[鳩故][穿越] 唔係吓話，我去咗《教父》世界！

學林鄭寫故仔，就係冇咩人睇，都堅持寫落去之後嘅會開始一步一步脫離日常，開始進入主線。

遲啲會唔會有個offer係主角can't refuse?

劇透問題嚟嘅答案係會，教父做主題點會冇

睇嚟我要睇教父劇情先得

睇完始終都易跟啲嘅

星期六-派對日。

寫意嘅早上，巴頓先生有佢星期六日唔開舖嘅堅持。

不過特別嘅係門口今日嘅係有封信，我過去攞起打開。

係賽德克先生嘅信，主要就係問而家情況點，幾時需要佢幫手。

我真係估唔到賽德克先生咁熱心，睇嚟部電話對佢吸引力好大。

----------------------------------------------------

下午一點，我攞住部相機同嗰份特別嘅禮物去到菲兒屋企。

情況係比想像中多人，有好多唔識嘅人，好緊張添。

我企係門口，直頭諗緊自己應唔應該入去。

就喺我迷惘嘅時候，哈爾係欄杆入面望到指住我大叫：

「係閃電俠呀，閃電俠，未來閃電俠！」

我人生第一次發現閃得快過光速嘅重要性。

但我冇咁做，我迎住眾人尷尬嘅目光，走去細細聲同哈爾講：

「秘密嚟架，唔好周圍同人講，不過生日快樂呀。」

我將份禮物遞畀哈爾，哈爾話：

「多謝你，但家姐負責收禮物，你要攞畀佢。」

「佢喺邊？」

「入面整緊野食。」

我行入屋，攞住份禮物想畀菲兒，佢同另外兩位女士忙到仆街，菲兒揮一揮手叫我放喺檯面堆禮物到。

放完，我企咗喺到，周圍都冇個識，好似網絡上流傳個張grad din男一樣站著如嘍囉。

我決定打破局面，我去搵咗個坐喺花園望住班細路玩緊嘅男人，我坐埋去指一指堆細路用最易共通嘅話題去問：

「望住班細路玩好開心呀可，人大咗真係搵唔翻。」

「係呀，望住自己個仔平平安安就夠啦。」

「我介紹自己先，我係湯姆，我啱啱搬過嚟呢個社區。」

「我係史密斯。」

講完，佢繼續專心望住堆小朋友，我問：

「邊個係你個仔？」

佢尷尷尬尬咁行開咗。

我成頭黑人問號咁坐咗喺到。

正當我思考自己講錯咩嘅時候，菲兒行咗過嚟，坐咗喺我隔離指一指頭先條友講：

「你識佢架？」

「唔識，見冇野做搵人吹下水啫。」

「佢唔係好人嚟架。」

「吓？」

菲兒捉住我去餐檯個面，而且講：

「係啦，總之過去食野啦。」

有女相伴都將一切拋諸腦後，冇去深究。

---------------------------------------------------------------------------------

