[鳩故][穿越] 唔係吓話，我去咗《教父》世界！

終於有文

樓主都真係慚愧

靜靜咁樣等待呀木談到來。

滴答，滴答，滴答........

我望住掛喺客廳嘅鐘，時間一分一秒咁過去，但威廉依然冇出現。

如果牆上面威廉兩隻字係戰書嘅話，我會形容威廉係一個連決鬥都遲到嘅牛仔。

時間一分一秒咁過去，無意中我竟然開始出現幾分睡意，神智開始唔太清醒。

當我隱約聽到開門嘅聲音，正當我想起身嘅時候，我發現自己四肢無力，我只可以眼睜睜咁見到威廉行入嚟，隨即行入嚟講：

「點解你咁蠢都迫到我上絕路嘅呢？」

佢望一望周圍，發現周圍冇咩異樣就繼續行入嚟。

行到我面前，望一望我，佢咩都冇講，就係咁樣坐咗喺我對面，我同佢講：

「你想點？」

佢笑一笑然後講：

「你叫我過嚟架啵，你問翻我想點？」

佢好似好有道理，但我冇誤闖陷阱，我同佢講：

「我問你捉咗菲兒同賽德克先生究竟有咩居心？」

威廉企咗起身，向我揮來一下手刀，喺我暈低之前聽到佢講咗一句：

「始終都要做個了斷。」

——————————————————

我迷迷糊糊咁擘大眼，只有喺上空照射落嚟嘅絲絲月光。

我發現自己雙手都各自俾人用手扣鎖咗喺一條嘅工字鐵到，無論我點用力，就算拉到手腕隱隱作痛都拉唔喐。

我望一望周圍，破爛嘅天花，殘舊嘅石屎牆，地方大，樓底高，我相信係一間廢棄工廠，電影中殺人滅口嘅最好地方。

唯一望到嘅就係前方一大塊白簾，周圍冇咩特別，天花穿咗個大窿，大到好似天井咁款。而且我望上天只係望到一片黑色同皎潔嘅月亮，增添幾分月黑風高殺人夜嘅感覺。

我得唔到任何有用資訊，我唯一望到嘅只有前面嘅白幕，不過今次我冇選擇大叫，因為我冇放棄到解開手扣嘅機會，亦都因為我知道今次如果我處理唔好，我可能真係會死。

我一邊嘗試解開個手扣，亦一邊諗緊點樣攞翻主導權嘅方法，點解咁講？

頭先將自己困喺屋入面引威廉出現嘅方法雖然叫做成功，但亦都令我完全失去咗主導權，無論係談判定交易都淪落至非常之差嘅境地。

可惜世事都唔盡如人意，好快我就聽到滋滋作響嘅聲音，聽落似係老舊而且沉重嘅鐵門所發出嘅聲音。

然而聲音係由白幕後面發出，我只能夠透過聲音估後面發生咩事。

白幕後面傳嚟女性掙扎嘅叫聲，鐵架移動啷啷響嘅聲音，同男性厚重嘅踏步聲。

踏步聲越嚟越接近，伴隨著腳步聲停止之後，就係滑輪滋滋作響嘅聲音。聲音一完，白幕就徐徐降下。

眼前就係一個著住白灰色西裝嘅威廉，同當日第一次見面一樣。

除咗威廉之外，映入眼前嘅仲有菲兒同賽德克先生，大家嘅情況都同我一樣被手扣鎖喺工字鐵，唯獨不同嘅係菲兒被黑布蒙眼及膠布封口，一直喺到叫嚷掙扎，楚楚可憐。

然而賽德克先生嘅情況更加惡劣，賽德克先生半倒在地上，衣服破損，滿身傷痕，身上衣物仲有滲血嘅情況，奄奄一息。

我望到兩人嘅情況，我再望一望威廉，我完全搵唔到佢做呢啲野嘅理由，我問佢：

