[鳩故][穿越] 唔係吓話，我去咗《教父》世界！

連住幾多日

晚上七點。

巴頓先生屋企後花園。

我同賽德克先生一直等，一直等都等唔到菲兒過嚟，睇嚟無論係道歉定父女破冰都唔太成功。

既然如此，我決定用其他方法了解吓菲兒，我問賽德克先生：

「其實你同菲兒之間有咩問題？」

賽德克先生低頭沉默咗一陣，佢抬起頭講：

「問題？我都唔知，當我同凱倫分開咗之後，一切就好似唔同曬咁。」

凱倫如無意外就係菲兒母親，但佢講到咁虛無縹緲，我尷尷尬尬咁再問佢：

「所以...所以你覺得係菲兒呀媽對菲兒講咗啲咩，所以...所以搞成咁？」

賽德克先生無講野，我望住佢都唔好意思再追問。

過咗一段時間，賽德克先生無啦啦講：

「你記唔記得好耐之前你問過我一個問題，你問我仲識唔識其他穿越者。」

我估唔到佢突然間提起啲咁耐以前嘅事，我答佢：

「記得，你拒絕回答嘛。」

賽德克先生將眼光放上天空再講：

「關於凱倫嘅事，有啲野我覺得你應該要知道。」

我應該要知？我覺得奇怪，但我依然靜靜咁點頭算。

賽德克先生再講：

「菲兒母親-凱倫凱勒，都係一個穿越者。」

嘩，我喺一個完全想像唔到嘅情況之下得到咗第四個穿越者嘅資訊。

我想追問更多資訊，但問落去又好似探索緊賽德克先生最深層次嘅秘密，我決定講其他穿越者嘅野，希望可以引佢講落去，我講：

「噢，咁我畀翻個對等嘅資訊你，記唔記得我都問過你一條問題，問你識唔識一個叫博曼罕嘅人。」

賽德克先生點一點頭。

我就繼續講：

「我唔識佢，但佢都係一個穿越者。佢嘅故事好簡單，穿梭之後俾人捉咗，被迫講出所有現實世界嘅知識，兩個星期之後俾人殺咗。」

我隱瞞咗兩個資訊，第一係只有四個穿越者，第二係懷疑死後會去翻現實世界。

賽德克先生諗咗諗然後講：

「所以你係話有個穿越者獵人？」

穿越者獵人？我都諗唔到個咁有趣嘅名，我講：

「唔知，可能係有預謀，都可能只係一時發現而決定加以利用，甚至可能只係一個變態佬。」

賽德克先生又再講：

「咁博曼罕件事係唔係發生喺紐約？」

我擺出一個唔知道嘅身體語言。

賽德克先生靜咗一陣又再講：

「當凱倫死咗之後，我就以為穿越嘅一切已經結束。但當你搵上門，攞出個部手提電話之後，我就有種穿越者會互相吸引嘅感覺。」

佢講嘅野非常感性，我唔太識處理呢種氣氛，我冇講野。

我自己喺到諗，四個穿越者都出曬嚟，我一直都認為博曼罕係第四個穿越者殺嘅可能性好高，咁如果唔係佢，咁會係邊個？

穿越者會互相吸引？呢個理論睇落都好合理，如果係咁，殺死博曼罕嘅可能都係我哋身邊嘅人，咁一切都要非常小心。

最緊要係穿越嘅運作方式我哋完全唔清楚，我哋唔知博曼罕嘅穿越嘅事係幾時發生，就算現實世界發生嘅係十年前，但可能佢穿越到嘅時間係兩三個星期之前，預計會發生咩事同危險程度都完全唔同。

賽德克先生有三十年嘅背景，而家嚟講佢接近同其他人無異，但我呢？尤其是我嗰個嚟至唐人街嘅故仔，只要一查就知我講緊大話咁濟，如果佢真係穿越者獵人，我好大機會成為下一個目標。