菲兒作為主人家，非常之忙碌，陪咗我一陣又行開咗啦。

百無聊賴之際又醒翻起頭先嗰個男人，古古怪怪咁。

我發揮自己做透明人嘅專長，靜雞雞觀察佢。

佢做嘅野好簡單，望住哈爾，避開菲兒，就憑呢兩點我已經知道事有蹺蹊。

我趁佢有次行埋去冇咩人嘅牆邊，我推佢埋牆邊發揮忠誠勇毅嘅態度問佢：

「你做緊乜撚嘢？」

「吓，冇做咩呀。」

「屌你老母，鬼鬼鼠鼠咁撚樣叫冇做野，未做啫吓話。」

正當我隻手放喺佢條頸準備勒嘅時候，佢講：

「我係哈爾爸爸。」

聽完之後我好似忠誠勇毅遇上白衣人一樣，態度好翻好多咁問：

「係呀，需唔需要幫手呀？」

「幫咩手啦，哈爾都唔知我係佢爸爸。」

咁複雜嘅，我個腦用緊毅進制，好難明架啵。

「發生咩事？」

史密夫個人好頹咁背脊貼牆坐咗落地下，佢講：

「海倫，我老婆，哈爾呀媽，我害死咗佢。」

佢停低咗，我心入面希望佢會講埋落去。

過咗陣，佢又講：

「十年前多啲，我畀人炒咗，我借酒消愁，我對海倫拳打腳踢，我唔知佢有咗我個仔。」

佢又停咗，正當我想開口問嘅事侯，佢又講：

「有一日，我太重手，我只係記得海倫成身都係血喺馬路，出面企滿鄰居同警察，我畀人拉咗。」

佢再停，我唔明白究竟點解佢冇飲酒都講到好似醉咗咁。佢過咗陣再講：

「我判咗七年，出翻嚟先知海倫幫我生咗個仔之後因為難產併發症死咗。我今次可以嚟哈爾生日會都要菲兒同法官批准先得。」

我問：

「咁菲兒呢？係唔係你個女？」

佢答：

「唔係，菲兒係海倫同佢前夫生架，不過聽講佢前夫都唔係咩好人，所以同哈爾一樣跟呀媽姓-凱勒。」

我聽完成個故仔之後，我發揮忠誠勇毅嘅精神，我一腳踢咗落去，之後講：

「你真係仆街嚟架你，咁你而家可唔可以發誓唔再傷害菲兒同哈爾？」

佢坐翻好咁講：

「唔會，永遠都唔會。」

「戒酒。」

佢答：

「戒咗。」

就係咁樣，我冇再理佢，就行走咗。

行翻出去，見到哈爾，我同佢講：

「想要咩禮物但今日收唔到嘅，再同我講，我買畀你。」

----------------------------------------------------------------------------------------------------------

大家飲飽食醉之後，有個𡃁妹衝出嚟大叫：

「拆禮物時間！」

大家都知道公然拆禮物就好似公然拆人情一樣，根本就係一場血淋淋嘅批鬥，喪心病狂呀𡃁妹你。

正當我以為大家會阻止佢嘅時候，但大家都好似唔介意咁，我開始心入面懷疑係唔係有建議清單架，定大家都對自己份禮物咁有信心？

接二連三打開嘅禮物，有杯，有相架，有字典，但哈爾望到都一樣開心。

我心諗真係年代唔同，今時今日十歲生日送字典，你會見識到咩叫童黨嘅憤怒。

終於拆到我個份啦，𡃁妹打開攞出嚟講：

「係相機喎，仲有個印有奇怪圖案嘅菲林盒。」

我正當想大叫咩叫奇怪圖案嘅時候，哈爾講：

「係小丑，蝙蝠俠嘅敵人小丑。」

多謝哈爾為我平反，死𡃁妹冇品味呀你。

「將就下啦，個蓋我用電話殼做架，如果你70年後仲換電話就用得著架啦。」

所有人都唔明我講咩唔緊要，我望到哈爾喜愛嘅目光就夠。

------------------------------------------------------------------------------------------------------

天黑，人群一步一步離席，留低當然有主人家兩個，仲有史密斯同我。

我諗住聽日約菲兒同哈爾去睇戲，咁史密斯想做咩呢？

我望住史密斯，佢坐埋一邊避開我視線，我行過去，佢又行住走，直到行去菲兒面前。菲兒問史密斯：

「做咩？」

史密斯支吾以對，我企喺後面睇。

菲兒再問：

「你冇野講嘛，走啦。」

史密斯答：

「我...聽日...可唔可以帶哈爾出去玩？」

菲兒一面不屑咁講：

「係因為有兩個社工幫你寫咗三年求情信，我今日俾你過嚟已經仁至義盡。」

史密斯沉默，菲兒望向我，我唔知點解，可能係因為佢覺得自己講得太多。

我行埋去細細聲同菲兒講：

「我知發生咩事，佢係哈爾老豆嘛，你去睇住哈爾啦，我幫你同佢講。」

菲兒表情非常震驚，但同意，佢行翻入屋。

史密斯同我講：

「你...可唔可幫我？」

我答：

「你做過啲咩，點幫得落你手呀，你走啦。好坦白講，你變成點，我唔理，你只要記住你發誓唔會再傷害菲兒同哈爾就夠啦。」

史密斯沉默。

我扯住佢出門口，推開佢之後同佢講：

「或者咁講，如果你想得到原諒，你等哈爾成年，畀佢做決定，走啦。」

呢句說話或許出自真心，又或只係怕佢會變成睇唔開嘅殺人狂魔。

我記得細個嗰時候生日真係收到字典

我都收過親身回億嚟 好彩當年未有智能電話 都仲用得著

個故好正呀

我行翻入屋，走去搵菲兒，佢望住我，似乎有口難言。

我同佢講：

「唔洗講啦，聽日睇戲好冇？同埋哈爾？」

佢冇講野，只有點頭。
----------------------------------------------------------------------------

