[鳩故][穿越] 唔係吓話,我去咗《教父》世界!
呀木談
246
回覆
22 Like
4 Dislike
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
武次子敏史
2020-08-27 19:52:22
不過重質重要啲
呀木談
2020-08-27 21:15:01
講得好呀,愛你呀華生
呀木談
2020-08-29 00:12:31
星期三。
我翻到麵包舖,巴頓先生一見到我就衝過嚟攬住我,佢話:
「我見到你張字條仲以為你會死呀。」
我答佢:
「我琴日都以為自己會死,以為自己搵到隱藏大佬,點知自己傻仔咗。」
講完之後自動自覺咁攞起個包,沖咗杯茶坐低喺餐枱。
巴頓先生遞封信畀我再講:
「你畀麥克封信仲係到,你自己畀佢?」
我接過封信講:
「好,話時話,琴日你見完教父點呀?」
巴頓先生答:
「危殆,依然昏迷中,希望柯里昂閣下撐得住啦。」
聽完之後我開始沉思。
而家雙方都仲係膠著狀態,而根據電影劇情,柯里昂幾兄弟一定係商討緊報仇嘅事,而麥克會流落西西里。
我唔樂見呢個情況,因為兩年嘅膠著時間,對我嚟講實在太長啦。我有必要搵佢哋幾兄弟求其一個傾吓,最好係麥克,因為我知道最多開於佢嘅事。
仲有博曼罕係邊個殺架?我聽唔到嘅第四個穿越者?退一步講,我連佢叫咩名同狀況點都唔知,完全無從入手。
我問巴頓先生:
「柯里昂大宅會唔會過嚟買麵包架?」
巴頓先生答:
「唔會。一嚟遠,兩嚟我諗佢哋本身都有廚師。」
我同巴頓先生講:
「借架車同幾袋麵粉嚟用下。」
巴頓先生問:
「你想點呀?」
我答:
「我決定試下最老套嘅方法。」
———————————————-
柯里昂大宅。
我打開車門攞咗袋麵粉落嚟。
行去後門搵個睇落最豬兜嘅保安同佢講:
「送麵粉架。」
正當我想掂行掂過嘅時候,嗰個成個張建宗咁嘅樣嘅保安過嚟截停我講:
「送咩麵粉,未聽講過。」
我唯有放低袋打開個麵粉袋開始鳩吹:
「呢批係瑞士山區粉,無污染,無添加,粒粒都咁白架。」
我望住保安嗰個迷惘嘅樣,我繼續講:
「一年得一批架咋,接觸空氣就氧化架啦,你睇吓,黃呀,黃呀,黃緊呀,你負唔負責得起架?」
見佢俾我質疑到開始動搖,我就一邊包翻好袋麵包一邊行入去,走之前講:
「今次教精你呀,走粉都係經驗,你冇讀過大學更加唔可以介意啦。」
望到嗰個貌似張建宗嘅保安一副感覺自己學到野一生受用嘅樣,我就知我好順利潛入啦。
——————————————————-
行到入正廳,求其放低袋麵粉喺角落頭,就開始尋找麥克的故事。
作為一個演員,最緊要自然,千其唔好偷偷摸摸。
我喺行嘅過程中,見到有個女人經過,我光明正大咁問佢:
「有冇見過麥克或者湯姆?」
佢答我:
「哈金先生出咗去,麥克在他的書房。」
我講:
「好,唔該你,不過書房係邊?」
佢有啲疑惑咁望我,我再講:
「唔好誤會,我係麥克海軍嘅朋友,我知道柯里昂閣下嘅事,特登過嚟搵佢。」
「唔好意思,失禮咗,嗰面行上一層轉左第三間房就係。」
「唔緊要,非常時期敏感啲係好事,唔該曬你。」
講完我就行咗去啦。
———————-
行到上去書房,門冇閂埋,望到麥克,一副憂心如焚,稚氣未除嘅樣子,完全冇《教父》後期嘅氣勢。
我只係需要獲得麥克嘅信任,尤其柯里昂永遠以家族優先嘅原則,只要善加利用,難度冇想像中咁高。
我敲一敲門,自然咁行入去搵張凳坐低講:
「你好,麥克,我係幫令尊做野嘅,我叫湯姆,勞根,我有啲野要同你講。」
麥克疑惑咁講:
「我從來冇見過你。」
我繼續講:
「我相信你都知道,令尊一直都唔希望你接觸黑道生意,而且有啲工作越少人知越好。」
望到麥克思考緊,我繼續講:
「我向你坦白,我幫教父喺唐人街個邊做野,我有特別嘅收風技巧,想殺死令尊嘅表面係塔塔基利亞,實際上係巴西尼,又或者可以叫做其他四大家族已經聯手啦。」