賽德克先生過一陣打破咗我嘅思考，佢望住我講：

「我可唔可以問你頭先個故仔你邊到聽翻嚟？嗰部好神秘嘅手提電話？」

我望一望佢，做咩生得佢咁聰明嘅呢，咩神秘感都冇曬，計翻時間聽日又係同呀木聯絡嘅日子，我講：

「你都仲好意思提部電話，叫你幫我叉電，搞咗咁多日都未得，科學家喎。」

賽德克先生迴避問題咁繼續講：

「我一直以嚟都搵唔到聯絡現實世界嘅方法，你有一部不明所以嘅手提電話，咁博曼罕呢？」

我一時之間理解唔到佢講咩，我呆咗喺到思考緊。

賽德克先生就繼續講：

「我可以估計死係去翻現實世界嘅方法？」

好啦，由兩個隱瞞資訊變成一個，我對賽德克先生嘅推理能力無容置疑，我坦白答佢：

「可以，估計啫，估咩都得。就咁聽個故仔，可能性好高，但始終都冇實質證據。」

賽德克先生笑一笑就講：

「所以就係因為咁你先咁大膽做間諜？只要唔怕死的而且確冇咩好怕嘅。」

雖然佢完全當我講野冇到，不過佢講得啱嘅，雖然唔知係唔係真，但我已經當咗係。我笑一笑轉移話題講：

「唔係呀，我怕死架，你早排仲叫我避忌下，而家同我一齊喺到食飯，唔怕咩？」

賽德克先生笑一笑再講：

「你都唔怕死啦，仲有咩好怕，到時我篤你出嚟就得啦。」

好多謝你咁坦白呀，但我知道咗菲兒係佢個女之後，我先思考到佢幫我嘅真正原因係咩，我講：

「真係唔怕咩？巴西里唔係善男信女，你同菲兒嘅關係收得好埋，但我破壞咗你嘅計劃，如果我畀巴西里發現咗，可能連累菲兒嘅係我。」

賽德克先生認真起嚟，佢坐直個身講：

「你講得啱，一開始我非常擔心，但之後一切都好似天助你也，所有機遇都幫緊你咁。所以你生生性性唔好出事，為咗菲兒我會毫不猶豫出賣你。」

細想之下，我就覺得更加奇怪，我再問：

「如果係咁，你一開始唔好邀請我合作咪更安全？」

賽德克先生攞起啤酒飲咗啖再講：

「原因有好多，可能留你喺身邊先係最安全呢？而家睇嚟一切都好順利。換個角度睇，若果你當日唔係選擇同我合作，你會變成點？」

呢啲假設性問題好難答喎，我講：

「或者聯合柯里昂家族搞掂埋你？」

賽德克先生依然眼望天咁講：

「如果唔係我介紹你埋巴西里身，我講你知教父係鉈中毒，柯里昂家族理你都傻。你覺得單憑你嗰啲電影劇情，你覺得你自己可以行到咩位？」

佢又真係講得好啱，就算我識預知未來，冇人脈冇關係，隨時俾人當係語無倫次嘅黐線佬。

不過我決定唔好輸曬個勢，我講：

「所以你覺得所有野都喺你掌握之內？我係一個好出色嘅扯線公仔？」

賽德克先生聽完將眼神望翻我講：

「計劃永遠趕唔上變化，正確嚟講我嘅計劃都冇開始過，我只可以見步行事，你唔係扯線公仔，正確嚟講你非常失控，不過我會叫你做出色嘅合作夥伴。」

就喺呢個時候，巴頓先生抱住溫莉出嚟打破咗呢場漫長嘅談話，佢講：

「睇嚟菲兒今日唔過嚟？我哋開飯？」

賽德克先生就走去溫莉身邊同佢講：

「係唔係溫莉肚餓啦？我哋去食飯啦。」

就係咁樣我哋開始咗嗰場所謂嘅「和談會議」之前嘅最後晚餐，亦都希望唔係死之前嘅最後晚餐。

死啦唔係好明
點解冇啦啦覺得死會返返現實
又點解要讀灰

個post嘅第二頁 好耐之前主角同呀木有段咁嘅對話

「第二個角色就係最有記錄嗰個，角色名同演員名都叫博曼罕，一睇就知印度人啦，我幾經搵咗個印度朋友幫我上網搵，佢話條友曾經寫過篇文分享自己穿越到過去嘅記錄，但醫生話佢有精神病，到最後不了了之，上埋新聞添。」呀木講。

