《我專門幫人擺分手和頭酒》（分手的意義是什麼呢？）[3]

唔夠喉呀 今晚幾點出呀

歐雪準備洗白

新讀者
LM

逃避婚姻？

八婆雪唔好扮心理病

好鍾意呢個故好少live都追咁耐樓主俾心機

唔係咁下嘛

（五十六）合久必分 伴讀歌曲：合久必婚（李克勤）

今日係十二月一號，距離我喺朗豪坊重遇歐雪已經有一個幾禮拜嘅時間。

而今日係一個特別嘅日子。

今日，係我同歐雪嘅「分手和頭酒」。

「條領整好啲啦，今日你係主角啊！」Kelly一邊幫我執靚件衫，一邊好似阿媽咁喺度吟。

「你整好你份主持稿未啊？今日你處女下海喎。」由於今日我係參加者，所以我將主持嘅重任交咗俾Kelly。

「顧掂你自己先啦，處男！」Kelly「處男」呢兩個字用得無錯，原來係，我自己雖然搞咗好多次「分手和頭酒」，但其實我都未正式參加過。

所以換言之，今次「分手和頭酒」都係我嘅第一次。

當一切準備就緒，我、Kelly同偵探三個一齊出發去今晚分手和頭酒嘅場地。

可能你會好奇怪，點解隔咗一星期多啲，成件事會突然轉咗去我同歐雪身上嘅呢？

其實自從上星期歐雪同Lawrence分手之後，我、Kelly同偵探三個開始調查歐雪。

因為當我發現咗「求婚」呢個關鍵元素之後，我突然間覺得，我應該繼續相信自己一直所堅持嘅嘢，亦都即係「所有分手都有原因」。

所謂「唔愛、無原因」，可能只係連歐雪自己都無留意到呢個原因，所以我更加決心從佢嘅歷史之中，幫佢搵翻呢個原因出嚟。

因為我相信，只有幫歐雪了解清楚自己嘅心，佢先可以幫自己健康同正常咁投入一段關係。

如果唔係，歐雪永遠都只會停留喺呢個不斷分手、但係又唔知自己要咩嘅循環入面。

呢一個半星期發生咗好多嘢，當中有唔少係由偵探同我合力搵出嚟嘅資料，亦同時俾我發現到一啲意外嘅線索。

當我哋將唔同嘅資料組合埋之後，我哋相信只要加埋歐雪自己嘅想法，成個畫面就可以完整咁拼湊到出嚟，而歐雪當年要同我分手嘅原因亦都可以解開。

所以，最後我決定用「分手和頭酒」嚟約歐雪出嚟，表面上係同佢傾計，實際上係想幫佢搵出連自己都無留意到嘅心結，將佢救翻出一個錯誤嘅愛情循環。

夜晚七點。

我同歐雪各自坐咗喺枱嘅兩邊，一邊望住枱上嘅食物，一邊品嚐緊枱上面嘅紅酒。

呢一間餐廳，係當年我同歐雪中學拍拖嘅時候講過，話將來出嚟做嘢搵到錢之後，一定要嚟食一次嘅高級餐廳。

為咗呢餐飯，我已經食定藥打底，加上事前充足嘅心理準備，同埋呢個星期不斷解開一啲歐雪嘅背景，呢刻嘅我明顯大幅減少咗驚恐症嘅反應。

「兩位好，我係今晚『分手和頭酒』嘅主持人Kelly，今晚因應主辦人黃正濤先生嘅要求，喺兩位用饍之後，將會有一個特別活動嘅。所以而家兩位可以傾下計食住嘢先，食完之後我會同大家進行特別活動嘅。」Kelly流暢咁講完呢段說話之後，就慢慢離開咗間房，房入面就得翻我同歐雪。

