要雙方有共識

印象中筆者好似係寫歐雪唔清楚自己有恐婚依個問題？

個重點唔係佢知唔知自己恐婚，雖然唔知自己恐婚都係有啲怪

一句冇感覺就將所有責任都撇清，又唔去諗原因，唔諗下會傷害到人

感覺上就係佢覺得好似拍拖唔駛負責任咁

佢自己都講得出鐘意拍拖多啲，一開始講清楚已經唔會咁易傷害到人

呢個係傳統帶落嚟嘅
東方(中、日、韓)傳統本來都係重視整體多於個人
社會>家庭>個人
所以唔好話女性, 其實男性好多都係咁
當然 因為以前重男輕女
女人更多要為家庭犧牲
所以「自我」呈現嘅機會更低係好正常

咁時代進步咗
其實情況係改善緊 女性亦都多咗可以過自己想過的人生
但單單講上一代 確實係真嘅

我明白巴打嘅感受

雖然故事會再解釋
不過都覆下先
其實呢一刻大家都睇故事咁睇
所以好自然覺得好清楚
但現實之中
其實好多意念都收收埋埋 即使你有好多行為做咗
但係其實你都唔會覺得同心底有某啲傾向有關

所以故事始終係故事
現實情況 可能阿濤問一大輪 歐雪都唔會覺得自己對婚姻有咩特別感覺

而世界上面其實好多人都係咁
唔夠認識自己就會去拍拖 其實真係好常見
或者係 自己覺得好認識自己
就好似歐雪 佢都覺得自己認識自己
因為對婚姻恐懼呢件事係一個盲點嚟

所以如果世界上個個人都真係可以一眼睇通自己所有問題
輔導同心理學就可以全部失業
故事之後會再講多啲 所以呢刻唔解住 但希望係明白我嘅意思

好彩你諗完有翻嚟追

故事會再解釋架
睇落去就知點解

我會繼續屌歐雪

但我唔明點解阿濤同歐雪拍左6年拖唔知歐雪屋企背景咩感覺好似阿濤係盲縱縱走去求婚然後觸礁

歐雪固然係仆街，但其實同阿濤分咗手之後，佢係有意識去搵一啲佢覺得無乜可能會同佢求婚嘅人拍拖。

唔覺得佢真係唔知自己恐婚，只係一直扮晒嘢話無原因，唔想解釋咁多。

歐雪無可能洗白到啦
當初聲都唔聲就走咗去
有病又點？咩責任感都無
仲要無悔意
正垃圾

依家男主幫佢 其實都係幫自己解心結咋
臭西瓜

我屋企都係離婚 所以可能我都會好似歐雪咁

冇責任感無啦啦走咗去真係最乞人憎
有咩又唔同阿濤講，如果佢有提過佢唔想結婚都叫好啲
依家分分鐘係佢令阿濤覺得可以結婚，但係一提結婚佢就粒聲唔出走咗去
一啲責任感都冇

有咩原因都好，阿濤的的確確係受左傷

就算佢冇心都好

雖不殺伯仁，伯仁卻因你而死

已經做左仆街

好似搵到真正既原因點解會分手...