「咁佢講咩？」

「簡單嚟講，佢話佢穿越咗過去嘅美國，佢受盡白眼歧視，加上佢證明唔到身份，過街老鼠咁過咗幾日。」呀木講。

「直到有個白人向佢伸出援手，正當佢以為自己過翻啲正常生活，嗰個白人只係將佢困咗喺地牢，向佢迫問關於現實嘅事，兩個星期後，佢將未來嘅知識講曬出嚟後，白人就開槍殺咗佢啦。」呀木繼續講。

（首先唔計呀木有嗰個時空電話亭啦，如果冇時空電話亭，主角有手提電話都冇用。

賽德克先生嗰個係估計啫，有曬頭盔嘅

賽德克先生生活咗三十年都搵唔到聯絡方法，唯有假設正常途徑之下根本冇方法聯絡現實世界，咁聽完個故仔啦，既然個消息係從現實世界得知，即係代表資料有由電影世界流去現實世界。

而且訊息係由博曼罕自己喺現實世界都發生，就可以好大機會剔除係兇手用不知名途徑喺現實世界發出嘅假消息。應該係話所有人都冇強烈嘅動機喺現實世界放假消息，因為冇人可以確定其他人可以喺現實世界得到消息。

所以推斷出最單純嘅結果係博曼罕喺電影世界死咗之後翻去現實世界講翻自己嘅經歷出嚟。）

———————————————————————-

篤灰就冇話真係要篤灰嘅。

最壞情況啫，如果主角俾人發現咗係間諜，到時害埋菲兒嘅，咁賽德克先生為咗保護個女，可能會篤灰保平安啫

係喎唔記得咗之前

星期三。

晚上六點。

一切都好風平浪靜，全日都冇人嚟搵我。

回想今朝早上起身，非常之唔習慣，何解？

因為喺咁重要嘅日子，竟然冇人喺間房到等我。

究竟係喬諾聽得明我嘅訴求，定係塔塔基利亞善於放手呢？好明顯兩個答案都唔啱。

縱使冇人看守我，但可能我已經太習慣，又或者我根本冇野好做，我都好成功喺酒店房留到夜晚六點等人嚟接我。

六點。

久違嘅敲門聲。

我打開門見到嘅係唐勞，佢第一句就講：

「我代表塔塔基利亞嚟接你。」

就係咁樣我跟咗落去。

上車向目的地出發之後，車上面只有我佢同司機，佢都好似估到我嘅問題咁，佢就繼續講：

「好明顯塔塔基利亞先生唔係搭呢架車，唔好將所有雞蛋放喺同一個籃嘛，尤其是雞蛋嘅價值唔係平等，始終安全啲好。」

我明白，但我著眼點並唔係呢樣，我知道嘅係柯里昂家族決心對付巴西里同塔塔基利亞，問題在於柯里昂會點做？會用咩野方法？

可能經歷太多嘅間諜嘅生活，又經歷咗被柯里昂家族拒諸門外嘅經驗，柯里昂家族秘密聯絡我，但又係唔係真係仲當我係同伴？若果我只係佢計劃入面被犧牲嘅一個？

不過既然柯里昂家族咩都唔同我講，亦都代表我唔需要為柯里昂家族負上更多嘅責任，無論係唔係真心當我係同伴。

就係咁樣我繼續跟住車去到某間門面裝潢華麗嘅酒店。

行入酒店去到一間房仔，我同唐勞坐低咗，又開始咗呆呆地等嘅時間。我思想緊我應唔應該問一個睇落非常毫無意義嘅問題，就係：我哋等緊咩？

我冇講出口，但唐勞好似知道我想問咩咁，佢講：

「等吓，你需要等。」

雖然唐勞自稱為塔塔基利亞嘅律師，但我相信係更加類似哈金先生嘅軍師，亦令我相信佢係維持整個塔塔基利亞家族運作嘅中心人物，而唔係塔塔基利亞本人，不過呢個唔會係公開承認嘅事實。

七點。

唐勞先生望一望手錶講：

「行得啦。」

就係咁樣，我哋行去酒店大門匯合塔塔基利亞先生同一班手下，之後我哋一齊行去宴會廳，亦即係和談會議嘅場所，同一時間我望到菲利普塔塔利亞遲嚟嘅事實，我瞬間發現我做咗佢一個鐘嘅替死鬼。