「點解你要咁做？」

威廉攞起變聲器就講：

「因為我應該咁做。」

當菲兒聽到威廉嘅聲音之後又激動叫嚷咗一翻。

威廉聽到菲兒叫就指一指賽德克先生繼續同我講：

「我同伊森玩咗個遊戲，我同佢講，只要佢發出任何一粒聲，我都會對菲兒不利。」

我望住賽德克先生慘不忍睹嘅情況，配上威廉啱啱所講嘅所謂遊戲，我一時之間講唔出咩野說話。

威廉就繼續用變聲器講：

「伊森就算畀我打到咁嘅樣，一粒聲都冇出過，所以你話父愛幾偉大啦。」

威廉繼續講：

「我想同你玩個遊戲。」

無錯，係我想像中最變態嘅對白，我同佢講：

「點解我要同你玩？」

威廉喺衫袋隨手攞咗支槍出嚟，向雜物堆開咗一槍，菲兒嚇咗一嚇大叫，威廉然後再同我講：

「你覺得自己仲有選擇咩？」

的而且確我冇話語權，我唯有被迫接受。

威廉見我冇講野佢就繼續講：

「我畀個機會你，你可以選擇喺兩個入面放過一個人。」

我覺得呢個問題太簡單，無論係我定係賽德克先生都會願意俾菲兒走先，我諗都冇諗就同佢講：

「菲兒。」

威廉無講野，行去菲兒身邊攞走咗菲兒嘅眼罩，菲兒見到威廉以及喺地上奄奄一息嘅男人，面上顯露出嘅係疑惑同震驚。

威廉冇理會菲兒，佢終於放低變聲器再講：

「你確定？我比你嘅選擇的而且確有菲兒，但另一個選擇唔係你，亦都唔係伊森，而係諾亞巴頓。」

我皺起眉頭講：

「你捉咗巴頓先生咩？」

威廉搖一搖頭講：

「冇，但我要對付佢易如反掌。」

我呢一刻心中嘅想法只有一個，就係威廉實在無恥至極，但我依然未理解點解佢要咁做，我問：

「你點解要咁做？」

威廉問非所答，佢繼續講：

「我畀你重新選擇多一次，你會選擇邊一個平安，係喺你面前楚楚可憐嘅菲兒，還是無辜而且仲有一家大細嘅巴頓？」

同一時間，菲兒由當初嘅否認轉為憤怒，對威廉大呼小叫，但威廉並無選擇理佢。

而我喺威廉嘅問題中重新發現咗提示，我問威廉：

「巴頓先生係無辜，咁點解我哋有罪？」

威廉一如以往，佢繼續講：

「穿越者。唔應該存在嘅人。只係呢個原因已經足夠。」

我聽完充滿疑問，我一時之間都唔再理菲兒面上嘅疑惑，我問威廉：

「點解？」

威廉皺一皺眉頭，語氣平靜咁講：

「點解？你啲本來就唔應該存在，你哋嘅存在係搶走緊我哋原本應該擁有嘅野。」

威廉行去面前賽德克先生面前，佢扯住賽德克先生嘅頭髮，繼續同我講：

「就好似佢搶走咗我嘅凱倫。」

菲兒同我聽到之後面上都出現咗疑惑。

威廉放翻低賽德克先生，然後細細聲同佢講：

「你知唔知點解當年凱倫忽然之間咁驚你？」

賽德克先生傷勢嚴重，只能夠微微搖頭。

威廉將目光轉移翻去我身上，佢講：

「我知道你一直查緊博曼罕嘅事，我講個秘密你知，博曼罕係我殺嘅，而我將件事嫁禍畀佢，令到凱倫離開佢。」

威廉冷笑咗一聲再講：