「特別活動？你又想搞咩啊？」歐雪呢刻嘅語氣，令我諗翻起以前中學時代。

每次我為佢準備驚喜，我都鍾意要佢瞇埋眼先，然後佢就會問我一句：「你又想搞咩啊？」

諗起呢個片段，我不由自主咁好似以前咁答翻佢一句：「一陣你咪知囉。」

歐雪聽到呢個答案都笑起上嚟，然後講：「呢個『分手和頭酒』咁有創意，果然好有你嘅風格喎。」

「講到創意，當年你都唔差嘅。」跟住落嚟，我哋開始不著邊際咁講起好多中學往事，唯獨無提起嘅，就係我哋嘅事。

往事同美食一樣，都可以令人回味。

中二到中七嘅美好回憶，同枱上嘅食物一齊陪伴我同歐雪過咗半個鐘。

「嘩，呢間嘢真係好好食，好彩你仲記得要嚟試下咋！」歐雪成餐最欣賞就係塊牛扒。

「咁我記得嘅又唔止食得嘅嘢嘅。」我見時間差唔多，即刻話題一轉，準備直入正題。

「你轉話題都轉得幾差喎。」歐雪笑一笑我，然後話：「不過如果你真係想講當年嘅話，我知道我爭你一句對唔住嘅。聽Kelly講，我突然分手呢件事令到你傷咗好耐。」

「點止耐，直頭而家都未好翻，啲醫藥費一陣慢慢同你計翻。」我刻意輕鬆咁講，「其實今日約你出嚟，我係有個問題想問你嘅。」

「問吖。」歐雪爽快咁講。

「當年點解你同我分手嘅？」我望住咗歐雪嗰對大眼，同時感受到自己心跳開始加速。

「嗯……呢個問題上次Kelly都問過我，我事後都有翻屋企諗過。我知，如果有個原因俾你，可能你會無咁傷心。但係……我諗真係無原因，純粹係覺得好似突然無咗感覺，所以就想分手。」歐雪講嘅時候表情好認真，睇嚟佢真係經過一翻思考先答。

「如果你唔介意，我想問多一個問題。你同我分手之後，係咪總共拍過四次拖？」

我問完之後，歐雪有啲驚訝咁點一點頭。

我之所以知道，當然係全靠偵探嘅事前功夫。

「咁我想問下，你呢四次分手嘅原因係咩啊？」

歐雪聽咗我個問題之後皺住眉頭咁托住下巴，睇嚟佢好認真咁回憶緊。

「嗯……無原因。」歐雪答完之後，睇嚟佢自己都有少少意外最後得出咗呢個答案。

發生一次可以係意外，但係多次發生嘅意外，就一定有背後嘅原因。

而明顯地，歐雪從來都無留意過自己每次拍拖都係無疾而終咁完結。

「你自己唔覺得好奇怪咩？明明每段關係都好地地，點解會突然間話唔愛就唔愛嘅呢？定係其實呢幾次分手都有啲相同嘅事發生咗，只係你無留意到？」我問呢一個問題嘅時候，其實我心入面已經有答案，只係我想俾歐雪自己諗一諗。