星期日

又收到封信，依然係賽德克先生，打開同琴日接近一樣嘅內容，我放埋一邊就算。

---------------------------------------------------------------------------

叩，叩。

開門嘅係哈爾，佢講：

「巴利叔叔你好。」

「試下唔好叫叔叔，叫哥哥啦好嘛。」

菲兒搭嘴同我講：

「積尼，湯姆，而家係巴利？」

「超級英雄嘅藝名就好似斗篷一樣，越多越好。」

--------------------------------------------------------------------------

喺冇嗰個不知所謂嘅限聚令下，我哋一行三人搭的士去戲院。

哈爾問：

「我哋去睇咩戲？」

「《黃金時代》，經典電影呀，可以入戲院真係不得了。」

菲兒又講：

「新上畫架喎，你講到好多年前咁嘅。」

我細細聲同菲兒講：

「我同哈爾講我係未來人嚟，我係未來嚟嘅閃電俠呀。」

菲兒聽完之後講：

「睇嚟男人之間嘅秘密都非常無聊。」

我笑一笑之後冇講野，但我承認。

男人之間嘅秘密只有三種：無聊，錢同女人。

------------------------------------------------------------------------------

睇完套戲，雖然有美好嘅結局，但時代嘅悲傷一直揮之不去。

唔係講緊我，講緊頭先坐我哋前面嗰位單手嘅男人，散場之後喊到咁嘅樣，明顯係一個受傷退役軍人。

我同哈爾講：

「你想唔想做軍人？」

哈爾講：

「我唔知道。」

我再同佢講：

「唔緊要架，但你必須記住前線為你守護家園嘅人，唔好忘記佢哋嘅付出。」

我知道今日嘅哈爾未必明，但我依然必須講。

我轉移話題繼續講：

「琴日有咩禮物收唔到？我買畀你啦。」

「單車。」哈爾講。

「單車？你唔係有架單車咩？」

「我要架大啲。」哈爾講。

我望住菲兒，菲兒講：

「個架五歲買架。」

早講啦，電話殼都慳翻嘛。

「我哋去行街，買單車，食野啦。」
------------------------------------------------------------------------

星期一。

朝早又收到封信，依然係賽德克先生，不過內容變咗，信入面寫住：「晏晝巴頓麵包見，非常重要。」

我本身今日要同呀木傾野，但都講到咁，無辦法啦。

----------------------------------------------------------------------

下午一點，我打開部電話，放喺褲袋繼續做野。

巴頓先生問：

「琴日同菲兒睇戲？」

「係呀，同埋佢細佬。」

「就係你之前話嗰個十歲細路？」巴頓先生講。

「係呀，睇完戲買咗禮物食埋飯，完美嘅一日。」

就喺我哋傾傾下嘅途中，電話響。

巴頓先生震驚緊我褲袋點解有野會響，我一邊行入工作室一邊同佢講：

「我罷陣工先。」

我同呀木講：

「喂。」

「我好似幫你搵到翻嚟嘅方法啦，不過....」呀木講。

「吓，咁開心。」

「我對咗名單啦，有四個人物本身係冇架，有一個同名人撞名，所以搜尋好有困難。」呀木講。

我心入面諗四個咁奇怪。

呀木繼續講：

「第一個係你，呢個唔重要。」

「係。」

「第二個角色就係最有記錄嗰個，角色名同演員名都叫博曼罕，一睇就知印度人啦，我幾經搵咗個印度朋友幫我上網搵，佢話條友曾經寫過篇文分享自己穿越到過去嘅記錄，但醫生話佢有精神病，到最後不了了之，上埋新聞添。」呀木講。

「咁佢講咩？」

「簡單嚟講，佢話佢穿越咗過去嘅美國，佢受盡白眼歧視，加上佢證明唔到身份，過街老鼠咁過咗幾日。」呀木講。

「直到有個白人向佢伸出援手，正當佢以為自己過翻啲正常生活，嗰個白人只係將佢困咗喺地牢，向佢迫問關於現實嘅事，兩個星期後，佢將未來嘅知識講曬出嚟後，白人就開槍殺咗佢啦。」呀木繼續講。