「但你知唔知道最有趣係咩？我一直扮做佢朋友，喺佢哋離婚當日，佢仲叫我好好照顧佢哋兩母子。」

賽德克先生聽完之後自己獨自冷笑咗幾下，然後佢用微弱嘅聲音講：

「係呀，而且去到最後凱倫都冇愛上你。」

說話一完，威廉又一拳打向賽德克先生。

而菲兒嘅面上亦表達出佢因為喺咁奇怪嘅情況得知關於身世嘅消息而震驚。

扭曲嘅愛，將所有問題怪罪於人，我瞬間發現咗威廉並唔係一個可以談判嘅人，因為驅使佢咁殘忍嘅唔係理性，而係感情。

我都毫不隱瞞咁同佢講：

「如果你話穿越者搶走原本屬於你嘅野，咁你就錯啦，因為凱倫凱勒都係一個穿越者。」

威廉聽完呆左一呆，我聽到喺賽德克先生嘅方向傳出微弱嘅笑聲。

但呢種笑聲成為咗對威廉嘅錐心之痛，威廉呆咗一陣，由當初否認嘅喃喃自語變得情緒激動，攞出手槍射向菲兒左腳，菲兒劇痛大叫，威廉然後向賽德克先生大叫：

「你唔好再笑。」

空間變得寧靜，我同賽德克先生都冇再講野，威廉向我講：

「你攞走曬我嘅野，我俾柯里諾家族追殺，巴西尼家族都再冇我嘅位置。」

我俾佢嚇一嚇，佢回復翻幾分冷靜繼續講：

「我畀三秒時間你決定要放過邊個。」

隨即佢開始倒數：

「三。」

菲兒將目光放翻喺我身上，我望到佢眼帶淚光，想起當日生日會嘅經歷。

「二。」

我回想起喺巴頓先生屋企食飯嘅畫面，溫莉望到爸爸時候嘅笑容。

「一。」

我思緒一片混亂，決定嘅頭緒一片空白。

「零。」

嘭一聲響起，巨響過後空氣變得寧靜凝重。

胸口滲出血嘅係賽德克先生，本來已經虛弱嘅賽德克先生隨即失去意識。

威廉將槍口指向菲兒繼續同我講：

「選擇。如果唔係，我幫你選擇。」

倒數又再次開始：

「三。」

我將目光由賽德克先生轉翻向菲兒。

「二。」

菲兒再冇望住我，已經被嚇得淚流滿面。

「一。」

我衝口而出向威廉大叫：

「菲兒，菲兒，放過菲兒。」

我當刻只係知道我唔可以再俾任何一個人喺我面前中槍。

威廉聽完之後徐徐咁答：

「好。」

威廉解開菲兒手扣，指一指門口同菲兒講：

「走啦。」

菲兒呆咗喺到一陣，隨即撕開封口膠布，拖著受傷嘅左腳慢慢向門口爬過去。

空間瀰漫著菲兒劇痛呻吟嘅聲音，喺佑大嘅工廠地上，出現一條用血拖成嘅血痕，菲兒好似無論點爬都逃離唔到呢個空間咁。

空氣非常寧靜，直至菲兒爬到工廠門口，發現工廠門已經上鎖，菲兒單腳靠住門用力掙扎，無論點樣都打唔開。

又過咗一陣，菲兒筋疲力盡，面青口唇白咁坐咗喺門前面。

威廉慢慢行過去，去到望一望菲兒，就行翻轉頭。

我望到之後就非常不憤，我就問佢：

「你由一開頭就冇諗住放過我哋？」

威廉點一點頭，然後就將槍口指住我。

事已至此，我用我最後嘅機會同佢講：

「柯里諾家族唔會放過你，如果你放咗我哋，我會幫你向麥克求情。」

威廉聽完笑一笑講：

「麥克已經忘記咗點樣原諒人。」