打開門，塔塔基利亞先生一馬當先行咗入去，唐勞推一推我示意我行入去，隨即佢都跟埋入嚟，其他手下就留喺門口外面等候。

宴會廳入面有張大到不何所謂嘅木檯，然而人數卻非常之少，柯里昂家族一方亦只有三人，麥克柯里昂，湯姆哈金以及一個我以為佢喺拉斯維加斯嘅佛朗多柯里昂，不過縱使二哥翻咗嚟，但坐喺首席位嘅依然係麥克，權力得結構並沒有改變。

唯獨佛朗多嘅出現代表嘅係另一種資訊，係拉斯維加斯嘅事已經處理好，還是放棄咗拉斯維加斯嘅計劃？又或者只係我諗多咗，佛席多特登翻嚟出席一個虛假嘅和談會議。

和談會議並冇順暢咁樣開始，只得兩個陣營總共六人互相對望，情況非常不安，何解？因為主持和談嘅巴西里先生並沒有出現。

過咗一段時間之後，麥克柯里昂打破沉默講：

「睇嚟巴西里先生今日並唔係太得閒，我哋不如直接開始，塔塔基利亞先生？」

塔塔基利亞望一望唐勞，唐勞就開始講：

「和談會議冇主持，睇落都唔太得體，我諗不如擇日再談。」

呢個時候哈金先生隨即就講:

「塔塔基利亞先生唔可以自己做決定咩？佢需要你或者巴西里先生做代言人咩？」

塔塔基利亞聽完並冇出聲，而我都好清楚呢個唔係哈金先生平時嘅說話方式，呢個係一個引誘塔塔基利亞落疊嘅陷阱，睇嚟柯里昂家族都發現咗塔塔基利亞反抗之心。

塔塔基利亞沉默咗一陣，佢就講：

「係，我哋開始啦。」

我衷心感慨佢竟然咁都答應，明眼人都知兩個家族勢力嘅懸殊，可以從柯里昂家族嘅追擊中保住塔塔西利亞嘅只有巴西利，我相信塔塔基利亞自己都知，不過卻決定以氣用事。

雖然話和談會議開始，但我仍然難以想像一個虛假嘅和談會議可以點樣進行，尤其是連一個虛偽嘅和事佬都唔存在嘅時候。

就係呢個時候唐勞行埋咗去塔塔基利亞耳邊講咗幾句說話，塔塔基利亞揮一揮手就行咗出去，一切都非常奇怪。

當唐勞閂埋門，麥克就問：

「我失去咗一個哥哥，而你失去咗一個仔，你覺得對唔對等？」

我完全冇諗過麥克會問呢啲咁冇意義嘅問題。我望塔塔基利亞面有疑惑，睇嚟問題都同佢預期中唔同。

菲利普塔塔基利亞冇講野。

麥克見塔塔基利亞冇講野就繼續講：

「一個兒子失去咗父親，咁殺人填命都天公地道啦？」

塔塔基利亞依然一臉迷惘，但我知道麥克所講嘅父親就係教父，亦都印證咗賽德克先生話教父已死嘅推論。

塔塔基利亞終於發現情況唔太正常，佢企起身有種想走嘅感覺。

麥克冇等塔塔基利亞回應，佢指住我問塔塔基利亞：

「你承唔承認你指使佢落毒加害我父親？」

麥克冇等塔塔基利亞講野，麥克從衫袋中攞出支槍，毫不猶豫向塔塔基利亞嘅後腦開咗一槍，充滿電影入面家庭餐廳內嘅影子。

當下我眼中充滿嘅係恐懼，從我出生到現在第一次見荷槍實彈嘅謀殺喺眼前發生，第一次見完人變成血肉模糊嘅屍體，第一次見生命喺你面前流逝。

然而事情並無係塔塔基利亞死後告一段落，槍口從塔塔基亞身上轉向我，麥克向我問：

「你有冇落毒害死教父？」

恐懼突然遍佈我的全身，我有一種想奪門而出嘅想法，然而理智制止咗我，轉身走只會自招嫌疑，就好似叫佢直接開槍一樣。

我強壓住恐懼，而且鑑於塔塔基利亞嘅例子，我知道我應該盡快回答問題，當下我只可以講：

「我冇做過。」

答完之後時間就好似重新停止咗咁，恐懼重新湧入心頭。

嘭。

我眼前望到一絲火光，隨即我亦失去咗意識。

樓主喺到正式宣布，佢放完中秋連假啦，佢開始寫翻文啦

開始懷疑樓豬係一早打定
等人催文先po

唔係，只係今朝你留完言之後良心過意唔去，就即刻去打文

翻工偷偷摸摸推一推

幾得意 會追落去 加油

新讀者呀

舊讀者仲追緊

新讀者你好

一齊鞭策下樓豬

聽日八號仔，我會專心在家寫故架啦

愛呀

我從恐懼中醒來。

我訓喺張簡陋嘅床上面，坐喺身望到自己身處喺一間房仔，而且只有門上面有監獄式單方面可以打出嘅窗口，感覺非常壓抑，就好似電影中綁架先會出現嘅嗰種密閉房間。

我行去門到嘗試打開佢，理所當然哋鎖咗，係一種舊式鐵門，而且手柄位明顯裝喺另一邊，明顯係專登改裝成牢籠，無論我點用暴力都打唔開，但我聽到門嘅另一面有人聲，我就用力敲門嚟表示我醒咗啦，我相信佢哋會理我，因為既然捉得我就代表我仲有存在價值。