麥克眼神散弱咁講:
「好似你所講,父親一直都唔希望我接觸家族生意,我冇咩號召力,咁重要嘅事或者你應該同山姆講。」
我一隻手搭住麥克膊頭講:
「麥克,當然要同佢哋講,但唔係我,係你。你需要畀翻啲自信自己,令尊出咗意外,負擔落咗去你哋幾兄弟身上,你都需要變得堅強。」
「假如,我話假如,你可能會擔上重任,
我知道你對自己嘅人生有唔同嘅期望,就好似你加入海軍一事咁,但同時有啲責任係冇可避免,我知你愛你嘅家族,你都希望可以減輕父親同兄弟嘅負擔架嘛。」
麥克講:
「我明白......我會。」
我再講:
「麥克,我一直以嚟向令尊負責,而家佢訓喺醫院,我有野要同你講,我有個機會去巴西尼身邊做臥底,我以後會同你聯絡,你得唔得?」
我等咗麥克一陣,見到麥克眼神開始轉變。
麥克講:
「可以,我會同佢哋講,我哋會重新部署,而你專心去做臥底工作。」
我問麥克攞咗張私人卡片,同時用紙寫底巴頓麵包舖嘅電話,然後講:
「我會用積尼托倫斯嘅身份再聯絡你,暗號係閃靈,如果你迫不得已要聯絡我就用丹尼。」
講完之後我就行翻去後門,同個豬兜保安光明正大講再見咁行出去。
———————————-
離開大宅,揸車翻去麵包舖嘅途中搵咗個電話亭打畀雷達研究所。
「喂,我想搵賽德克先生,同佢講我係艾德蓋恩。」
等咗陣,電話另一邊再次傳嚟聲音,係賽德克先生,佢講:
「你有答案?」
我講:
「答案同條件。」
「好,聽日過嚟。」賽德克先生講。
收線。
揸翻架車去麵包舖,同巴頓先生講:
「巴頓先生,我諗我做埋今日做唔到啦。」
巴頓先生拍一拍我膊頭講:
「我明...我明...自己小心。」
幾分鐘後,巴頓先生又講:
「唔啱聽嘅野想唔想聽?」
我好似愚民樂咁則一則頭講:
「你講啦。」
巴頓先生嘆一嘆氣講:
「以前有幾個後生仔都係咁,好嘅都仲見得翻佢,最差嘅連畀紥花嘅機會都冇,如果你唔想,我可以畀筆錢你離開紐約。」
「我明白,多謝你嘅好意,但係有啲野我需要面對,或者......可能係我存在喺到嘅唯一意義。」
講完之後我行埋去攬一攬巴頓先生,攬完我望到巴頓先生眼泛淚光。
我心中咒罵識咗一個星期多啲啫,做咩咁感性架你,搞到我都有啲眼濕濕啦。
經歷咗呢幾日,我發現就算冇女神指引,但原來其他穿越者一直喺我身邊,當教父中槍之後一切亦接踵而來,佢令我相信逃避命運並唔係解決當前環境嘅方法。
瓦努阿圖達文西
2020-08-29 12:16:55
太平洋都被巴打抽乾了
呀木談
2020-08-29 13:29:16
我都唔想架
只係豬兜樣我第一時間諗到就係呀張司長
武次子敏史
2020-08-29 14:25:30
遲啲會唔會有林奠
呀木談
2020-08-29 15:28:47
暫時個故仔溝想未有心腸歹毒,喪盡天良嘅老女人,所以出現機會唔大
呀木談
2020-08-29 18:43:13
做個負責任嘅樓豬,睇嚟一日一篇的確有難度,又唔想減少章節嘅完整性,正式調整為兩至三日一篇
據樓豬非正式統計,每篇字數都有二千字連標點,除翻開每日都有700至1000字
叫做合乎國際標準
武次子敏史
2020-08-29 20:09:53
呀木談
2020-08-30 03:48:48
深夜訓唔著自推
瓦努阿圖達文西
2020-08-30 22:46:24
樓主加油
呀木談
2020-08-31 12:36:13
星期四。
朝早8點多啲,同之前咁多日唔同,我唔需要去麵包舖,好似冇咗目的咁。
我訓咗喺張床到,望住天花板。
迷惘,一切都好真實,但唔屬於我嘅真實。
如果係都要我解釋,我會講就好似中咗變奏版嘅天舞寶輪一樣,除咗五感我咩都感覺唔到。
一段時間之後,有啲野打破咗沙加嘅奧義,係鎖匙開門嘅聲音。
菲兒開門衝咗入嚟講:
「我啱啱去咗巴頓麵包唔見你,我問巴頓先生你喺邊,佢講到你就嚟死咁,我.....我......你......竟然就咁訓喺床到......」
我望一望個鐘,11點半,天舞寶輪咁就食咗我三個鐘,我同菲兒講:
「冇事架,巴頓先生誇張咗啫,簡單啲,你可以當我轉份新工啫。」
我冇諗過菲兒會咁激動,我唔肯定佢係基於友情,愛情,又或者係純粹嘅人道精神,但喺當下我覺得唔重要,我就冇去深究。
———————————-
聖鬥士會浴火重生,正確嚟講只有一個係,而我都係。
我今次去到雷達研究所,保安冇阻撓我,仲同我打招呼添。
我自己行到去電梯前面,開門見到嘅唔再係兩個彪形大漢,而係一個電梯小姐。
今次依然係天台,果然傾秘密始終都要去天台,打開門見到嘅係賽德克先生,我講:
「靚女人工好貴咩,得一個咁冇誠意嘅。」
賽德克先生笑一笑講:
「你應承合作咪兩個囉。」
我舉出代表一嘅手勢然後講:
「好,佢係我第一個合作條件。」
賽德克先生喺天台搵咗個壆坐低講:
「咁仲有幾多個,講埋出嚟啦。」
「第二,我要翻部電話;第三,我要你介紹我畀巴西尼識;第四,與其話條件,不如話係合作策略,你答我個問題先,你同巴西尼咩關係?好似你希望我同你之間嘅合作關係?」
賽德克先生講:
「唔係,我之前都講過,巴西尼係商人,唔可以叫合作,有需要時我會利用佢。」
我再問佢:
「所以你唔介意摧毀佢?」
賽德克先生:
「唔介意。」
我再講:
「如果你嘅目的係掌握未來,巴西尼只可以係跳板,五大家族最後都唔應該存在。」
賽德克先生講:
「雖然唔係咁易,但我同意。」
我再問:
「所以你同意我嘅條件?」
賽德克先生講:
「唔係,手提電話我唔會畀翻你。」
我望住佢,我思考緊有冇其他攞翻電話嘅方法。
賽德克呢個時候再講:
「我唔會畀翻你,但我可以讓步。四樓實驗室範圍之內,你可以自由使用你部手提電話。」
我答佢:
「雷達研究所範圍。」
賽德克先生再講:
「四樓實驗室範圍。」
我再答佢:
「好,四樓實驗室範圍,唔受監控,包括你。」
賽德克先生聽完企起身行埋嚟伸出握手姿勢講:
「我接受,歡迎合作。」
握完手,賽德克先生係衫袋攞咗部對講機出嚟,開掣講:
「搵多個電梯小姐上嚟頂樓。」
賽德克先生講完之後我諗起樣野,我講:
「我唔記得咗仲有一個條件。」
賽德克先生聽完之後問:
「咩條件呀?」
我講:
「下面有個保安叫陶輝,好乞我憎架,幫我炒咗佢得唔得?」
賽德克先生聽完又向對講機講:
「幫我同人事部講,一個叫陶輝嘅保安,佢好乞我憎,叫佢執埋啲野走啦。」
賽德克先生講完望一望我,我畀咗個滿意嘅手勢佢。
——————
四樓實驗室。
賽德克先生入門口一邊行一邊講:
「等我重新介紹自己,我係開發部嘅主管,簡單嚟講呢棟大廈我話事,而呢到係我嘅私人辦公室兼實驗室。」
我望一望個實驗室講:
「好大喎,中間個空中花園係畀你放晏個陣野餐用架?」
賽德克先生講:
「的而且確景色係唔錯嘅,良好提議。」
原來啲高官叫人去郊野公園食晏嘅想法係咁嚟嘅。
我繼續講:
「部電話呢?」
賽德克先生答:
「入面行多間。」
我行到入去,我望到部電話放咗入玻璃箱,我問佢:
「你係1980年嘅人,個時有大哥大未?」
「有,不過貴。」賽德克先生講。
「有冇爆炸嘅新聞?」
「好似冇。」賽德克先生講。
「咁你做得啱,而家啲電話會爆炸架。」
我望一望手錶,十二點幾接近一點,我講:
「我要用電話,你要出一出去,如果有閉路電視個啲幫我熄埋,你應承咗架。」
賽德克先生一邊出去一邊講:
「呢間房冇任何監控架。」
等賽德克先生閂埋門我就打開玻璃箱,攞部電話出嚟準備等呀木電話。
我㩒住電源掣等佢開機,但佢一直都冇反應。
大概一分鐘後,我開始接受現實,行出房口見到賽德克先生坐咗喺出面望住我,我講:
「你唔會係用曬啲電可?」