「所以呢？」

「所以你翻嚟嘅方法可能就係死。」呀木講。

「呢個方法好高風險。」

「我知。」呀木講。

靜默片刻。

「咁仲有兩個呢？」

「第三個，你提過嘅賽德克，角色名叫伊森賽德克，演員名叫艾德蓋恩。」呀木講。

伊森賽德克？我聽完之後即刻衝出去想查白頁。

就喺我行出去舖面嘅時候，整理緊貨架嘅巴頓先生同我講：

「賽德克先生等緊你。」

我細細聲同呀木講等陣，就放翻部電話入褲袋。

賽德克先生喺衫袋攞槍指住背向住佢嘅巴頓先生，同我講：

「過嚟坐。」

我唯有乖乖就範。

賽德克先生指一指我褲袋，之後用手做出攞嚟嘅手勢。

我猶疑，但佢揮一揮把槍表示我冇選擇嘅餘地。

我伸手入褲袋到畀佢之間偷偷哋熄咗機，佢接過嚟露出滿意嘅表情。

佢收翻埋支槍，同我講：

「你琴日同菲兒出去玩得好似幾開心喎。」

佢見我冇出聲，望一望錶笑住繼續講：

「仲有時間，你好似好多野想問，俾啲時間你問問題。」

我問佢：
「艾德蓋恩？」

賽德克先生用饒有趣味嘅眼神望住我講：

「噢，你查到呀，係因為部手提電話？」

喺呢個時候門外傳來大叫聲：

「號外，號外，柯里昂先生中槍，柯里昂先生中槍。」

巴頓先生聽到之後即刻扭開收音機，收音機播出：「特別消息，有教父之稱嘅維托柯里昂中槍危殆，據報喺大宅受到十幾人強攻闖入，警方正從黑幫仇殺方面調查。」

播完之後我望住賽德克先生。

賽德克先生笑一笑講：

「點解唔係生果檔？邊有嘢係一定架，本身都唔應該有人提佢要加倍小心，本身你同我都唔應該喺到。」

我停一停，諗咗一諗，我講：

「你幫巴西尼做野？所以你選擇今日？」

佢答：

「唔算幫嘅，巴西尼係生意人，我有情報，佢有財有勢。」

佢再望一望手錶，一邊行去門口一邊講講：

「時間都差唔多，好高興同你傾計，想搵我就去公司搵我啦。」

我追問佢：

「你識唔識博曼罕？」

賽德克先生喺門口講：

「你過嚟公司我話你知。」

之後就行咗出去啦。

喺我思考緊一切嘅時候，有人搭我膊頭，係巴頓先生，佢講：

「收舖啦，去醫院。」

-------------------------------------------------------------------------

去到醫院，發現探訪嘅人多得誇張，保安亦嚴密得誇張，我同巴頓先生呢啲小薯仔由晏晝等到夜晚，由夜晚等到醫院趕人走。

我同巴頓先生翻咗舖頭，執埋啲手尾，放低咗啲麵包畀訓到死咗咁款嘅流浪者之後，巴頓先生講：

「聽日唔開舖，我會同屋企人去探柯里昂閣下，如果你想可以跟埋嚟。」

「唔啦，我有其他嘢可以幫到教父。」

本身已經想睇教父
巴打個故好正 G持！
不過P牌仔like唔到

多謝你，就係要呢啲咋嘛，你哋嘅留言就係我寫落去嘅動力

正負評話唔著緊就假嘅但只要係正數都過到自己嗰關

我推薦大家睇教父架，馬龍白蘭度個角色形象寫得好好，阿爾柏仙奴個心理轉變都做得好好，值得一睇。

我啱啱睇咗兩個鐘頂唔緊有啲悶
都係睇返你個故算

原來係咁辛苦你突破自我咗兩個鐘始終電影喜好人人唔同，你鍾意我個故就夠

終於live左,來身見巴打有睇JoJo仲諗仲問會唔會去到西西里島果到見到有個金毛仔成日話想做黑道之星

好可惜呀，一開始設定人物角色個陣諗唔到睇吓遲啲有冇機會加落去

純粹覺得劇情好似好拖咁
可能70年代既戲係咁

不過樓豬今日唔記得出文喎

星期二。

柯里昂大宅。

保安極之嚴密，五步一崗。

「我係湯姆勞根，我想入去見山姆柯里昂。」

「唔可以，閒雜人等唔可以入去。」保安講。

「我嚟過兩次，柯里昂小姐婚禮都有出現。」