就係咁樣我坐翻喺床到，一邊等待佢哋嚟搵我，一邊思考自己究竟發生咩事。

我望曬自己全身，完全冇中槍嘅痕跡，可
能性有三個：

第一，我有不死身。
第二，我翻咗去現實世界。
第三，嗰一槍嘅目標唔係我。

第一個可能性唔高，但相比我識穿越時空嚟講，好似更合理。我衷心相信第二及第三個可能性較大，但無論係邊個可能性，我都需要等人嚟先有得證明。

時間過咗一陣，我聽到金屬碰撞嘅聲音，我見有人打開嗰個門上面嘅窗，我行埋去，但門另一邊嘅人講：

「行翻埋牆去俾我望到你全身。」

我唯有聽佢講企翻埋牆，而且心中抱怨佢間設計得咁差嘅房。

打開門，我望到嘅係一個牛高馬大嘅黑人同哈金先生，亦都令我好肯定我仲喺電影世界。

哈金先生揮一揮手叫我行出嚟，隔離嗰黑人想制止佢，但哈金先生耍一耍手表示冇問題，我跟住佢行到出去，佢坐咗喺櫈上面講：

「坐低先，我哋可以傾吓。」

我坐低之後佢笑一笑就講：

「嗰一槍本來係想嚇吓你嘅，點知你暈咗。」

佢用咗令我最尷尬嘅方式開始話題，我轉移話題講：

「所以你捉我嚟係想繼續嗰場問答？」

哈金先生擰一擰頭講：

「唔係我捉你嚟，麥克捉你嚟，講個秘密你知，巴西里喺你隔離屋。」

我非常疑惑佢講真定假，我試探佢咁講：

「所以你相信我係真心幫你哋？」

哈金先生向左上望一望之後講：

「你記唔記得你第一次見教父個陣，你講咗個關於你身世嘅故仔？」

我有種俾人質疑我份口供嘅感覺，我冇講野，只係點一點頭。

哈金先生就繼續講：

「好假，你啲演技好差，我同教父一聽就知你講大話。事後我問教父點解唔踢爆你，仲要幫你，佢同我講你嘅故事係假，但你嘅不安無助係真嘅。」

佢講咗一個令我一時之間手足無措嘅故仔，佢見我呆咗喺到，佢就繼續講：

「所有人都唔會選擇背叛喺你最徬徨嘅時候扶你一把嘅人，我喺教父身邊咁多年學識架。」

佢講咗咁耐終於進入我有心理準備嘅正題，我講：

「所以你相信我？」

哈金先生聽完就講：

「教父好少睇錯人，希望你唔會令佢失望。」

我望一望周圍然後講：

「咁所以係麥克唔信我？」

哈金先生擺出一個稍為無奈嘅表情然後講：

「麥克係當家，我唔方便多講，我只可以講佢唔係教父。」

我深呼吸一下，我講：

「所以我要離開呢到就要等麥克搵到落毒嘅真相，先決定放唔放我出去？」

哈金先生望一望手錶講：

「我都唔知，我夠鐘走，如果你仲有問題，自己睇啦。」

哈金先生講完喺個袋入面攞咗份報紙出嚟就開始行咗去啦。

聽完之後我問佢：

「去邊呀？去隔離搵巴西里？」

佢冇應我就繼續行咗去。

睇嚟我要喺報紙入面搵真相。

我攞住份報紙望一望我個黑人新室友，我決定開始睇報紙，我望一望日期，原來我俾人嚇暈咗一晚，好彩冇咩人知啫。

報紙標題非常簡單，開宗明義就寫住：紐約黑手黨三大家族面臨瓦解！

我快速咁望一望份報紙，接近全份報紙都講緊黑手黨嘅野，我第一個簡單得出嘅資訊就係有線人聲稱塔塔基利亞被一名華裔手下叛亂槍殺，而唐勞處決咗叛徒之後就名正言順接手家族。

睇嚟我又俾人擺咗上檯，所以我喺世人眼中成為咗雙面叛徒，我非常之懷疑我幾時會出現喺報紙上面，而且我一定會有黑手黨首領剋星嘅稱號。

之後仲有段仔講巴西里喺教父病逝之後仍然未有露面或者發表任何言論，有線人聲稱巴西里由琴日中午開始已經失蹤。

睇嚟頭先哈金先生講巴西里喺隔離係真架啵。

不過全份報紙嘅主要內容都落咗喺教父病逝嘅消息到，每一頁都有政要名人嘅悼念文，甚至乎印有公祭嘅時間表，連政府各大部門都話會派代表出席。

睇嚟掌控傳媒業真係非常重要，將教父病逝嘅消息延遲發佈，舉辦一場會殺人嘅和談會議，然後好成功將所有人嘅焦點轉移去教父逝世身上，如此高章真係不得不讚麥克手段出色。

但就算面嗰陣叫做解決咗，但底嗰陣黑手黨之間嘅恩怨點解決？就算真係捉咗巴西里喺隔離，冇人知實際發生咩事，但始終都會燒到柯里昂家族身上，咁又點解決？

更何況如果我背負咗殺死塔塔基利亞嘅罪名，咁而家我喺柯里昂家族保護之下，如果俾其他人知道咗，咪即係同其他人講係柯里昂家族指使我嘅。

咁睇嚟柯里昂家族又多一個唔應該放過我嘅理由。

可惜就算而家我諗得仲多都冇意思，因為冇人嚟證實我嘅想法。

除咗我嘅新室友，我放低份報紙望一望佢，我問佢：

「點稱呼？你收到嘅指令係唔好俾我出去？」

佢打量咗我一陣，然後講：

「叫我尼羅。」

第一次被困之餘仲有個室友，雖然正確嚟講佢更加類似獄卒，但唔緊要啦，我講：

「你係會廿四小時嚟陪我定有人會嚟替更？」

佢聽完摸一摸衫袋而且用懷疑嘅眼神望住我，佢冇講野。

但我發現咗兩樣野，第一佢非常多疑，第二佢衫袋一係收埋咗某樣可以有效壓制我嘅工具，又或者係鎖匙。

我見佢懷疑我，我決定講其他野嚟洗脫我嫌疑，無論我點睇得罪佢都冇好處，我講：

「唔好誤會，我唔係想逃走，只係見我哋可能要相處好耐，想搵啲野傾吓啫。」

佢聽完就指一指間細房講：

「如果你有咩奇怪嘅舉動，我會韞翻你入去。」

我舉起雙手扮投降嘅姿勢講：

「我會非常合作，而且我非常唔建議你咁做，孤獨感會引發精神病，大家仲可能要對好耐，無謂搞到咁尷尬啦。」

佢聽完冇講野，我就決定繼續講：

「我可唔可以請你幫我一個忙，例如幫我去請翻哈金先生翻嚟？」

佢輕描淡寫咁樣答咗句：

「唔可以。」

我決定再問：

「咁你會唔會知道某啲內情而又可以解答我一啲問題呢？」

佢依然係冷淡咁講：

「唔可以。」

可憐嘅我遭到兩次拒絕，我笑一笑同佢講：

「至少我哋有好多時間搵出你會答可以嘅問題。」

襯啱啱出完文，有啲面自我推post

一個鐘Live冇睇過教父但好吸引呀

20正皮

新讀者

好多謝你欣賞我個故仔，但我開始對自己個開頭太鳩而唔係幾滿意有啲想重寫個開頭

推推