賽德克先生講:
「實驗必然會有啲消耗嘅。」
我深一深呼吸,畀咗個手指公佢,講:
「好嘢呀你。」
賽德克先生再講:
「我睇過下,我設計咗啲需要嘅零件,而家要等佢造,而且我哋當前要解決嘅係關於你嘅問題先。」
我再講:
「但對我嚟講,當前係需要部電話。」
賽德克先生答:
「咁睇嚟我哋有第一個合作糾紛,咁我都坦白講,我會盡力幫你,我都需要佢,但開發研究係需要時間架,快嘅可能幾日後就用得,如果唔啱用嘅,唯有試到成功為止。」
無可厚非亦都唯有接受,只可惜辛苦呀木打唔知幾耐電話。
————————————
電話問題只能等,咁我講:
「咁你所講關於我嘅問題係咩?」
賽德克先生講:
「你都好清楚柯里昂家族喺紐約衰落緊,無論佢哋仲會唔會去拉斯維加斯發展,如果我哋要留喺紐約發展,我哋要投靠巴西尼。」
「而問題係你住嘅地方係柯里昂名下嘅物業,你翻工嘅地方同柯里昂關係密切,若果你要投誠,你需要作出一啲改變。」賽德克先生繼續講。
聽完之後我講:
「我已經辭咗職,屋我隨時都可以搬。」
賽德克先生望一望我表情又講:
「做人最緊要知道自己真正著緊啲咩,無論你個人喺邊。」
正當我思考緊呢句咁有弦外之音嘅說話嘅時候,賽德克先生再講:
「談判嘅時候多啲注意自己嘅表情,唔好畀人知你諗咩。」
我心入面諗,咁即係之前兩次談判你都抽緊我水啦,賤人。
呀賤人講完去咗打個電話。
我係實驗室到遊走,望下個空中花園有幾離地。
賽德克先生講完電話行出嚟遞咗個地址畀我,然後講:
「聽日去見巴西尼。我搵咗間巴西尼旗下嘅酒店,你暫時住喺個到先,你去到同經理講係喬諾巴拿訂嘅房就得啦。」
Mr.Incredible
2020-08-31 14:48:11
喬諾巴拿係咪即係Giovanna?
瓦努阿圖達文西
2020-08-31 23:13:10
巴打啲文好好睇呀
呀木談
2020-08-31 23:37:56
如果你講嘅Giovanna係佢嘅話,係。
事源早幾日有位巴打講起義大利jojo,所以搵個角色嚟試吓
不過我改一改咗佢嗰名,如果佢有機會出現喺演員名表,佢會叫Giona vanna
呀木談
2020-08-31 23:40:02
好多謝你呀,有你呢句我會繼續作落去
AftynRose
2020-09-01 02:24:06
個故好好睇,好想繼續追落去
椒鹽蝦米
2020-09-01 03:25:48
Lm
Mr.Incredible
2020-09-01 07:56:59
咁佢彈琴一定好叻
呀木談
2020-09-01 13:55:02
我會努力架
呀木談
2020-09-01 13:55:34
有新讀者
武次子敏史
2020-09-01 18:19:11
出得多就會多啲人見到
呀木談
2020-09-01 21:32:40
睇嚟要搵日出嚟做廿四小時作家啦
zerogaro
2020-09-02 16:59:00
本身諗巴打劇情到會唔會有Michael出走西西里島果段
咁西西里島,黑手黨會諗起god father同埋jojo第五部。咁jojo會客串下都好正常呀,所以先咁問巴打
呀木談
2020-09-02 17:18:23
我知
但今次Michael 應該唔會出走西西里,所以今次jojo就揚威海外,喺美國發展啦
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
吹水台
自選台
熱 門
最 新
手機台
時事台
政事台
World
體育台
娛樂台
動漫台
Apps台
遊戲台
影視台
講故台
健康台
感情台
家庭台
潮流台
美容台
上班台
財經台
房屋台
飲食台
旅遊台
學術台
校園台
汽車台
音樂台
創意台
硬件台
電器台
攝影台
玩具台
寵物台
軟件台
活動台
電訊台
直播台
站務台
黑 洞