我談談回應佢：

「你又何嘗唔係。」

嘭！

今次又遲咗好多，我都冇咩籍口，真係唔好意思

下一話如無意外就係結局啦

推

加油

樓主會學精架啦下個故會寫多啲先開post樓主懶性好高

咁不如寫下互動
增加自己既動力

我擘大眼。

我發現自己困咗喺嗰漆黑嘅房仔到，我企直個人，望到喺我眼前嘅喺當日吸我去教父世界嘅電視，電視上面仲掛咗幾個十字架，前面仲放咗幾本聖經添，我嚇咗一嚇。

嚇一嚇之後我冷靜落嚟望一望周圍，周圍有啲舊書，有啲模型，仲有其他大量雜物，但全部都係現代嘅產物，無論點睇我都喺現實世界。

我對嗰部會食人嘅電視心有餘悸，我嘗試開門離開間房，好可惜門鎖咗，一時心急就開始用力敲門，而且講：

「放我出去呀。」

我見有段時間冇反應就開始使用暴力，我用力撞開嗰道用塑膠製嘅劣質門，隨即伴隨嘅係響遍整個空間嘅警報聲，我行出去望多兩望，我發現咗個事實。

仆街啦，呀木個衰仔將部電視放咗入迷你倉。

一如期望，有兩個疑似保安嘅人行咗過嚟問我：

「你係邊個？做乜偷野？」

我思考緊自己應唔應該好似電影主角咁逃走引發一大段奇遇。

黐線啦，我非常之冷靜咁同佢哋講：

「你打俾倉主，我可以解釋架。」

————————————————————-

「身分證呀！」某個保安大叫。

我嘆一嘆氣咁講：

「都話喺屋企囉。」

我真係唔明白，好哋哋一個保安講野成個差佬咁，出事架嘛。

就係咁樣我哋就糾纏喺冇身份證同公司唔想報警之間。

大概半個鐘之後，呀木出現咗，將我係偷渡人士屈蛇喺迷你倉嘅嫌疑解除。

等緊𨋢嘅時候我問呀木借電話，佢同我講：

「你唔係想打俾伯母嘛？」

我一面理所當然咁講：

「係呀。」

呀木面有難色咁講：

「我琴日先仲話緊你喺北韓，你今日打電話翻去我好難做架啵。」

我眉頭皺一皺望住佢。

呀木繼續講：

「你唔見咗咁多日喎，家陣有國安法呀，我唯有屈金正恩啦。」

佢講嘅野非常荒謬，但的而且確符合事實，我唯有接近。

叮！

𨋢到。

開門，

打開門我見到嘅係一個熟悉嘅面孔，唯讀面上更添幾分滄桑。

我望住佢講：

「呀木，你記唔記得我曾經叫你查過一個叫賽德克嘅人，佢就喺你面前。」

呀木聽完之後舉起雙拳，擺出咗個戰鬥姿勢，我心入面非常懷疑佢以為我穿越嘅電影係洛奇。

我心入面勾起賽德克先生滿身傷痕，心口滲出血嘅畫面，喺菲兒面前慘死嘅畫面，我冇講野就咁行去攬住賽德克先生。

就係咁樣形成咗我同賽德克先生感動重逢嘅畫面，而呀木成為咗喺側邊非常尷尬嘅裝飾。

————————————————————-

某間餐廳內。

賽德克先生帶咗我去一間咖啡店，裝修非常類似巴頓麵包鋪，一如以往我同賽德克先生坐咗喺到，大家都非常寧靜，我就問佢：

「你係點搵到我架？」

賽德克先生喺衫袋入面攞咗個公文袋放喺檯面，然後講:

「三十年，我喺電影世界生存咗三十年，當我重新踏足現實世界係二零一零年，我就知道兩個世界嘅時間係相對嘅。」

佢望一望我，指一指個公文袋再講：

「我喺幾十年前買落嘅股票到而家升幅完全超乎想像，所以我有好多時間同資源做功課，搵出你係邊一個。」

原來時間就是金錢係真架，但我冇糾纏喺呢點，因為我知道有更加重要嘅野，我笑一笑同賽德克先生講：

「當你知道死咗會翻嚟現實世界，你第一時間唔會係諗起我，而應該係凱倫凱勒。」

賽德克先生聽完之後眼中閃過一絲哀傷淚意，佢深呼吸然後講：

「凱倫，凱倫死咗啦，又一次。」

空氣變得死寂。

過咗一陣賽德克先生繼續講：

「我搵咗好耐，終於搵到凱倫生前最後住嘅精神病院。醫生判斷凱倫患有精神病，只係因為凱倫如實將佢嘅經歷講出嚟，然而冇人相信佢，所有人都同佢講所有野都只係佢幻想出嚟。」

氣氛凝重到令人窒息。

賽德克先生流咗兩滴眼淚然後講：

「凱倫精神崩潰，佢喺精神病院頂層跳咗落去，而我發現佢跳嗰日亦正正喺我翻嚟現實世界嗰一日。」

講完之後賽德克先生失聲痛哭，我冇怪佢，因為我知道我係佢唯一一個可以將真相完全講出嚟嘅人，亦都係佢重翻現實十年嚟第一次可以將傷心分攤出去嘅機會。

就係咁樣又經歷一段時間，賽德克先生嘅心情都開始回復平常。

此時此刻我擔心嘅係當賽德克先生失去咗三十年努力，失去咗愛人，我心入面怕下次精神失常搵上門嘅係佢，我眼中閃過不安同關懷嘅情緒。

賽德克先生回復理性，見到我嘅表情之後講：

「你唔需要擔心我，我有生存嘅希望，亦都係我搵你嘅最大原因。」

我皺一皺頭表示不解。

賽德克先生繼續講：

「菲兒係我同凱倫生嘅，而我哋都係穿越者......」

聽完之後我就靈機一觸，我打斷佢講：

「所以你認為菲兒有機會穿越咗嚟呢個世界？」

賽德克先生點一點頭。

我心中又想起菲兒喺門前失血致死嘅畫面，我諗咗一諗再講：

「但係我哋冇任何證據，亦都唔知佢會幾時嚟，邊到嚟，甚至乎可能已經死咗。」

賽德克先生冷靜咁講：

「死咗都會留低痕跡。」

的而且確，當我知道有呢個可能性，無論點都釋懷唔落，我就同佢講：

「我會幫手一齊去搵菲兒。」

賽德克先生搖一搖頭講：

「穿越者會互相吸引，你只要唔好忘記已經足夠。」

————————————————————-

我坐咗喺迷你倉入面。

賽德克先生走之前同我講佢曾經去翻聖海倫火山到睇，佢都建議我翻去面對，會睇到更多野。

就係咁樣我留咗喺到獨自面對呢部食人機器。

我駁上電源，㩒著電源掣之後迅速奪門而出。

過咗一陣我隔住道門偷偷摸摸咁望，咩都冇發生，冇強光，冇怪聲，連著都冇著，我可以肯定嘅只有佢係一部壞咗嘅電視。

我鼓起勇氣行入去望兩望，㩒多次個電源掣，一切都冇分別。

我求其搵咗盒雜物坐咗上去，喺到諗翻之前發生嘅事。

威廉殺曬我哋三個，究竟佢最後有冇向巴頓先生落手？

雖然巴頓先生同穿越者毫無關係，但殺戮之人將紅線一步一步拉近，又有邊個可以置身事外。

柯里昂家族會唔會喺兩年之後俾奧雲迫到好似電影咁去內華達州呢？

柯里昂家族搵我做誘餌，決心要搵威廉出嚟，威廉捉咗三個人嘅事，柯里昂家族一定知，然而麥克冇選擇拯救我哋。

哈爾一個小朋友孤苦伶仃，失去曬所有親人，佢嘅路可以點樣行落去？

我都唔知，我再望一望嗰部壞咗嘅電視，睇嚟我冇得睇《穿越教父》下集，就係咁樣我行咗出去，踏上北韓歸家之路。

———————————————————-

三個月後。

「嘟，嘟，嘟。

而家時間係下午一點。

歡迎大家收聽機動娛樂台，我係你哋嘅節目主持人-隆威，今日我哋收到一則好特別嘅新聞，據報今日凌晨三點喺黃竹坑嘅一間迷你倉發生咗一宗劫案，三個劫匪大搖大擺持槍闖入，大家聽到呢到都以為有人將咩珠寶黃金呀，驚世名物收埋喺迷你倉到啦。