「邊個湯姆勞根，呢到冇人識你呀。」保安講。

我決定開始撻朵。

「你識唔識威廉瓊斯？佢叫我嚟嘅。」

佢聽到威廉個名之後望住我一陣，講：

「威廉，我識，琴日開始已經唔見嗰個嘛，我哋都搵緊佢，你最好直接叫佢嚟，而家個個都有可疑。」

威廉唔知去咗邊？早知唔撻朵啦，搞到我都做埋可疑人士，我尷尷尬尬咁問：

「你懷疑威廉？」

「我只係知冇鬼唔死得人啫。」保安講。

我相信威廉，但搵威廉出嚟又談何容易。

-------------------------------------------------

我跟住白頁上嘅地址，一步一步咁終於搵到威廉屋企。

門鐘，冇人應。

敲門，冇人應。

圍住間房行個圈，都冇人。

我又留低張紙，之後我搵咗個電話亭，打去醫院問：

「你好，我係湯姆，勞根，可唔可以幫我叫威廉瓊斯或者諾亞巴頓嚟聽電話，應該喺維托柯里昂嗰層。」

等咗陣，係巴頓先生聽電話，我問：

「有冇見過威廉？」

「冇，今朝到而家都冇見過。」巴頓先生講。

「咁你有冇見到任何一位柯里昂家族成員？」

「都冇，保安好嚴格，聽記者講柯里昂家族行秘密通道出入。」巴頓先生講。

原來大家都係小薯仔嘅悲劇。

我收線，去最後機會出發。

------------------------------------------------


我敲門。

菲兒打開門，我問菲兒：

「你知唔知威廉喺邊？」

菲兒答：

「唔知，做咩搵佢？」

我有啲疑惑咁問：

「你知唔知威廉做咩架？」

「唔知，佢冇同我講過。」菲兒講。

我心中更多疑惑，我問：

「咁你同威廉點識架？」

「佢係包租公囉，佢十年前好平咁租咗呢間屋畀我哋，到而家都係。」菲兒講。

「十年前？你母親死咗之後？」

菲兒冇出聲，只係點一點頭。

我諗起菲兒母親係難產併發症而死，我問：

「幾時死忌？」

「三日後。」菲兒講。

我攬住佢講：

「我陪你一齊去。」

菲兒依然點頭。

我轉移話題講：

「今日唔洗翻工咩？」

「維托柯里昂先生入院，成個小義大利區地震咁款，俱樂部都唔開門。」菲兒講。

----------------------------------------------------------

搞咗一個上畫，入唔到大宅，搵唔到威廉，見唔到柯里昂家族成員，冇埋部電話，我好似一日之內，咩都冇曬。

我係到諗，我有菲兒，麵包舖有份工，睇落我都可以好好咁生活，若然我將啲錢買曬柯達股份，可能我一世都唔洗做。

諗諗吓，我去攞起之前威廉放落支槍，又或者我應該一槍打落自己到，好似呀木所講，我就可以翻去現實世界。

我做唔出，無論係開槍定疊埋心水留喺到。

屌喇媽，頂硬上，成個明朝歷史凈係記得呢句，不過亦都成為咗我嘅座右銘。

我攞起紙筆，寫咗封信，同一張紙條。

封信係畀麥克柯里昂，紙條係畀巴頓先生，字條內容好簡單，就係叫巴頓先生一定要親手交封信畀麥克，唔好相信任何人。

點解咁做？因為時至今日，情況已經同電影唔同，我唔再肯定邊個係鬼。而且我必須深入虎穴面對賽德克先生，只怕有去冇回。

我攝咗封信同字條喺麵包舖就去入刀山啦。

---------------------------------------------------------

雷達研究所。

我向門口嘅保安講：

「我想見賽德克先生。」

一如以往嘅情節，對講機之後帶我入去，一段長長嘅石屎路，地上巨型嘅紅字，令我諗起國產零零漆打靶嗰一幕，佢要殺死我只需要虛構一場實驗意外已經足夠。

行到去𨋢大堂，又望到嗰兩個彪形大漢，我一行入𨋢，保安就推我埋牆同我講：