「相同嘅事？」歐雪又陷入咗沉思之中。

「例如，求婚？」我見歐雪好似未有頭緒，我決定將關鍵字講出嚟。

喺過去一星期入面，偵探所做嘅嘢有好多，其中一件就係起清歐雪呢六年以嚟嘅情史。

計埋最近同Lawrence呢一次，歐雪同我分手之後總共拍咗四次拖。

對象分別係大學同學、法國working holiday識嘅當地男仔、一個三十幾歲曾經離婚嘅男人、同埋最近嘅Lawrence。

為咗證實我推測歐雪分手原因同「求婚」有關，喺偵探嘅教路之下，我、Kelly同埋偵探分別扮成唔同身份去向歐雪嘅大學同學、法國男仔同埋離婚男人問話。

而最後我哋得出一個驚人嘅結論，果然，所有被分手嘅人，都同過歐雪提及「求婚」或者「結婚」嘅意欲。

「你咁講，又好似真係有。係喎，你點會知嘅？」歐雪有啲驚訝我講得中。

「我點知唔係重點。重點反而係，到底點解你嘅男朋友一提及求婚，你就會想分手？」我發現每搵出歐雪嘅答案多一啲，我對佢嘅恐懼就少一啲。

「嗯……我真係諗唔到。」歐雪有啲困擾咁搖一搖頭。

「或者換個問題吖，你其實想唔想結婚啊？」我決定從另一邊入手。

「我享受拍拖多啲。」當歐雪答嘅時候，臉上有好發自真心嘅笑容，我知呢個係佢由衷嘅答案。

「咁係咩原因令你咁享受拍拖啊？」

「拍拖比起結婚浪漫好多。一結咗婚，咩浪漫咩幸福都會無哂，只會淨低好平凡嘅日子、家頭細務、吵吵鬧鬧同生活壓力。既然係咁，點解唔俾自己自由自在咁拍下拖呢？」

當歐雪提到「結婚」，臉上有一份無奈同黯然；但係提到「拍拖」，佢就顯得雀躍同有憧憬。

果然，其實喺歐雪心目中，不知不覺之間係有一份對婚姻嘅恐懼喺度。

呢個答案，都符合我呢個星期所搜集資料所得出嚟嘅結果。

我、偵探同Kelly搵到一大堆關於歐雪嘅資料之後，其實都可以估到歐雪係對婚姻有恐懼，所以一聽到對方想結婚就會退出關係。

偵探甚至推測歐雪揀選對象嘅時候，其實都不自覺愈來愈刻意去揀一啲應該無咩可能會結得成婚嘅對象。

例如，身處法國嘅男朋友，對歐雪嚟講Long d嘅關係，對方應該唔會考慮結婚；

然後係失婚嘅男人，經歷過一次婚姻失敗，歐雪會以為對方唔想再結婚；

而最近嘅Lawrence直頭係有婦之夫，理論上係最唔會同到歐雪結婚嘅人，但估唔到對方竟然會激動到為咗要同歐雪結婚而離婚。

聽完偵探嘅推測，我除咗覺得合理之外，心中亦相當佩服歐雪嘅魅力。

聽落一切都好似搵得好順利，但係，其實呢啲都仲未係最終答案。

即使我哋知道歐雪對婚姻有恐懼，但係到底呢份恐懼係由邊度嚟呢？

呢個答案，連偵探都估唔到，所以只可以由歐雪自己解答。

「就咁聽，你好似對婚姻嘅感覺好差喎。你呢份感覺喺係邊度嚟㗎？」我望住歐雪問。

「吓？我屋企就係咁。」歐雪冷笑一聲，然後露出咗一個無奈嘅樣。

一個我等咗將近六年嘅最終答案，似乎要出現啦。

______________________________________
無錯, 今日呢篇係加長版嚟, 差唔多有兩更咁多字,
當係陪大家過weedend, 多謝下大家支持啦
歐雪故事準備進入正題, 而佢背後嘅故事亦會出現,
但係, 可能係一個普通到大家都意想不到嘅故事

查咗啦

叻喎巴打, 估得幾好, 感覺有啲料到

知道, 多謝你提我 以後小心

又未必係洗白, 始終衰咗就衰咗

多謝留名支持

多謝你追故支持啊

我都係因為家庭背景所以完全唔想結婚
或者有一日我都會變成歐雪咁

上面好多類似嘅留言, 所以唔逐一回覆住
但係我好開心大家都慢慢估到個問題所在
至於真正原因, 當然會慢慢講到啦
但我覺得有一班高質讀者諗到深入位真係好好 愛大家

家庭 其實影響真係可以好大

好想睇埋落去
唔知道樓主你嘅長輩過成點呢？
但我總覺得，一個已經做得婆婆嘅女性，通常都因為社會結構等問題，佢地對自己嘅自我認知，好少可以超越「女兒」、「太太」、「母親」、「祖母」等等。

唔知又有無人，見到自己嘅長輩咁樣會有啲唔舒服呢？

睇到第二句以為你想鬧我
睇埋先發覺係深度嘢
我想問清楚啲
追擊手巴你意思係老一輩嘅女性對自己認知好受家庭框架所限？

係，或者人際關係嗰一類嘅個人身分。
至少同我最親嘅，好難體現到「自我」呢種概念。

雖然未必係歐雪所想，但老一輩嘅女性即使有幸福美滿嘅家庭生活，都少不免喺實現自我上有啲缺陷？

或者犬巴讀中學嗰陣，有無睇過一篇中文閲讀理解，係講全家都笑阿嫲字都唔識多隻，但成日喺樹下面睇報紙。而嗰個阿嫲唔理其他人睇法，都會keep住咁做，就係想了解家庭以外嘅事、對世界有觀念。

又忽然覺得，可能藍絲d propaganda咁work，係因為佢地會用一種「就算你地讀得書少又老，只要睇我地d文宣就可以輕鬆理解世界」嘅角度，所以咁易入口

Sor9ly講遠咗

其實有啲怪，唔鐘意結婚最多唔結姐，點解一聽到求婚就會變左冇感覺?

同埋就算拍拖，都應該會傾高結婚呢個話題，咁抗拒結婚，唔係應該點都會傾過下咩？

因為佢唔覺得自己抗拒 只係成個感受好似開關掣一嘢熄鳩咗咁？
利申鳩估