樓主我今晚外出 覆唔到大家
之後慢慢覆

不過文會照出 十一點見

（五十七）失落的浪漫（上）
喺我嘅引導之下，歐雪講出咗佢屋企嘅故事。

下面嘅內容，就係我代歐雪整理好嘅故事。

歐雪，從小開始一出街都會受到路人嘅注目。

無計，面圓圓嘅大眼妹，可以話喺世界通行嘅「可愛」定義。

所以出一次街，可能佢會收到路人送嘅糖、得到好多人嘅稱讚、又或者俾人搣下塊面同埋摸下頭。

每一次見到外人嘅時候，佢都好似一個小公主一樣，所以歐雪好細個已經練成咗一身討好外人嘅功夫。

但係，每當佢翻到屋企之後，就好似走咗入一個完全唔同嘅時空咁。

屋企，永遠都係一片寂靜。

歐雪嘅爸爸媽媽都係唔多講嘢嘅人，呢個家，永遠都靜到好似無人咁。

無交流、無家庭時間。

只不過，歐雪喺心底其實都寧願呢個屋企可以靜。

因為每當呢個屋企唔靜嘅時候，就代表佢爸爸媽媽鬧緊交。

「你做咩搞我啲嘢啊？」
「幫你執嘢洗唔洗咁大聲啊？好心著雷劈啊！」
「邊個叫你執啊？多事！」
「痴線！你個人都唔講道理㗎！」
「唔鍾意咪離婚囉。」

「離婚」，係歐雪爸爸媽媽常用嘅口頭禪。

雖然佢哋講咗咁耐都無實行出嚟，但係對當時仲係小朋友嘅歐雪嚟講，「離婚」似乎係一件呢刻未出現，但係隨時都可以成真嘅事。

所以，喺呢個家入面，歐雪每次見住爸爸媽媽鬧交，心裡面就不自覺地提心吊膽，好驚有一日佢哋真係會分開。

歐雪睇住自己一係靜得出奇，一係嘈到離婚嘅爸爸媽媽，細細個嘅佢開始諗，到底呢個係咪就係佢自己將來嘅人生呢？

當歐雪開始喺度諗緊婚姻嘅問題嘅時候，佢媽媽有一句說話勾起咗佢嘅好奇心：「你拍拖嗰時都唔係咁㗎！」

拍拖嗰時唔係咁？

歐雪幻想唔到，到底眼前感情好淡嘅父母，拍拖嗰時可以係點。

所以，佢有一日喺屋企入面翻箱倒籠，終於搵到一本爸爸媽媽拍拖時候嘅相簿。

喺呢本相簿入面，佢好似發現咗一個新世界。

相簿入面，每一張相嘅爸爸媽媽都笑得好甜好開心。

爸爸雖然一貫地表情唔多，但睇得出佢臉上有一份喜形於色嘅快樂；

而媽媽亦都唔似而家向爸爸破口大鬧嘅兇神惡剎，反而有一份含羞答答嘅少女味道。

歐雪突然諗，原來唔結婚，拍緊拖嘅爸爸媽媽係可以咁開心同幸福嘅。

「你做咩咁遲翻啊？啲家務做死我啊！」
「唔洗做嘢搵錢養家啊？水電媒唔洗錢啊？」
「我起身做到而家啦，無抖過啊，幫下手啦！」
「我無做嘢？我都周身骨痛啦！」
「痛就唔洗做啊？咁一齊唔好做囉！」
「咁唔鍾意個屋企咪離婚囉！」

聽住耳邊如常嘅吵鬧，歐雪開始用爸爸媽媽拍拖嘅相嚟幫自己設起咗一層保護罩。

相簿嘅世界，實在太美好。

無家務，只有去「荔園」玩掉彩虹。

無水電煤，只有入戲院睇戲嘅戲飛錢。

無周身骨痛，只有一齊落的士高跳下老舞。

無離婚，只有每一張相都一致嘅幸福笑容。

歐雪經過長年累月嘅思考之後，佢終於明白一樣嘢。

拍拖係美好嘅，因為無壓力，只有浪漫。

所以佢從小開始，就已經期待緊大個會擁有一場浪漫關係嘅憧憬。

而佢無留意嘅係，佢內心其實同時種下咗對婚姻嘅抗拒。

佢第一個遇上嘅男仔，係一個會為咗令佢笑，為佢喺班房預備一場假雪嘅人。

好浪漫，所以歐雪愛佢。

喺一齊嗰五年零六個月入面，呢個男仔不斷發揮創意，而每一次都可以俾到驚喜同浪漫歐雪。

歐雪喺屋企入面從來無見過嘅幸福快樂，佢喺呢個男仔身上搵到。

對歐雪嚟講，如果一世都可以享受到呢種幸福浪漫就好。

歐雪嘅浪漫幻想，俾呢個男仔一段說話打破咗。

「我知呢隻戒指粒石好細，你放心，呢隻只係首期，用嚟幫你封盤嘅。因為我想一年半後，到我哋大學畢業之後就同你結婚。到結婚嗰日，我會拎一隻更大嘅戒指俾你。」

聽一個驚喜，對歐雪嚟講，應該係呢個男仔第一次失敗嘅驚喜。

望住呢隻戒指，雖然其實幾靚，但係歐雪唔知點解感受到自己個心入面第一時間浮現嘅係反感。

所以當呢個男仔話想幫佢戴嘅時候，歐雪求其咁用一個理由就拒絕咗。

歐雪翻到屋企，開始諗點解自己會對呢個男仔有咁嘅反應。

明明之前都好似好享受呢段關係，點解自己突然會對方反感呢？

要形容嘅話，歐雪覺得自己好似喺一瞬間無哂對呢個男仔嘅期待。

就好似一間本來充滿光明嘅屋，燈泡一燒，唔洗一秒全間屋就暗哂。

最後歐雪覺得，自己可能一直都唔太愛佢，而今次嘅事只係一個幫自己認清事實嘅觸發點。

________________________________
周末大放送 因為劇情連住好睇啲關係
夜少少出埋下半

憧憬著浪漫永遠都係美好

等緊下半

下半呢