「搜身。」

搜完一輪，保安攞走我支槍，留低「天台」兩隻字畀兩個彪形大漢就走咗。

我心諗入到嚟先叫我搜身，咁明裝我彈弓啫，連支槍想同賽德克先生攬炒都唔得。
-------------------------------------------

頂樓。

我畀兩個大漢夾住我由頂樓行上天台。

賽德克先生企到母雷公咁遠。

正當我猶疑緊會唔會做梁朝偉嘅時候，後面兩個彪形大漢推一推我示意我要行之後閂埋咗天台門。

「我估到你會黎架喇，不過估唔到你真係夠膽嚟。」賽德克先生講。

「你講野咁《龍咁威》嘅。」

賽德克先生冇理我講咩：佢講

「你有咩想問？」

「點解你仲會想見我？教父失勢，你有巴西尼撐腰，你攞咗部電話，你殺咗我可以一了百了。」

賽德克先生講：

「點解我要殺你？你同我只要合作就可以掌握未來，攞部電話翻嚟只係最基本嘅保障啫，就算你唔同我合作都有啲野揸手。」

非常疑惑，情況同我預想中唔同，我問：

「你想合作？咁畀啲誠意，答我幾個問題啦。」

賽德克先生爽快回應咁講：

「好。」

「你知唔知翻去現實世界嘅方法？」

「唔知。搵過，但唔成功。」賽德克先生講。

「你知唔知邊個係博曼罕？」

「你琴日問過，唔知。」賽德克先生講。

唔知？又同我預想中差好遠，如果博曼罕唔係賽德克先生殺，咁係邊個殺？

賽德克先生繼續講：

「最後一條。」

我問：
「你點樣過嚟呢個世界？」

賽德克先生笑一笑講：

「1980年，聖海倫火山爆發，地陷山崩嘅時候，我失去咗意識，醒翻就喺到啦。」

我非常震驚衝口而出問：

「1980年！你嚟咗幾耐？」

賽德克先生答：

「最後一條啦，而家要一條換一條，相同嘅問題，你答先。」

我答：

「十日。」

賽德克先生講：

「三十年。」

三十年，完全超出我想像。

呢個時候，賽德克先生突然問：

「琴日，你同電話對面嗰個講緊咩？」

我答：

「我拒絕。」

賽德克先生再講：

「咁簡單啲，電話另一面嗰個係幾多年嘅人？」

我答：

「2020，你識唔識其他穿越嚟嘅人？」

佢講：

「我拒絕。」

「咁我都嚟條簡單啲，三十年時間，你仲渴唔渴望翻去現實世界？」

「唔重要啦已經。其實真係有咁大分別咩？呢到你覺得係《教父》電影嘅世界，你覺得虛假，咁可能你本身生存嘅世界都只係人哋嘅一份劇本，邊個知呀？」賽德克先生講。

我停一停，諗咗諗。

「你有冇屋企人？無論係呢面定嗰面。」

賽德克先生笑一笑之後講：

「我喺到生活咗三十年，我學識呢到同你所講嘅現實世界一樣，馬龍白蘭度唔係主角，冇人係主角，無謂對教父有情意結，翻去諗下合作嘅事。」

佢講完之後，天台門同時打開，兩個大漢行咗出嚟，而我同時追問賽德克先生：

「你唔係話換兩條女係好提議嘅咩？」

我俾兩個大漢夾走時聽到賽德克先生講：

「你同我合作，我就換。」

--------------------------------------------

我俾人帶翻落地下，我向天台大叫：

「我唔會為咗兩條女而折腰架。」

大叫完之後，保安走埋嚟同我講：

「冇咩野唔該出翻去。」

我問佢：

「我支槍呢？」

佢答：

「我冇呢方面資料，有咩問公共關係科。」

我望一望個鬼佬，我問佢：

「你唔會叫陶輝呀可？」

佢答：

「係，有咩幫到你。」

我同佢講：

「冇，得個知字啫。」

我心諗如果我同賽德克先生合作，我要加多個條件就係埋你單。

樓豬發現自己隻手速度跟唔上個腦

咁快冇哂啲存貨啦

樓豬丟架啦今次樓豬太懶樓豬會發𡚒圖強架啦