但奇就奇在，倉主向警方落口供嘅時候，佢話佢俾人搶咗嘅係一部電視，仲要係某個罪大滔天嘅牌子，究竟劫匪係唔係認錯咗部電視係新出嘅遊戲主機呢？還是佢有錢買槍冇錢買電視呢？真係耐人尋味呀！」

我喺食飯途中聽到呢單新聞，我飯都噴埋出嚟，我即刻攞起電話打畀呀木，我第一句就同佢講：

「部電視係唔係畀人偷咗？」

呀木語帶睡意咁講：

「係喎，好眼瞓唔記得同你講。」

我心中平談咁留下咗一句：

「屌你呀。」

我就收咗線啦。

我即刻打電話俾賽德克先生。

冇人聽。

突然間電話傳出嗶一聲，接住就收咗線。

我再打過去都打唔通啦。

......

嬲。

—————————————————————

當日晚上。

我收工翻到屋企，大門攝住咗個公文袋，公文袋上面嘅署名係賽德克先生。

我攞咗個文件袋入屋，我有思考過會唔會係炸彈又或者某種陷阱，我決定相信而無謂糾纏呢啲咁哲學嘅問題。

我打開公文袋，入面有一封信，一張相同一張卡片。

卡片上寫住嘅係畢德堡俱樂部，成張卡得個名，睇完我放埋一邊先。

我攞起張相，係菲兒，但無論係服飾還是背景都非常舊式，係一張攝自十九世紀嘅相片。

我放低相，攞起封信，信入面寫住：

「 我就坦白講，我搵到菲兒，而且菲兒已經死咗，因為菲兒穿越嘅時間點比我哋前好多。

穿越能力係一種血統遺傳，就好似我同凱倫將穿越能力遺傳俾菲兒一樣。

菲兒喺穿越嚟到呢個世界嘅時候，佢改咗名叫哈爾凱勒，同一個叫卡洛蓋恩嘅人結咗婚，而卡洛蓋恩就係我太爺。

題外話，或者我哋有某種遠房親戚嘅關係。

最後，有個神秘集團好似發現咗穿越嘅事，小心卡片上嘅名字。」

一時之間我接收到太多資訊，太多令人震驚嘅事實，我放低封信坐咗喺到。

正當我想進一步思考嘅時候，門鐘響起。

我行去開門，打開門係兩個著住黑白色西裝嘅男人，佢哋講：

「你好，我哋係畢德堡俱樂部，我哋有啲關於電影嘅問題想搵你傾下。」

（完）

好嘢

好嘢

無錯故仔已經完咗，大家有冇咩想法意見講吓，真實直接啲都唔緊要

又幾好睇

雖然唔知係唔係安慰我嘅說話 但我真係好多謝你 會唔會有多啲評價畀我

一開始好刺激，去到最後一兩章變到好溫情。
尤其係賽德克先生擁抱主角嗰一幕，真係好感動，明明佢哋兩個一開始係一啲都唔信對方

大結局嘛，始終激情會有完結嘅一日

我都放咗好大比重喺主角同賽德克先生關係轉變身上，因為成個故仔真係有出過場嘅穿越者就係得佢哋兩個

我都好感動，最感動係你覺得感動，我叫做寫出咗有溫度嘅文字

唔知俾咩評論好喎

點解咁講呀唔通個結局令你好失望

唔係呀係唔識俾feedback
等你下篇

好呀 雖然下一篇主題係咩都未決定到